Mătti 5

1Inhăy Ɣisa ĕjut n-tamĕtte ta has-tĕlkămăt ɣas, iwwăn taḍaɣt tiyyăt, ăqqima, ĕkkăn-t-dd inĕṭṭulab-net, ăqqimăn edes-has; 2iḍkăl măjrăd, ad-tăn-isaɣra, ijann'-asăn: 3"Tĕnḍĕḍ i-wi ăẓoẓnen iman-năsăn dat-Măssinăɣ ed Tĕmmĕnĕya n-Măssinăɣ ti-năsăn. 4Tĕnḍĕḍ i-wi ăsninnen dăɣ-iman-năsăn ed ad-ismaḍăn ulhawăn-năsăn. 5Tĕnḍĕḍ i-wi ăẓednen ha taẓidert ed ad-ĕkusĕn ăkall. 6Tĕnḍĕḍ i-wi inaqq laẓ d-fad n-asĕtbat n-iqqud ed ad-ăyyăwănăn dăɣ-a-wa s-tammăɣăn. 7Tĕnḍĕḍ i-wi s-ha tăhanint ulhawăn-năsăn ed ad-hasăn-aḍĕn Măssinăɣ tăhanint. 8Tĕnḍĕḍ i-wi s-šăddijăn ulhawăn-năsăn ed ad-ĕnhĕyăn Măssinăɣ. 9Tĕnḍĕḍ i-wi n-kăl-ălɣafyăt ed ad-tăn-iwăr isĕm: dăgg-Măssinăɣ. 10Tĕnḍĕḍ i-wi tamăḍraynen dăɣ-tĕssĕba n-iqqud-năsăn dăɣ-erhet n-Măssinăɣ ed Tĕmmĕnĕya n-Măssinăɣ, ti-năsăn. 11Tĕnḍĕḍ-awăn e-d kăwăn-gaggărăn ăddinăt, tiɣĕzzĕbun-kăwăn, jannen fălla-wăn s-bahu e d t-illăm a lăbasăn dăɣ-ăddimmăt-in. 12Dăwătăt, talwĕm dăɣ-iman-năwăn ed ad-ijat marušăt-năwăn dăɣ-ălžănnăt, ălɣizabăt-wen-dăɣ kăwăn-săknen ăddinăt ašăl-i-dăɣ, a ĕssĕknăn i-ănnăbităn wi hawăn-dd-ăzzarnen." 13"Kăwăneḍ a-s tesĕmt n-ăddunya măšan, tesĕmt, afăl tăt-tĕjmăḍ temḍe-net, ma s-tăt-e-isĕsmĕm ăwadĕm? Ad-ăbas t-illa a tĕnfa ar ad-hin-tăḍf, ĕfkĕlfĕkĕlăn-tăt ăddinăt. 14Kăwăneḍ a-s ănnur n-ăddunya. Aɣrĕm ya iwarăn afălla n-aḍaɣ wăr mad-iffăr; 15ăddinăt, wăr sărmisăn tefătelt tĕzzar, ĕjĕn-tăt daw-ăkoss, ănn-ak, ăsaḍĕf ăsikakăn a făll-tăt-e-silĕyăn i-ad-ăsimălăwlăw ănnur-net ehăn d-a-wa t-ihăn iket-net. 16A-wen-dăɣ a făl, imlĕwlĕwet ănnur-năwăn kăwăneḍ-dăɣ, s-ĕmmĕk-en-dăɣ, dat-ăddinăt i-ad-ĕnhĕyăn imărkedăn-năwăn, sĕmɣărăn Abba-năwăn-i ihăn išĕnnawăn." 17Inn'-asăn Ɣisa daɣ: "Wăr teɣalăt năkk, oseɣ-dd i-ad-hin-ĕkkĕsăɣ a-wa innă alămăr wa n-ănnăbi Mosa d-a-wa ĕnnăn ănnăbităn wi iyyăḍnen, asĕtbat-net a-s dd-oseɣ wădden anăxas-net. 18Ăsidătteɣ-awăn a-s ad-iba išĕnnawăn d-ăkall, wăr-ăba wăla-dăɣ tahnĕqqet wăla tătbăqqet tiyyăt ɣas dăɣ-alămăr n-Măssinăɣ a ikkăs wăr-itbet a-wa dăɣ-s ătwănnăn iket-net. 19A-wen-dăɣ a făl ere ănmăšrăyăn i-alămăr wa dăɣ-săn ojărăn tĕmmĕḍrit, meɣ ittăr ad-išĕnnĕmĕšrĕy ăwadĕm iyyăn s-a-wen-dăɣ, ăwadĕm-en, ĕnta a madăn-umas wa ojărăn iba n-tĕfărre dăɣ-Tĕmmĕnĕya n-Măssinăɣ măšan, ere itamašalăn a-wa innă alămăr, isalmad ăddinăt a-wa inna i-ad-t-ămašălăn ĕntăneḍ-dăɣ, ăwadĕm-en, ad-umas ămizăr dăɣ-Tĕmmĕnĕya n-Măssinăɣ. 20Ǝkkasăɣ-kăwăn dăɣ-taɣdărt n-a-s afăl wăr-ojer iqqud-năwăn wa n-ălɣulam n-Ăṭṭăwrăt d-kăl-faris, xăram-awăn ujĕš n-Tĕmmĕnĕya n-Măssinăɣ." 21"Wădden, tĕslam a-s imɣarăn-năwăn wi n-ibda, ătwănn'-asăn, inna Măssinăɣ: 'Wăr jed iman ed ere ijăn iman dăɣ, iwăr-t uḍlem dat-Măssinăɣ', 22măšan năkk, ĕnneɣ-awăn a-s: ere ijjăš aḍkăr făll-ă/n/na-s dăɣ, iwar-t uḍlem, ere innăn i-ă/n/na-s: 'Amăros', ăniihăjja s-ad-ămawăy s-ăššăreɣa wa măqqărăn s-itawănna Sinhidrin i-ad-itwĕšrăɣ; ere daɣ innăn i-ă/n/na-s: 'Tĕkšăfăd', ăniihăjja d-ad-t-ăkš efew wa n-žohănnăma. 23Afăl tĕkked ehăn n-ămudd wa măqqărăn, tăwwayăd takute-năk, afăl ălwăqq wa d-sănsed tăkute-năk făll-tasĕskărt ta n-tikutawen har dd-tĕkted a-s ikka hărăt jere-k d-ă/n/na-k, 24wăr ketăd, ăyy'-et dĕdi-dăɣ, ĕqqĕl ă/n/na-k har hak-ănš tĕzzar, tĕjĕd takute-năk i-Măssinăɣ. 25Kunta irwas-kăy ăwadĕm, išk'-ak s-ĕlxĕkum, uf'-ak ad-dăr-s tĕnmĕknăd šik iket-di d-hin-tiwĕḍăm ĕlxĕkum ed ĕlxĕkum, afăl t-in-tăwwăḍăm, ad-kăy-ăj ere wa kăy-ăsiwărăn uḍlem dăɣ-ifassăn n-ăgg-ăššăreɣa, ăj'-ik ăgg-ăššăreɣa dăɣ-ifassăn n-ălgomi, ăj'-ik ălgomi dăɣ-takărmut. 26Ăsidătteɣ-ak a-s edăgg-en, afăl t-tĕjjăšăd, wăr t-dd-mad-tĕzjărăd a tĕkked wăr dd-tĕssĕmdăd timẓal n-har tămma ta kăy-irwăs." 27"Wădden, tĕslam a-s ătiwănna: 'Wăr jed ĕzzĕna', 28năkk ĕnneɣ-awăn a-s ere ijăn dăɣ-tamăḍt wăr-ădobăn akăyad n-derhan, isălan ĕmdăn, izn'-et dăɣ-ulh-net. 29Kăyy, kunta tiṭṭ-năk ta n-aɣil a kăy-isifun abăkkaḍ, kukkĕrĕt-tăt-dd, tĕjrĕd-tăt-in fălla-k hărwa wăr tămešălăd abăkkaḍ-wen-dăɣ, ed uf'-ak, iji n-tiṭṭ tĕjjĕšăd ălžănnăt, uhĕn tĕtwĕjărăd-in dăɣ-temse tĕmda taɣĕssa-năk. 30Kunta daɣ ăfuss-năk wa n-aɣil a kăy-isifun abăkkaḍ, ĕnkĕḍ-t, tĕjrĕd-t-in fălla-k hărwa wăr tămešălăd abăkkaḍ-wen-dăɣ, ed uf'-ak, iji n-ăfuss tĕjjĕšăd ălžănnăt, uhĕn tĕjjăšăd temse tĕmda taɣĕssa-năk." 31"Tĕssanăm a-s ătwănnă: 'Ere irhăn azĕmmĕzzi n-hănne-s, ăkf'-et-tăt tăkarḍe n-amĕzzi tĕzzar' 32măšan, năkk, ĕnneɣ-awăn: ere ăzmăzzăyăn hănne-s s-wădden arămas a tăt-ija tikĕr-as, ij'-et temăznit; ere daɣ wa ădobănăn tamăḍt dd-tămmiizzăyăt, izna." 33Ḍarăt-a-wen-dăɣ, inn'-asăn: "Tĕslam a-s ătiwănna i-imɣarăn-năwăn wi n-ibda: 'Wăr mad-tărẓĕd taflĕst, a-wa hăḍăd s-Măssinăɣ s-ad-t-tăjĕd, ăj'-e', 34măšan, năkk, ĕnneɣ-awăn: wăr heḍăm făw. Wăr heḍăm s-išĕnnawăn ed ĕntăneḍ a-s tasăqqaymut n-tĕmmĕnukĕla n-Măssinăɣ, 35wăla s-ăkall ed ĕnta a-s isĕkkukal n-iḍarăn-net wăla s-Yărussălam ed ĕnta a-s aɣrĕm wa n-Măssinăɣ-i n-ămănokal măqqărăn, 36wăla făll-eɣăf-năk ed wăr tăddobed ad-sĕmlĕlăd wăla ad-sĕkwĕlăd wăla-dăɣ iyyăn ɣas dăɣ-amẓadăn-năk. 37E-d kăwăn-issĕstăn ăwadĕm d-hărăt, ănnăt-as: 'Ǝyya' i-tidĕt, tĕnnĕm: 'Ăbo' i-bahu, a tăssewăḍăm făll-a-wen-dăɣ, Iblis a dd-ifal." 38Inn'-asăn daɣ: "Tĕslam a-s ătiwănna: 'Tiṭṭ a tĕẓẓalăt tiṭṭ, esen a itĕẓẓalăn esen', 39măšan, năkk, ĕnneɣ-awăn: ĕlɣĕnăt i-ere hawăn-irhan a lăbasăn; afăl hak-istăɣ ăwadĕm făll-tăjomăst-năk ta n-aɣil, sĕgdĕl-as daɣ ta iyyăḍăt. 40Afăl hak-iška ăwadĕm s-ĕlxĕkum dăɣ-tĕssĕba n-tanăkăbbat-năk, ăyy-as-in daɣ anăkăbba-năk i-ad-wăr-ija a-wen, 41afăl kăy-ăšhăššăl ăgg-ĕlxĕkum aḍkul n-ăẓuk har ĕḍḍĕkuḍ n-kelumetăr, awĕy-as-t har ĕssin kelumetărăn; 42ere kăy-idălăn, tĕkfĕd-t, wăr tĕnneḍăd făll-ere dăɣ-k ittarăn ămarwas." 43"Tĕslam a-s ătiwănna: 'Ărh ănhăraj-năk, tĕknĕsăd ašănjo-năk' 44măšan, năkk, ĕnneɣ-awăn: ărhăt išĕnja-năwăn. ((Ăjăt ălhimmăt i-wi hawăn-tajjănen terk tittar, ăjăt a olaɣăn i-wi dăr-wăn okăḍnen)), ădĕlăt Măssinăɣ i-wi kăwăn-samăḍraynen, tiɣĕzzĕbun-kăwăn. 45Dihen, ad-itbĕt a-s aratăn n-Abba-năwăn-i ihăn išĕnnawăn a tămoosăm; ĕnta, isajmaḍ-dd tăfukt-net făll-ăddinăt wi lăbasnen hakd wi olăɣnen, isasaway-dd akăsa-net făll-imaɣdalăn hakd inămăšrayăn. 46Afăl wăr tărhem ar imărhan-năwăn, ma kăwăn-ibḍan d-ăddinăt wi iyyăḍnen, ĕndek marušăt-năwăn? Inarmasăn n-tiwse-dăɣ, a-wen, tajjăn-t. 47Afăl wăr tĕjjĕm isofan ar i-ayĕtma-wăn, ma kăwăn-iẓlayăn d-ăddinăt wi iyyăḍnen? Wădden inĕẓẓulam -dăɣ, a-wen, tajjăn-t. 48Umasăt ăddinăt ĕmdanen, wăr iwer ălɣib ed Abba-năwăn-i ihăn išĕnnawăn, imda, wăr t-illa ălɣib t-iwarăn."

will be added

X\