Mătti 19

1Issĕmdă Ɣisa tĕnna n-isălan-win-dăɣ ɣas, ifăl teje ta n-Galila, ikkă tidbi ti hin-ĕllanen i-ejănš wa n-Ɣurdĕni dăɣ-teje ta n-Ălyăhudĕyăt; 2ĕlkămăn-as-dd ăddinăt ăjjootnen, ăzozăy dăɣ-săn wi ărhinnen. 3Dăɣ-a-wen-dăɣ ad-dd-ĕbdădăn kăl-faris iyyăḍ data-s, orămăn-t s-asĕstan dăɣ-innă a wărăn itĕtwĕnn, ĕnnăn-as: "Dăɣ-a-wa innă alămăr-nănăɣ, ak ajăn xălal i-ăhalĕs, ad-izĕmmĕzzĕy hănne-s făl-ăsaru, a ămoos-dăɣ?" 4Ăwwežăb-asăn, inn'-asăn: "Adiš kăwăneḍ wăr tăɣrem dăɣ-ĕlkĕttab n-Măssinăɣ edăgg wa dăɣ-ătwănna a-s: 'S-tizarăt a-s dd-ixlăk Ămaxlak ăddunya, ăhalĕs d-tamăḍt a dd-ixlăk.' " 5Inn'-asăn daɣ: " 'Tĕssĕba n-a-wen-dăɣ a făl mad-ifĕl ăhalĕs ti-s d-ma-s, asăɣ d-hănne-s, umasăn făll-ĕssin-essăn, tiyyăt taɣĕssa. 6Ad-ăbas ămoosăn ĕssin ăddinăt, ămoosăn tiyyăt taɣĕssa.' A-wen-dăɣ a făl, a-wa osăɣ Măssinăɣ i-ad-umas iyyăn hărăt, wăr t-ibĕḍḍĕwet ăgg-adĕm." 7Ǝnnăn-as: "Adiš mafăl ijanna ănnăbi Mosa a-s: 'Afăl irha ăhalĕs azĕmmĕzzĕy n-hănne-s, ilzam-t ad-tăt-ăkf tăkarḍe n-amĕzzi tĕzzar, izĕmmĕzzĕy-tăt?' " 8Inn'-asăn Ɣisa: "A-wa hawăn-innă ănnăbi Mosa, inn'-awăn-t dăɣ-tĕssĕba n-tăɣart-i jăn ulhawăn-năwăn; ĕnnar wădden a-wen, s-tizarăt a-s dd-tăxlăk ăddunya, wădden a-wen a dd-ăzzăbbăt Măssinăɣ. 9Ăssiilmădăɣ-kăwăn a-s ere hin-ăzmăzzăyăn hănne-s a-s, ija a-wen, wădden tikra a has-tĕja, olăs adubĕn n-iyyăt, izna." 10Ǝggădăn-dd inĕṭṭulab-net, ĕnnăn-as: "Šămad a-wen-dăɣ a ijan, adiš, ufa ɣas, ăqqiima ăwadĕm wăla adubĕn." 11Inn'-asăn Ɣisa: "Wădden ăddinăt iket-năsăn a ăddobătnen ujreh n-măjrăd-wa-dăɣ, wi ikfa Măssinăɣ turhajăt-net ɣas, a t-jarrăhnen. 12Tidĕt, wădden ăddinăt iket-năsăn a ĕjrawnen turhajăt-ten-dăɣ n-ad-ăqqaymĕn wăr-ădobănăn: iyyăḍ, a-s dd-ĕwăn-dăɣ, ĕjrawăn s-a-wen; iyyăḍ, ĕgdălăn-asăn-t imidiwăn-năsăn-i tăn-jănen imudăšăn, ĕkkăsăn-tăn dăɣ-meddĕn; iyyăḍ daɣ, unjăyăn s-adubĕn dăɣ-tĕssĕba n-Tĕmmĕnĕya n-Măssinăɣ. Ere ăddoben ujreh n-măjrăd-wa-dăɣ, ijrăhet-t." 13Ămmewăyăn-dd ḍarăt-a-wen aratăn s-Ɣisa i-ad-tăn-isĕwăr ifassăn-net, ittăr-asăn dăɣ-Măssinăɣ a dăɣ-săn ijăn ălbăraka; ĕnhăyăn inĕṭṭulab ăddinăt wi tăn-dd-ăwwăynen ɣas, ăklăwlăwăn fălla-săn. 14Iɣtăl-tăn Ɣisa, inn'-asăn: "Ăyyăt aratăn ad-hi-dd-ĕkkĕn, wăr tăn-in-tăwweɣăm făll-i, făl-a-s, Tĕmmĕnĕya n-Măssinăɣ, ăddinăt wi dăr-săn ănifăqqănen a-s tăt-ihakk." 15Ăswăr-tăn ifassăn-net ḍarăt-a-wen, ija dăɣ-săn ălbăraka tĕzzar, ifăl edăgg-en. 16Igla Ɣisa har šik-dăɣ ăhalĕs iyyăn da-dăɣ t-dd-ikkăn, inn'-as: "Ălɣalim, ma ămoos emărked wa s-leɣ s-ad-t-ăjăɣ i-ad-ĕjrĕwăɣ tămudre ta tăɣlălăt?" 17Inn'-as Ɣisa: "Mafăl hi-sastanăd d-emărked s-tăddobed iji-net? Milɣaw, Măssinăɣ ɣas a olaɣăn. Ămăra, kunta tărhed ad-tĕjrĕwăd tămudre tăynayăt, adiš, mašăl alămărăn n-Măssinăɣ." 18Inn'-as ămawaḍ: "Win-š alămărăn, ma ămoosăn?" Inn'-as Ɣisa: "Ǝntăneḍ da: Wăr jed iman, wăr jed ĕzzĕna, wăr tokerăd, wăr tăjjĕyhăd s-bahu, 19sĕmɣăr ti-k d-ma-k, tărhĕd anhăraj-năk s-tărha ta jed i-iman-năk." 20Innă ămawaḍ-en i-Ɣisa: "Ăɣdalăɣ i-a-wen-dăɣ iket-net; ma t-illan daɣ hin-oḍanăɣ?" 21Inn'-as Ɣisa: "Kunta tărhed ad-dd-tĕmdĕwăd s-iba n-ălɣib dat-Măssinăɣ, ĕglĕw, tužžăr-in ehăre-năk, tĕkfĕd-t i-tilăqqiwen i-ad-tĕkrĕšăd ărrĕzăɣ dăɣ-ălžănnăt; dihen, ĕqqĕl-dd, ĕlkĕm-ahi." 22Isl' ămawaḍ i-a-wen-dăɣ ɣas, ĕnxăsăn iman-net, inkăr iglă ed a-wa ila dăɣ-ehăre, tikunen. 23Innă Ɣisa ḍarăt-a-wen i-inĕṭṭulab-net: "Ăsidătteɣ-awăn a-s iẓẓĕwăt ad-ijjĕš ere irzaɣăn Tĕmmĕnĕya n-Măssinăɣ. 24Ojăr tărăɣse ta ija ad-ijjĕš amnĕs s-tiṭṭ n-ănaẓmay uhĕn, ad-ijjĕš ere irzaɣăn Tĕmmĕnĕya n-Măssinăɣ." 25Ǝslăn inĕṭṭulab i-a-wen ɣas, ĕqqănăn iɣăfawăn-năsăn, ĕnnăn-as: "Adiš mi madăn-iɣlĕs?" 26Ikyăd dăɣ-săn Ɣisa, inn'-asăn: "A-wen, wăr t-ăsmăkkănăn dăgg-adĕm, măšan Măssinăɣ ĕnta, ăddoobăt-t ed wăr t-illa a has-indarăn." 27Iggăd-dd Bĕṭrus, inn'-as: "Năkkăneḍ-i-š-i oyyănen a-wa nĕla iket-net nĕlkăm-ak, ĕndek isălan-nănăɣ, ma s-ilkam ad-t-nĕjrĕw?" 28Inn'-asăn Ɣisa: "Ăsidătteɣ-awăn a-s ašăl wa dd-mad-tĕzzubbĕt ăddunya-ta tăynayăt-i dăɣ-mad-ixkĕm Ăgg-ăgg-adĕm dăɣ-ălxurmăt-net făll-hărăt iket-net, ad-tăqqaymĕm kăwăneḍ-i hi-ĕlkămnen făll-mărawăt tisăqqima n-tĕmmĕnukĕla d-sănatăt, tĕšrăɣăm tiwsaten ti n-mărawăt d-sănatăt n-Iṣrayil. 29Ere oyyăn ihănan-net d-ayĕtma-s d-šătma-s d-ti-s d-ma-s d-mĕddana-s d-išĕkraš-net dăɣ-ăddimmăt-in, ilmĕdet a-s ad-ijrĕw a-wa hin-oyyă ija temeḍe n-anĕḍfus, ijrĕw daɣ tămudre ta tăɣlălăt. 30Ălwăxla a-s a ăjjeen dăɣ-wi ăzzarnen ašăl-i-dăɣ, ad-ijjĕš ajilal, a ăjjeen daɣ dăɣ-wi hănen ajilal ašăl-i-dăɣ, ad-izar."

will be added

X\