Mătti 21

1Ohăẓ-in Ɣisa d-inĕṭṭulab-net Yărussălam, iha ămăra taɣrĕmt ta n-Bătfaži, edes i-taḍaɣt ta tăsijătăt ihĕškan wi n-ĕzzăytun, ăšmašăl ĕssin dăɣ-inĕṭṭulab-net, 2inn'-asăn: "Ăkkăt tadăbayt ta n-data-wăn, tĕjjašăm-tăt ɣas, ad-dăɣ-s tĕjrĕwăm tešeḍt tĕkrafăt s-t-illa ăẓa-net edes-has; arăt-tăt-dd, tĕlwĕyăm-ahi-tăt-dd ĕnta d-ăẓa. 3Ere hawăn-innăn hărăt, ănnăt-as: 'Ălɣalim a dăɣ-săn ilan ĕššăɣĕl,' afăl has-tĕnnăm a-wen, ad-hawăn-dd-ăyy tešeḍt hakd d-ăẓa-net." 4Ămoos a-wen a ăssiitbătăn a-wa innă ănnăbi n-Măssinăɣ a-s innă: 5"Ănnăt i-kăl-Yărussălam: Ǝnhĕywăt, ikk'-iwăn-in ămănokal-năwăn, ikk'-iwăn-in s-ĕmmĕk wărăn inbej tiṭṭ, ešeḍ ɣas a inay ara n-tešeḍt ɣas a inay." 6Ǝglăn inĕṭṭulab, jăn a-wa hasăn-inna Ɣisa; 7wătăn-as-dd tešeḍt d-ăẓa-net, ĕstăjăn-asăn isĕlsa-năsăn tĕzzar, inăy Ɣisa ăẓa. 8Ad-fattăɣ ya tamĕtte iket-net, isĕlsa făll-tabarăt-ta ija, nakkăḍăn-dd iyyăḍ ileḍleḍăn dăɣ-ihĕškan, săns'-en-tăn dăɣ-zăbo-wa ija i-asĕmɣar-net. 9Tăseɣărăt tamĕtte-ta has-tăzzarăt hakd ta has-tĕlkămăt, janna: "Ozana! Năkfet Măssinăɣ semɣar dăɣ-tĕssĕba n-Ăgg-Dawĕd, Ija Măssinăɣ ălbăraka dăɣ-wa dd-osăn dăɣ-isĕm n-Emăli, Imɣaret isĕm n-Emăli dăɣ-išĕnnawăn iket-dăɣ-năsăn!" 10Ijjăš-dd Ɣisa Yărussălam ɣas, ămramăr aɣrĕm iket-dăɣ-net, hak ăwadĕm-dăɣ, ibdad, ijanna i-amidi-net: "Ma ămoos ăwadĕm-wa hanăɣ-dd-ijjăšăn?" 11Ad-janna tamĕtte ta tĕlkămăt i-Ɣisa: "A-wa Ɣisa, ănnăbi wa dd-ifălăn Năṣirăt ta n-Galila." 12Ijjăš Ɣisa ḍarăt-a-wen ehăn n-ămudd wa măqqărăn ihăn Yărussălam, ad-dăɣ-s isattăɣ ăttužžar d-imăžănšan-năsăn, ăsbărăɣwăl tisĕskar ti n-kăl-amăhaš n-iẓărfan, ijjar-in tisăqqima n-ăttužžar n-tidăberen, 13isattăɣ-tăn, ijann'-asăn: "Wădden iktab a-s, innă Măssinăɣ: 'Ehăn-in, ad-umas ehăn n-tittar'; măšan kăwăneḍ jăm-t, tasĕssihărt n-imăkrăḍăn." 14Iha Ɣisa ehăn n-ămudd-en-dăɣ a-s t-dd-osăn imĕddorɣal d-inĕbdan, ăzozăy-tăn. 15Ǝggădăn aratăn hanen ehăn n-ămudd-en-dăɣ, ad-saɣăren, jannen: "Ozana! Năkfet Măssinăɣ semɣar dăɣ-tĕssĕba n-Ăgg-Dawĕd!" Ǝnhăyăn imănokalăn n-kăl-tikutawen d-ălɣulam n-Ăṭṭăwrăt tikunen-ti s-iket tănăt-ija, ĕslăn i-a-wa jannen aratăn ɣas, ijjăš-tăn ălhăm făll-Ɣisa. 16Ǝggădăn-dd săr-s, ĕnnăn-as: "Ajăn kăyy, wăr sĕllĕd i-a-wa jannen aratăn-wi-dăɣ?" Inn'-asăn Ɣisa: "Sallăɣ-asăn." Olăs, inn'-asăn: "Ajăn wăr tăɣrem a-wa innă Măssinăɣ dăɣ-ĕlkĕttab-net, a-s innă: 'Imawăn n-aratăn d-imărkăsăn ad-dd-zajjăr tĕmmal i-Măssinăɣ.' " 17Ifăl Ɣisa edăgg-en ɣas, odwa tadăbayt ta n-Bitanya. 18Ăffăw, iqqăl Ɣisa Yărussălam dăɣ-a-s ălluẓ. 19Dăɣ-tekle-net, inhăy ahĕšk n-ašar iɣtan dăɣ-asălim n-zăbo, ikk'-e-hi-dd măšan, wăr fălla-s ijrew ar ifărketăn, wăr t-hen aratăn. Immĕjrăd i-ahĕšk, inn'-as: "Ija Măssinăɣ a-s wăr-ilkem ad-torawăd!" Ăqqur-in ahĕšk-en s-iyyăt ălwăqq-wen-dăɣ. 20Ǝnhăyăn inĕṭṭulab a-wen ɣas, ăqqănăn iɣăfawăn-năsăn ad-jannen: "Ǝndek ĕmmĕk wa s-hin-ăqqur ašar wa-dăɣ s-iyyăt?" 21Inn'-asăn Ɣisa: "Ăsidătteɣ-awăn a-s afăl itbat immun-năwăn, wăr t-illa ăššăk t-ihan, ad-tudabem iji n-a-wa jeɣ i-ašar-wa-dăɣ, tĕglĕm făw har afăl tĕnnăm i-aḍaɣ wa-dăɣ: 'Tălbăy-dd dăɣ-edăgg wa hed, tăɣtĕd dăɣ-ejărew wa sĕmmăn dihen', ad-ăj a-wa tĕnnăm. 22A dăɣ-dălăm Măssinăɣ s-ulh omanăn-dăɣ, ad-hawăn-t-ăkf." 23Ijjăš Ɣisa ehăn n-ămudd wa măqqărăn, isaɣra tamĕtte dihen a-s t-dd osăn imănokalăn n-kăl-tikutawen d-inušămăn n-Iṣrayil, ĕnnăn-as: "Mi kăy-ikfăn turhajăt n-amišĕl n-tikunen-ti-dăɣ? Mi kăy-ikfăn tărna-ta-dăɣ s-tăjjăd a-wa tăjjăd?" 24Ăwwežăb-asăn Ɣisa, inn'-asăn: "Ad-hawăn-ăjăɣ năkk-dăɣ asĕstan iyyăn, afăl hi-tăwwežăbăm, ad-hawăn-ăllăɣeɣ năkk-dăɣ ere wa hi-ikfăn turhajăt ta s-tamašalăɣ a-wa tăjjăɣ." 25Inn'-asăn: "Mi dd-ăšmašălăn Exya wa n-Enĕsselmăɣ i-ad-isĕlmăɣ ăddinăt dăɣ-aman? Ak Măssinăɣ a t-dd-ăšmašălăn meɣ dăgg-adĕm ɣas?" Inn'-asăn a-wen ɣas, ĕqqălăn-dd, ămmiizăɣăn jer-iman-năsăn, jannen: "Afăl has-nĕnna: 'Măssinăɣ a t-dd-ăšmašălăn', ad-hanăɣ-ănn: 'Adiš, mafăl wăr tomenăm s-a-wa hawăn-innă.' 26Afăl has-nĕnna daɣ dăgg-adĕm ɣas a t-dd-ăšmašălnen, ad-fălla-năɣ tiḍĕw tamĕtte-ta-dăɣ ed tĕkkas iket-net ăššăk a-s Exya ănnăbi n-Măssinăɣ a ămoos." 27Ǝqqălăn-t-dd, ĕnnăn-as: "Wăr nĕssen." Inn'-asăn Ɣisa: "Adiš năkk-dăɣ, wăr hawăn-e-ăllăɣeɣ ere wa hi-ikfăn tărna ta s-tăjjăɣ a-wa tăjjăɣ." 28Innă Ɣisa ḍarăt-a-wen i-ăddinăt wi has-ăsijădnen: "Ma tĕnnăm dăɣ-tanfust-ta-dăɣ? Ătwănna, kăla t-illa ăhalĕs ilan ĕssin aratăn. Ašăl iyyăn, iɣră-dd dăɣ-săn wa iššămăn, inn'-as: 'Alyaḍ-in, ašăl-i, ăkk ašĕkrĕš wa n-lăɣnăb, tăxdĕmăn dăɣ-s.' 29Inn'-as rure-s, wăr-igla măšan, a ĕnḍărrăn ḍarăt-a-wen, ămmujrăẓ, ikk' ašĕkrĕš, ixdăm dăɣ-s. 30Iɣră-dd daɣ wa s-ĕssin, inn'-as a ĕnnin-dăɣ innă i-wa ăzzarăn. Inn'-as rure-s, igla măšan, a-s dd-tĕšrăy tanfust, wăr-igla. 31Ămăra, ĕndek dăɣ-săn wa ămešălăn erhet n-abba-net?" Ǝnnăn-as ăddinăt: "Un, wa ăzzarăn." Inn'-asăn Ɣisa: "Ăsidătteɣ-awăn a-s kăwăneḍ-i hannăyăɣ, ad-hawăn-izarăn kăl-tiwse d-tălkăxbaten ujĕš n-Tĕmmĕnĕya n-Măssinăɣ. 32Exya, a-s kăwăn-dd-osa, issĕkn'-iwăn tabarăt ta n-iqqud măšan, tunjăyăm tomănăm s-a-wa hawăn-innă, a-s ija a-wen kăl-tiwse d-tălkăxbaten, omănăn săr-s; tăjjihăm i-a-wen-dăɣ iket-net măšan, wăr tătubăm, tamĕnăm s-a-wa hawăn-innă." 33Issăɣlăy Ɣisa tamĕtte tangalt tiyyăt dăɣ-innă: "Săjdăt! Kăla t-illa ăhalĕs ilan tĕfărre-net, ij'-as afăraj, ija dăɣ-s ašĕkrĕš n-lăɣnăb, ija daɣ dăɣ-ašrut-net iyyăn, edăgg wa dăɣ-iẓimmĕw lăɣnăb, iday dăɣ-s edăgg n-soro i-ămagaẓ-net; ifăr-t ḍarăt-a-wen i-inĕsduma iyyăḍ tĕzzar, ikk' ăkall iyyăn. 34Tăwwăḍ-dd tăqqăn n-amili n-ašĕkrĕš ɣas, ăšmašăl-dd s-inĕsduma inaxdimăn-net, i-ad-has-dd-awĕyăn folăt-net dăɣ-a-wa dd-orăw ašĕkrĕš; 35măšan, ănaxdim săr-săn dd-ăšmašăl-dăɣ, ad-t-ărmĕsăn, ad-tithĕkken meɣ jăn iman-net meɣ t-ĕkfăn sămmăjori n-tihun. 36Olăs-dd daɣ ašĕmmišĕl n-inaxdimăn iyyăḍ săr-săn, issĕlkăm-asăn-dd daɣ i-ăjjootnen ojărnen wi săr-săn ăšmašăl s-tizarăt; jăn-asăn a ĕnnin-dăɣ jăn i-wi hasăn-dd-ăzzarnen. 37A-s tĕšrăy tanfust, rure-s iman-net a săr-săn dd-ăšmašăl ed, inna dăɣ-iman-net: 'Ǝnta ya i n-rure-ɣ, ănihăjja s-ad-t-sĕmɣărăn.' 38Măšan, ĕnhăyăn inĕsduma rure-s wa dd-imalăn ɣas, ănmănnăn jer-iman-năsăn: 'Ǝnhĕywăt-ak, amăkkasu-net; ĕyyăwăt, năjet iman-net i-ad-hanăɣ-dd-tăqqĕl tăkasit-net.' 39Osă-dd ɣas, ĕrmăsăn-t, ĕzjărăn dăr-s ašĕkrĕš, ănɣăn-t kĕrĕf." 40Inn'-asăn Ɣisa: "Ma tordam, wi-dăɣ inaxdimăn, ma hasăn-mad-ăj măssi-s n-ašĕkrĕš afăl tăn-dd-osa, ĕnta iman-net?" 41Ǝnnăn-as ăddinăt: "Adiš, afăl dd-osa imĕkkĕrukaḍ-wi-dăɣ, wăr hasăn-e-aḍĕn tăhanint, ad-tăn-ilhĕs iket-dăɣ-năsăn, alĕs tefert n-ašĕkrĕš-net i-iyyăḍ t-e-ĕkfĕnen folăt-net afăl dd-ăwwăḍ ăzzăman wa n-amili n-ašĕkrĕš." 42Inn'-asăn Ɣisa: "Adiš kăwăneḍ, kăla wăr tăɣrem edăgg wa innăn dăɣ-ĕlkĕttab n-Măssinăɣ a-s: 'Tăhunt ta hin-jărăn ălbănnatăn s-ĕnnăn wăr tĕnfa hărăt, ĕnta a-s a-s tĕšrăy tanfust, tămoos tăhunt ta tufăt n-aɣmăr hakkăt ăṣṣahăt ehăn; a-wen iket-net Măssinăɣ ad-t-ijăn i-ad-umas tăqqăn n-eɣăf dat-tiṭṭawen-nănăɣ.' " 43Inn'-asăn Ɣisa: "Janneɣ-awăn ămăra a-s dăɣ-tĕssĕba n-a-wen-dăɣ a făl, Tĕmmĕnĕya n-Măssinăɣ, ad-dăɣ-wăn tăttărmăs, tĕtwĕkf i-tamĕtte tiyyăt madăt-tămašăl a-wa hasăn-tĕnnă dăɣ-erhet n-Măssinăɣ." (( 44Tăhunt-ta-hi, ere fălla-s oḍăn, ad-ărrăẓrăẓ; ere făll-toḍa daɣ, ad-t-tĕlkĕẓ.)) 45Ǝslăn imănokalăn n-kăl-tikutawen d-kăl-faris i-tangalen-tin-dăɣ tăn-issăɣlăy Ɣisa ɣas, ĕlmădăn a-s ĕntăneḍ-en-dăɣ a-s iha ti-năsăn. 46Ǝttărăn ad-t-ĕrmĕsăn măšan, ăksuḍăn tamĕtte ed, tĕkkas ăššăk a-s Ɣisa, ănnăbi a ămoos.

will be added

X\