Mătti 2

1Ăzzăman wa d-ămoos Harudĕs ămănokal n-teje ta n-Ălyăhudĕyăt ad-iwa Ɣisa dăɣ-taɣrĕmt ta n-Bătlehăm hăt teje-ten-dăɣ. Ăzzăman-en-dăɣ daɣ ad-dd-osăn imusănăn dd-falnen emăynăj, ĕkkan-dd Yărussălam, 2sastanăn ăddinăt d-ămănokal n-kăl-Ălyăhud wa s-iket iwa s-ĕnhăyăn atăr-net a-s dd-izjăr s-emăynăj; ĕllăɣen-asăn a-s ass ad-dd-jăn i-ad-t-ĕɣbĕdăn. 3Isl' ămănokal Harudĕs i-măjrăd-wen-dăɣ ɣas, iššĕwwăš ĕnta d-kăl-Yărussălam iket-dăɣ-năsăn. 4Ăsdăw-dd ḍarăt-a-wen e d t-illăm ămănokal n-kăl-tikutawen d-ălɣalim n-Ăṭṭăwrăt, issĕstăn-tăn d-edăgg wa dăɣ-mad-iwĕy Ălmasex. 5Ǝnnăn-as: "Bătlehăm ta hăt teje ta n-Ălyăhudĕyăt a dăɣ-mad-iwĕy făl-a-s iktab ănnăbi iyyăn a-s, inna Măssinăɣ: 6'Ya Bătlehăm, kămm-i hăt teje ta n-Ălyăhudĕyăt, tidĕt, wăr tĕkned tĕmɣăre jer-tiɣărmaten ti n-kăl-Ălyăhud măšan, kămm-i-dăɣ ĕnḍărrăt ad-dd-mad-izjăr ămănokal wa madăn-izar i-tamĕtte-nin ta n-kăl-Iṣrayil, isĕssiɣĕd-tăt.' " 7Islă Harudĕs i-a-wen ɣas, ikkăs-dd imusănăn-winnin s-takše, ad-tăn-ikann asĕstan d-ăzzăman wa dăɣ-hasăn-dd-ănfalăl atăr wa s-ĕnnăn ĕnhayăn-t. 8Issĕgl'-en ḍarăt-a-wen, dăɣ-a-s hasăn-inna: "Ăkkăt Bătlehăm, tĕknĕm asĕstan d-alyaḍ, afăl t-tĕjrăwăm, ĕqqĕlăt-ahi-dd, tĕjĕm dăɣ-i isălan i-ad-t-ăkkăɣ, ărkăɣăɣ-as năkk-dăɣ." 9Ǝslăn i-a-wa inna, ĕglăn. A ĕnḍărrăn, atăr-wĕnnin ĕnhăyăn s-emăynăj-da-dăɣ, ăzzar-asăn har tanămhăla n-ehăn wa iha alyaḍ. 10Ǝnhăyăn atăr-en, ĕknăn tedăwit. 11Ǝjjăšăn ehăn wa jĕnnĕj-ĕnhăyăn atăr, ĕnhăyăn alyaḍ d-ma-s Măryăma, ărkăɣăn-as, ad-t-ɣabbădăn. Orăn ḍarăt-a-wen tisĕtwar-năsăn, ĕkkăsăn-as-dd tibĕddar n-orăɣ d-matălxer d-telḍĕḍt. 12Ǝllan-t dihen-dăɣ a-s tăn-issĕlmăd Măssinăɣ dăɣ-tăharjit s-udaɣnet i-ad-ĕqqĕlăn Harudĕs. Jăn tabarăt tiyyăt săl ta dd-jăn, ĕqqălăn ăkall-năsăn. 13Ǝglăn imusănăn ĕnnin ɣas, ănfalăl-dd ănjălos n-Emăli i-Yusĕf dăɣ-tăharjit, inn'-as: "Yusĕf, ĕnkăr, ĕḍkĕl alyaḍ d-ma-s, jawăḍ s-ăkall wa n-Miṣra, tĕzzăɣăd dihen-dăɣ har ašăl wa d-hak mad-ănnăɣ tăddoobed ad-dd-tĕqqĕlăd făl-a-s alyaḍ-i, itammăɣ-as Harudĕs i-ad-t-ănɣ." 14Inkăr, iḍkăl alyaḍ d-ma-s, ăhona s-Miṣra ehăḍ-wen-dăɣ, 15izzăɣ dihen har ăba Harudĕs. Ij'-a-wen i-ad-itbĕt a-wa innă ănnăbi iyyăn a-s innă, innă Emăli: "Ǝɣreɣ-dd Rure-ɣ i-ad-dd-izjăr Miṣra." 16Ilmăd Harudĕs a-s ĕssĕswădăn-t imusănăn ed wăr t-dd-olesăn uɣĕl ɣas, ikăf s-aḍkăr. Omăr ălwăqq-wen-dăɣ s-ad-ămmătăn ilyaḍăn wi hănen Bătlehăm d-attayăn-net t-ĕllanen daw-ĕssin iwĕtyan ed tăqqăn-ten-dăɣ a togdăhăt d-ta s-has-ĕnnăn imusănăn, ănfalălăn-asăn-dd atăr dăɣ-s. 17Ămoos a-wen-dăɣ ijăn a ăssiitbătăn a-wa innă ănnăbi Yirmiya a-s inna dăɣ-ĕlkĕttab n-Măssinăɣ: 18"Ij' emăsli n-tisnant dăɣ-aɣrĕm wa n-Rama, ja tahăla d-tikălelen. A-wa Răhila hallăt ilyaḍăn-net, ăbă-dd a tăt-isĕssisumăn, ed ilyaḍăn-net, ămmun iket-dăɣ-năsăn." 19Ăba Harudĕs ɣas, ănfalăl-dd ănjălos n-Emăli i-Yusĕf dăɣ-tăharjit dăɣ-ăkall wa n-Miṣra, inn'-as: 20"Ǝḍkĕl alyaḍ d-ma-s ămăra, tĕqqĕlăd ăkall wa n-Iṣrayil ed ăddinăt wi s-kăla tattarăn iji n-iman-net, ăba-tăn." 21Inkăr Yusĕf, iḍkăl alyaḍ d-ma-s, iqqăl ăkall wa n-Iṣrayil. 22Măšan, islă a-s Erkilyas ăgg Harudĕs a ămnakălăn dăɣ-edăgg n-ti-s făll-teje ta n-Ălyăhudĕyăt ɣas, igdăl-as ĕmmĕttĕsu ad-tăt-ăkk i-ad-dăɣ-s izzăɣ. Ănfalăl-as-dd Măssinăɣ dăɣ-tăharjit, inn'-as ad-ăkk teje ta n-Galila. 23Iwwăḍ-in teje-ten ɣas, izzăɣ dăɣ-taɣrĕmt s-isĕm-net Năṣirăt. Ija a-wen i-ad-itbĕt a-wa ĕnnăn ănnăbităn făll-Ɣisa a-s ĕnnăn: "Ad-t-iwăr isĕm: U-Năṣirăt."

will be added

X\