Mătti 17

1Săḍis išilan ḍarăt a-s inna a-wen-dăɣ, iɣră-dd Bĕṭrus d-Yaqub d-Exya wa n-ă/n/na-s n-Yaqub s-edes, ikka dăr-săn taḍaɣt tiyyăt šĕjreet. 2Ǝllan-t dihen-dăɣ a-s ijjăš data-săn ini ăynayăn, ămmuttăy, ăsmăɣmăɣ idĕm-net šund tăfukt, jăn-dd imălsan-net tĕmĕlle ta n-ănnur ăsimăɣmăɣăn. 3A ĕnḍărrăn ănnăbi Mosa d-ănnăbi Ɣĕli da-dăɣ hasăn-dd-ănfalălnen, falăn-dd išĕnnawăn, ad-tamăjradăn d-Ɣisa. 4Iggăd-dd Bĕṭrus, innă i-Ɣisa: "Ălɣalim, ufa ad-nĕzzăɣ ɣas diha-dăɣ, kunta tărḍed s-a-wen, ad-ĕkrĕsăɣ kăraḍ ihĕktan: wa-năkk, wa n-Mosa d-wa n-Ɣĕli." 5Hărwa-dăɣ ămmiijrăd a-s, tejărăkt tiyyăt tăsimăɣmăɣăt da-dăɣ tăn-dd-tĕlsăt s-tele-net, ijmăḍ-tăt-dd emăsli innăn: "A-wa Rure-ɣ wa ĕkneeɣ tărha, ĕnta a dăɣ-ăsriwăn iman-in, săjdăt-as!" 6Ǝslăn inĕṭṭulab i-emăsli-wen-dăɣ ɣas, hăn-dd ăbbunbăyăn iket-dăɣ-năsăn a-wa-dăɣ hasăn-tĕja tărĕmmeɣt. 7Ikk'-en-dd Ɣisa, issĕnsă ifassăn-net fălla-săn, inn'-asăn: "Wăr tĕrmeɣăm, ĕnkărăt-dd." 8A-s dd-ĕḍkălăn idmawăn-năsăn, wăr t-illa ere hannăyăn ar Ɣisa. 9Ătrarăn-dd taḍaɣt ɣas, inn'-asăn Ɣisa: "Wăr jem isălan n-a-wa hawăn-dd-ănfalălăn ašăl-i-dăɣ i-ăwadĕm wăl' iyyăn, har ašăl wa dd-mad-inkăr Ăgg-ăgg-adĕm jer-inĕmmuttan." 10Ǝssĕstănăn-t ḍarăt-a-wen, ĕnnăn-as: "Mafăl jannen ălɣulam n-Ăṭṭăwrăt a-s ănnăbi Ɣĕli a ilan s-ad-dd-ass tĕzzar, išrĕy-t-dd Ălmasex?" 11Ăwwežăb-asăn, inn'-asăn: "Tidĕt, ănnăbi Ɣĕli a ilan s-a-dd-ass, isĕssiɣĕd hărăt iket-net, 12măšan, ăssiilmădăɣ-kăwăn a-s ănnăbi Ɣĕli, ăru dd-osa, ăkkuddălăn-t dăgg-adĕm, jăn-as a-wa s-ărhăn. A-wen-dăɣ has-jăn a-s ilkam daɣ, ad-t-ĕjĕn i-Ăgg-ăgg-adĕm." 13Inn'-asăn a-wen ɣas, ĕfhămăn inĕṭṭulab a-s Exya wa n-Enĕsselmăɣ a-s hasăn-iha ti-net. 14Ălwăqq wa dd-iqqăl Ɣisa d-inĕṭṭulab-net tamĕtte, ikk'-e-hi-dd ăhalĕs iyyăn, irkăɣ data-s a t-ilaqqăd, ijann'-as: 15"Ălɣalim, aḍĕn tăhanint i-rure-ɣ, tĕjraw-t tašăkărkărăt t-saknet aɣăna hullan. E-d t-tărmăs, ad-itiḍĕw dăɣ-efew, itiḍĕw dăɣ-aman dehiyyăn. 16Ăwwăyăɣ-t-dd s-inĕṭṭulab-năk măšan, indăr-asăn ad-t-zuzĕyăn." 17Innăḍ-dd Ɣisa ḍarăt-a-wen s-inĕṭṭulab-net, inn'-asăn: "Ya ĕzzurĕyăt-i-dăɣ wărăt tomen s-Măssinăɣ, tănimăšrăy-as, hundăɣ har ĕmme ĕlleɣ jere-wăn, ĕṣbarăɣ-kăwăn? Awĕyăt-ahi-dd alyaḍ." 18Os'-e-hi-dd alyaḍ, ăsmăhăḍ Ɣisa dăɣ-alšin i-ad-t-izjăr; izjăr-t, izzăy ăssaɣăt-wen-dăɣ. 19Ǝkkăsăn-dd inĕṭṭulab ḍarăt-a-wen Ɣisa s-ăssaɣăt d-wăr ɣur-s t-illa ăwadĕm s-takše, ĕnnăn-as: "Alšin-wĕnnin-hi, mafăl hanăɣ-indăr ad-t-nĕkkĕs dăɣ-alyaḍ?" 20Inn'-asăn: "Tĕmmĕtkit-i ija immun-năwăn a hawăn-igdălăn s-a-wen; ĕnnar wădden a-wen, ăssiilmădăɣ-kăwăn a-s afăl ogdăh immun-năwăn d-temătăwt ta tojărăt tĕmmĕtkit dăɣ-idommăn har tĕnnăm i-aḍaɣ-wa-dăɣ: 'Haan dăɣ-edăgg wa hed, tĕddĕkăd dihen', ad-ăj a-wa has-tĕnnăm; ad-ăbas t-illa făw a hawăn-indarăn. (( 21Alšin daɣ šund wa-hi, wăr t-itĕkkĕs ar tamădilt n-Măssinăɣ d-ăẓum.))" 22Ălwăqq wa dd-iqqăl Ɣisa d-inĕṭṭulab-net teje ta n-Galila, inn'-asăn: "Ăgg-ăgg-adĕm, išwar ăttermăs, ijjĕš ifassăn n-ăgg-adĕm, 23ad-ĕjĕn iman-net măšan, ašăl wa n-kăraḍ, ad-dd-inkăr jer-inĕmmuttan." Ǝnxăsăn iman n-inĕṭṭulab a-s hasăn-innă a-wen-dăɣ. 24Ijjăš Ɣisa d-inĕṭṭulab-net taɣrĕmt ta n-Qăfărnaxum ɣas, osăn-dd inarmasăn n-tiwse n-ehăn n-ămudd wa măqqărăn Bĕṭrus, ĕnnăn-as: "Ajăn ălɣalim wa-năwăn, wăr-ihĕkk tiwse ta n-ehăn n-ămudd wa măqqărăn?" 25Inn'-asăn Bĕṭrus: "Ihakk'-et lab." Ijjăš-dd Bĕṭrus ehăn făll-Ɣisa ɣas, iššĕšwăr-as Ɣisa, issĕstăn-t, inn'-as: "Ma torded Simyon, mi ilan s-ad-itĕẓẓal tiwse i-imănokalăn n-ăddunya: ak imăjarăn meɣ kăl-ăkall a lanen s-ad-hasăn-ĕẓĕlăn tiwse?" Inn'-as Bĕṭrus: "Imăjarăn." 26Inn'-as Ɣisa: "Adiš kăl-ăkall, wăr tăn-tĕlzem. 27Ămăra, i-ad-wăr năqqen iɣăfawăn n-ăddinăt n-ehăn n-ămudd wa măqqărăn rammăsnen tiwse, ăkk ejănš, tĕrmĕsăd-dd dăɣ-s emăn iyyăn, tarĕd emm-net, ad-dăɣ-s tĕjrĕwăd ărriyal n-aẓrĕf, tĕkkĕsăt-t-dd, tĕẓlĕd fălla-năɣ năkk d-kăyy."

will be added

X\