1 Osăn-dd kăl-faris iyyăḍ d-hărăt dăɣ-ălɣulam n-Ăṭṭăwrăt dd-falnen Yărussălam Ɣisa, 2 ĕnnăn-as: "Mafăl tinmĕšrĕyăn inĕṭṭulab-năk i-agna wa hanăɣ-dd-oyyăn imărawăn-nănăɣ? Tattăn wăr-ăsserădăn ifassăn-năsăn s-ĕmmĕk wa s-t-ifrăḍ agna-nănăɣ." 3 Ăwwežăb-asăn Ɣisa, inn'-asăn: "Ad-kăwăn-sĕstĕnăɣ: kăwăneḍ-š, mafăl tinmĕšrĕyăm i-alămăr wa n-Măssinăɣ, tajjăm agna-năwăn jĕnnĕj-s? 4 Wădden Măssinăɣ innă: 'Sĕmɣăr ti-k d-ma-k', innă daɣ: 'Ere ăbodărăn ti-s meɣ ma-s, adiš, ămmătet.' 5 Tĕssanăm s-a-wen-dăɣ iket-net măšan, iyyăḍ dăɣ-wăn, saɣren ăddinăt a-s ăddoobăt ăwadĕm ad-ănn i-ti-s d-ma-s: 'A-wa s-ăsidărhănăɣ ad-kăwăn-ĕdhĕlăɣ săr-s, jeɣ-t takute i-Măssinăɣ.' Ija ɣur-wăn a-s ere innăn a-wen-dăɣ i-imărawăn-net, ad-ăbas t-iwar ălxaqq-năsăn. 6 Ǝnhĕywăt ɣas a-wa kăwăn-išlăn: tăsbăṭṭălăm-in a-wa inna Măssinăɣ, jăm a-wa hawăn-inna agna-năwăn dăɣ-edăgg-net. 7 Ălmunafeɣăn yaden! Tidĕt a-wa fălla-wăn innă ănnăbi Saya a-s innă, innă Măssinăɣ: 8 'Tamĕtte ta-hi, iḍlay-net ɣas a-s hi-tăssiimɣăr ulh-net, ujĕj-ahi; 9 Ălɣibadăt-wa hi-tăjj d-tikutawen ti hi-tăjj, mălayăɣna ɣas ed a-wa săɣren făll-ismawăn n-Măssinăɣ, wăr ămoos ɣas ar fărĕḍăn dd-ăɣtasăn i-iman-năsăn.' " 10 Iɣră-dd Ɣisa tamĕtte s-iman-net ḍarăt-a-wen, inn'-as: "Săjdăt, tĕjrăhăm a-wa hawăn-janneɣ: 11 wădden a-wa itajjăšăn emm n-ăgg-adĕm a t-isamăḍasăn, a-wa dd-itĕffalăn ammas n-ulh-net ijănna s-emm-net a t-isamăḍasăn dat-Măssinăɣ." 12 Ohăẓăn-t-dd inĕṭṭulab-net, ĕnnăn-as: "Kăyy ya, a-wa tĕnned, ikma kăl-faris hullan." 13 Inn'-asăn Ɣisa: "E d t-illăm emăɣt s-wădden Abba-nin-i ihăn išĕnnawăn a t-ăddomen, ilkam, ad-hin-ăttălbăy. 14 Ăyyăt kăl-faris d-iman-năsăn, olăhăn ɣas d-imalwayăn dărɣalnen; emĕdderɣĕl ya ilwayăn amidi-net, ejăḍăl ɣas a ĕkkan issĕnăn-essăn dăɣ-anu." 15 Iggăd-dd Bĕṭrus, inn'-as: "Fassăr-anăɣ tangalt-ta-dăɣ jed. " 16 Inn'-asăn Ɣisa: "Ɣas kăwăneḍ-dăɣ, wăr t-illa a tĕjrahăm hărwa? 17 Ajăn wăr tĕjrehăm a-s ăsink esăk? A-wa isuk ăwadĕm emm-net, tăsa-net ɣas a itakk, ijăr-t-in ḍarăt-a-wen dăɣ-tăkoyt 18 măšan, măjrăd wa dd-izajjărăn emm n-ăwadĕm, ulh-net a dd-itĕffal, ĕnta-den-dăɣ a-wa t-isamăḍasăn dat-Măssinăɣ 19 făl-a-s ulh n-ăgg-adĕm, a dd-itĕffal erk ĕnniyăt, iji n-iman, ĕzzĕna, iba n-tăkrakiḍt, tikra, tajuhe n-bahu, tĕkkufăra. 20 Ǝntăneḍ-den-dăɣ hărătăn wi samăḍasnen ăwadĕm, wădden tetăte wăr-ăsserăd ifassăn-net." 21 Ifăl Ɣisa edăgg-en ĕnta d-inĕṭṭulab-net ɣas, ikkă teje ta hăn iɣărman wi n-Tir d-Săyda. 22 Ill'-ee dihen-dăɣ a-s šik-dăɣ, tamăḍt tiyyăt ila ăkall wa n-Xăna da-dăɣ t-dd-tosăt, ad-t-laqqăd, saɣărat, jann'-as: "Ălɣalim! Ya Ăgg-Dawĕd, aḍĕn-ahi tăhanint; elle-ɣ tăllubbăḍ, issĕkn'-et alšin wa tăt-ihăn aɣăna." 23 Wăr t-illa a has-inna Ɣisa. Ǝggădăn-dd săr-s inĕṭṭulab-net, ĕnnăn-as: "Săfĕl-anăɣ tamăḍt-ta-dăɣ, tăsɣăf-anăɣ, e-s nĕkka-dăɣ, tăseɣărăt ḍara-năɣ!" 24 Inn'-asăn Ɣisa: "Năkk tamĕtte ta n-kăl-Iṣrayil-i toolăhăt d-tihatten ăssujjălnen a-s hi-dd ăšmašăl Măssinăɣ. A-wa săl ĕntăneḍ, wăr hi-săr-s-dd-ăšmašăl." 25 Măšan hakd a-wen-dăɣ, tĕkk'-e-hi-dd tamăḍt, tărkăɣ data-s, tĕnn'-as: "Ălɣalim, ĕkkĕs-ahi tekăriḍt." 26 Ăwwežăb-as Ɣisa, inn'-as: "Wăr-ănhăjja ad-dd-ikkĕs ăwadĕm amĕnsi daw-aratăn, ijăr-t-in i-iyyăḍan?" 27 Tĕnn'-as tamăḍt: "Ălɣalim, tidĕt măšan, a-wen wăr-ikkes a-s afăl ălwăqq wa d-itătt măssi-s n-ehăn, ăddooben iyyăḍan ad-ăkkămen a-wa ititrĕkkin." 28 Ja măjrăd-wen-dăɣ ɣas, inn'-as Ɣisa: "Tamăḍt! Immun-năm, tidĕt-dăɣ a-s i măqqărăn; ăjet a-wa tĕttărăd." Tĕzzăy elle-s dăɣ-tamăzăyyat-ten-dăɣ. 29 Ifăl Ɣisa teje-ten-dăɣ ɣas, ikkă asălim n-ejănš wa n-Galila, iwwăn dihen taḍaɣt tiyyăt ăqqima fălla-s. 30 Ǝkkăn-t-dd ăddinăt ăjjootnen ăwwaynen inĕbdan d-imĕddorɣal d-inaɣyabăn d-ăddinăt s-ĕkradăn ilsawăn-năsăn d-imarhinăn ăjjootnen, ĕssĕnsăn-tăn daw-iḍarăn-net; ăzozăy-tăn iket-dăɣ-năsăn. 31 Ăkunăn ăddinăt dăɣ-a-wa ija ed hannăyăn a-s, wi s-kăla ĕkrăsăn ilsawăn-năsăn, tamăjradăn; inaɣyabăn, tazzăyăn; inĕbdan, rajjăšăn; imĕddorɣal, hannăyăn. Tĕnhăy tamĕtte a-wen ɣas, ad-t-timĕl, janna: "Tĕmmal i-Emăli wa n-Iṣrayil." 32 Ikkăs-dd Ɣisa inĕṭṭulab-net s-takše, inn'-asăn: "Naqq'-ahi tăhanint n-tamĕtte-i-dăɣ; a ilan kăraḍ išilan, tĕlkam-ahi, ăbas ĕṭṭafăn ăddinăt a ĕkšăn, wăr-ăddobeɣ ad-tăn-săglăɣ ălluẓăn s-ĕmmĕk-wa-dăɣ, ad-hasăn-indăr ad-hin-awĕḍăn ihănan-năsăn făl iba n-ăṣṣahăt." 33 Ǝnnăn-as inĕṭṭulab-net: "Ǝndek diha d-mad-nĕjrĕw tijĕlwen ăššikšănen tamĕtte jat ĕjut-wa-dăɣ dăɣ-tenere-ta-dăɣ?" 34 Inn'-asăn: "Maniket tijĕlwen tĕṭṭăfăm?" Ǝnnăn-as: "Ǝssayăt, nĕṭṭaf daɣ hărăt n-imănan." 35 Ăsɣăyma Ɣisa tamĕtte iket-net, 36 iḍkăl ḍarăt-a-wen tijĕlwen ti n-ĕssayăt d-a-wa t-ĕkfăn dăɣ-imănan, ămmoy i-Măssinăɣ, ăfrăsfărăs annin-dăɣ iket-net tĕzzar, ikf'-e i-inĕṭṭulab i-ad-t-uẓanăn jer-ăddinăt. 37 Tĕkša tamĕtte ta tĕllăt dihen-dăɣ hundăɣ har tĕyyĕwăn iket-dăɣ-net, ăsdăwăn-dd inĕṭṭulab a-wa dd-ĕjlăšăn ăddinăt, osăn-t iḍnay ĕssa deketăn. 38 Ǝkkoẓ afḍăn n-ăwadĕm dăɣ-wăr ăḍḍinnăt tiḍeḍen d-aratăn a ikšăn ašăl-wen-dăɣ. 39 Issĕglă Ɣisa tamĕtte ḍarăt-a-wen tĕzzar, ijjăš turăft n-aman, ikkă teje ta n-Magadan.
