Mătti 16

1Ašăl iyyăn, osăn-dd hărăt dăɣ-kăl-faris d-kăl-sadus Ɣisa, jăn-as asĕstan dăɣ-otasăn irrum-net, i-ad-ĕjrĕwăn ăsaru făl t-ĕssĕḍlămăn, ĕnnăn-as: "Ăj data-năɣ iji n-Măssinăɣ hanăɣ-issĕtbătăn a-s tidĕt-dăɣ a-s Măssinăɣ a kăy-dd-ăšmašălăn." 2Ăwwežăb-asăn, inn'-asăn: (("Ajăn wădden e-d tăbok tăfukt i-ejăḍăl har tĕnhăyăm a-s šăggaɣ, ad-tĕnnĕm: 'Ašĕkka, wăr-e iwĕt ajĕnna.' 3Afăl ăffăw har tĕnhăyăm ajĕnna ikannă-dd, ad-tĕnnĕm: 'Ašăl-i, ad-iwĕt ajĕnna, ĕnhĕywăt-ak, kăwal-dd.' Kăwăneḍ-i s-e-d tĕkyădăm išĕnnawăn, ad-tĕlmĕdăm a-wa dd-imalăn, mafăl hawăn-indar ad-tăɣrĕm išmal n-ăzzămanăn wi jănen, tĕfhĕmăm ălmăɣna-năsăn?)) 4Kăl-ĕzzurĕyăt-ta-dăɣ, tenăllăbăst n-temăznit, wăr tĕmmăɣ ɣas ar i-ad-ĕtwĕjjĕn ijităn n-Măssinăɣ data-s măšan, tĕlmĕdet a-s wăr dăɣ-s ilkem iji n-Măssinăɣ săl wa n-ănnăbi Yunĕs." Inn'-asăn Ɣisa a-wen ɣas, ifăl-tăn, iglă. 5Ijlăy Ɣisa ĕnta d-inĕṭṭulab-net ejănš s-ašrut wa iyyăḍăn. Ǝglan făll-ejănš-en-dăɣ a-s dd-ĕktăn inĕṭṭulab-net a-s wăr-ĕwweyăn ăzzad dăɣ-tijĕlwen. 6Ǝjlăyăn ejănš ɣas, inn'-asăn Ɣisa: "He kăwăneḍ! Agĕẓăt iman-năwăn dăɣ-tăẓẓa ta n-kăl-faris d-kăl-sadus." 7Inn'-asăn Ɣisa a-wen ɣas, ad-tinmĕnnin jer-iman-năsăn: "A-wa, a-wa dăɣ s-wăr nĕwwey tijĕlwen a făl hanăɣ-itajj măjrăd-wa-dăɣ." 8Ilmăd Ɣisa ɣur-iman-net a-wa dăɣ-zinĕzjumăn, inn'-asăn: "Mafăl tinmĕnnim? 'A-wa, a-wa dăɣ s-wăr năwwey tijĕlwen a făl hanăɣ-itajj măjrăd-wa-dăɣ', tĕmmĕtkit ija immun-năwăn. 9Adiš, kăwăneḍ har ămăra-dăɣ, wăr t-illa a tĕjrahăm? Ajăn tĕttĕwăm-in sĕmmosăt tijĕlwen-ti tăẓunăm i-sĕmmos afḍăn n-ăhalĕs? Maniket deketăn dd-tăsdăwăm dăɣ-a-wa dd-tĕjlăš tamĕtte? 10Adiš tĕttĕwăm-in ĕssayăt tijĕlwen-ti s-ăsyăwănăɣ ĕkkoẓ afḍăn n-ăhalĕs, maniket deketăn dd-tĕjlăš tamĕtte? 11Ma hawăn-igdalăn ad-tĕfhĕmăm a-s wădden tijĕlwen a dăɣ-hawăn-ăssewălăɣ? A hawăn-ĕnnĕɣ: 'Agĕẓăt iman-năwăn dăɣ-tăẓẓa ta n-kăl-faris d-kăl-sadus.' " 12Inn'-asăn Ɣisa a-wen ɣas, ĕfhămăn a-s wădden isălan n-tăẓẓa ta n-tijĕlwen a dăɣ-hasăn-ăssewăl, ănn-ak, ămmijrăd-asăn dăɣ-isălan n-ad-agĕẓăn iman-năsăn dăɣ-a-wa săɣren kăl-faris d-kăl-sadus. 13Ikkă Ɣisa ḍarăt-a-wen aɣrĕm s-itawănna Qăyṣăra wa n-Fĕlibb. Dihen-dăɣ ad-issĕstăn inĕṭṭulab-net, inn'-asăn: "Ma jannen ăddinăt, mi ămoos Ăgg-ăgg-adĕm?" 14Ǝnnăn-as: "Iyyăḍ jannen: kăyy a-s Exya wa n-Enĕsselmăɣ; iyyăḍ jannen: kăyy a-s ănnăbi Ɣĕli; iyyăḍ făw a jannen: kăyy a-s ănnăbi Yirmiya meɣ iyyăn dăɣ-ănnăbităn dd-olasăn uɣĕl." 15Inn'-asăn: "Kăwăneḍ-š, ma tĕnnăm, mi ămoosăɣ?" 16Iggăd-dd Bĕṭrus, inn'-as: "Kăyy a-s Ălmasex wa n-Rure-s n-Măssinăɣ-i iddărăn." 17Inn'-as Ɣisa: "Simyon ăgg Exya, tĕnḍĕḍ-ak ed isălan wi s-iket tăn-jed, wădden ad-dd-tĕkkasăd dăɣ-eɣăf-năk, Abba-nin-i hăn išĕnnawăn a hak-tăn-dd-ăsnăfalălăn. 18Năkk daɣ, ĕnneɣ-ak: isĕm-năk Bĕṭrus, ăssiilmădăɣ-kăy a-s făll-tăhunt-ten-dăɣ, ad-mad-ădyăɣ ălkănisăt-in s-ălaxărăt wăla Iblis, wăr fălla-s mad-ikrĕš ašăl; 19ad-kăy-ăkfăɣ isyar n-Tĕmmĕnĕya n-Măssinăɣ, a tĕgdălăd făll-ărori n-ăkall, ad-itwĕgdĕl dăɣ-išĕnnawăn, a tăqbălăd făll-ărori n-ăkall, ad-itwăqbĕl dăɣ-išĕnnawăn." 20Ăsmăhăḍ Ɣisa ḍarăt-a-wen s-ăṣṣahăt dăɣ-inĕṭṭulab-net i-ad-wăr-ĕnnen i-ăwadĕm wăl' iyyăn a-s ĕnta a-s Ălmasex. 21Ɣur-ašăl-wen-dăɣ, ad-issĕntă Ɣisa asĕlmad n-inĕṭṭulab-net a-s ilzam-t ad-ăkk Yărussălăm, inhĕy dăɣ-s tersĕmmawen ăjjootnen jer-ifassăn n-inušămăn wi n-Iṣrayil d-imănokalăn n-kăl-tikutawen d-ălɣulam n-Ăṭṭăwrăt; ad-ĕjĕn iman-net măšan, ašăl wa s-kăraḍ ḍarăt tamăttant-net, ad-dd-inkăr jer-inĕmmuttan. 22Ij'-asăn Ɣisa măjrăd-wen-dăɣ ɣas, ikkăs-t-dd Bĕṭrus s-takše, ad-itiklĕwlĕw fălla-s, ijann'-as: "Ălɣalim, ogăẓ-kăy Măssinăɣ! A-wen ya, wăr t-illa ĕmmĕk s-kăy-irmăs." 23Ikna Ɣisa akăyad dăɣ-Bĕṭrus, inn'-as: "Šĕnkĕš făll-i Iblis-wa, kăyy ĕssĕbab n-anmĕšri a hi-tămoosăd ed inĕzjam-năk, i n-dăgg-adĕm wădden i n-Măssinăɣ." 24Inna Ɣisa ḍarăt-a-wen i-inĕṭṭulab-net: "Ere irhăn alkum-hahi-dăɣ, adiš, iksĕnet iman-net, ăjet făll-tamăttant šund ta n-tajĕttewt tĕzzar, ilkĕmet-ahi. 25Wa wărăn itĕttăr ar ĕmmĕk s-ogăẓ iman-net dăɣ-ăddunya-ta-dăɣ, ad-ifut dăɣ-ălžănnăt măšan, wa irḍăn ăfota dăɣ-iman-net dăɣ-ăddunya-ta-dăɣ, dăɣ-ăddimmăt-in, ad-ijjĕš ălžănnăt. 26Ma s-infa ăgg-adĕm ad-irbăx ăddunya iket-dăɣ-net, a-s ija a-wen, ăfota dăɣ-ălaxărăt? Ajăn ma t-illan s-ăddoobăt ăwadĕm ad-t-ăkf i-ad-săr-s iɣlĕs iman-net dăɣ-temse? 27Ašăl wa dd-mad-iqqĕl Ăgg-ăgg-adĕm dăɣ-ălxurmăt n-Abba-net ăddeew d-ănjălosăn-net, ašăl-en, hak ăwadĕm d-a-wa has-jăn imojjan-net. 28Ăssiilmădăɣ-kăwăn a-s han-kăwăn ăddinăt ĕbdadnen diha-dăɣ, wăr-e iba, wăr-ĕnheyăn Ăgg-ăgg-adĕm ijjaš Tĕmmĕnĕya-net."

will be added

X\