Mătti 24

1Ălwăqq wa d-ifăl Ɣisa ehăn n-ămudd wa măqqărăn, ohăẓăn-t-dd inĕṭṭulab-net, ăddoqqen-as tihusay n-akăros wa ija ehăn n-ămudd wa măqqărăn. 2Islă i-tĕmmal ta tăjjăn i-ehăn-en ɣas, inn'-asăn: "Wădden hannăyăm tihusay n-edey-wa-dăɣ? Ăsidătteɣ-awăn a-s ilkam ašăl d-wăr mad-dăɣ-s dd-tăqqayĕm wăla-dăɣ tăhunt tiyyăt warăt tamidit-net ed, ad-ăttăɣtăɣ iket-dăɣ-net." 3Ikkă Ɣisa ḍarăt-a-wen taḍaɣt ta tăssidwălăt ihĕškan wi n-ĕzzăytun, ăqqima. Ohăẓăn-t-dd inĕṭṭulab-net, ĕnnăn-as dăɣ-tenere n-iman-năsăn: "Ălɣalim, lăɣăt-anăɣ, hărătăn-win-dăɣ s-tĕnned, ĕmme d-mad-ĕjĕn? Ǝkkĕs-anăɣ dăɣ-taɣdărt n-išmal n-uɣĕl-năk d-tămĕddawt n-ăddunya." 4Ăwwežăb-asăn Ɣisa, inn'-asăn: "He kăwăneḍ, ăjăt ĕnniyăt; wăr kăwăn-išăšket ăwadĕm wăl' iyyăn 5făl-a-s, ad-kăwăn-dd-asĕn ăddinăt ăjjootnen ăwwaynen isĕm-in, ănn hak iyyăn dăɣ-săn: 'Năkk a-s Ălmasex', šiškĕn s-a-wen-dăɣ ăddinăt ăjjootnen. 6Ad-tĕslĕm i-isălan n-imjărăn d-măhewĕl n-imjărăn, wăr tăxwelăm ed ilzam ad-ăj a-wen măšan, sămdo n-ăddunya ĕnta, wăr-ija hărwa. 7Ad-tĕknĕs tawset tamidit-net, iknĕs ĕddĕwĕl amidi-net, ăj laẓ, iškĕḍkĕḍ ăkall dăɣ-idăggan ăjjootnen, 8sănto n-tămĕddawt n-ăddunya ɣas a-wa, olăh d-sănto n-tiẓẓurt ta rămmăsăt tamăḍt s-išwar tĕjraw eɣăf-net. 9Ad-kăwăn-ăqqĕzzĕbun ăddinăt, ĕjĕn iman-năwăn kĕrĕf, akĕḍnăt dăr-wăn tiwsaten iket-dăɣ-năsnăt, dăɣ-ăddimmăt n-isĕm-in wa kăwăn-iwarăn. 10Ad-tĕjmĕḍ tuksĕḍa n-Măssinăɣ ulhawăn n-i ăjjootnen dăɣ-wăn, tĕnmăɣdărăm jer-iman-năwăn, tĕnmĕkyĕḍăm jer-iman-năwăn, 11asĕn-dd ănnăbităn n-bahu ăjjootnen, šĕnnĕmĕšrĕyăn ăddinăt ăjjootnen. 12Ad-ăj iba n-iqqud tĕmɣăre ta-dăɣ făl ad-tismaḍ tărha n-Măssinăɣ dăɣ-ulhawăn n-ăddinăt ăjjootnen 13măšan, ere wa ăkoyădăn dăɣ-alkum-hahi dăɣ-immun-net har ašăl wa d-imda a-wen-dăɣ iket-net, ad-iɣlĕs. 14Ad-ĕtwĕjjĕn isălan n-Ălĕnžil n-Tĕmmĕnĕya n-Măssinăɣ i-tiwsaten n-ăddunya iket-dăɣ-năsnăt i-ad-ĕslĕnăt i-isălan-win-dăɣ tĕzzar, tĕmdĕw ăddunya." 15Inna Ɣisa daɣ: "Afăl ašăl wa d-tĕnhăyăm ănabxas wa n-emĕkkărekăḍ s-innă ănnăbi Danyăl har dd-ijjăš edăgg wa šăddijăn ihăn ehăn n-ămudd wa măqqărăn ad-t-isamăḍas, ((ašăl-en, ăwadĕm wa iɣarrăn isălan-wi-dăɣ, ijrăhet ălmăɣna-năsăn!)) 16Ašăl-en, wi hănen teje ta n-Ălyăhudĕyăt, jawăḍnet dăɣ-azzal s-ašrut wa n-iḍaɣăn; 17wi dd-ogăẓ ašăl-en ĕwarăn afălla n-ihănan, wăr dd-tĕzĕbbutnet i-ad-ĕḍkĕlăn a hasăn-ihan ammas n-ehăn, jawăḍnet dăɣ-azzal. 18Wi dd-ogăẓ ašăl-en han išĕkraš, wăr dd-tăqqălnet ḍara-săn i-ad-ĕḍkĕlăn isĕlsa-năsăn. 19Timĕskay tiḍeḍen ti mad-ijrĕw ašăl-en-dăɣ lanăt ĕnniyăt meɣ siḍuḍnăt, ed ad-tăẓẓăwăt talɣa-năsnăt. 20Ǝttărăt dăɣ-Măssinăɣ ad-wăr itĕmzĕyyit ajiwĕḍ-năwăn d-ăzzăman wa n-akăsa meɣ tajrĕst meɣ d-ašăl n-ĕssĕbĕt-i n-tăsonfat. 21Ăzzăman-en, ad-tăj tissust tăssuksăḍăt s-ad-dd-tăxlăk ăddunya-dăɣ, wăr kăla ătiwănhăy šund ĕnta făll-ărori n-ăkall; ad-tĕmdĕw ăddunya daɣ, wăr-ilkem ad-ija a dăr-s olăhăn. 22Afăl wăr-ifneẓ Măssinăɣ dăɣ-tăqqăn n-tisnant ta hăt išilan-en-dăɣ, wăr t-illa ere madăn-iɣlĕs; măšan ad-išĕkšĕl Măssinăɣ tăqqăn n-tiẓẓurt-ten-dăɣ dăɣ-tĕssĕba n-ăddinăt wi ăsnăfrăn i-ĕlɣĕllas. 23Dihen, afăl hawăn-innă ăwadĕm: 'Ǝnhĕywăt-t-ak Ălmasex, ĕnta da' meɣ: 'Ǝnta den', wăr t-tĕflesăm. 24Ad-dd-asĕn ălmasexăn n-bahu d-ănnăbităn n-bahu, ĕjĕn ijităn d-hărătăn ăssuksăḍnen, šiškĕn ĕnnăr ămmukkăn a-wen wăla ăddinăt wi ăsnăfrăn Măssinăɣ. 25He kăwăneḍ, ĕkkasăɣ-kăwăn dăɣ-taɣdărt hărwa wăr jen hărătăn-win-dăɣ. 26Ere hawăn-innăn: 'Ǝnhĕywăt, Ălmasex wa n-Ămaɣlas, osă-dd, iha tenere-ta', wăr tĕkkem dihen; meɣ daɣ afăl hawăn-ătwănna: 'Ih' ehăn iyyăn dihen', wăr t-tĕflesăm. 27Ăgg-ăgg-adĕm, ad-alăh ass-net d-essam-i s-e-d issăm dăɣ-emăynăj, ad-itwĕnhĕy asmăɣmăɣ-net dăɣ-atăram. 28Dihad t-tĕlla tamăɣsoyt, ad-itajj ellay." 29Ăssewăḍ Ɣisa făll-a-wen, innă: " 'Tĕmda ɣas tisnant n-išilan-win-dăɣ, ad-ĕlsĕnăt tihay tăfukt, iba tĕmĕlle n-ewăr; ĕtrĕkken-dd etran, ĕnhĕynĕhĕyăn imĕṣṣuha wi hănen išĕnnawăn.' 30Ălwăqq-wen-dăɣ, a dd-e-tĕnfilĕl tamătart ta sălmadăt s-ass n-Ăgg-ăgg-adĕm dăɣ-išĕnnawăn, ad-šoršĕnăt tiwsaten ti wărnen ărori n-ăkall, ad-t-ĕnhĕynăt, imal-dd, inay tijărăken, tĕlkam-as tărna-net d-ălxurmăt-net. 31Dihen, ad-išĕmmišĕl ănjălosăn-net i-ad-săhĕḍăn tăsinsăɣt s-afălla, sĕdwĕn-dd săr-s e d t-illăm ere ăsinăfrăn Măssinăɣ dăɣ-e d t-tĕllăm tamdujt, sĕntĕn dăɣ-ašrut iyyăn, sĕmdĕwăn-dd s-ašrut wa iyyăḍăn." 32"Sĕjrăhăt ɣas ĕmmĕk wa s-idaggăl ašar: wădden e-d t-tĕnhăyăm a-s dd-inšăr har lămmeḍăn ifărketăn-net, ad-tĕnnĕm, os'-anăɣ ăzzăman wa olăɣăn; 33ĕmmĕk-wen-dăɣ daɣ a-s afăl tĕnhăyăm išmal-wi-dăɣ s-hawăn-ĕnneɣ har jăn, adiš ĕlmĕdăt a-s Ăgg-ăgg-adĕm, ohăẓ-dd uɣĕl-net, os'-iwăn făw. 34Ăsidătteɣ-awăn a-s wăr-e takĕy ĕzzurĕyăt-ta-dăɣ, wăr jen hărătăn-win-dăɣ s-hawăn-ĕnneɣ iket-dăɣ-năsăn. 35Ojăr tărăɣse ija ad-ib' išĕnnawăn d-ăkall, uhĕn ad-iba tĕnna-nin." 36Innă Ɣisa daɣ ḍarăt-a-wen: "Ămăra, dăɣ-isălan n-ašăl d-ăssaɣăt wa d-mad-ĕjĕn hărătăn-win-dăɣ, wăr t-illa ere t-issanăn; wăr t-ĕssenăn ănjălosăn wi hănen išĕnnawăn wăla Ăgg-ăgg-adĕm; Abba ɣas, a t-issanăn. 37Ass n-Ăgg-ăgg-adĕm, ad-alăh a-wa dăɣ-s-e-ijĕn d-a-wa ijăn dăɣ-išilan wi n-ănnăbi Nox. 38Ăzzăman wa n-Nox, dat-anji wa n-ḍuf, tayăwanăn ăddinăt, sassăn, tidubunăn, sidubunăn har ašăl wa d-ijjăš Nox turăft n-aman ta măqqărăt s-has-innă Măssinăɣ ad-tăt-ikĕn. 39Wăr t-illa a-s tăn-ha tijya-net har fălla-săn dd-oḍăn aman wi n-anji wa n-ḍuf, olăm-tăn-in iket-dăɣ-năsăn. Šund a-wen-dăɣ ijăn a madăn-ăj ašăl wa dd-mad-dd-ass Ăgg-ăgg-adĕm. 40Ašăl-en, ad-ăddewăn ĕssin meddĕn dăɣ-tenere, ămmăḍkăl iyyăn, itwĕyy-dd iyyăn, 41ad-taddăhnăt sănatăt tiḍeḍen dăɣ-iyyăn edăgg, tammăḍkăl tiyyăt, tĕtwĕyy-dd tiyyăt. 42A-wen-dăɣ a făl, ɣaymăt tokayăm ed wăr tĕssenăm ašăl n-ass n-Emăli-năwăn. 43Wădden kăwăneḍ iman-năwăn tĕssanăm a-s ĕnnăr issan măssi-s n-ehăn ălwăqq wa s-t-dd-itis emăkrăḍ s-ehăḍ i-ad-ărẓ ehăn-net, iket-di, wăr-itĕṭṭĕs i-ad-has-ărẓ emăkrăḍ ehăn-net. 44A-wen-dăɣ a făl, ɣaymăt tăsidăwăm, tăɣtafăm ed, Ăgg-ăgg-adĕm, ad-dd-ass s-ăssaɣăt d-wăr fălla-s jem. 45Ănaxdim wa n-ămaɣdal ijrăhăn hărăt, ĕnta a mad-isăɣlĕf măssi-s tĕla-net i-ad-ănnihăḍ făll-inaxdimăn-net wi iyyăḍnen, isamănsaw-tăn e-d ija ălwăqq n-a-wen. 46Tĕnḍĕḍ i-ănaxdim wa mad-ijrĕw măssi-s ăddunkăt dăɣ-ălxidmăt wa dăɣ-t ija, ălwăqq s-t-dd-osa-dăɣ. 47Ăsidătteɣ-awăn a-s ănaxdim-en, ad-t-isăɣlĕf măssi-s tĕla-net iket-net, 48măšan, erk ănaxdim ĕnta, ad-ănn dăɣ-iman-net: 'Năkk, măssi-ɣ, ăhoja-hin făll-i, ăbas dd-iqqal', 49ad-iḍannăy imidiwăn-net wi iyyăḍnen tiwit, itatt, isass ĕnta d-imăswan n-ĕlxĕmăr, 50ănaxdim-wen, ilkam ad-t-dd-iɣdăr măssi-s dăɣ-ašăl d-ăssaɣăt d-wăr fălla-s ija, ilmĕd s-erk ĕššăɣĕl wa t-išlăn a ija a-wa-dăɣ, 51afăl t-dd-osa, ad-t-iqquzzĕbĕt, isărtĕy-t d-ălmunafeɣăn dăɣ-tihay ti n-ajăma wăr-iha ar tahăla d-aẓĕmmăkărkĕẓ n-isenăn făl tămujriẓt."

will be added

X\