Mătti 10

1Iɣră-dd Ɣisa ḍarăt-a-wen inĕṭṭulab-net wi n-măraw d-ĕssin, ikf'-en tărna n-ukĕs n-alšinăn dăɣ-ăddinăt d-azuzi n-ăddinăt dăɣ-turhĕnnawen d-ălɣibăn. 2Ismawăn n-inĕṭṭulab wi n-măraw d-ĕssin ăsnăfrăn da: Simyon wa s-itawănna Bĕṭrus d-ă/n/na-s Idris; Yaqub wa n-ăgg Zăbdi d-ă/n/na-s Exya; 3Fĕlibb d-Bărtălămma; Tomi d-Mătti wa n-ănarmas n-tiwse; Yăqub ăgg Ălfa d-Tade; 4Simyon wa n-Kăna d-Yăhudĕs wa n-Isxaryut-i t-e-isĕssăɣdărăn. 5Ǝntăneḍ-den-dăɣ inĕṭṭulab wi n-măraw d-ĕssin ăšmašăl Ɣisa s-innă: "Wăr tĕkkem tiwsaten ti n-inĕẓẓulam, wăr tĕjješăm aɣrĕm n-kăl-Sămari; 6wăr tĕkkem ar tamĕtte ta n-kăl-Iṣrayil tăssujjălăt šund tihatten. 7Dăɣ-tekle-năwăn, ăxṭĕbăt i-ăddinăt a-s Tĕmmĕnĕya n-Măssinăɣ, tohăẓ-dd. 8Zuzĕyăt imarhinăn, sĕnkărăm-dd inĕmmuttan, šĕšdĕjăm ăddinăt wi ijrăw jĕri, tĕkkĕsăm alšinăn dăɣ-imĕlšan; ănnuɣmăt n-Măssinăɣ wa tĕjrăwăm bănnan, ăkfăt-t i-ăddinăt bănnan. 9Wăr tiwĕyăt orăɣ, wăla aẓrĕf, wăla totĕyya dăɣ-fărtĕmatăn-năwăn, 10wăr tiwĕyăt šăkkoš, wăla anăkăbba săl wa tĕlsăm, wăla tifădelen săl ti sălăm, wăla tăborit ed, wăr t-ih' ăššăk a-wen, hak ănaxdim-dăɣ, ărhuj-as ălxaqq n-tide-net. 11Aɣrĕm d-tadăbayt tĕjjăšăm-dăɣ, sĕstĕnăt d-ere wa s-ăniihăjja ad-ɣur-s tĕzzubbem, tĕzzubbem ɣur-s har ašăl wa d-tăssawăḍăm tekle. 12Ehăn tĕjjăšăm-dăɣ, ăjrăt fălla-s ăssălam; 13afăl kăwăn-ăsbărrăkăn mĕssaw-s, sănsăt fălla-săn ălxer wa tăwwayăm; kunta daɣ wăr kăwăn-ăsbărrăkăn mĕssaw-s, ăglăt d-ălxer-năwăn. 14Ehăn, wăla aɣrĕm, tosăm-dăɣ, har wăr kăwăn-ăsbărrăkăn mĕssaw-s, meɣ unjăyăn s-asjĕd i-măjrăd-năwăn, ĕzjărăt-t, tăbbăkbăkăm iḍarăn-năwăn i-ad-wăr kăwăn-ilĕttăɣ wăla ăboqqal-net. 15Ăsidătteɣ-awăn a-s ehăn-en-dăɣ, meɣ aɣrĕm-en-dăɣ, ašăl wa ilkămăn, tojăr tisnant ta t-madăt-tărmĕs ta tărmăsăt iɣărman wi n-Sodoma d-Gomora." 16Inn'-asăn daɣ: "Ǝnhĕywăt, năkk da-dăɣ kăwăn-ăšimašălăn i-ad-talăhăm d-tihatten ĕllanen jer-tiɣĕs; udaɣăt i-iman-năwăn šund taššălen, ijjĕšet-kăwăn ălɣafyăt wa ihăn tidăberen. 17Agĕẓăt iman-năwăn dăɣ-dăgg-adĕm; ad-kăwăn-ĕjĕn dăɣ-ifassăn n-ĕlxĕkum, ĕjĕn dăɣ-wăn tiwit dăɣ-ihănan n-ăddin wi n-kăl-Ălyăhud. 18Dăɣ-tĕssĕba n-isĕm-in wa kăwăn-iwarăn, ad-hawăn-aškĕn ăddinăt s-gĕfărăn d-imănokalăn, tăttărmăsăm-dd săr-săn, măšan ad-umas a-wen ĕssĕbab făl tămoosăm tijuhawen-in, tĕjĕm isălan-in i-tiwsaten ti n-inĕẓẓulam. 19Afăl tĕttărmăsăm, wăr tăšăwwašăt dăɣ-isălan n-a-wa mad-tĕnnĕm d-ĕmmĕk wa s-tăn mad-tĕnnĕm, ed afăl tăbokăm i-măjrăd, ad-kăwăn-itwĕkf a-wa mad-tĕnnĕm, 20făl-a-s wădden kăwăneḍ a maden-ămmăjrăd, Unfas wa n-Abba-năwăn a madăn-ămmăjrăd dăɣ-idăggan-năwăn. 21Ad-isĕttărmĕs ăwadĕm ă/n/na-s i-ad-ămmăt, isĕttărmĕs abba rure-s i-ad-ămmăt, ănnăbdădăn aratăn d-imărawăn-năsăn, ĕjĕn iman n-imărawăn-năsăn; 22ad-dăr-wăn akĕḍăn ăddinăt iket-năsăn dăɣ-ăddimmăt n-isĕm-in wa kăwăn-iwarăn măšan ere ibdădăn s-ăṣṣahăt dăɣ-immun-net, ad-iɣlĕs. 23Afăl kăwăn-ăqquzzăben ăddinăt dăɣ-aɣrĕm iyyăn, jawăḍăt-asăn s-iyyăn; ăsidătteɣ-awăn a-s, a-s dd-e-săɣlĕyăm iɣărman n-Iṣrayil iket-năsăn, iqqal-dd Ăgg-ăgg-adĕm." 24"Wăr t-illa ănăṭṭalib ufan ălɣalim-net wăla akli ufan măssi-s, 25igdăh ɣas i-ănăṭṭalib, ad-ăttiilăl ălɣalim-net, ăttiilăl daɣ akli măssi-s. Kunta ăddinăt wăla măssi-s n-ehăn, jăn-as isĕm Abălzăbil, a-wen Iblis, ăb' ăṭṭăma n-a-wa he-ĕnnĕn făll-inalkimăn-net; ad-fălla-săn ĕnnĕn a ojărăn a-wa ĕnnăn făll-măssi-s n-ehăn." 26"Ǝnneɣ-awăn: Dăgg-adĕm, wăr tăn-tăksuḍăm. Wăr t-illa a ăttunkălăn s-wădden ad-dd-infilĕl, wăr t-illa a iffarăn s-wădden ad-dd-iffukkăr. 27A-wa hawăn-janneɣ dăɣ-takše, ănnăt-t s-afălla dat-ăddinăt iket-năsăn; a-wa hawăn-ăsmătăktăkăɣ, săqqĕyyăt-t făll-afălla n-ihănan. 28Wăr tăksuḍăm dăgg-adĕm-i wăren ăddoobăt ar tenăɣe n-taɣĕssa, wăr-ăddoben tenăɣe n-iman; ănn-ak, uksaḍăt Wa ăddoben ad-ihlĕk iman hakd taɣĕssa dăɣ-žohănnăma. 29Ɣur-wăn, wădden igḍaḍ ĕssin, tămma ɣas a nazzăn? Hakd a-wen-dăɣ, wăr-ilkem ad-dăɣ-săn oḍa iyyăn, a ikkăs Abba-năwăn wăr otes s-a-wen, 30wăla amẓadăn n-iɣăfawăn-năwăn, ăḍḍinăn. 31Wăr tărmeɣăm, tojărăm abrĕk n-igḍaḍ ălqim." 32"Ere ăsjăyhăn dăgg-adĕm a-s năkk a t-ilăn, ad-sĕjjĕyhăɣ năkk-dăɣ Abba-nin-i ihăn išĕnnawăn a-s ăwadĕm-en, i-nin; 33ere daɣ wa hi-ăkkuddălăn dat-dăgg-adĕm, ad-t-ĕkkuddĕlăɣ năkk-dăɣ dat-Abba-nin-i ihăn išĕnnawăn." 34Olăs daɣ, inn'-asăn: "Wăr teɣalăt ălɣafyăt ad-dd-ăwwăyăɣ s-ăkall, tăkoba, wădden ălɣafyăt a săr-s dd-ăwwăyăɣ. 35Năkk, oseɣ-dd i-ad-ibḍĕw ăhalĕs d-ti-s, tĕbḍĕw talyaḍt d-ma-s, tĕbḍĕw tamăḍt d-taḍăggalt-net, 36umasăn kăl-ehăn n-ăwadĕm išĕnja-net. 37Ere hi-ăssofăn ti-s meɣ ma-s, a-di, wăr-ănhăjja ad-umas ănăṭṭalib-in, ere daɣ wa hi-ăssoofăn rure-s meɣ elle-s, wăr-ănhăjja ad-umas ănăṭṭalib-in. 38Ere wa wărăn ăsdăw i-aḍkul n-tajĕttewt-net ta n-tamăttant, ilkĕm-ahi, a-di, wăr-ănhăjja d-ad-umas ănăṭṭalib-in. 39Ere wa wărăn idgeẓ ar dăɣ-igguẓ n-iman-net dăɣ-ăddunya-ta-dăɣ, ad-ifut dăɣ-ălžănnăt, măšan, wa irḍăn ăfota dăɣ-iman-net dăɣ-ăddunya-ta-dăɣ, dăɣ-ăddimmăt-in, ăwadĕm-en, ad-iɣlĕs dăɣ-ălaxărăt." 40Inna daɣ: "Ere kăwăn-ăsbărrăkăn, năkk a ăsbărrăk, wa hi-ăsbărrăkăn, wa hi-dd-ăsmašălăn a ăsbărrăk. 41Ere ăsbărrăkăn ănnăbi dăɣ-tĕssĕba n-a-wa s-iqqăl ănnăbi, ĕlkamăn dăɣ-s imraš šund wi mad-ijrĕw ănnăbi; ere ăsbărrăkăn ere oɣadăn dat-Măssinăɣ dăɣ-tĕssĕba n-iqqud-net, ilkam ad-ijrĕw imraš šund wi mad-ijrĕw ere oɣadăn dat-Măssinăɣ. 42Ere wa issĕswăn wăla-dăɣ alkas n-aman sămmeḍnen i-iyyăn dăɣ-inĕṭṭulab dăɣ-tĕssĕba n-a-wa s-ămoos ănăṭṭalib-in, ăsidătteɣ-awăn a-s, wăr t-e-ijmăḍ marušăt n-emărked wa ămešăl."

will be added

X\