Mătti 18

1Ohăẓăn-dd inĕṭṭulab Ɣisa ălwăqq-wen, ĕnnăn-as: "Ma ămoos ăwadĕm wa ojărăn dăɣ-Tĕmmĕnĕya n-Măssinăɣ?" 2Iɣră-dd Ɣisa ara ĕnḍărrăn s-iman-net, ij'-e jere-săn, 3inn'-asăn: "Ăssiilmădăɣ-kăwăn a-s a tĕkkăsăm wăr tutabăm, talĕhĕm d-aratăn, xăram-awăn ujĕš n-Tĕmmĕnĕya n-Măssinăɣ. 4Ere wa ăsrăsăn iman-net har alăh d-ara-wa-dăɣ, ĕnta a-s wa ojărăn dăɣ-Tĕmmĕnĕya n-Măssinăɣ; 5ere daɣ wa ăsbălălăn ara šund wa-dăɣ, dăɣ-ăddimmăt-in, năkk a ăsbălăl." 6"Aratăn daɣ wi săr-i omănnen, ere hasăn-ămoosăn ĕssĕbab n-tanmĕšrayt-dăɣ, ăwadĕm-en, iššăm-as-in, ad-tĕtwăqqĕn tăhunt ta măqqărăt s-itĕẓẓad ălkăma dăɣ-err-net, itwĕjăr-in dăɣ-ider n-ejărew wa sĕmmăn, ĕkšĕn-t aman. 7Tamăskoyt ăddunya dăɣ-tĕssĕba n-tinmĕšrayen ti dăɣ-s tajjănen făl-a-s, wăr t-illa ĕmmĕk făw s-mad-tăqqayĕm ăddunya-ta-dăɣ wăr dăɣ-s ănmăšrăyăn ăddinăt, măšan, amăskoy ăwadĕm wa madăn-umas ĕssĕbab n-tanmĕšrayt-ten-dăɣ. 8Kăyy, kunta ăfuss-năk meɣ aḍăr-năk a kăy-isifun abăkkaḍ, adiš, ĕnkăḍ-t-in, tĕjrĕd-t-in fălla-k hărwa wăr tămešălăd abăkkaḍ-wen-dăɣ, ed uf'-ak, ad-tĕjjĕšăd ălžănnăt jeed ăfuss, meɣ aḍăr, uhĕn leed ĕssin ifassăn-năk d-ĕssin iḍarăn-năk, tĕtwĕjărăd-in dăɣ-efew wa s-hărkuk ăhijăljăl; 9kunta daɣ tiṭṭ-năk a kăy-isifun abăkkaḍ, adiš, kukkĕrĕt-tăt-dd, tĕjrĕd-tăt-in fălla-k hărwa wăr tămešălăd abăkkaḍ-wen-dăɣ, ed uf'-ak, ad-tĕjjĕšăd ălžănnăt jeed tiṭṭ, uhĕn ad-leed sănatăt tiṭṭawen, tĕtwĕjărăd-in dăɣ-žohănnăma, temse ta s-hărkuk tăhijăljăl. 10He kăwăneḍ! Wăr lăkkăhăt wăl' iyyăn dăɣ-aratăn-win-dăɣ ed ijmaḍ-t ăššăk a-s ĕbdadăn ănjălosăn-năsăn hak ăssaɣăt dat-Abba-nin-i ihăn išĕnnawăn i-ad-tăn wăr-itĕḍḍis hărăt. (( 11Ăgg-ăgg-adĕm, osă-dd i-ad-iɣlĕs ăddinăt wi ăssujjălnen.))" 12Inn'-asăn Ɣisa ḍarăt-a-wen: "Ad-kăwăn-sĕstĕnăɣ: ma tĕnnăm? Kunta ila ăwadĕm temeḍe n-tehăle, har dăɣ-snăt tăssujjăl tiyyăt, ma he-ăj? Wădden ad-ăyy ti n-tĕẓẓayăt timĕrwen d-tĕẓẓayăt ĕfradnăt făll-tiḍaɣen, isĕssĕjjĕl ta hin-oḍăn? 13Afăl-tăt dd-ijrăw, ad-ăj tedăwit tojărăt ta ija a-s ila ti n-tĕẓẓayăt timĕrwen d-tĕẓẓayăt wăren ăssujjăl. 14Ǝmmĕk-wen-dăɣ daɣ a-s mad-ăddăwăt Abba-năwăn-i ihăn išĕnnawăn ed wăr-irha făw ad-iba wăl' iyyăn ɣas dăɣ-aratăn-net. 15Afăl kăy-iḍlăm ă/n/na-k, ăkk'-e, sĕlmĕdăd-t s-a-wa hak-iɣšăd jere-wăn ĕssin-ewăn ɣas. Afăl hak-ăsjăd, adiš jed-t dăɣ-tabarăt ta tolăɣăt, wăr t-illa daɣ a iḍasăn temiḍt-năwăn 16măšan, afăl unjăy s-asjĕd-hak, ĕqqĕl-t-dd tăddewăd d-ăwadĕm, meɣ ĕssin, dăɣ-tĕssĕba n-ad-ăjjayhăn ăddinăt i-a-wa itawănnen iket-net ed 'Hărăt iket-net, ufa ad-ila sănatăt meɣ kăraḍăt tijuhawen.' 17Afăl jed a-wen-dăɣ uhĕn-dăɣ har ămăra-dăɣ, unjay s-asjĕd-hawăn, sĕrrĕwrĕw-as s-ălkănisăt. Afăl has-tĕmmĕjrăd ălkănisăt har unjăy s-asjĕd-has, umaset data-k šund ănăẓẓalim n-amăjar, meɣ šund ănarmas n-tiwse. 18Ăsidătteɣ-awăn a-s a-wa tĕkrădăm făll-ărori n-ăkall-i-dăɣ, ad-itwĕkrĕd ašăl wa ilkămăn, a-wa torăm daɣ făll-ărori n-ăkall-i-dăɣ, ad-ămar daɣ ašăl wa ilkămăn. 19Ăssiilmădăɣ-kăwăn daɣ a-s făll-ărori n-ăkall-i-dăɣ, edăgg dăɣ-ănmărḍăn ĕssin dăɣ-wăn făll-talɣa, a tămoos-dăɣ, har dălăn Abba-nin-i ihăn išĕnnawăn, ad-ăj a-wa dăɣ-s ĕttărăn 20făl-a-s edăgg iket-net dăɣ-ăžžimmăɣăn ĕssin, meɣ kăraḍ inĕṭṭulab-in, dăɣ-ăddimmăt n-isĕm-in, ĕlleɣ jere-săn." 21Ohăẓ-t-dd Bĕṭrus ălwăqq-wen, inn'-as: "Ălɣalim! Har maniket ihăndăggan d-hi-tĕwar tenăšše i-ă/n/na-ɣ hi-iḍallămăn? Ak, ajăn ĕgdăhăn ĕssa ihăndăggan?" 22Inn'-as Ɣisa: "Ăbo, wăr-ĕnneɣ har ĕssa ihăndăggan, a hak-janneɣ, našš'-as har ĕssayăt timĕrwen janen ĕssa inĕḍfusăn." 23Issăɣlăy-tăn Ɣisa tangalt, inn'-asăn: "Tĕmmĕnĕya n-Măssinăɣ, tănifăqqa d-ămănokal dd-issăɣrăn ăddinăt wi irwăs i-ad-has-siḍĕnĕn a-wa tăn-irwăs, ĕẓĕlăn-as. 24Han isălan n-a-wen-dăɣ a-s dd-ittĕlwăy ănaxdim-net iyyăn irwas aẓrĕf-i-dăɣ ăjjen. 25Măšan ma n-ĕmmĕk! Indăr-as ad-iẓĕl aẓrĕf-wen-dăɣ ɣas, omăr măssi-s s-ad-hin-ănš ĕnta d-hănne-s d-aratăn-net d-a-wa ila dăɣ-ilalăn iket-net i-ad-inmiwĕḍ ĕnta d-ehăre-net. 26Isl' ănaxdim i-a-wen ɣas, ošăl s-măssi-s, irkăɣ dat-măssi-s, ad-t-ilaqqăd, ijann'-as: 'Ya măssi-ɣ, ĕṣbăr făll-i tene-ta-dăɣ, tĕkfĕd-ahi tăqqăn tăynayăt i-ad-hak-ĕẓĕlăɣ ehăre-năk iket-dăɣ-net.' 27Tănɣa tăhanint-net măssi-s ɣas, ăsdărfăt, inš'-as-in a-wa t-irwăs iket-net. 28Măšan, diha-dăɣ dd-izjăr ănaxdim-ĕnnin-dăɣ făll-măssi-s, ad-ămmoqqăs d-iyyăn dăɣ-imidiwăn-net dăr-ănnixdăm irwas hărăt n-aẓrĕf, ăkbăttăt-t s-tăkorsăyt, oɣay-as, ijann'-as: 'Ǝẓĕl-ahi ehăre-in wa kăy-ihăn.' 29Irkăɣ-as amidi-net, ad-t-ilaqqăd, ijann'-as: 'Ǝṣbăr făll-i, ad-hak-ĕẓĕlăɣ ehăre-năk.' 30Unjăy s-ad-has-isĕjĕd, ilwăy-t, ăswăjj'-e dăɣ-takărmut i-ad-tăt-iha har has-iẓĕl a-wa t-irwăs iket-net. 31Ǝnhăyăn inaxdimăn wi iyyăḍnen dăr-ănniixdăm a-wa ija amidi-năsăn ɣas, ĕknăn iman-năsăn tisnant, ĕglăn, jăn isălan n-a-wa ijăn iket-net dăɣ măssi-săn. 32Issăɣr'-e-hi-dd măssi-s, inn'-as: 'Kăyy ănaxdim n-enăllăbăs a tămoosăd! Ajăn wădden tĕlɣădăd-ahi ɣas, oyyeɣ-ak-in a-wa kăy-ărwăsăɣ iket-net. 33Adiš, ma hak-igdalăn, ad-taḍĕnăd tăhanint šund ta hak-oḍănăɣ i-amidi-năk?' 34Ijjăš-t aḍkăr hullan făll-akli-net-wen-dăɣ, issăɣră-dd gărdităn-net i-ad-t-in-ĕjărăn dăɣ-takărmut, ăqqayĕm ihannăy dăɣ-s aɣăna har iẓĕl a-wa t-irwăs has-in-oyya ihĕnnin iket-dăɣ-net." 35Innă daɣ ḍarăt-a-wen: "Ǝlmĕdăt a-s šund a-wen-dăɣ a hawăn-mad-ăj Abba-nin-i ihăn išĕnnawăn, afăl wăr tĕnmĕnšim jer-iman-năwăn s-ulh imdan."

will be added

X\