1 Ija Ɣisa i-ăddinăt tangalt tiyyăt daɣ dăɣ-hasăn-innă: "Tĕmmĕnĕya ta n-Măssinăɣ, tănifăqqa d-mărawăt timawaḍen wăren ĕzzey meddĕn ĕḍkălnen tiftĕl-năsnăt s-ehăḍ i-ad-ĕlkĕḍnăt i-ămaẓlay s-edăgg-wa-dăɣ ităjj aẓli. 2 Sĕmmosăt dăɣ-timawaḍen-tin-dăɣ, ijraw-tănăt iba n-tayĕtte, sĕmmosăt ti iyyăḍnen, timĕssorha. 3 Ălwăqq wa d-gillĕwnăt, ĕḍkălnăt ti ijrăw iba n-tayĕtte tiftĕl-năsnăt măšan, wăr dăɣ-snăt jenăt aman n-kărănžil hasnăt-ĕgdăhnen. 4 Ti n-timĕssorha ĕntănăteḍ, jănăt aman dăɣ-butĕlăn s-edes, ăwwăynăt-tăn. 5 Ad-simăqqulnăt ya ḍarăt a-wen i-ămaẓlay. Tăqqălnăt-as, tăqqălnăt-as har ălḍăšnăt, ilɣăd-tănăt-in eḍĕs iket-năsnăt. 6 Šămad igl' ehăḍ ad-ija eɣări innăn: 'Ămaẓlay ya, iwwăḍ-dd, sĕlkĕḍăt-as.' 7 Ǝnkărnăt-dd timawaḍen iket-năsnăt, ĕḍkălnăt tiftĕl-năsnăt. 8 Ǝggădnăt-dd ti ijrăw iba n-tayĕtte, ĕnnănăt i-ti n-timĕssorha: 'Năkkănăteḍ ya, tiftĕl-nănăɣ, išwar ămmutnăt, ăkfĕmăt-anăɣ-dd hărăt n-aman.' 9 Ǝnnănăt-asnăt ti n-timĕssorha: 'A făw, wăr năddobăt ed a-wa nĕṭṭaf dăɣ-aman, wăr hanăɣ-igdeh iket-nănăɣ, ăkkĕmăt u-mamăla, žănšĕmăt-dd aman i-iman-năkmăt.' 10 Ǝglănăt i-ad-dd-žĕnšĕnăt aman, osă-dd ămaẓlay ḍara-snăt. Ănmăjjašnăt dăr-s ti n-timĕssorha ăsdăwnen i-a-wen, ammas n-ehăn tĕzzar, ăṭṭubben ishar n-edăgg. 11 A ĕnḍărrăn ḍarăt-a-wen, ĕqqălnăt-dd ti ijrăw iba n-tayĕtte, ad-takăwkawnăt ashăr, jannenăt: 'Măndam, măndam! Arr-anăɣ-in emm n-ehăn.' 12 Măšan, inn'-asnăt măssi-s n-edăgg: 'Ălɣafyăt-năkmăt, wăr kămăt-ĕzzeyăɣ.' " 13 Innă Ɣisa ḍarăt-a-wen i-inĕṭṭulab-net: "A-wen-dăɣ a făl, ɣaymăt tokayăm ed wăr tĕssenăm ašăl wăl' ăssaɣăt wa s-dd-mad-dd-ass Emăli." 14 Olăs daɣ Ɣisa, innă: "Tĕmmĕnĕya n-Măssinăɣ, tănifăqqa d-isălan n-ăhalĕs iyyăn dd-ijjăš ĕnniyăt n-asikĕl, ăssawăḍ tekle ɣas, issăɣră-dd inaxdimăn-net, ij' ehăre-net iket-net jer-ifassăn-năsăn i-ad-săr-s ăxdĕmăn; 15 ikf'-iyyăn sĕmmos ibĕlɣan n-orăɣ, wa iyyăḍăn, ikf'-e ĕssin ibĕlɣan, wa s-kăraḍ, ikf'-e iyyăn n-ablăɣ; hak iyyăn-dăɣ, ikf'-e s-a-wa dăr-togdăh tardast-net tĕzzar, ăssokăl. 16 Šik-dăɣ a-s hin-ămmummălăt wa n-sĕmmos ibĕlɣan, orăɣ-net, irbăx fălla-s sĕmmos ibĕlɣan iyyăḍ. 17 Wa n-ĕssin daɣ, ija šund a-wen-dăɣ, irbăx făll-wi-net, ĕssin iyyăḍ daɣ. 18 Wa n-iyyăn n-ablăɣ n-orăɣ, iglă, iɣăš-as anu, tĕzzar inbăl dăɣ-s a-wa t-ikfa măssi-s. 19 Ăhoja-hin măssi-săn dăɣ-asikĕl har ašăl wa dd-iqqăl; osă-dd ɣas, iɣră-dd inaxdimăn-net i-ad-has-ĕjĕn ălmeḍan n-a-wa tăn-issăɣlăf. 20 Os-e-hi-dd wa n-sĕmmos ibĕlɣan n-orăɣ, ăwway daɣ sĕmmos ibĕlɣan wi dd-irbăx; inna i-măssi-s: 'Măssi-ɣ, sĕmmos ibĕlɣan n-orăɣ wi hi-tĕssăɣlăfăd, ĕntăneḍ da, ărbăxăɣ-dd fălla-săn sĕmmos iyyăḍ.' 21 Inn'-as măssi-s: 'Ehoyd! Ănaxdim ifranăn ha taflĕst a tămoosăd; šămad h'-ik taflĕst dăɣ-a-wărăn ĕjjĕt, adiš ad-kăy-săɣlĕfăɣ a ăjjeen. Ǝyyăw ɣayĕm edes-in, ad-nahăr tedăwit ta jeɣ.' 22 Osă-dd ḍarăt-a-wen wa n-ĕssin ibĕlɣan n-orăɣ, inna i-măssi-s: 'Măssi-ɣ, ĕssin ibĕlɣan-wi hi-tĕssăɣlăfăd, ărbăxăɣ-dd fălla-săn ĕssin iyyăḍ.' 23 Inn'-as măssi-s: 'Ehoyd! Ănaxdim ifranăn ha taflĕst a tămoosăd; šămad h'-ik taflĕst dăɣ-a-wărăn ĕjĕt, adiš ad-kăy-săɣlĕfăɣ a ăjjeen. Ǝyyăw ɣayĕm edes-in, ad-nahăr tedăwit ta jeɣ.' 24 Išrăy-dd wa n-iyyăn n-ablăɣ, innă i-măssi-s: 'Măssi-ɣ, ĕssanăɣ a-s kăyy emăṣṣehi a tămoosăd, tijlubud a wăr tăddomed, tilĕyĕd ašĕkrĕš dăɣ-wăr tĕnferăd hărăt, 25 jeɣ-ak tuksĕḍa-ta-dăɣ făl tĕgled ɣas, ĕgleɣ năkk-dăɣ, jeɣ anu i-ablăɣ n-orăɣ wa hi-tĕssăɣlăfăd, ĕnbălăɣ-t dăɣ-s; ĕnta da, ĕrmĕs tĕla-năk.' 26 Inn'-as măssi-s: 'Kăyy wa-hi, erk ănaxdim n-emĕssendĕd a tămoosăd! A-s tĕssănăd a-s tijlubeɣ a wăr-ăddomeɣ, tilĕyăɣ ašĕkrĕš dăɣ-wăr ĕnferăɣ hărăt, 27 mafăl wăr jed aẓrĕf-in dăɣ-bănk i-ad-ăttă/l/lăɣăɣ hărăt fălla-s afăl dd-ăqqălăɣ?' 28 Inna i-ăddinăt ḍarăt-a-wen, ad-dăɣ-s ahăɣăn ablăɣ n-orăɣ wa iṭṭăf, ĕkfĕn-t i-wa n-măraw ibĕlɣan. 29 Ăssiilmădăɣ-kăwăn a-s ăwadĕm wa ilăn hărăt ad-has-iwwaḍ, ijat a-wa ila măšan, wa wărăn ila hărăt, ad-dăɣ-s ăttărmăs wăla a-wa iṭṭăf. 30 'Ămăra, amălɣon wa-hi, ĕrmĕsăt-t, tĕjrĕm-t-in dăɣ-tihay ti n-ajăma wăr iha ar tahăla d-aẓĕmmăkărkĕẓ n-isenăn făl tămujriẓt.' " 31 Innă Ɣisa daɣ: "Ašăl wa dd-mad-iqqĕl Ăgg-ăgg-adĕm dăɣ-ălxurmăt-net ăddew d-ănjălosăn-net, ad-ăqqayĕm făll-tasăqqaymut-net ta n-ălxurmăt i-ad-imnukĕl. 32 Ašăl-en, ad-dd-ăqqaymĕnăt data-s tiwsaten n-ăddunya iket-dăɣ-năsnăt, iẓĕmmăẓlĕy ăddinăt s-ĕmmĕk wa s-iẓamăẓlay amăḍan tahrut i-ad-ibḍĕw tihatten d-išulaɣ. 33 Dihen, ad-ăj tihatten daw-aɣil-net, ăj išulaɣ daw-tăšalje-net. 34 Tihatten ti t-ĕllănen daw-aɣil-net, ad-hasnăt-ănn ămănokal: 'Ǝyyăwmăt, kămăteḍ-i n-timĕssunḍaḍ n-Abba-nin, uhĕnmăt tĕmmĕnĕya ta hakmăt-ăsmăjnăt Abba a dd-tăxlăk ăddunya. 35 Ašăl wa d-ălluẓăɣ, kămăteḍ a hi-ăswăyănăn, a-s ăffudăɣ, kămăteḍ a hi-issĕswăn, a-s hakmăt-ămjareɣ, tăsbărrăkmăt-ahi, 36 a-s ɣălulăɣ, tĕssĕlsămăt-ahi, a-s ărhinăɣ, tĕssĕfărmăt-ahi, a-s heɣ takărmut, jămăt-ahi-dd ăsafu.' 37 Afăl inn' ămănokal a-wen-dăɣ, ad-has-ĕnnĕn imaɣdalăn wi t-ĕllănen dihen: 'Emăli, ĕmme d-kăy-nĕnhăy tălluẓăd, nĕššĕkš'-ik? Ǝmme d-kăy-nĕnhăy tăffudăd, nĕssĕsw'-ik? 38 Ǝmme hanăɣ-dd-tămjared har kăy-năsbărrăk? Ǝmme d-ɣălulăd har kăy-nĕssĕlsa? 39 Ǝmme d-tărhinăd meɣ ĕmme d-tĕjjăšăd takărmut har hak-in-nĕja ăsafu?' 40 Dihen, ad-hasăn-ănn ămănokal: 'Ăsidătteɣ-awăn a-s hak ăssaɣăt d-jăm a-wen-dăɣ i-iyyăn dăɣ-ayĕtma-ɣ dăɣ-ăddunya, kud-dăɣ wa ĕnḍărrăn dăɣ-săn, šund năkk a-s t-jăm.' 41 Ad-dd-innăḍ ămănokal ḍarăt-a-wen s-wi wărnen tăšalje-net, ănn'-asăn: 'Kăwăneḍ imĕlɣan ilɣan Măssinăɣ a tămoosăm, ăflăt dat-i, ăkkăt temse ta tăɣlălăt tămmujnet i-Iblis d-ănjălosăn-net, 42 făl-a-s kăwăneḍ, ălluẓăɣ data-wăn, wăr hi-tĕššĕkšăm; ăffudăɣ, wăr hi-tĕssĕswăm; 43 ămjareɣ-awăn, wăr hi-tăsbărrăkăm; ɣălulăɣ, wăr hi-tĕssĕlsăm; ărhinăɣ, ĕjjăšăɣ takărmut măšan, wăr hi-dd-jem ăsafu.' 44 Afăl hasăn-inna ămănokal a-wen, ad-has-ĕnnĕn ĕntăneḍ: 'Emăli, ĕmme kăy-nĕnhăy tălluẓăd? Ǝmme kăy-nĕnhăy tăffudăd, meɣ ɣălulăd, meɣ tămijared-anăɣ-dd, meɣ tărhinăd, meɣ hed takărmut năqqim wăr hak-nĕkna hărăt?' 45 Ad-hasăn-ănn ămănokal: 'Ăsidătteɣ-awăn a-s ed wăr jem a-wen i-iyyăn dăɣ-ayĕtma-ɣ dăɣ-ăddunya, kud-dăɣ wa ĕnḍărrăn dăɣ-săn, šund năkk a-s wăr t-jem.' 46 Ăywa, wi-hi ĕntăneḍ, ad-hin-ĕtwĕjărăn dăɣ-tisnant ta tăɣlălăt măšan, imaɣdalăn ĕntăneḍ, ad-ĕjjĕšăn tămudre ta tăɣlălăt."
