Marqĕs 9

1Inn'-asăn Ɣisa ḍarăt-a-wen: "Ăsidătteɣ-awăn a-s han-kăwăn ăddinăt ĕbdadnen diha-dăɣ wăr-e iba wăr-ĕnheyăn Tĕmmĕnĕya n-Măssinăɣ tosa-dd s-ăṣṣahăt." 2Săḍis išilan ḍarăt a-s inna a-wen-dăɣ, iɣră-dd Ɣisa Bĕṭrus d-Yaqub d-Exya s-edes, ikka dăr-săn taḍaɣt tiyyăt tĕḍkalăt tĕzzar, ijjăš dihen ini ăynayăn data-săn; 3ămlăwlăwăn-dd imălsan-net, jăn-dd tĕmĕlle s-kăla wăr-tătwănhăy făll-ărori n-ăkall. 4Ănfalăl-asăn-dd dihen ănnăbi Ɣĕli d-ănnăbi Mosa dd-falnen išĕnnawăn, ad-tamăjradăn d-Ɣisa. 5Iggăd-dd Bĕṭrus, innă i-Ɣisa: "Ălɣalim, ufa ad-nĕzzăɣ ɣas diha-dăɣ, ad-nĕkrĕs kăraḍ ihĕktan: wa-năk, wa n-Mosa d-wa n-Ɣĕli." 6Wăr-issen a ijănna a-wa-dăɣ has-ja tarĕmmeɣt ĕnta d-imidiwăn-net. 7Tĕls'-en-dd tele n-tejărăkt tiyyăt ălwăqq-wen-dăɣ, ifăl-dd emăsli išĕnnawăn, innăn: "A-wa Rure-ɣ wa ĕkneeɣ tărha, săjdăt-as!" 8A-s dd-olăsăn inĕṭṭulab aḍkul n-asăwaḍ-năsăn, šanăšlamăn siha d-siha, wăr t-illa ere hannăyăn edes-hasăn kunta wădden Ɣisa ɣas. 9Ălwăqq wa dd-titrurun taḍaɣt, ăsmăhăḍ dăɣ-săn Ɣisa i-ad-wăr jen isălan n-a-wa ĕnhăyăn i-ăwadĕm wăl' iyyăn hundăɣ har ašăl wa dd-mad-inkăr Ăgg-ăgg-adĕm jer-inĕmmuttan. 10Ăsjădăn i-a-wa hasăn-inna, ad-tinmĕsĕstinăn d-ălmăɣna n-tanăkra jer-inĕmmuttan ed, iqqan a-wen iɣăfawăn-năsăn. 11Ǝssĕstănăn-t, ĕnnăn-as: "Mafăl jannen ălɣulam n-Ăṭṭăwrăt a-s ănnăbi Ɣĕli a ilan s-a dd-ass tĕzzar, išrĕy-t-dd Ălmasex?" 12Inn'-asăn: "Tidĕt, ănnăbi Ɣĕli a ilan s-a dd-ass isĕssiɣĕd hărăt iket-net; măšan, mafăl iktab a-s Ăgg-ăgg-adĕm, ilzam-t ad-inhĕy tersĕmmawen ăjjootnen, sĕffăṭṭĕn dăɣ-s dăgg-adĕm? 13Ăssiilmădăɣ-kăwăn a-s ănnăbi Ɣĕli, ăru dd-osa, măšan ăkkuddălăn-t dăgg-adĕm, jăn-as a-wa s-ărhăn ed, a-wen-dăɣ a ĕnnăn ĕlkĕttabăn dăɣ-isălan-net." 14Ălwăqq wa dd-iqqăl Ɣisa d-inĕṭṭulab-net wi n-kăraḍ, ogăẓăn-dd inĕṭṭulab-wi iyyăḍnen, ămmiizăɣăn d-ălɣulam n-Ăṭṭăwrăt, tăɣlay-tăn tamĕtte. 15Tojja tamĕtte Ɣisa ɣas, tof'-et tăkunt, tošăl săr-s, ad-has-tajjăn isofan. 16Inn'-asăn: "Ma tămmizăɣăm?" 17Inn'-as ăhalĕs iyyăn dăɣ-tamĕtte: "Ălɣalim, ĕlwăyăɣ-dd săr-k rure-ɣ ih' alšin ikrasăn ilĕs-net; 18edăgg dăɣ-t irmăs-dăɣ, ad-t-ăjjăḍlăt s-ăkall, ad-isakăffaw, iẓimĕkărkiẓ isenăn, isaqăqqad; ĕttărăɣ dăɣ-inĕṭṭulab-năk ad-dăɣ-s t-ĕkkĕsăn măšan, indăr-asăn." 19Ăwwežăb-asăn, inn'-asăn: "Ya ĕzzurĕyăt-i-dăɣ wărăt tomen, hundăɣ har ĕmme ĕlleɣ jere-wăn, ĕṣbarăɣ-kăwăn? Awĕyăt-ahi-dd alyaḍ." Ăwwăyăn-as t-dd. 20Diha-dăɣ d-inhăy alšin Ɣisa, ad-ijjăḍlăt alyaḍ s-ăkall, ad-itišbărḍil, isakăffaw. 21Issĕstăn Ɣisa ti-s, inn'-as: "Ǝmme t-irmăs a-wa?" Inn'-as ăhalĕs: "Hărwa măḍrĕy, 22dehiyyăn făw, itĕjjar-t alšin dăɣ-efew meɣ dăɣ-aman i-ad-ămmăt. Ɣas, kunta tăddoobed hărăt dăɣ-a-wa-dăɣ, aḍĕn-anăɣ tăhanint, agĕẓ-anăɣ." 23Inn'-as Ɣisa: "Tĕnned: 'kunta tăddoobed!' Ǝlmĕd a-s wăr t-illa a-s wădden răqqiis i-amumĕn." 24Iḍkăl ti-s n-alyaḍ emăsli-net ălwăqq-wen-dăɣ, innă: "Omanăɣ, agĕẓ-ahi dăɣ-iba n-immun." 25Inhăy Ɣisa tamĕtte tošal-dd săr-s ɣas, ăsmăhăḍ dăɣ-alšin, inn'-as: "Alšin wa ikrăsăn ilĕs n-alyaḍ-i-dăɣ, ăẓimăẓẓăj-t; omarăɣ-kăy s-ad-t-tĕzjărăd, wăr-ilăkkămet ad-t-dd-tăqqalăd." 26Ăɣwăttăt alšin, ibbĕkbăk alyaḍ s-ăṣṣahăt tĕzzar, izjăr-t; ăktăyyăt alyaḍ har ăɣelăn ăddinăt ăba-t 27măšan, irmăs-t-dd Ɣisa s-ăfuss, issĕnkăr-t-dd, ibdăd făll-iman-net. 28Ǝqqălăn ehăn ɣas, ĕssĕstănăn inĕṭṭulab Ɣisa s-edes, ĕnnăn-as: "Alšin-wĕnnin-hi, mafăl hanăɣ-indăr ad-t-nĕkkĕs dăɣ-alyaḍ?" 29Inn'-asăn: "Alšin šund-wa, wăr t-ill' ĕmmĕk s-izjăr ar s-tamădilt n-Măssinăɣ." 30Fălăn dihen ɣas, ăllilăn teje ta n-Galila măšan, wăr-irha Ɣisa ad-săr-s ilmĕd ăwadĕm 31ed isaɣra inĕṭṭulab-net, ijann'-asăn: "Ăgg-ăgg-adĕm, ad-ăttărmăs, ijjĕš ifassăn n-dăgg-adĕm, ĕjĕn iman-net măšan, kăraḍ išilan ḍarăt tamăttant-net, ad-dd-inkăr jer-inĕmmuttan." 32Wăr-ĕjrehăn măjrăd-wen-dăɣ, h'-en daɣ tasăja n-ad t-sĕstĕnăn d-ălmăɣna-net. 33Ǝwwăḍăn-in Qăfărnaxum, ĕjjăšăn ehăn wa ĕkkăn ɣas, issĕstăn Ɣisa inĕṭṭulab-net, inn'-asăn: "Ma tămmizăɣăm dăɣ-tabarăt?" 34Wăr t-illa a has-ĕnnan. Ij'-asăn asĕstan-wen-dăɣ, făl-a-s, dăɣ-tekle-năsăn, ămmiizăɣăn jer-iman-năsăn i-ad-ĕlmĕdăn ĕndek dăɣ-săn wa ojărăn. 35Ăqqima Ɣisa ɣas, iɣră-dd inĕṭṭulab-net wi n-măraw d-ĕssin s-iman-net, inn'-asăn: "Wa dăɣ-wăn irhăn tăzert, imĕlet daw-imidiwăn-net, umaset-asăn akli." 36Irmăs ḍarăt-a-wen ara iyyăn, ij'-e jere-săn tĕzzar, iḍkăl-t dăɣ-ifassăn-net, inn'-asăn: 37"Ere ăsbălălăn ara šund wa-dăɣ, dăɣ-tĕssĕba-nin, năkk a ăsbălăl; ere wa hi-ăsbălălăn, wădden năkk a ăsbălăl, Wa hi-dd-ăšmašălăn a ăsbălăl." 38Inn'-as ănăṭṭalib wa s-isĕm-net Exya: "Ălɣalim, nĕnhay ăhalĕs itakkăsăn alšinăn dăɣ-ăddinăt s-tărna n-isĕm-năk, nĕnn'-as, wăr-itilĕset, ed wăr dăr-năɣ ăddew." 39Inn'-asăn Ɣisa: "Wăr has-t-tĕgdelăm, făl-a-s, wăr t-illa ere madăn-ăj iji n-Măssinăɣ s-tărna n-isĕm-in alĕs daɣ, a ĕnḍărrăn ḍarăt-a-wen, tiẓmit-in. 40Ere wărăn hanăɣ-iknes, a-di, amidi-nănăɣ. 41Ere kăwăn-issĕswăn kara n-aman, dăɣ-tĕssĕba n-a-wa s-Ălmasex a kăwăn-ilăn, ăsidătteɣ-awăn a-s ilkam, ad-ijrĕw, ălhăk n-emărked wa ija." 42"Aratăn wi săr-i omănnen, ere ămoosăn ĕssĕbab n-tanmĕšrayt i-wăla iyyăn dăɣ-săn-dăɣ, ăwadĕm-en, iššăm-as-in, ad-tĕtwăqqĕn tăhunt ta măqqărăt s-itĕẓẓad ălkăma dăɣ-err-net, itwĕjăr-in dăɣ-ider n-ejărew wa sĕmmăn hărwa wăr-ofa abăkkaḍ-wen-dăɣ. 43Kăyy, kunta ăfuss-năk a ăbokăn ad-hak-ăssăbăb s-abăkkaḍ, itiḍărrut-kăy, ĕnkăḍ-t-in hărwa wăr tămešălăd abăkkaḍ-wen-dăɣ ed uf'-ak, ad-jeed ăfuss, tĕjjĕšăd ălžănnăt, uhĕn, ad-leed ĕssin ifassăn, tĕtwĕjărăd-in dăɣ-efew wa n-žohănnăma wărăn itĕmĕkit (( 44d-tiwĕkkawen ti wăren tĕmĕttit s-hărkuk ĕfradnăt dăɣ-tiɣĕswen n-ăddinăt)). 45Kunta daɣ aḍăr-năk a ăbokăn ad-kăy-isidĕw dăɣ-abăkkaḍ, itiḍărrut-kăy, ĕnkăḍ-t-in hărwa wăr tămešălăd abăkkaḍ-wen-dăɣ, ed uf'-ak, ad-tĕjjĕšăd ălžănnăt, jeed aḍăr, uhĕn ad-leed ĕssin iḍarăn, tĕtwĕjărăd-in dăɣ-efew wa n-žohănnăma-i hănăt (( 46tiwĕkkawen ti wăren tĕmĕttit s-hărkuk ĕfradnăt dăɣ-tiɣĕswen n-ăddinăt)). 47Kunta daɣ tiṭṭ-năk a ăbokăn ad-kăy-siḍĕw dăɣ-abăkkaḍ, tiḍărrut-kăy, kukkĕrĕt-tăt-dd hărwa wăr tămešălăd abăkkaḍ-wen-dăɣ, ed uf'-ak, ad-tĕjjĕšăd Tĕmmĕnĕya n-Măssinăɣ jeed tiṭṭ, uhĕn ad-leed sănatăt tiṭṭawen, tĕtwĕjărăd-in dăɣ-efew wa n-žohănnăma. 48Dihen, tiwĕkkawen ti ĕfrădnen dăɣ-tiɣĕswen n-ăddinăt, ĕddarnăt hărkuk. 49Ere ămešălăn abăkkaḍ, ad-ijjĕš efew s-ĕmmĕk-wa-dăɣ s-tajjăš tesĕmt imĕnsiwăn i-ad-tăn-tĕjjĕš temḍe. 50Tesĕmt, hărăt olaɣăn măšan, afăl tăt-tĕjmăḍ temḍe, ma tăt-e-isĕsmĕmăn? Tumaset tămudre-năwăn a ha tesĕmt, tĕnhirĕjăm dăɣ-ălɣafyăt."

will be added

X\