Mătti 14

1Ăzzăman-en-dăɣ ad-dd-iwwăḍ mawmaw n-Ɣisa Harudĕs wa n-ămănokal n-teje ta n-Galila. 2Issăɣră-dd kăl-ĕlxĕkum-net, inn'-asăn: "Ăhalĕs-wa-hi s-săllăɣ, Exya wa n-Enĕsselmăɣ dd-olasăn tanăkra jer-inĕmmuttan, a-wen-dăɣ a t-ikfăn tărna n-tikunen ti itamašal." 3Innă Harudĕs a-wen făl-a-s ĕnta iman-net a ăstărmăsăn Exya, ij'-e dăɣ-tišĕm tĕzzar ij'-e dăɣ-takărmut, dăɣ-tĕssĕba n-Harudĕyăt ta n-hănne-s n-ă/n/na-s Fĕlibb dăɣ-s ohăɣ Harudĕs. 4Ăzzăman-en-dăɣ ad-ăsmăqqa Exya făll-Harudĕs, inn'-as: "Wăr hak-xălal ad-tărkĕbăd hănne-s n-ă/n/na-k." 5Ad-itammăɣ ya Harudĕs i-ăsaru făl t-issănɣa măšan, ăksuḍ tamĕtte ed iket-net tĕssan a-s Exya, ănnăbi a ămoos. 6Tĕgla tanfust har ašăl wa n-isĕkta n-tiwit n-ămănokal Harudĕs. Ašăl-en, dăɣ-ăzzăho wa ijăn, tĕggăd-dd elle-s n-Harudĕyăt, ad-dallăl dat-imăjarăn wi-dd-osănen; ijrăẓ a-wen i-ămănokal. 7Dăɣ-tedăwit-net, iɣr'-et-dd, ijjăš-as ărkăwăl n-ad-tăt-ăkf a-wa dăɣ-s mad-tĕttăr, a ămoos-dăɣ. 8Tĕglă talyaḍt, tĕttăr ăddăbara dăɣ-ma-s, tĕntăj-tăt-dd ma-s, tĕnn'-as, ănn'-as: "Ărheeɣ dăɣ-k eɣăf n-Exya insa dăɣ-aẓăwa." Tĕglă tămawaḍt, ja isălan dăɣ-ămănokal. 9Ǝnxăsăn iman n-ămănokal măšan, ăbas ăddoobăt uɣĕl s-a-wa inna, ed ihăḍ-as s-ad-tăt-ăkf a-wa dăɣ-s mad-tĕttăr, a ămoos-dăɣ, dat-imăjarăn-net. Omăr ḍarăt-a-wen s-ad-itwĕjj a-wa tărha. 10Issĕglă ăwadĕm wa inakkăḍăn iɣăfawăn n-kăl-takărmut wi lănen s-tamăttant, inkăḍ-dd eɣăf n-Exya, 11ăwwăy-t-dd insa dăɣ-aẓăwa; ikf'-e i-talyaḍt, tăwwăy-t talyaḍt i-ma-s. 12Osăn-dd inĕṭṭulab n-Exya ḍarăt-a-wen, ĕḍkălăn tafĕkka-net, ĕẓkăn-tăt; ĕkkăn Ɣisa, jăn dăɣ-s isălan. 13Ǝjjăšăn isălan n-iba n-Exya Ɣisa ɣas, ifăl teje-ten-dăɣ dăɣ-turăft n-aman, ikkă tenere n-iman-net măšan, ĕslăn-t ăddinăt ɣas, fălăn-dd iɣărman, ălliilăn asălim n-ejănš, ĕlkamăn-as. 14Izjăr-dd Ɣisa turăft n-aman, inhăy tamĕtte-ta-dăɣ tăjjet has-dd-tĕlkămăt ɣas, tănɣ'-e tăhanint-net, ad-dăɣ-săn izizuy wi n-inaɣyabăn. 15Ja takkăṣt ɣas, ohăẓăn-t-dd inĕṭṭulab-net, ĕnnăn-as: "Ălɣalim, tenere a nĕha, ij'-anăɣ ehăḍ, sĕfĕl iman-năk tamĕtte, ad-tăkk tidbi-ti ohăẓnen žănš-dd a tĕkša." 16Inn'-asăn Ɣisa: "Wăr ămɣatărăn s-ad-ĕkkĕn edăgg. Un, šăkšăt-tăn kăwăneḍ iman-năwăn." 17Ǝnnăn-as: "Wăr nĕṭṭef ar sĕmmosăt tijĕlwen d-ĕssin imănan." 18Inn'-asăn: "Awĕyăt-ahi-dd a-wa tĕṭṭăfăm." 19Omăr ḍarăt-a-wen s-ad-ăqqaymĕn ăddinăt făll-teyĕšše, iḍkăl tijĕlwen ti n-sĕmmosăt d-imănan wi n-ĕssin, ăjoẓăy išĕnnawăn, ămmoy i-Măssinăɣ; ăfrăsfărăs tijĕlwen, ănkăḍnăkăḍ imănan tĕzzar, ikfă a-wen-dăɣ iket-net i-inĕṭṭulab-net, ăẓunăn-t jer-ăddinăt. 20Ǝkšăn iket-dăɣ-năsăn har ĕyyĕwănăn, ăsdăwăn-dd a-wa dd-tĕjlăš tamĕtte, osăn-t iḍnăy măraw deketăn d-ĕssin n-tijĕlwen d-imănan. 21Sĕmmos afḍăn n-ăwadĕm dăɣ-wăr ăḍḍinnăt tiḍeḍen wăla aratăn a ikšăn ašăl-wen-dăɣ. 22Izzĕlzăm Ɣisa ḍarăt-a-wen inĕṭṭulab-net ujĕš n-turăft ta n-aman i-ad-has-izarăn s-efăyy n-ejănš wa iyyăḍăn, ad-isagla ĕnta tamĕtte. 23Issĕglă tamĕtte ɣas, iwwăn taḍaɣt tiyyăt, ad-itĕddal Măssinăɣ. A-s toḍa tăfukt, wăr dd-ăqqima dăɣ-edăgg-ĕnnin-dăɣ, ar ĕnta ɣas. 24A-s ija a-wen, turăft n-aman ta dăɣ-ĕglăn inĕṭṭulab tăsisăgdăh ejănš măšan, inkăr-dd fălla-săn aḍu ăwwiɣwăɣăn turăft, băhhălnăt-as tinăzzămăren siha d-siha. 25Igl' ehăḍ ɣas, ilkăm-asăn-dd irjaš făll-aman. 26Ǝnhăyăn-t inĕṭṭulab, ikk'-en-dd irjaš făll-aman ɣas, ărmăɣăn, ad-jannen: "Os'-anăɣ ămăttănkul iyyăn", ad-naḍḍăwăn iɣăran. 27Ăssewăl-asăn šik, inn'-asăn: "Meddĕn, ănset ĕnniyăt-năwăn, năkk a-wa; wăr tărmeɣăm." 28Iggăd-dd Bĕṭrus dăɣ-a-wen-dăɣ, innă i-Ɣisa: "Ălɣalim, kunta kăyy a-wa, amăr s-ad-kăy-in-ăkkăɣ, năkk-dăɣ, ărjašăɣ făll-aman." 29Inn'-as Ɣisa: "Ǝyyăw!" Izjăr-dd Bĕṭrus turăft n-aman, ikkă-dd Ɣisa irjaš făll-aman. 30Inhăy Bĕṭrus ĕṣṣuhu n-aḍu făll-ejănš ɣas, irmăɣ, ĕqqălăn-t aman alămaẓ ălwăqq-wen-dăɣ, ad-isaɣărat, ijanna: "Ya Ălɣalim! Agĕẓ-ahi." 31Irmăs-t-dd Ɣisa s-ăfuss, inn'-as: "Tĕmmĕtkit ija immun-năk, ma itajjăn ăššăk dăɣ-ulh-năk." 32Ǝjjăšăn-dd turăft făll-inĕṭṭulab wi iyyăḍnen ɣas, ibdăd aḍu. 33Ǝnhăyăn wi ăqqimănen dăɣ-turăft a-wen ɣas, ărkăɣăn data-s, ĕnnăn-as: "Tidĕt-dăɣ a-s kăyy a-s Rure-s n-Măssinăɣ." 34Tăsjăn turăft n-ăman-năsăn ălwăqq-wen-dăɣ dăɣ-teje ta n-Žănnăṣarăt. 35Ǝzzăyăn-t kăl-aɣrĕm-en ɣas, ošălăn, jăn isălan dăɣ-attayăn-en, ad-săr-s dd-tiwĕyăn ăddinăt e d t-illăm ere ărhiinăn. 36Laqqădăn kăl-aɣrĕm Ɣisa dăɣ-ad-tăn-ăyy, ad-ăḍĕsăn kud-dăɣ afăr n-erăswăy-net, ed ere t-iḍăsăn-dăɣ, ad-izzĕy.

will be added

X\