Mătti 12

1Ašăl iyyăn n-ĕssĕbĕt-i n-ašăl wa n-tăsonfat, irăs Ɣisa d-inĕṭṭulab-net išĕkraš n-ălkăma. Ǝglan dăɣ-a-wen-dăɣ a-s ălluẓăn inĕṭṭulab, ad-nakkăḍăn tiɣăɣănen n-ălkăma, taffăẓăn tiblalen-năsnăt. 2Ǝnhăyăn-tăn hărăt dăɣ-kăl-faris ɣas, ĕnnăn i-Ɣisa: "Ǝnhĕy, ăɣtĕl inĕṭṭulab-năk ed išl'-en a wărăn itĕtwĕjj dăɣ-ašăl wa n-ĕssĕbĕt-i n-tăsonfat." 3Inn'-asăn: "Adiš kăwăneḍ wăr tăɣrem dăɣ-ĕlkĕttab a-wa ij' ămănokal Dawĕd ašăl wa d-ălluẓ ĕnta d-ejhăn-net? 4Ătwănn'-anăɣ, ijjăš ĕnta d-ejhăn-net ehăn n-Măssinăɣ, ad-tattăn tijĕlwen-ti n-tikutawen s-innă alămăr wa n-ănnăbi Mosa, wăr t-illa ere s-xălal tetăte-năsnăt a săl kăl-tikutawen? Tijĕlwen-tin-dăɣ, wăr has-xălalnăt ĕnta wăla ejhăn-net măšan, ălluẓ ɣas, ikš'-enăt ĕnta d-meddĕn wi dăr-ăddew. 5Ajăn wăr tăɣrem dăɣ-alămăr a-s ašăl wa n-ĕssĕbĕt-i n-tăsonfat, kăl-tikutawen wăr hasăn-ămoos anmĕšri i-a-wa innă alămăr afăl ĕxdămăn dăɣ-ehăn n-ămudd wa măqqărăn, ed ĕjrawăn s-ad-ĕnmĕšrĕyăn i-fărĕḍăn wi ătiwăɣtăsnen i-ašăl wa n-ĕssĕbĕt-i n-tăsonfat. 6Ăssiilmădăɣ-kăwăn a-s ehăn n-ămudd wa măqqărăn, ill'-e jere-wăn ere t-ojărăn. 7Xăxx, ĕnnar tĕssanăm ălmăɣna n-a-wa innă Măssinăɣ a-s innă: 'Ojăr a-s ɣur-i la tăhanint idĕm uhĕn tikutawen', iket-di-š, wăr sĕḍlimăm bănnan inĕṭṭulab-wi-dăɣ wăren ĕɣšed hărăt. 8Ăgg-ăgg-adĕm, a ănnihăḍăn dăɣ-a-wa s-ila ăgg-adĕm s-ad-t-ăj d-a-wa s-wăr ila s-ad-t-ăj dăɣ-ašăl wa n-ĕssĕbĕt-i n-tăsonfat." 9Ifăl Ɣisa dihen, ikk' ehăn n-ăddin wa n-kăl-Ălyăhud. 10Diha-dăɣ d-t-ijjăš a-s ăhalĕs iyyăn da-dăɣ s-ăqqur ăfuss-net. Ǝggădăn-dd ăddinăt iyyăḍ s-Ɣisa, ĕnnăn-as: "Ak xălal meɣ xăram ad-izuzĕy ăwadĕm iyyăn dăɣ-ašăl wa n-ĕssĕbĕt-i n-tăsonfat?" Ăsaru ɣas făl t-ĕssĕḍlămăn a-s tammăɣăn. 11Ăwwežăb-asăn Ɣisa, inn'-asăn: "Ǝndek dăɣ-wăn wa s-afăl toḍa tehăle ta n-iyyăt ila dăɣ-anu dăɣ-ašăl wa n-ĕssĕbĕt-i n-tăsonfat, ad-dăɣ-s tăt-ăyy har akĕy ašăl-en tĕzzar? 12Uhĕn kăwăneḍ, wăr tĕjrehăm a-s ăgg-adĕm ufa arĕzzej s-a ăjjeen? Ăssiilmădăɣ-kăwăn a-s wăr t-illa a ăssixrămăn iji n-a olaɣăn dăɣ-ašăl wa n-ĕssĕbĕt-i n-tăsonfat." 13Innă Ɣisa ḍarăt-a-wen i-ăhalĕs wa s-ăqqur ăfuss-net: "Ǝẓẓĕl ăfuss-năk." Iẓẓăl ăhalĕs ăfuss-net, izzăy, olăh ăfuss-net ăssaɣăt-wen-dăɣ d-ăfuss-net wa iyyăḍăn wăr-ijrew hărăt. 14Ǝzjărăn kăl-faris edăgg-en ɣas, ănmănhăyăn jer-iman-năsăn dăɣ-isălan n-ĕmmĕk wa s-mad-ĕjĕn iman-net. Ilmăd Ɣisa a-wa lăbasăn has-kittĕwăn ɣas, ifăl dihen, iglă. 15Dăɣ-tekle-net, ĕlkămăn-as-dd imarhinăn ăjjootnen, ăzozăy-tăn iket-dăɣ-năsăn. 16Hărwa wăr-ifel dihen-dăɣ, ăsmătăr-tăn hullan d-ad-wăr jen isălan n-ere wa ămoos i-ăwadĕm wăl' iyyăn. 17Ămoos a-wen inna a ăssiitbătăn a-wa innă ănnăbi Saya a-s innă, innă Măssinăɣ: 18"Ǝnta da ănaxdim-in wa ăsnăfrănăɣ, ĕnta a ĕkneɣ tărha, ĕnta a dăɣ-ăsriwăn iman-in. Ad-fălla-s sănsăɣ Unfas-in, isĕssiɣĕd inĕẓẓulam dăɣ-iqqud i-Măssinăɣ. 19Wăr t-mad-ijjĕš ăjaḍ, wăr mad-isăqqĕy bănnan, wăr t-illa ere has-madăn-isĕll ăsiɣăyya dăɣ-tišarriten bănnan. 20Wăr mad-ărẓ wăla-dăɣ teẓewt a-wa-dăɣ has-ija iba n-ăddăɣwa Wăr mad-isĕmmĕkĕt wăla-dăɣ tefătelt, ad-isĕjăr ăṭṭăma ăddinăt wi ĕbrărnen, ăj iqqud dăɣ-edăgg iket-net. 21Isĕm-net a madăn-isĕjăr inĕẓẓulam ăṭṭăma." 22Ăwwăyăn-dd ăddinăt s-Ɣisa ḍarăt-a-wen amălšon ăsidărɣăl alšin wa t-ihăn, ikras daɣ ilĕs-net; ăzozăy-t, olăs ahănay, ad-itamăjrad. 23Ǝqqălăn-dd ăddinăt ɣas oran imawăn, ăkuunăn, jannen: "Ămmukkăn ĕnta-i-dăɣ a-s Ăgg-Dawĕd wa s-ătwănna!" 24Ǝslăn kăl-faris i-a-wen ɣas, ĕnnăn: "A-wa Abălzăbil, Iblis wa n-ămănokal n-alšinăn a t-ihan; ĕnta a t-ikfăn tărna ta s-itakkăs alšinăn dăɣ-ăddinăt." 25Ilmăd Ɣisa ɣur-iman-net a-wa zinĕzjumăn, inn'-asăn: "E d t-illăm ĕddĕwĕl s-dd-ĕqqălăn mĕssaw-s ĕknasăn jer-iman-năsăn, ad-t-iba, umas timšar; aɣrĕm daɣ wăla ehăn wa s-dd-ĕqqălăn mĕssaw-s ĕknasăn jer-iman-năsăn, wăr-e ăhaj ibdad. 26Afăl dd-iqqăl Iblis isattăɣ imĕššerĕkăn-net siha d-siha, iman-net ɣas a iknas; ere iknasăn d-iman-net ya, wăr t-illa ĕmmĕk s-ăhoja ibdad. 27Kunta daɣ tĕnnăm năkk, tărna n-Abălzăbil wa n-ămănokal n-alšinăn a-s tăn-takkăsăɣ dăɣ-ăddinăt, adiš, inĕṭṭulab wi-năwăn, ma ămoos isĕm wa s-tăn-takkăsăn dăɣ-ăddinăt? Inĕṭṭulab-năwăn-en-dăɣ, a-s ilkam ad-ăjjayhĕn fălla-wăn, sĕḍlĕmăn-kăwăn, 28măšan, kunta năkk, tărna n-Unfas n-Măssinăɣ a-s takkăsăɣ alšinăn dăɣ-ăddinăt, ăniihăjja a-s ăssiilmăd-kăwăn a-wen a-s Tĕmmĕnĕya n-Măssinăɣ, tĕll'-ee jere-wăn. 29Wăr t-illa ere ăddooben ujĕš n-ehăn n-ăhalĕs n-anăkfor, awĕy ilalăn n-ehăn-net ar s-ad-t-ikrad tĕzzar; dihen, ad-udabăt terăẓẓe n-ehăn, awĕy a-wa t-ihăn. 30Ere hi-wărăn irha-dăɣ, a-di, ašănjo-nin; ere daɣ wa hi-wărăn itilal s-asdu, ašĕmmăhĕš ɣas a t-išlan." 31Inn'-asăn daɣ: "Ăssiilmădăɣ-kăwăn a-s abăkkaḍ ămešăl ăgg-adĕm d-asĕkkufăr ija-dăɣ, ăddoobăt Măssinăɣ ad-has-t-in-ănš măšan ere ăskafărăn dăɣ-isălan n-Unfas Šăddijăn-dăɣ, wăr-ilkem ad-has-in-ătiwănša. 32Ere innăn a lăbasăn făll-Ăgg-ăgg-adĕm-dăɣ, ăddoobăt ad-ijrĕw tenăšše n-a-wen măšan, ere wa innăn a lăbasăn dăɣ-isălan n-Unfas Šăddijăn, wăr-ilkem ad-has-in-ătiwănša dăɣ-ăddunya wăla ălaxărăt." 33Olăs daɣ, inn'-asăn: "Ahĕšk olaɣăn, a-s mad-t-tasĕd, aratăn-net daɣ i olaɣnen; erk ahĕšk daɣ, a-s t-mad-t-tasĕd, aratăn-net daɣ, i lăbasnen; ahĕšk, aratăn-net a-s ititwĕzzĕy. 34Ya kăwăneḍ-i n-taššălen-i-dăɣ! Kăwăneḍ-i n-inăllăbăsăn, ĕndek ĕmmĕk wa s-ăddoobăt ad-dd-izjăr măjrăd olaɣăn imawăn-năwăn? A-wa iḍkărăn ulh n-ăgg-adĕm a dd-izajjărăn emm-net. 35Ăwadĕm-wa olăɣăn, milɣaw n-ulh-net a dăɣ-dd-itakkăs a-wa olăɣăn măšan, enăllăbăs ĕnta, tăllăbăst n-ulh-net a dăɣ-dd-itakkăs a-wa lăbasăn. 36Ăssiilmădăɣ-kăwăn a-s ašăl wa ilkămăn e-d t-tĕllăm taxxalt d-tašujĕšt inna ăwadĕm, ad-tăt-iẓĕl dat-Măssinăɣ. 37Iyyăt-i-dăɣ, ad-kăy-iɣlĕs măjrăd-năk, meɣ daɣ, măjrăd-năk iman-net, a kăy-madăn-isiḍĕw, iwăr-kăy uḍlem." 38Ăwwežăbăn-as iyyăḍ dăɣ-ălɣulam n-Ăṭṭăwrăt d-kăl-faris, ĕnnăn-as: "Ălɣalim, ăj data-năɣ iji n-Măssinăɣ, nĕnhăy." 39Ăwwežăb-asăn, inn'-asăn: "Ǝzzurĕyăt-ta-dăɣ n-tenăllăbăst n-temăznit, wăr tăksuḍ Măssinăɣ; wăr tĕmmăɣ ɣas ar ad-ĕtwĕjjĕn ijităn n-Măssinăɣ data-s măšan, tĕlmĕdet a-s wăr-ilkem dăɣ-s iji n-Măssinăɣ săl wa n-ănnăbi Yunĕs. 40Ǝmmĕk-wa-dăɣ s-kăla ikkăs Yunĕs kăraḍ išilan d-kăraḍ ihăḍan dăɣ-tăsa n-emăn wa măqqărăn, ĕmmĕk-wen-dăɣ daɣ a-s mad-ikkĕs Ăgg-ăgg-adĕm kăraḍ išilan d-kăraḍ ihăḍan dăɣ-ider n-ăkall. 41Ašăl wa n-tebădde, ad-dd-ĕnkărăn kăl-aɣrĕm wa n-Nĕniba, sĕḍlĕmăn kăl-ĕzzurĕyăt-ta-dăɣ, ed ašăl wa d-hasăn-ixṭăb ănnăbi Yunĕs, ătubăn. Săjdăt! Ašăl-i-dăɣ, ĕnhĕywăt-ak, ill'-ee jere-wăn ere ojărăn Yunĕs, măšan hakd-a-wen-dăɣ, tunjăyăm s-ad-tutabăm. 42Ašăl wa n-tebădde, ad-dd-tĕnkăr tămănokalt ta s-kăla tăxkăm dăɣ-ăkall wa n-ajus s-isĕm-net Saba, tăjjăyh făll-kăl-ăzzăman-i-dăɣ, sĕḍlĕm-tăn dăɣ-ăššăreɣa ed, ĕnta tĕfăl-dd ăkall ujĕjăn i-ad-sĕjĕd i-imĕjridăn n-tayĕtte wi ităjj ămănokal Sulăyman. Săjdăt! Ašăl-i-dăɣ, ĕnhĕywăt-ak, ill'-ee jere-wăn ere ojărăn ămănokal Sulăyman, măšan hakd a-wen-dăɣ, tunjăyăm s-asjĕd-has." 43Olăs daɣ, inn'-asăn: "E-d izjăr alšin ăwadĕm, ad-ăkk tinariwen i-ad-dăɣ-snăt immăɣ i-edăgg dăɣ-ăssunfa măšan, ad-has-t-iba; 44afăl has-t-ăba, ad-ănn i-iman-net: 'Năkk-i-dăɣ, ma hi-idgaẓăn, ĕqqĕlăɣet ɣas ehăn-in wa dd-fălăɣ.' Afăl dd-iqqăl edăgg wa ifăl s-tizarăt, ad-t-dd-ass wăr t-ih' ăwadĕm, ifraḍ, ămmujnăt. 45Iglĕw ălwăqq-wen, awĕy-dd ĕssa alšinăn iyyăḍ t-ojărnen tăllăbăst, ĕjjĕšăn ăwadĕm-ĕnnin-dăɣ, ĕzzăɣăn dăɣ-s; umas a-s talɣa n-ăwadĕm-en ta tăzzarăt, tĕššăm i-ta tĕšrăyăt." Inn'-asăn ḍarăt-a-wen: "Ǝnta-den-dăɣ a-wa dăr-mad-talăh talɣa n-ĕzzurĕyăt-ta-dăɣ n-tenăllăbăst." 46Ămmiijrăd Ɣisa i-tamĕtte dihen-dăɣ a-s ma-s d-ayĕtma-s da-dăɣ dd-ĕbdădnen dat-emm n-ehăn, ăšmašălăn-dd săr-s ăwadĕm i-ad-hasăn-t-dd-iɣăr. 47Osă-dd ăwadĕm-en Ɣisa, inn'-as: "Anna-năk d-ayĕtma-k, ĕbdadăn-ak dat-emm n-ehăn, ărhan ahănay-năk." 48Ăwwežăb Ɣisa i-ăwadĕm-en, inn'-as: "Mi iqqalăn anna-nin, mi iqqalăn ayĕtma-ɣ?" 49Iẓẓăl ăfuss dăɣ-tanămhăla n-inĕṭṭulab-net tĕzzar, innă: "Ǝnhĕywăt-tăn-ak, anna-nin d-ayĕtma-ɣ! 50E d t-illăm ere itamašalăn erhet n-Abba-nin-i ihăn išĕnnawăn, ĕnta a-s ă/n/na-ɣ, ĕnta a-s wălătma-ɣ, ĕnta a-s ma-ɣ."

will be added

X\