1 Ija Ɣisa măjrăd-wen-dăɣ ɣas, innă i-inĕṭṭulab-net: 2 "Tĕssanăm a-s ĕssin išilan a hin-ăqqimănen i-ămudd wa n-Faṣka-i dăɣ-mad-ăttărmăs Ăgg-ăgg-adĕm, itwĕṣlĕb făll-tajĕttewt." 3 Dăɣ-isălan n-a-wen-dăɣ a dăɣ-dd-ĕžžĕmmăɣăn imănokalăn n-kăl-tikutawen d-inušămăn n-Iṣrayil dăɣ ehăn n-Qayăf wa n-ămănokal n-kăl-tikutawen. 4 Ănmănnakăn dihen făll-ĕmmĕk wa s-mad-săɣdărăn Ɣisa, ĕjĕn iman-net dăɣ-ufăr 5 măšan, ĕnnăn, wăr-ufa ad-ăj a-wen dăɣ-ašăl wa n-ămudd i-ad-wăr tĕjj tamdĕrwayt dăɣ-tamĕtte. 6 Ămjarăt Ɣisa ašăl iyyăn dăɣ-taɣrĕmt ta n-Bitanya i-ehăn n-ăhalĕs s-isĕm-net Simyon wa s-kăla t-ijrăw jĕri. 7 Ill'-e ɣur-s dihen-dăɣ, ăsiɣămăr dăɣ-edăgg wa n-imĕnsiwăn, a-s t-dd-tosa tamăḍt tăwwayăt butĕl n-aḍutăn lanen ălqim ad-tăn-sanɣal făll-eɣăf n-Ɣisa. 8 Ǝnhăyăn inĕṭṭulab-net a-wen, wăr hasăn-ijreẓ, ăhnăffen dăɣ-iman-năsăn ad-jannen: "Šăɣšad yaden! 9 Aḍutăn-wi-dăɣ, mafăl wăr hin-ĕnšĕn, umas ălqim-năsăn takute i-tilăqqiwen." 10 Ilmăd Ɣisa a-wa kittĕwăn, inn'-asăn: "Ma s-naxxăsăm iman n-tamăḍt-i-dăɣ? Tihusay n-hărăt, tĕj'-ahi-t! 11 Tilăqqiwen ya, ĕllanăt ɣur-wăn hărkuk, a-s ija a-wen, năkk, ilkam ad-kăwăn-ăflăɣ. 12 Asănɣal wa făll-i ja aḍutăn-wi-dăɣ, ašĕšwar a dd-ja i-ăddinăt dăɣ-isălan n-ămukĕn n-taɣĕssa-nin i-aẓĕkka. 13 Ăsidătteɣ-awăn a-s edăgg dăɣ-ătwăxṭăbăn isălan n-Ălĕnžil dăɣ-ăddunya-ta-dăɣ, ad-dăɣ-s ĕtwĕsuɣĕlăn isălan n-a-wa tĕja, i-ad-tăt-kittĕwăn ăddinăt." 14 Dăɣ-a-wen-dăɣ, a dd-iggăd Yahudĕs Isxaryut wa n-iyyăn dăɣ-inĕṭṭulab wi n-măraw d-ĕssin, ikk' imănokalăn n-kăl-tikutawen, 15 inn'-asăn: "Ma hi-hakkăm afăl hawăn-ĕssăɣdărăɣ Ɣisa?" Ăsseḍănăn-as kăraḍăt timĕrwen n-ărriyal n-aẓrĕf, ĕkfăn-as-tăn. 16 Ad-itammăɣ Yăhudĕs ɣur-ălwăqq-wen-dăɣ i-tašlĕlt s-hasăn-t-ăstărmăs. 17 Ašăl wa ăzzarăn n-ămudd wa n-Faṣka, dăɣ-tamăkšanăt tijĕlwen-ti wăr ha tăẓẓa, ĕnnăn inĕṭṭulab i-Ɣisa: "Ălɣalim, ĕndek diha d-tărhed ad-nĕsĕssikĕy imĕnsiwăn n-ămudd wa n-Faṣka?" 18 Inn'-asăn: "Ǝjjĕšăt aɣrĕm, tĕkkĕm ehăn n-măndam, tĕnnĕm-as, inn'-ak ălɣalim: 'tăqqăn-in, tohăẓ-dd; ad-sĕssikĕyăɣ năkk d-inĕṭṭulab-in ămudd wa n-Faṣka dăɣ-ehăn-năk.' " 19 Jăn inĕṭṭulab a-wa hasăn-innă Ɣisa, ĕglăn ad-simĕjnun imĕnsiwăn wi n-Faṣka. 20 Ij' ehăḍ ɣas, ănɣăyma Ɣisa d-inĕṭṭulab wi n-măraw d-ĕssin dăɣ-edăgg wa n-imĕnsiwăn. 21 Tamănsawăn dihen-dăɣ a-s hasăn-innă: "Ăsidătteɣ-awăn a-s iyyăn dăɣ-wăn a hi-madăn-isĕssăɣdăr." 22 Ǝkmăn-tăn iman-năsăn a-s hasăn-innă a-wen-dăɣ, ad-has-jannen s-iyyăn-iyyăn: "Ălɣalim, ajăn năkk?" 23 Ăwwežăb-asăn, inn'-asăn Ɣisa: "Wa dăr-i madăn-imzĕyyĕt iji n-ăfuss dăɣ-ăkoss, ĕnta a hi-madăn-isĕssăɣdăr. 24 Tidĕt-dăɣ a-s Ăgg-ăgg-adĕm, ad-t-iba ed a-wen-dăɣ a ĕnnăn ĕlkĕttabăn n-Măssinăɣ dăɣ-isălan-net măšan, amăskoy ăwadĕm wa t-madăn-isĕssăɣdăr! Ăwadĕm-en, iššăm-as-in, ad-wăr dd-ijješ ăddunya." 25 Iggăd-dd Yăhudĕs wa t-madăn-isĕssăɣdăr, innă ĕnta-dăɣ: "Ălfăqqi-nin, ăwadĕm wa s-jănned, adiš năkk?" Inn'-as Ɣisa: "Kăyy iman-năk, tĕnned-tăn." 26 Tattăn dihen-dăɣ a-s iḍkăl Ɣisa tajĕlla, ămmoy i-Măssinăɣ tĕzzar, irẓ'-et, ăẓun-tăt jer-inĕṭṭulab-net, inn'-asăn: "Uhĕnăt, ăkšăt, a-wa taɣĕssa-nin." 27 Iḍkăl-dd daɣ kara han aman n-lăɣnăb ăxxiimmărnen, ămmoy i-Măssinăɣ tĕzzar, ikf'-asăn-t, inn'-asăn: "Uhĕnăt, ăswăt iket-năwăn; 28 a-wa ašni-nin wa ămoosăn ărkăwăl n-tassaɣt ta tăynayăt d-Măssinăɣ. Ašni-nin, ad-inɣĕl dăɣ-tĕssĕba n-tenăšše n-ibăkkaḍăn i-ăddinăt ăjjootnen. 29 Ăssiilmădăɣ-kăwăn a-s, wăr-ilkem ad-ĕsweɣ ad-dd-ijmaḍăn ara n-lăɣnăb hundăɣ har ašăl wa d-mad-alĕsăɣ năkk d-kăwăneḍ tesăse-net, s-ălxal ăynayăn dăɣ-Tĕmmĕnĕya ta n-Abba-nin." 30 Ăwwăy Ɣisa d-inĕṭṭulab-net isuhaɣ n-tĕmmal n-Măssinăɣ dd-ĕzjarnen ĕlkĕttab wa n-Ăẓẓăbur, ĕglăn ḍarăt-a-wen, ĕkkăn taḍaɣt ta tăssidwălăt ihĕškan wi n-ĕzzăytun. 31 Ǝwwăḍăn-in dihen ɣas, inn'-asăn: "Xorĕzzĕma wa-hi madăn-irmĕs, ad-dd-arĕw akuddĕl-năwăn hahi ehăḍ-i-dăɣ, tăjawăḍăm iket-dăɣ-năwăn, tĕyyĕm-ahi-dd năkk ɣas făl-a-s iktab dăɣ-ĕlkĕttab a-s: 'Ad-ĕwĕtăɣ amăḍan, iba-t, ămmăhăšnăt tihatten iket-năsnăt.' " 32 Inn'-asăn daɣ: "Afăl dd-ĕnkărăɣ jer-inĕmmuttan, ad-hawăn-izarăɣ s-teje ta n-Galila." 33 Iggăd-dd Bĕṭrus, innă i-Ɣisa: "Năkk iman-in, kud ăjewăḍăn imidiwăn-in wi iyyăḍnen iket-năsăn dăɣ, wăr mad-ăjawăḍăɣ, ăyyăɣ-kăy, făw!" 34 Inn'-as Ɣisa: "Ăsidătteɣ-ak a-s wăr mad-ăj ekăz kăraḍ iɣoran ehăḍ-i-dăɣ s-wădden tăkkudĕlăd-ahi har kăraḍ ihăndăggan." 35 Inn'-as Bĕṭrus: "Năkk ɣas, kud-dăɣ tamăttant a tihrăɣ dăr-k, wăr kăy-mad-ĕkkuddĕlăɣ." Abăraj-wen-dăɣ ija Bĕṭrus, a jăn daɣ inĕṭṭulab wi iyyăḍnen iket-dăɣ-năsăn. 36 Ăddew dăr-săn Ɣisa ḍarăt-a-wen s-ašĕkrĕš iyyăn iknan asĕdwal n-ihĕškan s-isĕm-net Žătsămmani, ĕwwăḍăn-in ɣas, inn'-asăn: "Ɣaymăt, tăqqĕlăm-ahi diha-dăɣ, ad-ĕdĕlăɣ Măssinăɣ, ĕqqĕlăɣ-kăwăn-dd." 37 Iššĕnkăš-in fălla-săn, ăddeew d-Bĕṭrus d-mĕddana-s n-Zăbdi wi n-ĕssin; ɣur-ăssaɣăt-wen-dăɣ, ad-t-ĕssĕntăn iman-net tĕkma, ixwăl. 38 Innă i-inĕṭṭulab wi dăr-ăddew: "Ărɣan iman-in, ărɣan har išwar hi-ăba, wăr hanăɣ-ilăqqădet eḍĕs." 39 Iššĕnkăš-in daɣ fălla-săn a ĕnḍărrăn, irkăɣ, ăsḍăs timme-net ăkall, ad-itĕddal Măssinăɣ, ijanna: "Ya Abba-nin, kunta ămmukkăn a-wen-dăɣ, sĕssijĕj-ahi tisnant-ta-dăɣ! Hakd a-wen-dăɣ, ăjet erhet wa-năk wădden wa-nin." 40 Iqqăl-dd Ɣisa inĕṭṭulab-net wi n-kăraḍ, ogăẓ-tăn-dd ĕṭṭasăn; issĕnkăr Bĕṭrus, inn'-as: "Ɣas kăwăneḍ, indăr-awăn wăla-dăɣ ad-dăr-i tahĕrĕm iyyăn n-ăssaɣăt ɣas dăɣ-wăr kăwăn-ilɣed eḍĕs! 41 Ǝnkărăt, ĕdĕlăt Măssinăɣ i-ad-kăwăn-agĕẓ dăɣ-tănḍărbaten n-Iblis; ăgg-adĕm, tidĕt-dăɣ, a-s ăsidărhăn amišĕl n-a ăjjeen ăhuusken măšan, igdal-as iba n-ăṣṣahăt n-tumast-net amišĕl n-a-wa irha." 42 Olăs-dd daɣ ăsihe wa s-ĕssin, iššĕnkăš-in fălla-săn, ad-itĕddal Măssinăɣ, ijanna: "Abba-nin, kunta wăr t-illa făw ĕmmĕk s-ăɣlăsăɣ dăɣ-tisnant-ta-dăɣ, adiš, ăjet erhet-năk." 43 Olăs-tăn uɣĕl, ogăẓ-tăn-dd, ij'-asăn eḍĕs alăɣad-wa-dăɣ făl hasăn-indăr wăla ad-arĕn tiṭṭawen-năsăn. 44 Ifăl-tăn daɣ asihe wa s-kăraḍ, idăl daɣ Măssinăɣ s-ĕmmĕk-wĕnnin-dăɣ. 45 Iglă, iqqăl-tăn-dd, issĕnkăr-tăn, inn'-asăn: "Ɣas kăwăneḍ tĕṭṭasăm, sinfum hărwa? Ǝnkărăt-dd ămăra, ăssaɣăt n-atărmĕs-in, ohăẓ-dd. Ăgg-ăgg-adĕm, ad-itwăɣdăr, ijjĕš ifassăn n-inăsbăkkaḍăn, 46 ĕnkărăt, ăglăt-anăɣ; os'-anăɣ wa hi-e-isĕssăɣdărăn." 47 Wăr-issĕmdă Ɣisa tĕnna n-a-wen-dăɣ a-s Yăhudĕs, wa n-iyyăn dăɣ-inĕṭṭulab-net wi n-măraw d-ĕssin da-dăɣ, ăsilăl tamĕtte tăjjeet dd-ăšimašălăn imănokalăn n-kăl-tikutawen d-inušămăn n-Iṣrayil; ĕšlajăn iyyăḍ tikobawen, ăwwayăn iyyăḍ iboriyăn. 48 Tamĕtte-ten-dăɣ, ij'-as Yăhudĕs wa n-ămaɣdar tamătart dăɣ-has-inna: "Ăhalĕs wa s-hi-tĕnhăyăm har t-osăsăɣ dăɣ-idmarăn-in, ĕnta a-s Ɣisa, ărmĕsăt-t." 49 Osă-dd Yăhudĕs, oɣăd iman-net s-Ɣisa, inn'-as: "Ălfăqqi-nin, jeɣ-ak ăsafu!" Osăs-t dăɣ-idmarăn-net. 50 Inn'-as Ɣisa: "Amidi-nin, ăj ya a-wa s-dd-tosed". Toḍa tamĕtte făll-Ɣisa ălwăqq-wen-dăɣ, tĕrmăs-t. 51 Iggăd-dd iyyăn dăɣ-inĕṭṭulab-net, ilbăy-dd tăkoba-net, ištăf-dd săr-s tamĕẓẓujt n-akli n-ămănokal n-kăl-tikutawen. 52 Iɣtăl-t Ɣisa, inn'-as: "Suɣĕl tăkoba-năk dăɣ-titar-net; ere iknăsăn s-tăkoba, ad-ămmăt s-tăkoba. 53 Ăddoobeɣ teɣăre n-Abba-nin ămăra-dăɣ, afăl t-ăɣreɣ daɣ, šik-dăɣ a-s mad-săr-i dd-išĕmmišĕl măraw ajhanăn n-ănjălosăn d-ĕssin hi-ohăɣnen tinahăɣen 54 măšan afăl ija a-wen, ĕndek ĕmmĕk wa s-mad-itbat a-wa făll-i ĕnnăn ănnăbităn dăɣ-ĕlkĕttabăn n-Măssinăɣ." 55 Innă Ɣisa i-tamĕtte ḍarăt-a-wen: "Ajăn năkk ănaɣtaf a ămoosăɣ a-s hi-dd-takkăm d-tikobawen d-iboriyăn i-ad-hi-tărmĕsăm? Wădden hannăyăm-ahi hak ašăl ăqqiimăɣ dăɣ-ehăn n-ămudd wa măqqărăn saɣreɣ, mafăl wăr hi dăɣ-s tĕrmesăm? 56 Măšan, ĕlmĕdăt a-s a-wa ijăn iket-net, ija i-ad-itbĕt a-wa ĕnnăn ănnăbităn dăɣ-ĕlkĕttabăn." Ăjewăḍăn inĕṭṭulab-net iket-năsăn, oyyăn-t-dd ĕnta ɣas jer-išĕnja-net. 57 Tĕlwăy tamĕtte ta tĕrmăsăt Ɣisa s-Qayăf wa n-ămănokal n-kăl-tikutawen-i s-a-s ităjj a-wen-dăɣ ăžžimmăɣăn ɣur-s ălɣulam n-Ăṭṭăwrăt d-inušămăn n-Iṣrayil. 58 Tamĕtte-en, ij'-as-dd Bĕṭrus alkum šĕjren har tĕjjăš ammas n-ăɣalla n-ehăn n-ămănokal n-kăl-tikutawen; osă-dd Bĕṭrus, ijjăš ĕnta-dăɣ, igla ăqqima edes i-gărdităn, ad-isimăqqul i-ajilal n-tanfust-ta-dăɣ. 59 Ǝggădăn-dd imănokalăn n-kăl-tikutawen d-kăl-Sinhidrin wi tirĕnen ăššăreɣa iket-năsăn, ad-tammăɣăn i-tajuhe n-bahu ĕnnăn făll-Ɣisa i-ad-t-siḍĕwăn dăɣ-ăššăreɣa, sĕnnĕhĕjjĕn-t d-tamăttant; 60 ĕnnăn fălla-s bahutăn ăjjootnen măšan, wăr tăn-iha a ibdadăn făll-hărăt. Ǝggădăn-dd ĕssin ăddinăt ăjjĕyhnen s-bahu, 61 ad-jannen: "Ăhalĕs-i-dăɣ, năjjĕyha a-s inna, ăddoobăt ad-ănd ehăn n-ămudd wa măqqărăn n-Măssinăɣ, idĕy-dd iyyăn ăynayăn dăɣ-edăgg-net dăɣ-kăraḍ išilan." 62 Isl' ămănokal n-kăl-tikutawen i-a-wen ɣas, ihă-dd ibdad, immĕjrăd, innă i-Ɣisa: "Ma tĕnned dăɣ-a-wa fălla-k itawănnen? Măjrăd!" 63 Wăr t-illa a has-inna Ɣisa. Inn'-as ămănokal n-kăl-tikutawen ălwăqq-wen: "Jarăɣ-kăy s-idĕm n-Măssinăɣ-i iddărăn, lăɣăt-anăɣ kunta kăyy a-s Ălmasex wa n-Rure-s n-Măssinăɣ." 64 Inn'-as Ɣisa: "Kăyy iman-năk, tĕnned-tăn; ăssiilmădăɣ-kăy daɣ a-s ɣur-ašăl-i-dăɣ, ad-tĕnhĕyăm Ăgg-ăgg-adĕm, ăqqiima daw-aɣil n-Wa ilăn tărna iket-net, talĕsĕm-t daɣ ahănay, iqqal-dd, ifal-dd išĕnnawăn, inay tijărăken." 65 Isl' ămănokal n-kăl-tikutawen i-a-wen-dăɣ ɣas, ijjăš-t ălhăm, wa-dăɣ făl, irmăs err n-erăswăy-net, ăsɣărrawăt-t făll-iman-net, innă: "A-wa ăskafăr, wădden sallăm-as a-s ăskafăr; ma nĕtajj i-tijuhawen daɣ? Igdăh-anăɣ a-wa dăɣ-inna meɣ ma tĕnnăm?" 66 Ǝnnăn-as: "Wa ĕnta, ănihăjja d-tamăttant!" 67 Ad-fălla-s situfăn, dabbăɣăn-as, ḍaẓẓăn dăɣ-s iyyăḍ, 68 jannen-as: "Ǝyyaa Ălmasex, lulĕy ya, tăllăɣed-anăɣ mi hak-istăɣăn?" 69 A-s ităjj a-wen-dăɣ, ăqqiima Bĕṭrus dăɣ-tĕfărre n-ammas n-ăɣalla. Tos'-e-hi-dd tănaxdimt tiyyăt, tĕnn'-as: "Kăyy-i-dăɣ hannăyăɣ, kăla tăddewăd d-Ɣisa wa n-Galila?" 70 Ăkkuddăl Bĕṭrus a-wen dat-ăddinăt iket-năsăn, inn'-as: "Wăr-ĕssenăɣ a dăɣ-hi-tăssewălăd." 71 Innă Bĕṭrus a-wen ɣas, ăškătarăš s-emm n-ăɣalla n-ehăn, tĕnhăy-t daɣ tănaxdimt tiyyăt, ad-janna i-ăddinăt wi t-ĕllanen dihen: "Hannăyăm-t ăhalĕs-wa-dăɣ, kăla ăddew d-Ɣisa wa n-Năṣirăt." 72 Ad-itĕhhaḍ Bĕṭrus išĕnnawăn d-ăkall, ijanna: "Ăhalĕs-wa-dăɣ s-hi-jănnem, wăr t-ĕzzeyăɣ." 73 A ĕnḍărrăn ḍarăt-a-wen, ĕkkăn-t-dd ăddinăt ĕbdadnen dăɣ-ammas n-ăɣalla-en-dăɣ, ĕnnăn-as: "Ijmaḍ-t ăššăk a-s kăyy-dăɣ, iyyăn dăɣ-ăddinăt wi n-Ɣisa, temăslăɣt-năk iman-net a tăsdăttet a-wen." 74 Ad-ităhhaḍ Bĕṭrus, ilaqqăn iman-net siha d-siha, ijanna: "Ǝnneɣ-awăn, ăhalĕs wa s-hi-jănnem, wăr t-ĕzzeyăɣ." Diha-dăɣ d-innă a-wen-dăɣ, ad-iwăt ekăz ăɣora. 75 Iktă-dd Bĕṭrus măjrăd wa s-kăla has-t-ija Ɣisa, a-s has-inna: "Wăr mad-iwĕt ekăz ăɣora ašăl-i-dăɣ s-wădden tăkkuddălăd-ahi har kăraḍ ihăndăggan." Izjăr ḍarăt-a-wen, ad-ihall a-wa-dăɣ has-ja tisnant.
