Mătti 3

1Išilan-win-dăɣ d-izzăɣ Ɣisa taɣrĕmt ta n-Năṣirăt, ad-issĕntă Exya wa n-Enĕsselmăɣ ămašal-net, ijanna i-ăddinăt dăɣ-tenere n-teje ta n-Ălyăhudĕyăt: 2"Utabăt făl-a-s Tĕmmĕnĕya n-Măssinăɣ, tohăẓ-kăwăn-dd." 3A-wen-dăɣ išlăn Exya, a dăɣ-ăssewăl ănnăbi Saya, a-s innă: "Ad-t-imĕl ăhalĕs ăsiɣăren dăɣ-tenere, ijanna i-ăddinăt: 'Ăknăt tabarăt i-Emăli, sĕssiɣĕdăt data-s ibaran-net.' " 4A-s ităjj a-wen-dăɣ, ilsa Exya asălso iknan s-elăm n-amnĕs warăn amẓadăn, ijbas s-tamĕntĕka n-elăm, iddar s-tašwalt d-torawăt. 5Tisĕn-t-dd ăddinăt dd-falnen aɣrĕm wa n-Yărussălam d-teje ta n-Ălyăhudĕyăt iket-net d-idăggan iket-năsăn wi ohăẓnen ejănš wa n-Ɣurdĕni, 6ad-tilɣun ibăkkaḍăn-năsăn dat-tamĕtte, isalmaɣ-tăn Exya dăɣ-ejănš wa n-Ɣurdĕni. 7Ijrăh-in Exya a-s tamĕtte ta t-dd-tĕkkăt, han-tăt ăddinăt ăjjootnen la taggayt ta n-kăl-faris d-ta n-kăl-sadus ărhanen ad-tăn-isĕlmăɣ, innăḍ-dd săr-săn, inn'-asăn: "Ya taššălen-i-dăɣ! Wădden tĕnnăm tĕmsădăm! Ǝyya, a tărham ad-tĕtwĕsĕlmăɣăm i-ad-tĕfĕlĕm daw-ăššăreɣa n-Măssinăɣ wa s-išwar fălla-wăn dd-oḍa? Lăɣătăt-ahi, mi kăwăn-issĕlmădăn s-a-wen? 8Sĕtbĕtăt tătubt-năwăn s-timašalen ăhuuskătnen, 9wăr tăsfăllăm făll-tĕnna n-a-s ĕzzurĕyăt n-Ibrahim a tămoosăm ed afăl tăqqăl s-isălan n-ĕzzurĕyăt ɣas, Măssinăɣ, ăddoobăt ad-isĕmmĕskĕl tihun-ti-dăɣ hannăyăm, ixlĕk-dd dăɣ-snăt ĕzzurĕyăt i-Ibrahim. 10Ăjăt ĕnniyăt făl-a-s emm n-tutăla ăru d-insa făll-ikewăn n-ihĕškan, e d t-illăm ahĕšk wărăn itirĕw aratăn iha ălfăyda, ad-hin-ăttănkăḍ, itwĕjăr-in dăɣ-efew. 11Năkk, aman a dăɣ-kăwăn-salmaɣăɣ i-ad-umas a-wen ašămol n-tătubt-năwăn măšan, ilkam-ahi ăhalĕs hi-ijan mijraw wa-dăɣ s-wăr-ănhăjjăɣ wăla-dăɣ d-ad-ĕḍĕsăɣ issal n-tifădelen-net, ĕnta, Unfas Šăddijăn d-efew a dăɣ-kăwăn-mad-isĕlmăɣ, 12iṭṭaf tesăyt-net ta s-mad-hin-izuzzăr allon-net, isĕdĕw ĕttăɣam wa olăɣăn dăɣ-ejănd-net, irmĕs ahošăr wa wăr-ih' ălfăyda, ijăr-t-in dăɣ-efew ăhijăljălăn hărkuk." 13Dăɣ-a-wen-dăɣ a dd-ifăl Ɣisa teje ta n-Galila, ikkă-dd Exya i-ad-t-isĕlmăɣ dăɣ-ejănš wa n-Ɣurdĕni 14măšan, unjăy Exya s-a-wen, ănn-ak, inn'-as: "Năkk a ămiɣatărăn s-ad-hi-sĕlmăɣăd dăɣ-aman, ɣas ĕndek e-d il' ĕmmĕk n-a-s kăyy a hi-dd-itakkăn i-a-wen?" 15Inn'-as Ɣisa: "Ămăra-dăɣ, ĕqbĕl s-a-wen ed ĕmmĕk-wen-dăɣ a-s mad-nămašăl a-wa oɣădăn, irha Măssinăɣ." Ij'-as Ɣisa măjrăd-wen-dăɣ ɣas, issĕlmăɣ-t Exya. 16Ătwăsălmăɣ Ɣisa, diha-dăɣ dd-izjăr aman, ad-dd-ămerăn išĕnnawăn dăɣ-tĕssĕba-net, inhăy Unfas Šăddijăn n-Măssinăɣ har fălla-s dd-ăzzubbăt dăɣ-ănnuɣ n-tedăbert măllăt. 17Dăɣ-tamăzăyyat-ten-dăɣ ad-dd-ijmăḍ emăsli išĕnnawăn, innăn: "A-wa Rure-ɣ wa ĕkneeɣ tărha, ĕnta a dăɣ-ăsriwăn iman-in."

will be added

X\