Mătti 1

1Ăṭṭarex n-Ɣisa Ălmasex wa n-ahăya n-ănnăbi Dawĕd d-ahăya n-Ibrahim da: 2Ikrăš Ibrahim Isxaqq, Isxaqq ikrăš Yaqub, Yaqub ikrăš Yăhuda d-ayĕtma-s wi iyyăḍnen. 3Yăhuda ĕnta, tĕkrăš-as hănne-s Tamar, Faris d-Zira. Ikrăš Faris Xăšrun, ikrăš Xăšrun Aram, 4ikrăš Aram Aminădab, ikrăš Aminădab Nasun, ikrăš Nasun Sălmun. 5Ikrăš Sălmun d-hănne-s Rahab Boɣaz, ikrăš Boɣaz d-hănne-s Rutt Ɣubăyd, Ɣubăyd ĕnta, ikrăš Yasa. 6Yasa ĕnta a orăwăn ămănokal Dawĕd. Dawĕd ĕnta, ikrăš d-hănne-s n-Urya Sulăyman, 7Sulăyman ĕnta ikrăš Raxăbyăm, Raxăbyăm ikrăš Abya, Abya ikrăš Asaf, 8Asaf, ikrăš Yăhušăffat, Yăhušăffat ikrăš Yoram, Yoram ikrăš Uzya, 9Uzya ikrăš Yotam, Yotam ikrăš Axaz, Axaz ikrăš Ezekya, 10Ezekya, ikrăš Mănase, Mănase ikrăš Amon, Amon ikrăš Yozya, 11Yozya ikrăš Yăxunya d-ayĕtma-s wi iyyăḍnen. Ăzzăman-wen-dăɣ a dăɣ-ĕttĕkfălăn kăl-Iṣrayil s-ăkall wa n-Babilun. 12Ḍarăt atĕkfĕl-wen-dăɣ ad-ikrăš Yakonya Ăṣṣălat, Ăṣṣălat ikrăš Zurubabil, 13Zurubabil ikrăš Abihud, Abihud, ikrăš Ilyakim, Ilyakim ikrăš Yazur, 14Yazur ikrăš Ăssăddiq, Ăssăddiq, ikrăš Yahim, Yahim ikrăš Ɣĕlihud, 15Ɣĕlihud ikrăš Ɣĕlyazăr, Ɣĕlyazăr, ikrăš Mittăn, Mittăn, ikrăš Yaqub. 16Yaqub-en-dăɣ a ăshăyăwăn Yusĕf wa n-ăhalĕs n-Măryăma ta torăwăt Ɣisa wa s-itawănna Ălmasex. 17Ɣur-ăzzăman wa n-Ibrahim tĕkkĕd ăzzăman wa n-Dawĕd, okăynăt mărawăt ĕzzurĕyaten d-ĕkkoẓăt; ɣur-ăzzăman wa n-Dawĕd tĕkkĕd ăzzăman wa n-atĕkfĕl n-kăl-Iṣrayil s-ăkall wa n-Băbilun, okăynăt mărawăt ĕzzurĕyaten d-ĕkkoẓăt; ɣur-ăzzăman daɣ wa n-atĕkfĕl n-kăl-Iṣrayil s-ăkall wa n-Babilun tĕkkĕd ăzzăman wa n-tiwit n-Ălmasex, mărawăt ĕzzurĕyaten d-ĕkkoẓăt a okăynen. 18Ǝnta da ĕmmĕk wa s-iwa Ɣisa Ălmasex: ma-s Măryăma, ittar-tăt ăhalĕs s-isĕm-net Yusĕf măšan dăɣ-a-wa ităjj Măssinăɣ s-tărna n-Unfas Šăddijăn, tĕkrăš ĕnniyăt hărwa wăr toher d-Yusĕf isĕftaɣ. 19Yusĕf-i n-anĕmmutăr-net, ăhalĕs n-ămaɣdal a ămoos, inhăy a-s tanfust-den-dăɣ ɣas, ăssosăm, wăr t-illa ere dăɣ-ija isălan ed wăr-irha ad-tăt-ikšĕf. Tĕssĕba n-a-wen-dăɣ a făl t-dd-ijjăš ĕnniyăt n-ad-hin-izjăr isălan-net dăɣ-ufăr. 20Izinĕzjum dăɣ-a-wen-dăɣ a-s has-dd ănfalăl ănjălos n-Emăli dăɣ-tăharjit, inn'-as: "Yusĕf Ăgg-Dawĕd, wăr tăksuḍăd adubĕn n-Măryăma făl-a-s ĕnniyăt wa la, Unfas Šăddijăn a-s ĕssĕbab-net, 21ad-tĕkrĕš alyaḍ, tĕjĕd-as isĕm Ɣisa făl-a-s ĕnta a madăn-iɣlĕs tamĕtte-net dăɣ-ibăkkaḍăn-net." 22A-wa iket-net ija i-ad-itbĕt a-wa innă ănnăbi n-Măssinăɣ iyyăn a-s innă: "Innă Emăli: 23'Săjdăt! Ad-tĕkrĕš tămawaḍt wărăt tĕzzey meddĕn ĕnniyăt, tĕkrĕš alyaḍ, iwăr-t isĕm Imanuwil'. Imanuwil, ălmăɣna-net: Măssinăɣ, izzăɣ-dd jere-năɣ." 24Inkăr-dd Yusĕf dăɣ-eḍĕs, ămešăl a-wa has-innă ănjălos n-Emăli, iẓẓĕẓlăy-dd Măryăma, 25măšan wăr dăr-s oher isĕftaɣ har tĕjrăw eɣăf-net, tĕkrăš alyaḍ, ăswăr-t isĕm Ɣisa.

will be added

X\