Mătti 4

1Oɣăd Unfas Šăddijăn Ɣisa ḍarăt-a-wen s-tenere i-ad-t-ižžurrĕbĕt Iblis. 2Ija dihen ĕkkoẓăt timĕrwen n-ehăḍ d-ašăl, ăẓum, wăr-ikša, wăr-iswa. Šămad tokay tăqqăn-ten-dăɣ, ad-ălluẓ. 3Ălwăqq-wen-dăɣ ad-t-ohăẓ Iblis-i n-ălmužărrib, inn'-as: "Šămad kăyy a-s Rure-s n-Măssinăɣ, ănn i-tihun-ti-dăɣ ad-umasnăt tijĕlwen!" 4Inn'-as Ɣisa: "Iktab dăɣ-măjrăd n-Măssinăɣ a-s: 'Tămudre n-ăgg-adĕm, wăr tĕmdă făl tetăte ɣas, iddăret daɣ s-e d t-illăm măjrăd dd-izjarăn emm n-Măssinăɣ.' " 5Iwwăy-t Iblis ḍarăt-a-wen s-aɣrĕm wa šăddijăn n-Yărussălam, ij'-e făll-afălla n-ehăn n-ămudd wa măqqărăn, inn'-as: 6"Šămad kăyy a-s Rure-s n-Măssinăɣ, ăyy iman-năk s-ăkall ed iktab dăɣ-măjrăd n-Măssinăɣ a-s: 'Ad-săr-k dd-amăr Măssinăɣ ănjălosăn-net ĕkbĕlăn-kăy dăɣ-ifassăn-năsăn i-ad-wăr hak-rĕssĕl wăla-dăɣ tăhunt tiyyăt ɣas.' " 7Inn'-as Ɣisa: "Iktab daɣ dăɣ-măjrăd n-Măssinăɣ a-s: 'Wăr-e tarĕmĕd Emăli-năk, Măssinăɣ.' " 8Iwwăy-t daɣ Iblis s-aḍaɣ iyyăn iknan aḍkul, issĕkn'-e ĕddĕwĕlăn n-ăddunya iket-net d-ălxurmăt-năsăn, inn'-as ămăra: 9"Hakkăɣ-kăy a-wa-dăɣ iket-net, afăl dat-i tărkăɣăd, tăɣbădăd-ahi." 10Inn'-as Ɣisa: "Iblis, ajĕj-ahi; iktab dăɣ-măjrăd n-Măssinăɣ a-s: 'Ăɣbĕd Emăli-năk Măssinăɣ, ĕnta ɣas a fălla-k ilan ălxidmăt.' " 11Oyy'-e Iblis ḍarăt-a-wen, osăn-t-dd ănjălosăn ăssaɣăt-wen-dăɣ, ăxdămăn-as. 12Islă Ɣisa atărmĕs n-Exya wa n-Enĕsselmăɣ ɣas, ikkă teje ta n-Galila. 13Izjăr taɣrĕmt ta n-Năṣirăt, iglă izzăɣ ta n-Qăfărnaxum, a-wen taɣrĕmt hat asălim n-ejănš wa n-Galila dăɣ-attayăn n-teje ta n-Ẓabilun d-ta n-Naftali; 14ămoos a-wen a ăssiitbătăn măjrăd wa ija ănnăbi Saya a-s innă: 15"Ya kăl-Ẓabilun, ya kăl-Naftali! Kăwăneḍ-i hănen asălim d-ejănš wa n-Galila, Kăwăneḍ-i hin-ĕllanen i-ejănš wa n-Ɣurdĕni, săjdăt! Kăwăneḍ-i n-kăl-teje ta n-Galila ĕzzăɣăn inĕẓẓulam, săjdăt! 16Tamĕtte ta hăt tihay, ămlăwlăw-dd fălla-s ănnur măqqărăn, ăddinăt daɣ wi s-kăla ĕzzăɣăn tihay ti hănen tamăttant, ašăl-i, ăzzubbăt-dd fălla-săn ănnur." 17Ɣur-dihen-dăɣ ad-issĕnta Ɣisa ămašal-net, ixaṭṭăb, ijanna i-ăddinăt: "Utabăt făl-a-s Tĕmmĕnĕya n-Măssinăɣ, tohăẓ-dd." 18Irjaš Ɣisa ašăl iyyăn dăɣ-asălim n-ejănš wa n-Galila a-s inhăy ĕssin ayĕtmatăn: Simyon wa s-itawănna Bĕṭrus d-ă/n/na-s Idris, tĕjjarăn tătart-năsăn dăɣ-aman ed imĕhhuyya n-imănan a ămoosăn, 19inn'-asăn: "Ǝlkĕmăt-ahi, ad-kăwăn-ăjăɣ meddĕn săr-i dd-sadawnen ăddinăt i-ad-tăn-ăɣlĕsăɣ." 20Oyyăn titarren-năsăn ălwăqq-wen-dăɣ, ĕlkămăn-as. 21Illa-hin i-dihen, olăs daɣ Ɣisa ahănay n-ĕssin ayĕtmatăn iyyăḍ: Yaqub d-ă/n/na-s Exya, han turăft n-aman ĕntăneḍ d-abba-năsăn Zăbdi, samăkrasăn titarren-năsăn; iɣr'-en-dd s-iman-net ĕntăneḍ-dăɣ. 22Oyyăn abba-năsăn hakd turăft n-aman dihen-dăɣ, ĕlkămăn-as ălwăqq-wen-dăɣ. 23Ălliil Ɣisa teje ta n-Galila iket-net, isaɣra ăddinăt dăɣ-ihănan n-ăddin wi n-kăl-Ălyăhud, ixaṭṭăb isălan n-Ălĕnžil n-Tĕmmĕnĕya n-Măssinăɣ, izizuy ăddinăt dăɣ-turhĕnnawen-năsăn d-ălɣibăn-năsăn. 24Intăj isĕm-net dăɣ-ăkall iket-net har ăwwăḍ Surya. Tamawayăn-dd săr-s imarhinăn d-inaɣyabăn d-imĕlšan d-wi tĕjrăw tašăkărkărăt d-inĕbdan, izizuy-tăn iket-dăɣ-năsăn. 25Dăɣ-asikĕl-net, tĕlkam-as tamĕtte tăjjeet han ăddinăt dd-falnen teje ta n-Galila d-tidbi ti n-mărawăt; iyyăḍ, Yărussălam d-Ălyăhudĕyăt d-illa-hin i-Ɣurdĕni sihen ad-dd-falăn.

will be added

X\