Mătti 20

1Issăɣlăy-tăn Ɣisa tangalt ḍarăt-a-wen, inn'-asăn: "Tĕmmĕnĕya n-Măssinăɣ, tănifăqqa d-ăhalĕs ilan ašĕkrĕš-net; ăffăw-t ɣas, ifăl ehăn-net, immăɣ i-inaxdimăn issăxdăm ašĕkrĕš-net n-lăɣnăb. 2Ănmănnăk dăr-săn făll-timẓal n-ărriyal n-aẓrĕf i-ašăl tĕzzar, ăssok'-en ašĕkrĕš-net i-ad-t-ĕxdĕmăn. 3Ij' agdĕlset ɣas, olăs azăjor, ijrăw iyyăḍ ăqqimnen ădiwănnen wăr-išla hărăt, iḍkăl-tăn; 4ĕntăneḍ-dăɣ, inn'-asăn: 'Ăglăt kăwăneḍ-dăɣ tăxdĕmăm dăɣ-ašĕkrĕš-in wa n-lăɣnăb, ad-kăwăn-ăkfăɣ ălxaqq n-tide-năwăn'; 5ĕglăn, ĕxdămăn. Tĕjă tarăhut ɣas, olăs aḍkul n-iyyăḍ, olăs daɣ iji n-a-wen s-tezzar. 6Tĕglă takkăṣt ɣas, izjăr daɣ, inhăy iyyăḍ ĕbdadnen wăr tăn-išla hărăt, inn'-asăn: 'Kăwăneḍ ma s-tĕbdadăm ašăl iket-net, wăr t-illa a kăwăn-išlan?' 7Ǝnnăn-as: 'Wăr t-illa ere hanăɣ-ikfan ĕššăɣĕl.' Inn'-asăn: 'Ăkkăt kăwăneḍ-dăɣ ašĕkrĕš-in, tĕxdĕmăm dăɣ-s.' 8Toḍă tăfukt ɣas, issăɣră-dd măssi-s n-ašĕkrĕš ănaẓraf-net, inn'-as: 'Ǝɣĕr-dd inaxdimăn, tĕẓlĕd-asăn, sănt s-wi dd-ĕšrăynen har tĕkkĕd wi dd-ăzzarnen.' 9Ǝjrăwăn wi dd-osănen šămad tĕgla takkăṣt timẓal-năsăn; hak iyyăn ijraw ărriyal n-aẓrĕf wa ămoosăn timẓal n-ašăl. 10Osăn-dd ḍarăt-a-wen wi dd-ăzzarnen s-ălxidmăt ija ɣur-săn a-s, ad-ajărăn inaxdimăn-wi dd-ĕšrăynen timẓal măšan, ĕjrăwăn ĕntăneḍ-dăɣ ărriyal n-aẓrĕf šund wa ĕjrăwăn inaxdimăn wi n-tišrayăt dăɣ-ălxidmăt. 11Ǝjrăwăn timẓal-năsăn ɣas, ăbjănjănăn făll-măssi-s n-ašĕkrĕš, ad-has-jannen: 12'Ajăn wădden inaxdimăn-wi dd-ĕšrăynen, iyyăn n-ăssaɣăt ɣas a jăn ĕxdamăn, a-s ija a-wen năkkăneḍ, ašăl imdan a nĕja nĕxdam, siknĕnniwĕt-anăɣ tăfukt. Ɣas ĕndek ĕmmĕk wa s-ila a-s ad-dăr-săn nagdăh timẓal?' 13Innă măssi-s n-ašĕkrĕš i-iyyăn dăɣ-săn: 'Amidi-nin, wăr-ĕkšeɣ ălxaqq-năk, wădden ărriyal n-aẓrĕf a făll-nĕnnăfhăm, ĕkfeɣ-ak-t, ma tărhed daɣ? 14Ǝrmĕs ehăre-năk, tĕglĕd. Ma dăɣ-kăy-ikma a-s ăsisăgdăhăɣ-kăy dăɣ-aẓrĕf-in kăyy-i dd-ăzzarăn, tajjăd dăɣ-i erk asăwaḍ, d-wa dd-išrăyăn? 15Ajăn wădden a-wa ehăre-nin s-ăddoobeɣ ad-has-ăjăɣ a-wa s-ărheɣ. Ma dăɣ-kăy-ikma a-s olaɣăɣ?' " 16Innă Ɣisa ḍarăt-a-wen: "Ǝlmĕdăt a-s s-ĕmmĕk-wen-dăɣ a-s ăddinăt wi hănen ajilal, ad-izarăn măšan, wi ăzzarnen, ad-ĕjjĕšăn ajilal." 17Ălwăqq wa d-irmăs Ɣisa tamdujt ta n-Yărussălam, ikkăs-dd inĕṭṭulab-net s-takše, inn'-asăn: 18"Ǝnhĕywăt, năkkăneḍ-da-hi ăjoẓăynen, nĕkka Yărussălam-i-dăɣ mad-ăttărmăs Ăgg-ăgg-adĕm i-ad-ijjĕš ifassăn n-imănokalăn n-kăl-tikutawen d-ălɣulam n-Ăṭṭăwrăt; ad-t-siḍĕwĕn dăɣ-ăššăreɣa-năsăn, ĕɣtĕsăn-as tamăttant, 19ĕjĕn-t dăɣ-ifassăn n-inĕẓẓulam -i t-maden-ăj tekăškăšt, ĕjĕn dăɣ-s tiwit s-ebărtăk, ĕṣlĕbăn-t făll-tajĕttewt i-ad-ămmăt măšan, ašăl wa n-kăraḍ ḍarăt tamăttant-net, ad-dd-inkăr jer-inĕmmuttan." 20Dăɣ-a-wen-dăɣ, ad-dd-tosa hănne-s n-Zăbdi Ɣisa, ĕnta d-mĕddana-s wi n-ĕssin, tărkăɣ data-s, tĕnn'-as tărha a dăɣ-s tĕttăr hărăt iyyăn. 21Inn'-as Ɣisa: "Ma tărhed?" Tĕnn'-as: "Ǝssin ilyaḍăn wi leeɣ, ĕntăneḍ da, ăj'-ahi ărkăwăl n-a-s ašăl wa dd-mad-tăqqĕlăd dăɣ-Tĕmmĕnĕya-năk, ad-săqqaymĕd iyyăn daw-aɣil-năk, săqqaymĕd wa iyyăḍăn daw-tăšalje-năk." 22Ăwwežăb-as Ɣisa, inn'-as: "Kăwăneḍ, wăr tĕssenăm a dăr-săstanăm. Ajăn năkk, kara n-tisnant wa s-ilkam ad-t-ăswăɣ, tăddoobem tesăse-net?" Ǝnnăn-as dăgg-Zăbdi: "Năddoobăt-t." 23Inn'-asăn Ɣisa: "Tidĕt lab a-s ad-tĕnhĕyăm ălɣizabăt šund wa mad-ĕnhĕyăɣ măšan, dăɣ-isălan wi n-taɣimit daw-aɣil-in d-tăšalje-nin, wădden năkk a ihakkăn a-wen; Abba-nin a t-ihakkăn i-wi s-t-ăsmăjnăt." 24Ǝslăn inĕṭṭulab wi iyyăḍnen n-măraw i-a-wen ɣas, ijjăš-tăn ălhăm făll-ayĕtma-win-dăɣ n-ĕssin. 25Iɣr'-en-dd Ɣisa iket-năsăn s-iman-net, inn'-asăn: "Tĕssanăm a-s imănokalăn ăxkămăn făll-kăl-ăkall-năsăn s-ăṣṣahăt; kăl-ĕlxĕkum daɣ, wăr lămmeḍăn făll-kăl-ăkall 26măšan, kăwăweḍ, wăr jem a-wen; wa dăɣ-wăn irhăn mijraw, umaset ănaxdim i-imidiwăn-net, 27ere dăɣ-wăn irhăn tăzert, umaset akli n-imidiwăn-net tĕzzar, 28s-ĕmmĕk wa s-Ăgg-ăgg-adĕm, wăr dd-ămesăl s-ăddunya i-ad-has-ĕxdĕmăn ăddinăt, ămešăl-dd săr-s i-ad-ixdĕm ĕnta iman-net, ăkf iman-net, ămmăt i-ad-isĕddărfĕt ăddinăt ăjjootnen dăɣ-ibăkkaḍăn-năsăn." 29A-s dd-izjăr Ɣisa d-inĕṭṭulab-net taɣrĕmt ta n-Žărriko, tĕlkăm-as tamĕtte tăjjeet. 30Igla har a ĕnḍărrăn, ĕssin imĕddorɣal da-dăɣ, ăqqiimăn dăɣ-asălim n-zăbo wa dd-ija. Ǝslăn a-s Ɣisa a okayăn ɣas, ad-saɣăren, jannen: "Ya Ăgg-Dawĕd, aḍĕn-anăɣ tăhanint!" 31Ɣattăl-tăn tamĕtte i-ad-hin-susĕmăn măšan, ăsɣăren dăɣ-išĕnnawăn: "Ya Ălɣalim, Ăgg-Dawĕd, aḍĕn-anăɣ tăhanint!" 32Isl'-asăn Ɣisa, ibdăd, iɣr'-en-dd, inn'-asăn: "Ma s-tărham ad-hawăn-t-ăjăɣ?" 33Ǝnnăn-as: "Ălɣalim, arr tiṭṭawen-nănăɣ i-ad-nĕnhĕy." 34Tănɣ'-e tăhanint-năsăn, iḍăs tiṭṭawen-năsăn, ămerănăt ăssaɣăt-wen-dăɣ, olăsăn ahănay; ĕlkămăn-as ḍarăt-a-wen.

will be added

X\