Marqĕs 8

1Tolăs-dd tamĕtte daɣ ažĕmmăɣ făll-Ɣisa dăɣ-išilan-win-dăɣ. Inhăy a-s wăr t-illa a tĕṭṭaf tĕkšă ɣas, iɣră-dd inĕṭṭulab-net, inn'-asăn: 2"Naqq'-ahi tăhanint n-tamĕtte-i-dăɣ; a ilan kăraḍ išilan, tĕlkam-ahi, ăbas ĕṭṭafăn a ĕkšăn; 3afăl tăn-ĕssĕglăɣ s-ihănan-năsăn, ălluẓăn s-ĕmmĕk-wa-dăɣ, ad-hasăn-indăr ad-tăn-in-awĕḍăn făl iba n-ăṣṣahăt ed, han-tăn-i dd-falnen ijĕj." 4Ǝnnăn-as inĕṭṭulab-net: "Mi ăddooben dăɣ-tenere-ta-dăɣ ad-išăkš tamĕtte jat ĕjut-wa-dăɣ?" 5Issĕstăn-tăn Ɣisa, inn'-asăn: "Maniket tijĕlwen tĕṭṭăfăm?" Ǝnnăn-as: "Ǝssayăt." 6Ăsɣăyma Ɣisa tamĕtte iket-net, iḍkăl tijĕlwen ti n-ĕssayăt, ămmoy i-Măssinăɣ, ăfrăsfărăs-tănăt tĕzzar, ikf'-enăt i-inĕṭṭulab i-ad-tănăt-uẓanăn jer-ăddinăt; ăẓunăn-tănăt. 7Ǝkfăn-t a-wa lăn dăɣ-imănan, iḍkăl-t, ămmoy i-Măssinăɣ tĕzzar, ikf'-en i-inĕṭṭulab-net i-ad-tăn-uẓanăn jer-ăddinăt. 8Tĕkša tamĕtte ta t-tĕllăt dihen-dăɣ hundăɣ har tĕyyĕwăn. Ăsdăwăn-dd inĕṭṭulab a-wa dd-ĕjlăšăn ăddinăt, osăn-t, iḍnay ĕssa deketăn. 9A iwwăḍăn ĕkkoẓ afḍăn n-ăhalĕs a ikšăn ašăl-wen-dăɣ. Tĕkša tamĕtte ɣas, issĕgl'-et Ɣisa; tĕglă. 10Ijjăš ĕnta d-inĕṭṭulab-net turăft n-aman ăssaɣăt-wen-dăɣ, ĕkkăn tidbi ti hănen teje ta n-Dălmănuta. 11Osăn-dd hărăt dăɣ-kăl-faris Ɣisa, ămɣănnănăn dăr-s, tiirĕmĕn-t, jannen-as: "Ăj data-năɣ iji n-Măssinăɣ hanăɣ-issĕtbătăn a-s tidĕt-dăɣ a-s Măssinăɣ a kăy-dd-ăšmašălăn." 12Ăhnăffăt dăɣ-iman-net, innă: "Mafăl tammăɣ ĕzzurĕyăt-ta-dăɣ i-iji n-Măssinăɣ? Ăsidătteɣ-awăn a-s wăr-ilkem ad-ija iji n-Măssinăɣ wăl' iyyăn data-wăn." 13Ifăl-tăn ḍarăt-a-wen, olăs ujĕš n-turăft n-aman, ijlăy ejănš s-efăyy wa iyyăḍăn. 14Dăɣ-tekle-ten-dăɣ, ĕttĕwăn-in inĕṭṭulab ad-awĕyăn ăzzad, wăr-ĕwweyăn dăɣ-turăft n-aman ar tiyyăt tajĕlla. 15Ăsmătăr-tăn Ɣisa, inn'-asăn: "He kăwăneḍ! Agĕẓăt iman-năwăn dăɣ-tăẓẓa ta n-kăl-faris d-Harudĕs." 16Ǝslăn inĕṭṭulab i-a-wen ɣas, ad-tinmĕnnin jer-iman-năsăn: "A-wa, a-wa-dăɣ s-wăr nĕwwey tijĕlwen a făl hanăɣ-itajj măjrăd-wa-dăɣ." 17Ilmăd Ɣisa ɣur-iman-net a-wa tinmĕnnin, inn'-asăn: "Mafăl ĕkkan inĕzjam-năwăn a-wa s-wăr tăwweyăm tijĕlwen? Ajăn ulhawăn-năwăn jan tăɣart-ta-dăɣ făl ăbas hannăyăm, ăbas jarrăhăm? 18Ma jănăt tiṭṭawen-năwăn tĕnhĕyăm săr-snăt, ma jănăt timĕẓẓujen-năwăn, tĕslĕm săr-snăt? 19Ajăn tĕttĕwăm-in tijĕlwen ti n-sĕmmosăt ăẓunăɣ i-sĕmmos afḍăn n-ăhalĕs, maniket deketăn dd-tăsdăwăm dăɣ-a-wa dd-tĕjlăš tamĕtte?" Ǝnnăn-as: "Măraw d-ĕssin." 20Inn'-asăn: "Ălwăqq wa d-ăẓunăɣ ĕssayăt tijĕlwen i-ĕkkoẓ afḍăn n-ăwadĕm, maniket deketăn ĕḍnaynen dd-tĕjlăš tamĕtte?" Ǝnnăn-as: "Ǝssa." 21Inn'-asăn: "Adiš, har ămăra-dăɣ, wăr t-illa a tĕjrahăm?" 22Iwwăḍ-in Ɣisa d-inĕṭṭulab-net taɣrĕmt ta n-Băṭsăyda ɣas, ittĕlwăy-dd săr-s emĕdderɣĕl iyyăn, ĕttărăn dăɣ-s ad-t-iḍĕs, izzĕy. 23Irmăs-t Ɣisa s-ăfuss, ilwăy-t hundăɣ har dăr-s izjăr tadăbayt tĕzzar, ăswăr tisutaf-net tiṭṭawen n-emĕdderɣĕl, ăswăr-t ḍarăt-a-wen ifassăn-net, inn'-as: "Ak, hannăyăd hărăt meɣ?" 24Ăsfănăwnăw emĕdderɣĕl, innă: "Hannăyăɣ ăddinăt măšan, olăhăn-ahi d-ihĕškan ărjašnen." 25Olăs Ɣisa asĕwăr n-ifassăn-net tiṭṭawen-net ɣas, ăsnăflăy ahănay, izzăy, oɣăd ahănay-net i-hărăt iket-net. 26Issĕgl'-e Ɣisa, inn'-as: "Wăr resăd wăla tadăbayt, aɣĕd iman-năk ɣas s-ehăn-năk." 27Izjăr Ɣisa ḍarăt-a-wen ĕnta d-inĕṭṭulab-net, ikka dăr-săn tidbi-ti hănen attayăn n-aɣrĕm wa s-itawănna Qăyṣăra wa n-Fĕlibb. Ǝglan hărwa a-s tăn-issĕstăn Ɣisa, inn'-asăn: "Ma jannen ăddinăt dăɣ-isălan-in? Ma jannen mi ămoosăɣ?" 28Ăwwežăbăn-as, ĕnnăn-as: "Iyyăḍ jannen: kăyy a-s Exya wa n-Enĕsselmăɣ; iyyăḍ jannen: kăyy a-s ănnăbi Ɣĕli; iyyăḍ făw a jannen: kăyy iyyăn dăɣ-ănnăbităn dd-olasăn uɣĕl." 29Issĕstăn-tăn daɣ, inn'-asăn: "Kăwăneḍ-š, ma tĕnnăm, mi ămoosăɣ?" Ăwwežăb-as Bĕṭrus, inn'-as: "Kăyy a-s Ălmasex." 30Ăsmăhăḍ dăɣ-săn Ɣisa ḍarăt-a-wen, d-ad-wăr jen isălan-win-dăɣ i-ăwadĕm wăl' iyyăn. 31Ɣur-dihen-dăɣ ad-issĕntă Ɣisa asĕɣăr n-inĕṭṭulab-net n-a-s Ăgg-ăgg-adĕm, ilzam-t ad-inhĕy tersĕmmawen ăjjootnen, ĕnkărăn-t inušămăn wi n-Iṣrayil d-imănokalăn n-kăl-tikutawen d-ălɣulam n-Ăṭṭăwrăt; ad-ĕjĕn iman-net măšan, kăraḍ išilan ḍarăt tamăttant-net, ad-dd-alĕs tanăkra jer-inĕmmuttan. 32Ij'-asăn Ɣisa măjrăd-wen-dăɣ s-ĕmmĕk ilan ujreh; ikkăs-t-dd Bĕṭrus s-takše, ăklăwlăw fălla-s. 33Innăḍ-dd Ɣisa s-inĕṭṭulab-net, iɣtăl Bĕṭrus, inn'-as: "Šĕnkĕš făll-i, Iblis-wa! Kăyy, inĕzjam-năk, i n-dăgg-adĕm, wădden i n-Măssinăɣ." 34Iɣră-dd Ɣisa ḍarăt-a-wen tamĕtte d-inĕṭṭulab-net s-iman-net, inn'-asăn: "Ere irhăn alkum-hahi-dăɣ, adiš, iksĕnet iman-net, ăjet făll-tamăttant šund ta n-tajĕttewt tĕzzar, ilkĕmet-ahi. 35Ere wa wărăn itĕttăr ar ĕmmĕk s-ogăẓ iman-net, dăɣ-ăddunya-ta-dăɣ, ad-ifut dăɣ-ălžănnăt; măšan, wa irḍăn ăfota dăɣ-iman-net, dăɣ-ăddunya-ta-dăɣ, dăɣ-ăddimmăt-in, d-ăddimmăt n-Ălĕnžil, ad-iɣlĕs. 36Ma s-infa ăgg-adĕm ad-irbăx ăddunya iket-dăɣ-net, a-s ija a-wen, ăfota dăɣ-ălaxărăt? 37Ajăn ma t-illan s-ăddoobăt ăwadĕm ad-t-ăkf i-ad-săr-s iɣlĕs iman-net dăɣ-temse? 38Ere hi-ăkrakăḍăn, năkk d-măjrăd-in, dat-ĕzzurĕyăt-ta-dăɣ n-temăznit tănmăšrăyăt i-Măssinăɣ, ad-t-ĕkrukĕḍăɣ năkk-dăɣ-i n-Ăgg-ăgg-adĕm, ašăl wa d-mad-dd-iqqĕl dăɣ-ălxurmăt n-Abba-nin, ăddew d-ănjălosăn wi n-imĕššeddĕjăn."

will be added

X\