Mătti 27

1Ăffăw ɣas, ĕžžĕmmăɣăn imănokalăn n-kăl-tikutawen d-inušămăn n-Iṣrayil, ĕṭṭăfăn iyyăn n-emm dăɣ-isălan n-iji n-iman n-Ɣisa, 2ĕrmăsăn-t, jăn dăɣ-s tišĕm tĕzzar, ĕlwăyăn-t s-Bilatĕs wa n-gĕfăr. 3Inhăy Yăhudĕs-i t-issăɣdărăn a-s ăššăreɣa n-tamăttant a ĕɣtăsăn i-Ɣisa ɣas, ămmujrăẓ a-wa ija; ikk' imănokalăn n-kăl-tikutawen d-inušămăn n-Iṣrayil, ăssoɣăl-asăn kăraḍăt timĕrwen n-ărriyal n-aẓrĕf wi t-ĕkfăn. 4Os'-en-dd, inn'-asăn, "Ofeɣ abăkkaḍ, Ɣisa, wa jeɣ dăɣ-ifassăn-năwăn, wăr t-illa a iɣšad." Ǝnnăn-as: "Un, ma năkkul? A-wen ĕššăɣĕl-năk." 5Irmăs Yăhudĕs aẓrĕf-ĕnnin, ijăr-asăn-t-in dăɣ-ehăn n-ămudd wa măqqărăn tĕzzar, iglă, ăsselăy aɣan, ija tărsĕm dăɣ-err-net, immĕntăl i-iman-net. 6Ǝkkĕmen-dd imănokalăn n-kăl-tikutawen aẓrĕf wa hin-ijăr măšan, ĕnnăn: "Wăr hanăɣ-xălal iji n-aẓrĕf-wa-dăɣ făll-wa n-ehăn n-ămudd wa măqqărăn, ed ĕnta a-s ătwăjjăn iman n-ăhalĕs." 7Ǝžžĕmmăɣăn dăɣ-isălan n-a-wa mad-ĕjĕn i-aẓrĕf-en, ohărăn emm, ĕnnăn, ad-săr-s žănšĕn ašĕkrĕš n-ăhalĕs iyyăn hin-ižanšen ilĕkkan, i-ad-umas edăgg-en, tiẓĕska i-imăjarăn. 8Dăɣ-tĕssĕba n-ăddăbara-wen-dăɣ a făl har ašăl-i-dăɣ, tĕfărre-ten-dăɣ, iwăr-tăt isĕm: "Ašĕkrĕš wa n-ašni." 9Ămoos a-wen-dăɣ jăn a ăssitbătăn a-wa innă ănnăbi Yirmiya, a-s innă dăɣ-ĕlkĕttab-net: "Ărmăsăn kăraḍăt timĕrwen n-ărriyal n-aẓrĕf, ălqim-wen-dăɣ a-s t-ĕḍkăḍăn kăl-Iṣrayil, ĕnta-den-dăɣ a-wa dăr-ăssagdăhăn ălqim n-ăgg-adĕm, 10ĕžžĕnšăn săr-s ašĕkrĕš wa n-i n-ilĕkkan s-ĕmmĕk wa s-hi-tăn-innă Emăli." 11Ălwăqq wa dd-ibdăd Ɣisa dat-Bilatĕs wa n-gĕfăr, issĕstăn-t, inn'-as: "Ak, kăyy a-s ămănokal n-kăl-Ălyăhud meɣ?" Inn'-as Ɣisa: "Kăyy iman-năk, tĕnned-tăn." 12Ǝggădăn-dd imănokalăn n-kăl-tikutawen d-inušămăn n-Iṣrayil, ad-t-saḍlamăn siha d-siha măšan, wăr t-illa a hasăn-inna. 13Innă gĕfăr i-Ɣisa: "Ajăn kăyy, wăr sĕllĕd i-tikunen ti fălla-k titwĕnninen?" 14Wăr t-tĕlla tăfert dd-tĕzjarăt emm n-Ɣisa, iqqăn a-wen eɣăf n-gĕfăr. 15Ăzzăman-en, hak ămudd n-Faṣka, ăsiwăyy'-in gĕfăr u-takărmut wa dăɣ-s tĕttăr tamĕtte. 16A-s ităjj a-wen-dăɣ, ih' ăhalĕs s-isĕm-net Bărɣăbbas takărmut, isĕm-net iyyăn Ɣisa ĕnta-dăɣ, wăr t-illa ere s-wădden issan făll-terwidĕma-net. 17Inhăy Bilatĕs tamĕtte-ta dd-tĕžžĕmmăɣăt săr-s ɣas, inn'-asăn: "Lăɣătăt-ahi, ĕndek jer-meddĕn-wi-dăɣ n-ĕssin wa s-tărham a hawăn-t-in-sĕwwĕyyăɣ? Ma tăssofăm Bărɣăbbas meɣ Ɣisa wa s-itawănna Ălmasex?" 18Ij'-asăn Bilatĕs asĕstan-wen-dăɣ făl-a-s issan a-s tĕmɣăre n-tismiten-năsăn ɣas a făl ăstărmăsăn Ɣisa. 19Ăqqiima Bilatĕs hărwa dăɣ-edăgg wa dăɣ-iɣattăs ăššăreɣa a-s dd-tăšmašăl hănne-s ăwadĕm săr-s i-ad-wăr-isĕmtĕltil iman-net d-iman n-ăhalĕs wărăn iɣšed hărăt ed tĕnn'-as, ĕnḍăhaḍ, ĕgdălăn-as imănăwnăwăn n-ăhalĕs-en-dăɣ eḍĕs. 20Ǝggădăn imănokalăn n-kăl-tikutawen d-inušămăn n-Iṣrayil, ăšhăššălăn tamĕtte i-ad-tĕttăr dăɣ-gĕfăr ad-hasăn-dd-isĕwwĕy Bărɣăbbas, ămmăt Ɣisa. 21Olăs daɣ gĕfăr, inn'-asăn: "Ǝndek jer-meddĕn-wi-dăɣ n-ĕssin wa s-tărham ad-hawăn-t-in-sĕwwĕyyăɣ?" Ǝnnăn-as: "Bărɣăbbas." 22Inn'-asăn Bilatĕs: "Ɣisa-š wa s-itawănna Ălmasex, ma has-e-ăjăɣ?" Ǝnnăn-as iket-dăɣ-năsăn: "Itwĕṣlĕbet făll-tajĕttewt!" 23Inn'-asăn Bilatĕs: "Mafăl, ma iɣšăd t-ăsiinăhăjjăn d-tamăttant?" Ăsɣăyyăn daɣ s-ăṣṣahăt: "Itwĕṣlĕbet făll-tajĕttewt." 24Inhăy Bilatĕs a-s wăr t-illa a infa măjrăd-net ed, tĕssĕntă tamĕtte amdĕrway n-ĕššĕnju ɣas, iḍkăl-dd ăkoss han aman, ăsserăd ifassăn-net dat-tamĕtte tĕzzar, inn'-asăn: "Ăhalĕs-i-dăɣ ya ămaɣdal, tăjjihăm a-s wăr dăɣ-i ĕḍmenăn iman-net; oyyeɣ jere-wăn dăr-s." 25Tĕnn'-as tamĕtte iket-net: "Ǝyya, nĕrḍa s-a-wen; ĕḍmĕnnet iman-net dăɣ-năɣ năkkăneḍ d-ihăyawăn-nănăɣ." 26Ăswăyy'-asăn-in Bilatĕs Bărɣăbbas, ăswăjja tiwit n-ebărtăk dăɣ-Ɣisa tĕzzar, ikf'-asăn-t i-ad-itwĕṣlĕb făll-tajĕttewt. 27Ǝlwăyăn ĕssărdusa wi n-gĕfăr Ɣisa s-ammas n-ehăn wa n-gĕfăr, iɣlăyɣălăy-t-dd dihen ejhăn n-ĕssărdusa imdan, 28ĕkkăsăn dăɣ-s isĕlsa-net, ĕssĕlsăn-t anăkăbba šăggăɣăn, 29jăn-as ălmăt, korona, a-wen, takĕnbut šund ta n-imănokalăn tĕẓat dăɣ-isĕnnanăn, jăn ălmăt tăborit ta n-tĕmmĕnukĕla dăɣ-ăfuss-net wa n-aɣil, ad-rakkăɣăn data-s, ḍazzăn, jannen-as: "Ămănokal n-kăl-Ălyăhud, nĕj'-ak gărdĕbu!" 30Situfăn fălla-s, tihăɣăn dăɣ-s tăborit ta jăn dăɣ-ăfuss-net, tĕggatăn-t săr-s făll-eɣăf. 31Ǝssĕgdăhăn dăɣ-tekăškăšt ta tăn-tĕšlăt ɣas, ĕkkăsăn-dd fălla-s anăkăbba-wĕnnin šăggăɣăn, ăssoɣălăn-as isĕlsa-net tĕzzar, ĕglăn dăr-s i-ad-itwĕṣlĕb făll-tajĕttewt. 32Ǝglan dăr-s a-s ămmoqqăsăn d-ăhalĕs n-tadăbayt ta n-Qĕrwan s-isĕm-net Simyon; ăšhăššălăn-t alĕnji n-tajĕttewt ta făll-mad-itwĕṣlĕb Ɣisa. 33Ǝkkăn d-Ɣisa edăgg s-itawănna: Gălgota, a-wen ălmăɣna-net: "Edăgg wa n-akărkor." Ǝwwăḍăn-in edăgg-en ɣas, 34ĕssărtăyăn ĕssărdusa asmĕd d-asăfar iyyăn ifannăẓăn tisnant i-ad-has-t-sĕswĕn, măšan, ăkrăbbăt-t ɣas, unjăy săr-s. 35Ǝṣlăbăn-t ĕssărdusa făll-tajĕttewt ɣas, jăn tisăɣeren i-ad-uẓanăn isĕlsa-net jer-iman-năsăn; ămoos a-wen a ăssiitbătăn a-wa s-kăla tăn-innă ănnăbi iyyăn a-s innă: "Ăẓunăn isĕlsa-nin jer-iman-năsăn jăn tisăɣeren făll-anăkăbba-nin." 36Ǝssĕmdăn a-wen-dăɣ ɣas, ĕqqimăn, jăn ĕnniyăt i-Ɣisa, 37ĕttĕytăyăn ăllox jĕnnĕj-s i-ad-ĕlmĕdăn ăddinăt ăddălil wa săr-s dd-orăwăn tamăttant. Ăllox-en, iktab fălla-s: "A|sc-WA |dƔ|scISA WA N-ĂMĂNOKAL N-|dK|scĂL-|dĂ|scLYĂHUD|d".|r 38Ašăl-en, ămizăyyen ĕssin inaɣtafăn atwĕṣlĕb d-Ɣisa; ătwăṣlăb iyyăn daw-aɣil-net, ătwăṣlăb wa iyyăḍăn daw-tăšalje-net. 39Iqqăl Ɣisa tekăškăšt i-ăddinăt-wi tikĕynen, gaggărăn-t, siwliwilăn iɣăfawăn-năsăn, 40jannen-as: "Ǝyyaa, kăyy-i innăn tăddoobed terăẓẓe n-ehăn n-ămudd wa măqqărăn talĕsăd-t edey dăɣ-kăraḍ išilan, ăɣlĕs iman-năk ya ămăra! Kunta tidĕt-dăɣ a-s kăyy a-s Rure-s n-Măssinăɣ, zubbĕt-dd tajĕttewt!" 41Ad-ḍaẓẓăn dăɣ-s daɣ imănokalăn n-kăl-tikutawen d-ălɣulam d-Ăṭṭăwrăt d-inušămăn n-Iṣrayil, jannen: 42"Wădden iɣlăs ăddinăt wi iyyăḍnen, iɣlĕset ya iman-net ămăra. Ikkĕset-dd iman-net făll-tajĕttewt, dihen ad-nĕflĕs a-s ĕnta a-s ămănokal n-Iṣrayil; 43wădden oman s-Măssinăɣ, iɣlĕset-t Măssinăɣ ya ămăra kunta ĕnta irh'-e, ed innă, ĕnta a-s Rure-s." 44Ǝggădăn-dd daɣ inaɣtafăn wi ătwăṣlăbnen edes-has, ad-t-gaggărăn ĕntăneḍ-dăɣ s-ĕmmĕk-en-dăɣ. 45Ǝlsănăt tihay ărori n-ăkall iket-dăɣ-net wa-dăɣ n-tarăhut hundăɣ har tezzar. 46Tĕjă tezzar ɣas, ăsɣărăt Ɣisa s-afălla, innă dăɣ-tawalt-net: "|iYă/l/loy, Yă/l/loy,|d |r |ilama săbăxtani?|d" |r A-wen ălmăɣna-net: "Măssi-ɣ Măssinăɣ, Măssi-ɣ Măssinăɣ, mafăl hi-tĕyyĕd d-iman-in dăɣ-tisnant-ta-dăɣ?" 47Ǝslăn-as ăddinăt ĕbdadnen dihen, wăr-ĕfhemăn a-wa ijănna ɣas, ad-jannen: "Săjdăt-as, ănnăbi Ɣĕli a iɣarr!" 48Ošăl-dd iyyăn dăɣ-săn ălwăqq-wen-dăɣ, issĕlmăɣ tăḍuft tĕttalăt făll-ăbori dăɣ-bĕnegăr tĕzzar, ăssok'-et-dd emm n-Ɣisa i-ad-tăt-isumĕm, infĕw-t a-wen dăɣ-fad 49măšan, ĕnnăn-as imidiwăn-net: "Ǝšlĕy-as, ăyy'-e ad-nĕnhĕy kunta ad-t-dd-ass ănnăbi Ɣĕli, iɣlĕs-t." 50Ăsɣărăt Ɣisa daɣ s-ăṣṣahăt, tĕzzar, ĕjmăḍăn-t iman. 51Diha-dăɣ d-ija a-wen a-s ărido wa ibḍăn edăgg n-ămudd wa šăddijăn d-wa iknăn tĕššĕdje dăɣ-ehăn n-ămudd wa măqqărăn da-dăɣ a-s iqqărrawăt dăɣ-ammas, wa-dăɣ n-afălla-net har ider-net; ăškăḍkăḍ ăkall, ăṣṣoren iḍaɣăn; 52ămerănăt tiẓĕska, ĕnkărăn-dd inĕmmuttan n-imumĕnăn ăjjootnen 53ḍarăt-tanăkra n-Ɣisa jer-inĕmmuttan. Ăjjĕyhăn ăddinăt ăjjootnen tăn-ĕnhaynen a-s dd-ĕjjăšăn aɣrĕm wa šăddijăn n-Yărussălam ḍarăt tanăkra-năsăn jer-inĕmmuttan. 54Inhăy kăbtăn iyyăn n-kăl-Roma d-ĕssărdusa wi jănen ĕnniyăt i-Ɣisa a-wa ijăn d-aškĕḍkĕḍ wa ija ăkall ɣas, ărmăɣăn, ad-jannen: "Tidĕt-dăɣ a-s ăhalĕs-i-dăɣ, Rure-s n-Măssinăɣ." 55Ǝbdadnăt daɣ tiḍeḍen ăjjootnen dihen, ĕswaḍnăt dăɣ-ijĕj dăɣ-a-wa ijăn iket-net. Tiḍeḍen-tin-dăɣ a-s kăla ĕdhălnăt Ɣisa, ăddewnăt dăr-s wa-dăɣ n-a ifăl teje ta n-Galila har ĕntănăteḍ-da-dăɣ; 56h'-enăt Măryăma ta n-Mulăždalĕyăt d-Măryăma ta n-ma-s n-Yaqub d-Yusĕf, h'-enăt daɣ ma-s n-dăgg-Zăbdi. 57Tokăy takkăṣt ɣas, osă-dd ăgg-ehăre iyyăn la taɣrĕmt ta n-Arimata n-anăṭṭalib n-Ɣisa s-isĕm-net Yusĕf. 58Ǝnta-en-dăɣ a ikkăn Bilatĕs, ittăr dăɣ-s turhajăt n-ad-dd-ikkĕs tafĕkka n-Ɣisa făll-tajĕttewt, iṣtăr-tăt; irḍ'-as Bilatĕs s-a-wen. 59Ikkăs-dd Yusĕf tafĕkka n-Ɣisa făll-tajĕttewt, ikn'-et, issĕls'-et tefit 60tĕzzar, issĕns'-et dăɣ-aẓĕkka ăynayăn s-ăru t-iɣaš i-iman-net dăɣ-esăwăl; ăsɣărănɣarăt-t-dd ḍarăt-a-wen tăhunt măqqoorăt, ăṭṭubbăt săr-s emm n-aẓĕkka tĕzzar, iglă. 61A-s ităjj a-wen-dăɣ, tĕbdad Măryăma ta n-Mulăždalĕyăt d-tanĕmmăɣrut-net ta iyyăḍăt, ăqqimănăt tissĕnen dat-aẓĕkka-en-dăɣ, hannăynăt a-wa ijăn iket-net. 62Ăba Ɣisa dăɣ-ašăl wa n-dat-wa d-simĕjnun kăl-Ălyăhud i-ašăl wa n-ĕssĕbĕt-i n-tăsonfat. Ašăl wa ilkămăn i-wen n-ĕssĕbĕt wa n-tăsonfat, ĕkkăn imănokalăn n-kăl-tikutawen d-kăl-faris Bilatĕs, ĕnnăn-as: 63"Ămănokal-nănăɣ, nĕkittĕw a-s ăwadĕm wa išinmĕšrĕyăn ăddinăt, a-s iddăr, innă, afăl t-ăba, kăraḍ išilan ḍarăt-tamăttant-net, ad-dd-inkăr jer-inĕmmuttan. 64Nărha dăɣ-k, ad-sĕwwĕjjĕd ĕnniyăt i-aẓĕkka-net hundăɣ har akĕyĕn kăraḍ išilan-win-dăɣ s-innă, dihen, wăr mad-akrĕn inĕṭṭulab-net tafĕkka-net, ĕffărăn-tăt tĕzzar, ĕnnĕn i-tamĕtte a-s inkăr-dd jer-inĕmmuttan. Afăl jăn a-wen, ad-tajăr tanmĕšrayt ta jăn ta ija ĕnta iman-net." 65Inn'-asăn Bilatĕs: "Ăjăt a-wa s-tărhăm. Ǝnhĕywăt, hărăt dăɣ-ĕssărdusa-dĕdi, sĕwwĕjjĕm-tăn ĕnniyăt i-aẓĕkka s-ĕmmĕk wa s-tărhăm." 66Ǝkkăn aẓĕkka, ĕssĕbdădăn data-s ĕssărdusa tĕzzar, ĕknăn-t ăṭabbu i-ad-wăr-itĕdubut ăwadĕm wăl' iyyăn arr-net.

will be added

X\