Mătti 13

1Izjăr Ɣisa ašăl-wen-dăɣ, ikk' asălim n-ejănš, ăqqima. 2Tăddew-dd săr-s tamĕtte tăjjeet, ijjăš-as turăft n-aman, ăqqima dăɣ-s, tăqqimă-dd tamĕtte ĕnta tĕbdad dăɣ-asălim n-aman, tăsijăd-as. 3Issăɣlăy-tăn tangalen ăjjootnen. Ij'-asăn tiyyăt dăɣ-hasăn-innă: 4"Kăla izjăr ănăsdamu iyyăn i-ad-iddumĕt ašĕkrĕš-net. Ălwăqq wa d-itidumut, oḍănăt tiblalen tiyyăḍ dăɣ-ăbara, ăkkukkăren-tănăt-dd igḍaḍ, ĕkšăn-tănăt. 5Oḍa ašăr iyyăn jer-tihun, ăffoqqăt-dd šik ed wăr-intem dăɣ-ăkall, 6tăsmăqqăt-dd tăfukt jĕnnĕj-s, tĕssărɣa isĕffuqqa, ăqqur-in a-di iket-net ed wăr-ĕntemăn ikewăn-net dăɣ-hărăt. 7Oḍa ašăr iyyăn dăɣ-tabĕ/n/nĕnt, tĕdwăl-dd fălla-s tabĕ/n/nĕnt, tĕẓmăd-as. 8Oḍa ašăr wa iyyăḍăn dăɣ-ăkall olaɣăn, ikrăš aratăn, ijă tibolăsen s-tiyyăḍ temeḍe n-tablalt a tănăt-iwarăn, tiyyăḍ săḍisăt timĕrwen, tiyyăḍ kăraḍăt timĕrwen. 9Ere ilăn timĕẓẓujen s-islă-dăɣ, isăjdet!" 10Ǝssĕstănăn-t inĕṭṭulab-net ḍarăt-a-wen d-ăddălil wa făl isaɣlay ăddinăt tangalen. 11Ăwwežăb-asăn, inn'-asăn: "Kăwăneḍ, tĕjrawăm turhajăt n-ujreh n-ĕddăraj wa n-isălan n-Tĕmmĕnĕya n-Măssinăɣ măšan, ăddinăt wi iyyăḍnen, wăr jen a-wen. 12Ăwadĕm wa s-išwăr ifhăm hărăt, ad has-iwwaḍ musnăt har isĕssikĕy măšan, wa s-wăr t-illa a ijrah, wăr t-in-ikka hărăt, ănn-ak, ad-dăɣ-s ămahăɣ wăla a-wa ĕnḍărrăn iṭṭăf. 13Ǝnta-den-dăɣ a-wa făl saɣlăyăɣ ăddinăt tangalen i-ad-: 'Ǝswaḍăn, wăr hĕnniyăn; ăsijădăn, wăr sĕllĕn; wăr t-illa daɣ a jarrăhăn.' " 14Ămoos a-wen a ăssiitbătăn a-wa fălla-săn inna ănnăbi Saya a-s innă, innă Măssinăɣ: "Ăddinăt! Ad-sallăm, wăr jărrĕhăm; ad-tĕkyadăm, tăsibălalăɣăm, wăr t-illa a hannăyăm." 15Ǝnta daɣ a innăn a-s, innă Măssinăɣ: "Tamĕtte-ta-dăɣ, tăsɣăr-ahi ulh-net; tăẓmăẓẓaj'-ahi iman-net, tăsdărɣăl-ahi iman-net i-ad-ăbas hannay, ăbas sall, i-ad-wăr jărrăh hărăt făl iba n-tărha-i-dăɣ ja n-ad-săr-i dd-tĕnnăḍ, tutab, zuzĕyăɣ-tăt." 16Inna Ɣisa ḍarăt-a-wen i-inĕṭṭulab-net: "Tĕnḍĕḍ-awăn kăwăneḍ ed hannăynăt tiṭṭawen-năwăn, sallănăt daɣ timĕẓẓujen-năwăn. 17Ăssiilmădăɣ-kăwăn a-s, ăsdărhănăn ănnăbităn ăjjootnen d-imaɣdalăn ahănay n-a-wa hannăyăm măšan, wăr t-ĕnheyăn; ăsdărhănăn măsăllăt n-a-wa s-săllăm măšan, wăr has-ĕslen." 18Săjdăt ămăra i-ălmăɣna n-tangalt ta n-ănăsdamu: 19"Ăbara wa dăɣ-oḍănăt tiblalen, ĕnta a-s ăddinăt wi săllănen i-isălan n-Tĕmmĕnĕya n-Măssinăɣ măšan, wăr tăn-jărrăhăn, as'-en-dd Iblis, ilbĕy-dd dăɣ-ulhawăn-năsăn a-wa s-ĕslăn. 20Tihun ti jer-oḍănăt tiblalen, ĕntănăteḍ a-s ăddinăt wi s-e-d isla iyyăn dăɣ-săn i-măjrăd n-Măssinăɣ, ad-ihlilĕy, iqbĕl-t šik măšan, 21wăr t-itĕyy ikraš ikewăn dăɣ-ulh-net; ad-ăj ăzzăman ĕnḍărrăn ăkoyăd dăɣ-s, măšan afăl dd-tosa tissust meɣ osă-dd ălɣizabăt dăɣ-tĕssĕba n-măjrăd n-Măssinăɣ, ad-hin-ibbuṭṭĕl a-wa s-omăn. 22Tabĕ/n/nĕnt ta jer-oḍănăt tiblalen, ĕnta a-s ăddinăt wi s-e-d isla iyyăn dăɣ-săn i-măjrăd n-Măssinăɣ, ad-has-iẓmĕd dăɣ-ulh-net s-tărha n-wălăt-ăddunya d-eylăl n-tărha n-ajmur-net, wăr t-illa a săr-s dd-isaɣsal. 23Ăkall wa olăɣăn dăɣ-oḍănăt tiblalen, ĕnta a-s ăddinăt wi s-e-d isla iyyăn dăɣ-săn i-măjrăd n-Măssinăɣ, ad-t-ijrăh, ijjĕš-as-t ălfăyda. Tarĕw-dd săr-s tiyyăt tablalt temeḍe n-tablalt, tarĕw-dd săr-s tiyyăt săḍisăt timĕrwen n-tablalt, tarĕw-dd săr-s daɣ tiyyăt kăraḍăt timĕrwen n-tablalt." 24Issăɣlăy-tăn-dd Ɣisa daɣ tangalt tiyyăt dăɣ-hasăn-innă: "Tĕmmĕnĕya n-Măssinăɣ, tănifăqqa d-ăhalĕs iyyăn infărăn ĕttăɣam olaɣăn dăɣ-ašĕkrĕš-net. 25Ija ehăḍ, ĕṭṭăsăn ăddinăt ɣas, osă-dd ămiksăn iyyăn ašĕkrĕš wa n-ălkăma ăddomăt ăhalĕs-ĕnnin, infăr dăɣ-s erk idommăn, iglă. 26Ăsfăqqăt-dd ašĕkrĕš wa n-ĕttăɣam wa olăɣăn, orăw, tĕdwăl-dd daɣ terk teyĕšše edes-has. 27Ǝnhăyăn inaxdimăn n-măssi-s n-ašĕkrĕš terk teyĕšše ta dd-tĕdwălăt ɣas, osăn-t, ĕnnăn-as: 'Măssi-năɣ, ajăn wădden kăyy ĕttăɣam olaɣăn ɣas a tĕnfărăd dăɣ-ašĕkrĕš-năk, ĕndek siha s-dd-ha terk teyĕšše ta t-hăt ămăra?' 28Inn'-asăn: 'A-di imojjan n-ere hi wărăn irha.' Ǝnnăn-as inaxdimăn-net: 'Adiš, nĕlbĕyet-tăt-in?' 29Inn'-asăn: 'Aha-aha! Wăr jem a-di, ed afăl tĕttărăm ad-hin-tĕlbĕyăm terk teyĕšše, ham miši n-ad-hin-tĕlbĕyăm daɣ ălkăma. 30Ăyyăt-tăn ad-ĕdwĕlăn issĕnăn-essăn har ăzzăman wa n-amili n-išĕkraš, dihen, ad-ănnăɣ i-wi tilĕynen išĕkraš, ad-dd-ĕlbĕyăn terk teyĕšše s-tizarăt, ĕjĕn-tăt tikărrad, tĕzzar, sărɣĕn-tăt, sĕdwĕn-ahi-dd ḍarăt-a-wen ălkăma, ĕjĕn-t dăɣ-ejănd-in.' " 31Issăɣlăy-tăn-dd daɣ ḍarăt-a-wen tangalt tiyyăt, inn'-asăn: "Tĕmmĕnĕya n-Măssinăɣ, tolăh d-temătăwt ăddomăt ăwadĕm dăɣ-ašĕkrĕš-net. 32Temătăwt-ten-dăɣ, ĕnta a tojărăt tĕmmĕtkit dăɣ-idommăn măšan, tĕdwăl-dd, tăqqăl ahĕšk ojărăn tiyĕššawen n-ašĕkrĕš iket-năsnăt har ẓattăn igḍaḍ iskak-năsăn dăɣ-ilĕktan-net." 33Issăɣlăy-tăn-dd tangalt tiyyăt daɣ, inn'-asăn: "Tĕmmĕnĕya n-Măssinăɣ, tolăh d-takmĕttet n-tăẓẓa tĕssărtăy tamăḍt d-kăraḍ ănnăfăɣatăn n-ejel n-ălkăma i-ad-ikĕf iket-net." 34Tangalen a dăɣ-issăɣra Ɣisa isălan-wi-dăɣ iket-năsăn, wăr t-illa a inna i-tamĕtte s-wădden tangalen a dăɣ-hasăn-t-inna. 35Ămoos a-wen a ăssiitbătăn a-wa innă ănnăbi n-Măssinăɣ iyyăn, innă Măssinăɣ: "Ad-săɣlĕyăɣ ăddinăt tangalen, ăjăɣ isălan s-ad-dd-tăxlăk ăddunya-dăɣ, ăttunkălăn." 36Ifăl Ɣisa tamĕtte, ijjăš ehăn ɣas, ĕkkăn-t-dd inĕṭṭulab-net, ĕttărăn dăɣ-s ad-hasăn-arr tangalt ta n-terk teyĕšše. 37Inn'-asăn: "Ăgg-agg-adĕm ĕnta, a ăddomen ĕttăɣam wa olăɣăn, 38ăddunya a-s ašĕkrĕš-net; ĕttăɣam wa olăɣăn a-s aratăn n-Tĕmmĕnĕya n-Măssinăɣ, terk teyĕšše a-s aratăn wi n-Iblis. 39Iblis a-s ămiksăn wa ăddomen terk teyĕšše dăɣ-ašĕkrĕš, amili n-išĕkraš a-s sămdo n-ăddunya, ănjălosăn a-s imalayăn n-ašĕkrĕš. 40Ǝmmĕk-wen-dăɣ s-dd-tatălbay terk teyĕšše, tămmăḍkăl, tĕtwĕjăr-in dăɣ-efew, ĕmmĕk-wen-dăɣ a he-ijĕn ašăl wa d-tamănd ăddunya. 41Ašăl-en, ad-išĕmmišĕl Ăgg-ăgg-adĕm ănjălosăn-net i-ad-hin-alĕmăn dăɣ-Tĕmmĕnĕya-net ăddinăt wi šinmĕšrĕynen imidiwăn-năsăn d-wi tamašalnen a lăbasăn, ĕḍkĕlăn-tăn, 42ĕjrĕn-tăn-in dăɣ-tahĕst-i dăɣ-tăn wăr mad-išlĕw ar tahăla, ẓimĕkărkiẓăn isenăn făl tămujriẓt. 43Ašăl-en, ăddinăt wi oɣădnen dat-Măssinăɣ, ad-fălla-săn ăj Măssinăɣ ănnur-net, ĕjĕn asmăɣmăɣ wa tăjj tăfukt dăɣ-Tĕmmĕnĕya n-Abba-năsăn. Ere ilăn timĕẓẓujen s-islă, isăjdet!" 44Inn'-asăn Ɣisa daɣ: "Tĕmmĕnĕya n-Măssinăɣ, tolăh d-ejănd n-orăɣ inbalăn dăɣ-ašĕkrĕš iyyăn. Tĕgla tanfust har ašăl wa d-fălla-s oḍa ăhalĕs iyyăn. A-wa-dăɣ has-ja tedăwit, ikn'-e ufăr i-ad-wăr săr-s ilĕmmĕd ăwadĕm wăl' iyyăn. Iglă ḍarăt-a-wen, ăttužžăr-in a-wa ila iket-net i-ad-udabăt akăraš n-ašĕkrĕš-en-dăɣ dăɣ-inbal orăɣ-wĕnnin-dăɣ." 45Olăs daɣ, inn'-asăn: "Tĕmmĕnĕya n-Măssinăɣ, tolăh d-u-mamăla itammăɣăn i-timăɣwanen n-tilăllaten, 46ijrăw tiyyăt tĕknat ĕllĕllu ɣas iglă, ăttužžăr-in a-wa ila iket-net, iqqăl-dd, ižžĕnš'-et." 47Inn'-asăn daɣ: "Tĕmmĕnĕya n-Măssinăɣ, tolăh d-tătart jărăn imĕhhuyya n-imănan dăɣ-ejănš i-ad-săr-s dd-ărmĕsăn tulaten n-imănan ăjjootnen, 48tĕḍnăy tătart ɣas, ĕntăšăn-tăt-dd s-asălim n-aman, ad-biḍḍun imănan s-iyyăn-iyyăn, hak iyyăn d-ĕẓẓĕnĕf-net. Jăn wi ĕfrănnen dăɣ-deketăn-năsăn, jărăn-in fălla-săn wi hasăn wăr iha ălfăyda. 49A-wen-dăɣ daɣ a madăn-ăj ašăl wa d-tamănd ăddunya, a dd-asĕn ănjălosăn, ĕbḍĕwăn imaɣdalăn d-inăllăbăsăn, 50ĕjrĕn-in inăllăbăsăn dăɣ-tahĕst ta-dăɣ tăn-wăr mad-išlĕw ar tahăla, ẓimĕkărkiẓăn isenăn făl tămujriẓt." 51Issĕstăn Ɣisa inĕṭṭulab-net ḍarăt-a-wen, inn'-asăn: "Ak a-wa hawăn-ĕnneɣ, tĕjrahăm-t meɣ?" Ǝnnăn-as: "Ǝyya, nĕjrah-t." 52Inn'-asăn: "E d t-illăm ălɣalim n-Ăṭṭăwrăt iknan afăham n-a-wa ămoosăn isălan n-Tĕmmĕnĕya n-Măssinăɣ, irḍa săr-săn, ad-has-iwwaḍ musnăt ăynayăn făll-wa ărĕwăn ila, afăl ija a-wen, ad-alăh d-abba n-eɣewĕn dd-itakkăsăn hărătăn ăynaynen d-i ărĕwnen dăɣ-ijăndăn-net." 53Issĕmda Ɣisa tĕnna n-tangalen-tin-dăɣ ɣas, ifăl dihen, 54ikkă taɣrĕmt ta dăɣ-idwăl. Issăɣra dihen dăɣ-ehăn n-ăddin wa n-kăl-Ălyăhud, ăkunăn ăddinăt iket-năsăn dăɣ-a-wa isaɣra, ĕqqălăn-dd ɣas oran imawăn, jannen: "Wa, ĕndek siha s-t-dd-ha tĕlɣulĕma-ta-dăɣ d-tikunen ti ităjj? 55Ajăn wădden a-wa rure-s n-mĕnizye wa-dăɣ nĕzzăy? Wădden ma-s, Măryăma? Ayĕtma-s: Yaqub, Yusĕf, Simyon d-Hudd? 56Ajăn wădden šătma-s da-dăɣ t-ĕllănen jere-năɣ? Ɣas ĕndek siha s-t-dd-iha a-wa-dăɣ ităjj iket-net?" 57Jăn-as a-wen-dăɣ s-t-ĕzzayăn asăkor, unjăyăn săr-s omănăn. Inn'-asăn: "Ănnăbi, wăr t-illa edăgg s-wădden ătiwăsămɣăr dăɣ-s ar dăɣ-ăkall-net d-ɣur-kăl-ehăn-net." 58Igdăl-as iba n-immun-năsăn ad-ɣur-săn ăj tikunen ăjjootnen.

will be added

X\