Mătti 23

1Iḍkăl Ɣisa măjrăd ḍarăt-a-wen, immĕjrăd i-tamĕtte d-inĕṭṭulab-net, innă: 2"Ălɣulam n-Ăṭṭăwrăt d-kăl-faris a iwar ăttăfăssir n-Ăṭṭăwrăt ta n-Mosa i-ăddinăt. 3Tamašalăt a-wa hawăn-jănnen iket-net, măšan, he kăwăneḍ, wăr tĕttĕlălăm ijităn-năsăn făl-a-s a-wa jănnen, wăr-oher hărăt d-a-wa tajjăn. 4Tajjăn fărĕḍăn n-Măssinăɣ ăẓuk sawarăn iẓerhan n-ăddinăt, šahăššalăn-tăn amišĕl-năsăn, a-s ija a-wen, wăr tăn-iha ad-hasăn-ilalăn s-aggay-năsăn wăla-dăɣ s-emm n-assĕkăḍ. 5A-wa tamašalăn iket-net, i n-tĕssĕba ɣas n-ad-tăn-in-ĕjrăhăn ăddinăt, šallăjăn ikĕtban ojărnen wi n-ăddinăt, tajjăn isĕlsa ăhobătnen, 6ărhan taɣimit dăɣ-idăggan wi ănnuflăynen dăɣ-imjora d-ihănan n-ăddin wi n-kăl-Ălyăhud, 7ijraẓ-asăn ad-hasăn-tajjăn ăddinăt isofan dăɣ-tišărriten, titwăɣrin s-isĕm: 'Ălɣalim, ălɣalim!' 8Kăwăneḍ, wăr jem a-wen, wăr tărḍem titwăɣrim s-isĕm: 'Ălɣalim' ed Ălɣalim-năwăn, iyyăn ɣas, kăwăneḍ, ayĕtmatăn a tămoosăm. 9Wăr tăɣrem ăwadĕm wăl' iyyăn s-isĕm 'Abba' ed Abba iyyăn ɣas a lam, a t-ămoosăn, Abba-năwăn wa ihăn išĕnnawăn. 10Wăr tărḍem ɣarrăn-kăwăn ăddinăt s-isĕm: 'Ămănokal', ed wăr lem ar iyyăn n-Ămănokal, a t-ămoosăn: Ălmasex. 11Wa ojărăn dăɣ-wăn, umaset akli n-imidiwăn-net. 12Ere iḍkălăn iman-net-dăɣ, ad-irĕs măšan, wa ăsrăsăn iman-net, ad-t-iḍkĕl Măssinăɣ." 13"Imĕskay kăwăneḍ-i n-ălɣulam n-Ăṭṭăwrăt d-kăl-faris, ălmunafeɣăn yaden! Ǝnhĕywăt ɣas, kăwăneḍ a itiṭĕbbun Tĕmmĕnĕya n-Măssinăɣ i-ăddinăt; ălwăxla, a-s wăr tăt-tĕjjĕšăm, ăddinăt daɣ wi ărhanen ujĕš-net, gaddălăm-asăn s-a-wen. (( 14Imĕskay kăwăneḍ-i n-ălɣulam n-Ăṭṭăwrăt d-kăl-faris, ălmunafeɣăn yaden! Kăwăneḍ a itihăɣăn a-wa ihăn ifassăn n-tinuḍăfen, tajjăm imaddăn šĕjrootnen i-ad-kăwăn-in-ĕjrăhăn ăddinăt, ilkam dăɣ-wăn ăššăreɣa sĕmmăn.)) 15Imĕskay kăwăneḍ-i n-ălɣulam n-Ăṭṭăwrăt d-kăl-faris, ălmunafeɣăn yaden! Wăr t-illa edăgg wăr tĕkkĕm făll-ăkall wăla făll-aman i-ad-dăɣ-s dd-tĕjrĕwăm ăwadĕm iyyăn ɣas jăm dăɣ-ăddin-năwăn măšan, igdăh-as ɣas ad-hawăn-ilkĕm i-ad-t-sĕmmuttĕyăm, umas, u-žohănnăma s-tojăr ămăra tăllăbăst ta ija ta jăm s-ĕssin ihăndăggan. 16Imĕskay kăwăneḍ-i n-imalwayăn dărɣalnen. Jannem: afăl ihăḍ ăwadĕm s-ehăn n-ămudd wa măqqărăn, wăr t-iwer ărkăwăl n-tahuḍe-net măšan, afăl ihăḍ s-orăɣ wa t-ihăn, iwar-t ărkăwăl n-tahuḍe ta ija. 17Tidĕt-dăɣ a-s irmas-kăwăn iba n-tayĕtte, dărɣalăm. Ajăn, ehăn n-ămudd wa măqqărăn, ma iẓlay d-orăɣ wa t-ihăn? Wădden tĕšĕdje-ta-dăɣ ija ehăn n-ămudd, a dd-torăwăt ĕllĕllu wa ija orăɣ wa t-ihăn? 18Jannem daɣ: ere ihăḍăn s-isĕm n-edăgg wa n-tikutawen, wăr t-iwer ărkăwăl n-tahuḍe-net măšan, afăl ihăḍ s-takute-ta tĕnsăt făll-edăgg-en, iwăr-t ărkăwăl n-tahuḍe ta ija. 19Imĕddorɣal yaden! Ajăn wădden tihusay n-edăgg wa n-tikutawen a ăshăsken takute ta fălla-s isănsa ăwadĕm. 20Tidĕt a-s ere wa ihăḍăn s-isĕm n-edăgg wa n-tikutawen, ihăḍ daɣ s-a-wa fălla-s insăn iket-net, 21wa ihăḍăn daɣ s-ehăn n-ămudd wa măqqărăn, adiš, Măssinăɣ-i n-Măssi-s n-ehăn-en a ihăḍ. 22Wa ihăḍăn s-išĕnnawăn, wădden tasăqqimit ta făll-ăminakăl Măssinăɣ a-s ihăḍ, Măssinăɣ iman-net a ihăḍ. 23Imĕskay kăwăneḍ-i n-ălɣulam n-Ăṭṭăwrăt d-kăl-faris, ălmunafeɣăn yaden! Hakkăm s-iqqud a-wa ămoosăn tămukăst-năwăn dăɣ-wăla ĕnnăɣnaɣ d-ăkamĕn d-tiyĕššawen-ti iyyăḍnen măšan, tăsisăndărăm dăɣ-amišĕl n-a-wa ifrăḍ alămăr dăɣ-isălan n-ălɣădalăt n-ulh, d-tăhanint, d-immun s-Măssinăɣ; hărătăn-win-dăɣ a-s ănihăjja a-s tĕssĕntăm săr-săn, sĕlkĕmăm-asăn amišĕl n-wi iyyăḍnen olăɣnen. 24Imalwayăn dărɣalnen a tămoosăm, šănšašăm a-wa săssăm i-ad-wăr dăɣ-s dd-itaɣimĕy wăla ešš iyyăn ɣas uhĕn-dăɣ, a-wa hin-sitrĕjjim dăɣ-tisatten-năwăn, ogdăh d-amnĕs tĕmɣăre. 25Imĕskay kăwăneḍ-i n-ălɣulam n-Ăṭṭăwrăt d-kăl-faris, ălmunafeɣăn yaden! Kannăm ašĕšdaj n-afălla n-karatăn d-ikassăn-năwăn, a-s ija a-wen, ammas n-ulhawăn-năwăn, ixla; šašdajăm tiɣĕswen-năwăn, a-s ija a-wen, ammas n-ulhawăn-năwăn, wăr-iḍney ar tikra d-ĕwwĕli. 26Ya kăl-faris-i n-imĕddorɣal, sirĕdăt ammas n-karatăn d-ikassăn-năwăn i-ad-išdajăn tĕzzar, ad-saradăm afălla-năsăn. 27Imĕskay kăwăneḍ-i n-ălɣulam n-Ăṭṭăwrăt d-kăl-faris, ălmunafeɣăn yaden! Tolăhăm ɣas d-tiẓĕska wăššarnen s-ăshăskăt ăwadĕm afălla-năsnăt, a-s ija a-wen, ammas-năsnăt, wăr t-iha ar iɣăsan n-măɣsoy d-mărkăhaw isamăḍasăn. 28Ǝnta-den-dăɣ a-wa dăr-toolăhăm; saknem ăddinăt ălmăt a-s tăɣdalăm, a-s ija a-wen, ammas n-ulhawăn-năwăn, wăr-iḍney ar tĕlmĕnufăɣa d-tăxărme. 29Imĕskay kăwăneḍ-i n-ălɣulam n-Ăṭṭăwrăt d-kăl-faris, ălmunafeɣăn yaden! Kăwăneḍ a salmadnen ăddinăt s-idăggan wi dăɣ-ĕẓkăn ănnăbităn, sahaskem iẓĕkwan wi n-imaɣdalăn wi n-ibda ăba; 30išl'-iwăn a-wen-dăɣ măšan, jannem: 'Ǝnnăr nĕzzaɣ dăɣ-ăzzăman n-abbatăn-nănăɣ, wăr dăr-săn nĕtumas imăjjan n-iman n-ănnăbităn-wi s-ĕssănɣălăn ašni-năsăn.' 31Jannen a-wen-dăɣ uhĕn-dăɣ wăr hin-tĕjrehăm a-s asĕtbat ɣas a tajjăm n-a-s, tămoosăm ihăyawăn n-abbatăn-năwăn-wi janen iman n-ănnăbităn. 32A-wa ĕssĕntăn abbatăn-năwăn ɣas a hin-samdem. 33Taššălen a tămoosăm, wăr tĕẓleyăm d-tanăɣwăt. Lăɣătăt-ahi ɣas ĕndek ĕmmĕk wa s-mad-tăɣlĕsăm dăɣ-žohănnăma? 34Dăɣ-tĕssĕba n-a-wen-dăɣ a făl săr-wăn-in-ăšimăšălăɣ hărăt dăɣ-ănnăbităn d-imĕssorha d-ălɣulam n-Ăṭṭăwrăt; ad-tĕjĕm iman n-iyyăḍ, tĕṣlĕbăm iyyăḍ, tĕjĕm tiwit s-ibărtăkăn dăɣ-iyyăḍ dăɣ-ihănan n-ăddin-năwăn, tăqquzzĕbum iyyăḍ s-aɣrĕm-aɣrĕm 35i-ad-dăɣ-wăn ĕḍmĕnăn iman n-e d t-illăm ămaɣdal s-jam iman-net bănnan făll-ărori n-ăkall-i-dăɣ, ɣur-ašni n-Xăbălla wa n-ămaɣdal ăba hundăɣ har ašni n-Zăkărya wa n-ăgg Bărăyka-i s-ătwăjjăn iman-net jer-edăgg wa šăddijăn ihăn ehăn n-ămudd wa măqqărăn d-edăgg wa dăɣ-raqqănăt tikutawen. 36Ăsidătteɣ-awăn a-s ăddinăt-win-dăɣ ăba, ĕḍmanăn iman-năsăn dăɣ-kăl-ĕzzurĕyăt-ta-dăɣ." 37Innă Ɣisa ḍarăt-a-wen: "Yărussălam, ya Yărussălam! Tamăskoyt kămm-i tăjjăt iman n-ănnăbităn, hakkăd sămmăjori n-tihun inĕmmušal wi săr-m dd-ăšmašăl Măssinăɣ, ĕndek ɣas a-wa-dăɣ wăr jeɣ dăɣ-utăr n-asdu n-imuzăɣăn-năm šund a-wa tăjj tekăzzit i-ikărtăn-net daw-tafriwen-net măšan, tĕssĕndărăm-ahi. 38Ămăra, ĕnhĕywăt, isălan ĕmdăn, ad-kăwăn-ăyy Măssinăɣ d-iman-năwăn, umas ehăn-năwăn timšar. 39Ăssiilmădăɣ-kăwăn, wăr t-ih' ăššăk a-wen, ăbas ilkam ad-hi-tĕnhayăm hundăɣ har ašăl wa d-mad-talĕsăm tĕnna n-a-s: 'Namĕlet wa dd-osăn s-isĕm n-Emăli!' "

will be added

X\