Mătti 28

1Tăbboqqăt tifawt n-ašăl wa n-ḍarăt wa n-ĕssĕbĕt-i n-tăsonfat ɣas, tĕkka Măryăma ta n-Mulăždalĕyăt aẓĕkka tăddeew d-Măryăma ta iyyăḍăt n-tanĕmmăɣrut-net. 2A ĕnḍărrăn, ăzzubbăt-dd ănjălos n-Emăli dd-ifalăn išĕnnawăn, ăškăḍkăḍ ăkall s-ăṣṣahăt, ăsɣărarăd-in tăhunt ta hărăt emm n-aẓĕkka, ăqqima fălla-s. 3Ănjălos-i-dăɣ, ăsimăɣmăɣ šund essam, jan isĕlsa-net tĕmĕlle-i-dăɣ măqqărăt. 4Ija a-wen ɣas, jăn ĕssărdusa wi jănen ĕnniyăt i-aẓĕkka tarĕmmeɣt-ta-dăɣ făl dd-hăn ăbbunbăyăn šund ămmun. 5Immĕjrăd ănjălos i-tiḍeḍen, inn'-asnăt: "Wăr tărmeɣmăt; ĕssanăɣ a-s Ɣisa wa ătwăṣlăbăn făll-tajĕttewt a-s tammăɣmăt; 6ăbas t-illa diha, inkăr-dd jer-inĕmmuttan s-ĕmmĕk wa s-tăn-innă, ĕyyăwmăt, ĕnhĕymăt edăgg wa s-kăla dăɣ-s insa. 7Šĕwĕnkĕtmăt ămăra, tĕjĕmăt isălan n-tanăkra-net jer-inĕmmuttan i-inĕṭṭulab, tăllăɣătmăt-asăn daɣ a-s ăzzar-awăn iket-năwăn s-Galila ed dihen-dăɣ ad-t-mad-tĕnhĕyăm. Ǝnta-den-dăɣ măjrăd wa s-dd-ămešălăɣ i-ad-hakmăt-t-in-sĕssiwĕḍăɣ." 8Fălnăt šik aẓĕkka, tărtay-asnăt tarĕmmeɣt d-tĕmɣăre n-tedăwit, ošălnăt i-ad-ĕjĕnăt jănăt isălan dăɣ-inĕṭṭulab-net. 9Wăr t-illa a hin-ĕjrahnăt a-s hasnăt-dd-ilkăḍ Ɣisa iman-net, ij'-asnăt ăsafu. Ohăẓnăt-t-dd, ărkăɣnăt data-s, ad-timĕllutnăt i-iḍarăn-net, ɣăbbădnăt-t. 10Inn'-asnăt: "Wăr tĕrmeɣmăt, ĕqqĕlmăt ayĕtma-ɣ, tĕnnĕmăt-asăn a-s, ăzzarăɣ-asăn s-teje ta n-Galila-i-dăɣ hi-mad-ĕnhĕyăn." 11Hărwa hanăt zăbo, ĕglanăt a-s ĕkkăn ĕssărdusa wi jănen ĕnniyăt i-aẓĕkka aɣrĕm, ăwwayăn isălan n-a-wa ijăn iket-net i-imănokalăn n-kăl-tikutawen. 12Ǝslăn imănokalăn n-kăl-tikutawen d-inušămăn n-Iṣrayil i-isălan-win-dăɣ ɣas, ănɣăymăn făl a-wen. Inkăr ălžămaɣăt-năsăn ɣas, ĕkfăn aẓrĕf ăjjeen i-ĕssărdusa tĕzzar, ĕnnăn-asăn: 13"Ere kăwăn-issĕstănăn, ănnăt-as: osăn-anăɣ-dd inĕṭṭulab n-Ɣisa s-ehăḍ, nĕṭṭas, okărăn tafĕkka-net, ĕglăn dăr-s." 14Ǝnnăn i-ĕssărdusa: "Afăl ĕjjăšăn isălan gĕfăr, ad-t-nĕsĕsmăḍ fălla-wăn, tăɣlĕsăm." 15Ărmăsăn ĕssărdusa aẓrĕf-năsăn, ĕglăn dăɣ-ĕššăɣĕl-năsăn, jăn a-wa hasăn-ătwănnăn. Ămoos a-s isălan-win-dăɣ a ĕflăsăn kăl-Ălyăhud har ašăl-i-dăɣ. 16Ǝkkăn inĕṭṭulab wi n-măraw d-iyyăn taḍaɣt ta hăt teje ta n-Galila hasăn-ija Ɣisa tasĕssihărt, ogăẓăn-t-in fălla-s. 17Ǝnhăyăn-t ɣas, ărkăɣăn-as, ad-t-ɣabbădăn măšan, hakd a-wen-dăɣ, han-tăn iyyăḍ dăɣ-s janen ăššăk. 18Ohăẓ-dd Ɣisa ălžămaɣăt wa n-inĕṭṭulab-net, inn'-asăn: "Wăr t-illa jer-išĕnnawăn d-ăkall a-s wădden ĕjrawăɣ fălla-s tărna; 19a-wen-dăɣ a făl ămăra, ăglăt; ăkkăt tiwsaten n-ăddunya iket-dăɣ-năsnăt, sĕṭṭulĕbăm dăɣ-snăt ăddinăt, sĕlmăɣăm-tăn dăɣ-aman s-isĕm n-Abba d-Rure-s d-Unfas Šăddijăn, 20săɣrĕm-tăn amišĕl n-a-wa s-hawăn-omărăɣ iket-net. Năkk-da, ad-dăr-wăn ăddewăɣ, ĕdhalăɣ-kăwăn hak ašăl har tĕmdĕw ăddunya." Amin!

will be added

X\