Mătti 22

1Issăɣlăy Ɣisa daɣ tamĕtte tangalen dăɣ-isălan n-Tĕmmĕnĕya n-Măssinăɣ, innă: 2"Tĕmmĕnĕya ta n-Măssinăɣ, ăddoobăt ăwadĕm ad-tăt-isĕnnĕfăqq d-tanfust n-ămănokal isidubunăn rure-s. Ašăl wa d-ităjj a-wen, ăsmăjarăt-dd ăddinăt ăjjootnen s-ehăn-net. 3Ămmujnăt-dd hărăt iket-net ɣas, ăšmašăl inaxdimăn-net s-ăddinăt wi dd-iɣra s-aẓli ašăl-wen-dăɣ; măšan, unjăyăn iket-dăɣ-năsăn s-ad-dd-asĕn. 4Olăs săr-săn ašĕmmišĕl n-eklan săl winnin-dăɣ ăzzarnen, inn'-asăn: 'Ăglăt, ănnăt i-ăddinăt: tăwwăɣăm-ahi, imĕnsiwăn, ămmujnen, ĕssănɣăɣ-awăn a-wa iddăren iket-net jer-wa n-iwan hakd wa n-taɣsiwen; ĕyyăwăt šik, kăwăneḍ ɣas a-s iqqal aẓli ămăra.' 5Wăr jen teɣăre ta tăn-dd-ija hărăt, iglă hak iyyăn dăɣ-ĕššăɣĕl-net: wa ikkăn ašĕkrĕš-net, wa ikkăn mamăla-net; 6ĕggădăn-dd iyyăḍ făw, ĕrmăsăn hărăt dăɣ-inaxdimăn wi dd-ăšmašăl ămănokal, ăsmăḍrăyăn iyyăḍ, jăn iman n-iyyăḍ. 7Ǝjjăšăn isălan ămănokal ɣas, ijjăš-t ălhăm, iɣră-dd ejhăn n-ĕssărdusa-net, issĕgl'-en i-ad-ĕlhĕsăn imăjjan n-iman-win-dăɣ, sĕntĕsăn aɣrĕm-năsăn. 8Innă ḍarăt-a-wen i-inaxdimăn-net iyyăḍ: 'Imĕnsiwăn wi n-aẓli, ĕskărăn-dd, măšan ăddinăt wi dd-ăsmăjareɣ săr-săn, wăr dăr-săn ănhăjjăn, 9ăglăt ămăra, ilalăt tišarriten n-aɣrĕm ti dăɣ-tažămmaɣăn ăddinăt, ere dăr-tămmoqqăsăm-dăɣ, sĕmmĕjurum-t-dd s-ehăn-in.' 10Ăllilăn inaxdimăn tišarriten iket-dăɣ-năsnăt, ăsdăwăn-dd a-wa ĕjrăwăn dăɣ-ăddinăt iket-net jer-wi n-erk ăddinăt hakd-dăɣ wi n-imĕssorha, iḍnăy ehăn tamĕtte. 11Ijjăš-dd ămănokal făll-tamĕtte i-ad-tăt-isĕbbărrĕk. Ăzjăzza tamĕtte, ijrăh-in a-s ih'-et ăhalĕs wărăn ija isĕlsa wi s-ănihăjja s-ad-tăn-ăj ere ihan aẓli, wăr-ăssahăɣ ašăl. 12Issăɣr'-e-hi-dd, inn'-as: 'Măndam! Ǝndek ĕmmĕk wa s-dd-tĕjjăšăd edăgg-wa-dăɣ a-s wăr tăssahăɣăd ašăl?' Wăr t-illa a has-inna ăhalĕs-en. 13Inna ămănokal i-inaxdimăn-net iyyăḍ: 'Ărmĕsăt-t, tĕkrĕdăm iḍarăn-net hakd ifassăn-net, tĕjrĕm-t-in dăɣ-tihay ti n-ajăma i-ad-ihall, iẓimĕkărkiẓ isenăn făl tămujriẓt.' 14Tidĕt, ătwăɣrăn-dd ăddinăt ăjjootnen măšan, wăr ĕjjĕtăn wi ĕnnĕfrănnen." 15Ănmăkkăsăn kăl-faris s-takše ḍarăt-a-wen, ad-tattărăn ĕmmĕk s-ăswănnăn Ɣisa a wărăn itĕtwĕnn i-ad-t-sĕttărmĕsăn. 16Ăšmašălăn-dd săr-s hărăt dăɣ-inĕṭṭulab-năsăn ăddewnen d-iyyăḍ la taggayt ta n-kăl-Harudĕs; osăn-t-dd, ĕnnăn-as: "Ălɣalim, nĕssan a-s tidĕt ɣas a janned, wăr săɣrid ar tabarăt ta n-tuksĕḍa n-Măssinăɣ, wăr tăkkulăd d-a-wa jănnen ăddinăt, wăr tăn-tăẓmăẓlăyăd; 17ămăra, lăɣăt-anăɣ, dăɣ-a-wa hannăyăd: ak iwar-anăɣ ad-nĕẓĕl tiwse i-ămănokal wa măqqărăn Qăyṣăr meɣ?" 18Ilmăd Ɣisa ɣur-iman-net erk ĕnniyăt n-asĕstan wa t-jăn ɣas, inn'-asăn: "Ălmunafeɣăn yaden! Mafăl hi-tižărrubum?" 19Inn'-asăn ḍarăt-a-wen: "Săknăt-ahi-dd ărriyal n-aẓrĕf wa s-tĕẓẓalăm tiwse", ĕkfăn-as-t-dd. 20Inn'-asăn: "Mi lăn ăṭṭăṣwer d-isĕm wa t-iwărăn?" 21Ǝnnăn-as: "I n-ămănokal Qăyṣăr." Inn'-asăn: "Adiš, suɣĕlăt i-ămănokal wa măqqărăn a-wa fălla-wăn ila, tĕkfĕm daɣ Măssinăɣ a-wa fălla-wăn ila." 22Iqqăn ălwižab-wen-dăɣ tăn-ikfa iɣăfawăn n-ăddinăt. Fălăn Ɣisa ḍarăt-a-wen, ĕglăn. 23Ašăl-wen-dăɣ iman-net ad-dd-ĕbdădăn data-s ăddinăt la taggayt ta n-kăl-sadus-i jannănen a-s wăr tĕlkem tanăkra jer-inĕmmuttan, afăl ăba ăwadĕm, ĕmdăn isălan-net; ĕssĕstănăn-t, 24ĕnnăn-as: "Ălɣalim, inn'-anăɣ ănnăbi Mosa: 'Afăl ădobăn ăhalĕs, ăba-t wăr-oher ara d-hănne-s, idubĕnet-tăt ă/n/na-s i-ad-ikrĕš ĕzzurĕyăt i-ă/n/na-s wa ăba, i-ad-wăr hin-itilĕm isĕm n-wa ăba făll-ărori n-ăkall.' 25Ămăra, ĕkkĕs-anăɣ dăɣ-tăqqăn n-eɣăf. Kăla hanăɣ-hăn ĕssa ayĕtma; ădobăn dăɣ-săn wa n-amăqqar, ăba-t wăr ikreš ara. Tăqqimă-dd hănne-s i-ă/n/na-s wa has-ilkămăn 26măšan, ăba-t ĕnta-dăɣ wăr-oherăn ara, tăqqimă-dd i-wa s-kăraḍ ḍarăt-a-wen; tĕgla tanfust s-ĕmmĕk-wen-dăɣ har wa n-ĕssa. 27Ḍarăt iba-năsăn iket-năsăn, ăba tamăḍt ĕnta-dăɣ. 28Năssistăn-kăy: ašăl wa n-tanăkra jer-inĕmmuttan, ĕndek dăɣ-ĕssa ayĕtma-win-dăɣ wa s-mad-tumas hănne-s ed, ĕnhayăn-tăt adubĕn iket-năsăn?" 29Inn'-asăn Ɣisa: "Tidĕt-dăɣ a-s kăwăneḍ toškam ed a-wa ĕnnăn ĕlkĕttabăn hakd-dăɣ a-wa dăr-togdăh tărna n-Măssinăɣ, wăr t-illa a dăɣ-s tĕfhamăm. 30Ašăl wa ilkămăn, meddĕn hakd tiḍeḍen, ad-ăbas tidubunăn ed ad-talăh tămudre-năsăn d-ta n-ănjălosăn wi hănen išĕnnawăn. 31Ămăra, dăɣ-isălan wi n-tanăkra n-inĕmmuttan, ajăn wăr tăɣrem a-wa hawăn-inna Măssinăɣ, a-s innă: 32'Năkk a-s Măssinăɣ n-Ibrahim d-Isxaqq d-Yaqub'? A-wen, ălmăɣna-net a-s ăddinăt-win-dăɣ, han ălžănnăt, tiimĕlĕn Măssinăɣ; ĕnnăr wăr-ĕdderăn, wăr tĕjjĕn a-wen. Măssinăɣ, wădden inĕmmuttan a-s ămoos Măssinăɣ, ămoos-t i-wi ĕddărnen." 33Ijrăẓ a-wen-dăɣ issăɣra Ɣisa i-tamĕtte ta has-tăsijădăt. 34Ǝslăn kăl-faris i-ĕmmĕk wa s-ăssoḍăf Ɣisa kăl-sadus imawăn-năsăn ɣas, ĕžžĕmmăɣăn-dd ĕntăneḍ-dăɣ săr-s. 35Iggăd-dd iyyăn dăɣ-săn n-ălɣalim n-Ăṭṭăwrăt, ija i-Ɣisa asĕstan dăɣ-otas irrum-net. 36Inn'-as: "Ălɣalim, ma ămoos ɣur-Măssinăɣ alămăr wa ojărăn?" 37Inn'-as Ɣisa: "Alămăr wa ojărăn da: 'Ad-tărhĕd Emăli-năk Măssinăɣ s-ulh-năk imda, tărhĕd-t s-iman-năk ĕmdan, tărhĕd-t s-tayĕtte-năk iket-net.' 38Ǝnta-den-dăɣ alămăr wa ăzzarăn dăɣ-alămărăn, ĕnta daɣ a ojărăn dăɣ-alămărăn. 39Ill'-ee daɣ wa s-ĕssin wărăn dăr-s iẓley: 'Ad-tărhĕd ănhăraj-năk s-ĕmmĕk wa s-tărhed iman-năk.' 40Alămărăn-win-dăɣ n-ĕssin a iṭṭafăn a-wa innă alămăr n-Măssinăɣ d-a-wa ĕnnăn ănnăbităn iket-net." 41Inhăy Ɣisa ažĕmmăɣ wa fălla-s dd-jăn kăl-faris ɣas, issĕstăn-tăn, inn'-asăn: 42"Ak ma tordam, Ălmasex, mi iqqal? Mi s-ămoos Rure-s?" Ǝnnăn-as: "Dawĕd." 43Inn'-asăn Ɣisa: "Kunta Ălmasex rure-s n-Dawĕd, adiš, mafăl has-ijanna Dawĕd s-măjrăd ija Unfas Šăddijăn dăɣ-emm-net: 'Emăli?' 44Dawĕd en-dăɣ a immĕjrădăn s-tărna n-Unfas Šăddijăn, innă: 'Inna Emăli Măssinăɣ i-Emăli-nin: Ǝyyăw, ɣayĕm daw-aɣil-in har ăjăɣ išĕnja-năk daw-iḍarăn-năk.' 45Ɣas kunta Dawĕd iman-net iɣarr Ălmasex s-isĕm 'Emăli', ĕndek ĕmmĕk wa s-ăddoobăt ad-umas rure-s?" 46Wăr tăn-ijješ ere t-ikfan ălwižab n-asĕstan-wen-dăɣ hasăn-ija; ijrăw dăɣ-săn ălɣafyăt ɣur-ašăl-wen-dăɣ, ăbas t-illa-i dăɣ-săn ihălăn asĕstan-net ḍarăt-a-wen.

will be added

X\