Marqĕs 7

1Ǝžžĕmmăɣăn-dd kăl-faris d-hărăt dăɣ-ălɣulam n-Ăṭṭăwrăt dd-falnen Yărussălam s-Ɣisa. 2Ǝjrăhăn-in dăɣ-a-wen-dăɣ a-s tattăn iyyăḍ dăɣ-inĕṭṭulab-net, wăr-ăsserădăn ifassăn-năsăn. 3Iqqăn a-wen iɣăfawăn-năsăn făl-a-s kăl-faris d-kăl-Ălyăhud iket-năsăn, ămoosăn ăddinăt ĕlkamnen i-ălɣadatăn wi hasăn-dd-oyyăn imărawăn-năsăn: wăr hasăn-t-tĕlla tetăte ar s-ad-ăsserădăn ifassăn-năsăn har taɣmărt tĕzzar. 4Afăl ĕkkăn ăssuk har t-dd-fălăn, wăr hasăn-t-tĕlla tetăte ar s-ad-ăsserădăn telămăkt-năsăn iket-net. Lan daɣ ălɣadatăn ăjjootnen s-ĕlkamăn săl wi-dăɣ: ašĕšdaj n-ikassăn d-iɣsas d-iɣerăn d-isĕftaɣ. 5Ǝssĕstănăn kăl-faris d-ălɣulam n-Ăṭṭăwrăt Ɣisa, ĕnnăn-as: "Mafăl inĕṭṭulab wi-năk, wăr-ĕlkemăn i-agna wa hanăɣ-dd-oyyăn imărawăn-nănăɣ? Tattăn wăr-ăsserădăn ifassăn-năsăn." 6Inn'-asăn Ɣisa: "Ălmunafeɣăn! Tidĕt-dăɣ a-wa fălla-wăn innă ănnăbi Saya, a-s innă, inna Măssinăɣ: 'Tamĕtte-ta-hi, iḍlay-net ɣas a-s hi-tăssiimɣăr ulh-net, ujĕj-ahi; 7semɣar wa hi-jăn ăddinăt, mălayăɣna ed a-wa saɣren dăgg-adĕm făll-i, wăr-ămoos ɣas ar fărĕḍăn dd-ăɣtasăn i-iman-năsăn.' 8Ǝmmĕk-wen-dăɣ a-s, kăwăneḍ-dăɣ, tĕšlăyăm i-alămăr wa n-Măssinăɣ, tĕṭṭăfăm ălɣadăt n-dăgg-adĕm." 9Inn'-asăn daɣ: "Kăwăneḍ, jărăm-in alămăr wa n-Măssinăɣ, jăm agna-năwăn dăɣ-edăgg-net. 10Wădden, innă ănnăbi Mosa: 'Sĕmɣăr ti-k d-ma-k', innă daɣ: 'Ere ăbodărăn ti-s meɣ ma-s, ămmătet.' 11Tĕssanăm s-a-wen-dăɣ iket-net măšan kăwăneḍ-da-dăɣ, iyyăḍ dăɣ-wăn, saɣren ăddinăt a-s, ăddoobăt ăwadĕm ad-ănn i-abba-net d-anna-net: 'A-wa s-ăsidărhăn ad-kăwăn-ĕdhĕlăɣ săr-s, jeɣ-t takute i-Măssinăɣ', 12ija ɣur-wăn a-s ere innăn a-wen-dăɣ i-imărawăn-net, ad-ăbas t-iwar ălxaqq-năsăn. 13A-wa săɣrem d-a-ăjjeen dăr-s ănifăqqăn a-s hin-tăsbăṭṭălăm a-wa inna Măssinăɣ, jăm a-wa hawăn-inna agna-năwăn dăɣ-edăgg-net." 14Iɣră-dd Ɣisa tamĕtte s-iman-net daɣ, inn'-as: "Săjdăt-ahi iket-dăɣ-năwăn, tĕjrăhăm a-wa hawăn-janneɣ: 15Wăr t-illa a itajjăšăn emm n-ăgg-adĕm ăddooben asĕmmăḍĕs-net, a-wa dd-itĕffalăn ammas n-ulh-net ijănna s-emm-net a t-isamăḍasăn dat-Măssinăɣ. (( 16Ere dăɣ-wăn ilăn timĕẓẓujen s-islă-dăɣ, isăjdet.))" 17Ifăl Ɣisa tamĕtte ɣas, iqqăl ehăn, ĕssĕstănăn-t inĕṭṭulab-net dihen d-ălmăɣna n-tangalt ta ija. 18Inn'-asăn: "Adiš kăwăneḍ har ămăra-dăɣ, wăr tĕjrehăm a-s ăsink, esăk? Ajăn wăr hĕnnĕyăm a-s, wăr t-illa a isuk ăwadĕm emm-net ăddooben a t-isĕmmăḍĕs 19făl-a-s, a-wa dd-itĕffalăn ajăma, wăr-itĕkk ulh-net, tăsa-net a itakk, izjăr ḍarăt-a-wen, ăj'-e-hin dăɣ-tăkoyt." Ǝmmĕk-wen-dăɣ a-s isaxlal Ɣisa imĕnsiwăn iket-năsăn. 20Inn'-asăn daɣ: "A-wa dd-itĕffalăn ulh n-ăgg-adĕm, a t-isamăḍasăn dat-Măssinăɣ, 21făl-a-s ammas n-ulh n-ăgg-adĕm a dd-itĕffal erk ĕnniyăt wa n-abjĕnjĕn, iba n-tăkrakiḍt, tikra, iji n-iman, 22ĕzzĕna, tăkkărdădt, tăllăbăst, amsud, asĕmmăḍĕs n-iman, erk derhan, asĕkkufăr, ĕkkĕbru, taxxalen. 23Ǝntăneḍ-den-dăɣ hărătăn wi samăḍasnen ăgg-adĕm, ed ammas n-ulh-net a dd-tĕffalăn." 24Ifăl Ɣisa dihen, ikkă teje ta n-Tir. Iwwăḍ-in ɣas, ijjăš ehăn iyyăn, făl-a-s wăr irha ad-fălla-s ĕlmĕdăn ăddinăt măšan, hakd-a-wen-dăɣ, wăr-iṣter ass-net. 25Šik-dăɣ a-s t-tĕslă tamăḍt tiyyăt s-ih' alšin elle-s, tĕkk'-e-hi-dd, tărkăɣ data-s. 26Tamăḍt-en, wăr tăt-len kăl-Ălyăhud, ti n-teje ta n-Finisya hăt ăkall wa n-Surya. Tos'-e-hi-dd ɣas, tĕttăr dăɣ-s ad-ikkĕs alšin dăɣ-elle-s măšan, 27inn'-as Ɣisa: "Ăyy aratăn ad-ăyyăwănăn tĕzzar ed, wăr-ănhăjja ad-dd-ikkĕs ăwadĕm amĕnsi daw-săn, ijăr-t-in i-iyyăḍan." 28Tăwwežăb-as tamăḍt, tĕnn'-as: "Ălɣalim, tidĕt măšan a-wen wăr hin-ikkes a-s iyyăḍan, ăddooben ad-tattăn a-wa dd-sitrĕkkin aratăn." 29Inn'-as Ɣisa: "Ǝglĕw, dăɣ-tĕssĕba n-a-wa-dăɣ tĕnned, a făl, elle-m, izjăr-tăt alšin." 30Tăqqăl ehăn-net, togăẓ-in elle-s, tĕnsa făll-tešejit, izjar-tăt alšin. 31Ifăl Ɣisa teje ta n-Tir, ikka ta n-Săyda, ihăl ebre n-ejănš wa n-Galila dăɣ-a-s ijlay teje ta n-măraw iɣărman. 32Ǝwwăyăn-dd săr-s ăddinăt ăhalĕs măẓẓĕjăn s-ikras ilĕs-net ad-dăɣ-s tattărăn ad-fălla-s isăns ifassăn-net. 33Irmăs-t-dd Ɣisa s-edes tĕzzar, ij' assĕkăḍ-net dăɣ-timĕẓẓujen-net, ijă daɣ s-assĕkăḍ-net emătăm-net făll-ilĕs n-ăhalĕs, 34ăjoẓăy išĕnnawăn, ăhnăffăt tĕzzar, inn'-as: "|iEfata|d", a-wen ălmăɣna-net: "Marr." |r 35Ămerănăt timĕẓẓujen-net hakd ilĕs-net, ad-itamăjrad. 36Ăsmătăr Ɣisa ăddinăt iket-năsăn d-ad-wăr jen isălan n-a-wen-dăɣ i-ăwadĕm wăl' iyyăn măšan, a ikk' isamătar-tăn, sawaḍăn ĕntăneḍ dăɣ-tĕnna n-a-wa ijăn. 37Ămoos Ɣisa i-ăddinăt tăkunt-i-dăɣ măqqărăt, ĕqqălăn-dd ɣas jannen: "A-wa, a-wa ităjj iket-net ifran, isasla imẓaj, isamăjrad daɣ wi s-ĕkrăsăn ilsawăn-năsăn."

will be added

X\