Mătti 11

1Issĕmdă Ɣisa asĕmmĕtăr n-inĕṭṭulab-net wi n-măraw d-ĕssin ɣas, ifăl dihen, ad-isaɣra ăddinăt, ixaṭṭăb dăɣ-iɣărman wi n-teje-ten-dăɣ. 2Iha Exya takărmut a-s islă ijităn n-Ălmasex, ăšmašăl săr-s hărăt dăɣ-inĕṭṭulab-net 3i-ad-has-t-dd-sĕstĕnăn kunta ĕnta a-s Wa s-ătwănnă ilkam ad-dd-ass meɣ ilkam ere săl ĕnta. Osăn-t-dd inĕṭṭulab-win-dăɣ, ĕllăɣen-as a-wa innă Exya. 4Ăwwežăb-asăn Ɣisa, inn'-asăn: "Ǝqqĕlăt Exya, suɣĕlăm-as a-wa s-tĕslăm d-a-wa tĕnhăyăm; 5ănnăt-as: imĕddorɣal hannăyăn; inĕbdan rajjăšăn, wi ijrăw jĕri tišdajăn, imẓaj sallăn; inĕmmuttan nakkărăn-dd; tilăqqiwen, sallănăt i-Ălĕnžil. 6Tĕnḍĕḍ i-ere wa dăɣ-i wărăn ij' ăššăk." 7Ǝglăn meddĕn-winnin dd-ămešălnen ɣas, ădwănnăt Ɣisa i-tamĕtte dăɣ-isălan n-Exya, inn'-asăn: "Ak, a-s tĕzjărăm s-tenere, ma tĕnhăyăm? Ak teẓewt ăsiwălawăl aḍu a tĕnhăyăm? Ăbo! 8Adiš ma tĕkkăm i-ad-t-tĕnhĕyăm? Ak ăhalĕs ăsisahăɣăn ašăl a tĕnhăyăm? Ǝnhĕywăt-tăn-ak ăddinăt wi sasahaɣnen ašăl, ihănan n-imănokalăn a ĕzzaɣăn? 9Adiš ma tĕkkăm i-ad-t-tĕnhĕyăm? Ak ănnăbi a tĕnhăyăm? Tidĕt lab a-s ănnăbi, ăssiilmădăɣ-kăwăn a-s ere ojărăn tumast n-ănnăbi a tĕnhăyăm. 10Ǝnta-en-dăɣ a făl innă ĕlkĕttab n-Măssinăɣ: 'Ǝnhĕy! Ăzizărăɣ-ak anămmašul-in wa he-iknĕn tabarăt-năk.' 11Ăsidătteɣ-awăn a-s wăr torew tamăḍt ăhalĕs wăr-ojer Exya wa n-Enĕsselmăɣ măšan hakd-a-wen-dăɣ, wăr t-illa ere t-wărăn ojer dăɣ-Tĕmmĕnĕya n-Măssinăɣ. 12Ɣur-ašăl wa dd-osa Exya har ašăl-i-dăɣ, ija amjăr ăṣṣoohen făll-ujĕš n-Tĕmmĕnĕya n-Măssinăɣ; amjăr-en, wăr dăɣ-s ikărrĕš ašăl ar ăddinăt wi ĕkfărnen 13făl-a-s, ănnăbităn wi dd-ăzzarnen i-Exya iket-năsăn, hakd-dăɣ alămăr wa n-ănnăbi Mosa, ălolăy a-wen-dăɣ iket-net dăɣ-isălan n-Tĕmmĕnĕya n-Măssinăɣ hundăɣ har ašăl-i-dăɣ n-ăzzăman wa n-Exya wa n-Enĕsselmăɣ. 14Kunta făw ad-tăqbĕlăm s-a-wen-dăɣ, ălleɣeɣ-awăn a-s dăɣ-ănnăbităn, ĕnta a-s ănnăbi Ɣĕli wa s-ătwănna ilkam ad-dd-alĕs uɣĕl. 15Ămăra, ere ilăn timĕẓẓujen s-islă-dăɣ, isăjdet!" 16Olăs daɣ Ɣisa, inn'-asăn: "Ak, mi dăr-mad-sĕnnĕfăqqăɣ ĕzzurĕyyăt ta-dăɣ? Tănifăqqa ɣas d-ălžămaɣăt n-aratăn janen aɣrĕf dăɣ-tĕfărre, jannen iyyăḍ i-wi iyyăḍnen: 17'Ǝnhĕywăt, kăwăneḍ, wăr lem asăfar; nĕwăt-awăn taɣănibt, tunjăyăm s-dăllol! Nĕnẓăr-awăn tiswal n-tisnant măšan, wăr tĕṭṭefăm iba!' 18Exya, ăzzăman wa dd-osa, wăr-itĕtt imĕnsiwăn olaɣnen, wăr-isĕss aman n-lăɣnăb ăxxiimmărnen, ĕnnăn fălla-s ăddinăt: 'Ih'-e alšin', 19išrăy-t-dd Ăgg-ăgg-adĕm, ĕnta itihăr dăr-wăn a-wa tăttăm d-a-wa săssăm, ɣas tĕnnăm dăɣ-s: 'Wa ĕnta, insăy, irăf aman n-lăɣnăb wi ăxxiimmărnen, inarmasăn n-tiwse d-ălfusaɣ wi iyyăḍnen a-s imidiwăn-net.' Ăsidătteɣ-awăn a-s: 'Sărho wa dd-ifălăn Măssinăɣ, ijităn n-ăwadĕm a t-isatbatăn.' " 20Ăsmăqqa Ɣisa ḍarăt-a-wen făll-iɣărman wi dăɣ-ija tikunen ăjjootnen măšan, ăsɣărăn-as ulhawăn-năsăn, unjăyăn ătubăn. 21Inn'-asăn: "Imĕskay kăl-Qorazin d-kăl-Băṭsăyda, ălmăṣṣibăt ɣas a fălla-wăn maden-iḍĕw ed ĕnnăr iɣărman wi n-Tir d-Săyda ĕzzăɣăn inĕẓẓulam a dăɣ-jănăt tikunen-ti-dăɣ jănen ɣur-wăn, ăru d-ĕlsăn šakutăn, ĕblĕnbulun dăɣ-eẓĕd făl tĕmɣăre n-tătubt-năsăn. 22A-wen-dăɣ a fal hawăn-janneɣ a-s ašăl wa ilkămăn, ad-kăwăn ijjĕš ăddăyyăt ojărăn wa ijjăšăn iɣărman wi n-Tir d-Săyda. 23Kăwăneḍ-i-š ĕzzăɣnen aɣrĕm wa n-Qăfărnaxum, ma tăɣelăm? Tordam a-s aɣrĕm-năwăn ad-itimɣar har awĕḍ išĕnnawăn? Xăram-awăn! Ănn-ak, ad-tĕhĕlĕm ider, wăr kăwăn-dd-e-tawăɣ a săl temse ed tikunen ti jănen ɣur-wăn, ĕnnar janăt dăɣ-aɣrĕm wa n-Sodoma, ăru d-ătubăn imuzăɣăn-net, ăqqayĕm aɣrĕm-năsăn iday har ašăl-i-dăɣ. 24A-wen-dăɣ a făl hawăn-janneɣ, a-s ašăl wa ilkămăn, ad-kăwăn-ijjĕš ăddăyyăt ojărăn wa ijjăšăn aɣrĕm wa n-Sodoma." 25Iḍkăl Ɣisa măjrăd, innă: "Abba, kăyy-i n-Emăli n-išĕnnawăn d-ăkall, timĕlăɣ-kăy făl-a-s hărătăn-wi-dăɣ, tĕffărăt-tăn i-imĕssorha d-imusănăn n-ăddunya-ta-dăɣ măšan, tăsnăfalălăd-tăn-dd wăla i-aratăn. 26Tidĕt Abba, kăyy a tiimĕlăɣ ed ădduuttăt a-s ĕnta-den-dăɣ erhet-năk wa ăhusken." 27Innă Ɣisa i-ăddinăt ḍarăt-a-wen: "Wăr t-illa a-s wădden ij'-e Abba-nin dăɣ-ifassăn-in, wăr t-illa ere hi-ijan muzĕyăt imdan kunta wădden Abba, wăr t-illa daɣ ere ijan muzĕyăt imdan i-Abba kunta wădden năkk-i n-Rure-s-i t-dd-ifălăn d-ere wa s-ărheɣ ad-has-t-zuzĕyăɣ." 28Inn'-asăn daɣ: "Ǝyyăwăt iket-dăɣ-năwăn kăwăneḍ-i ăsifăgga ăẓuk wa tăllinjem, ad-hawăn-sunfăɣ, 29mašălăt erhet wa-nin, tĕyyĕm-ahi ad-kăwăn-săɣrăɣ ed năkk, ăẓeedăɣ, hahi-taẓidert, wăr hi-iha ĕkkĕbru; ĕnta-den-dăɣ a-wa hawăn-ha tăsonfat n-iman-năwăn, tăɣlĕsăm. 30A-wa fălla-wăn ărheɣ, wăr-ăẓẓay, amišĕl n-erhet-in daɣ, i făsuusăn."

will be added

X\