1 Ifăl Ɣisa dihen, ăddew d-inĕṭṭulab-net s-taɣrĕmt ta dăɣ-idwăl. 2 Ašăl wa n-ĕssĕbĕt-i n-tăsonfat, ijjăš ehăn n-ăddin wa n-kăl-Ălyăhud, ad-dăɣ-s isaɣra. Ăsijădăn-as ăddinăt ăjjootnen ăkuunnen dăɣ-a-wa ijanna, ĕqqălăn-dd ɣas oran imawăn, jannen: "Ăhalĕs-wa-dăɣ, ĕndek siha s-t-dd-iha a-wa ităjj? Mi t-ikfăn tĕlɣulĕma d-tădabit n-iji n-tikunen ti ităjj? 3 Ak a-wa, ajăn wădden Ɣisa wa n-mĕnizye n-rure-s n-Măryăma n-ă/n/na-s n-Yaqub d-Yusĕf d-Hudd d-Simyon? Wădden šătma-s da-dăɣ ĕzzăɣnen jere-năɣ." Jăn-as a-wen-dăɣ s-t-ĕzzayăn asăkor, unjăyăn săr-s omănăn. 4 Inn'-asăn: "Ănnăbi, wăr t-ill' edăgg s-wădden ătiwăsămɣăr dăɣ-s, ar dăɣ-ăkall-net, d-ɣur-imărawăn-net d-dăɣ-ehăn-net." 5 Igdăl-as a-wen-dăɣ, ad-ɣur-săn ăj tikunen săl hărăt dăɣ-imarhinăn făll-ăssinsa ifassăn-net, ĕzzăyăn. 6 Tof'-e tăkunt n-iba n-immun-năsăn. Issăɣlăy-dd ḍarăt-a-wen dăɣ-attayăn n-tidbi-en-dăɣ, isaɣra ăddinăt. 7 Iɣră-dd Ɣisa inĕṭṭulab-net wi n-măraw d-ĕssin ḍarăt-a-wen, ăšmašăl-tăn s-ĕssin-ĕssin dăɣ-a-s tăn-ikfa tărna făll-alšinăn. 8 Ăsmătăr-tăn, inn'-asăn: "Wăr tĕḍkelăm dăɣ-asikĕl-năwăn a săl tăborit; wăr tăwweyăm ăzzad, wăla šăkkoš, wăl' aẓrĕf, 9 asĕsăt tifădelen-năwăn, wăr jem ĕssin irăswăyăn." 10 Inn'-asăn daɣ: "Ehăn tĕjjăšăm-dăɣ, tĕzzăɣăm dăɣ-s har ašăl wa d-tăssawăḍăm tekle. 11 Edăgg tosăm-dăɣ, wăr kăwăn-ăsbărrăkăn mĕssaw-s, unjăyăn s-asjĕd-hawăn, ĕzjărăt-t, tăbbăkbăkăm tifădelen-năwăn i-ad-wăr tănăt-ilĕttăɣ wăla-dăɣ ăboqqal-net. Ilkam, ad-ăjjăyh a-wen fălla-săn." 12 Ǝglăn inĕṭṭulab, ad-xaṭṭăbăn i-ăddinăt i-ad-utabăn, 13 takkăsăn daɣ alšinăn ăjjootnen dăɣ-ăddinăt, šawwăyăn inĕbdan s-ĕzzăyt, zizuyăn-tăn. 14 Isl' ămănokal Harudĕs mawmaw n-Ɣisa ed ih' isĕm-net imawăn n-ăddinăt iket-năsăn. Jannen iyyăḍ dăɣ-săn: "A-wa Exya wa n-Enĕsselmăɣ a dd-inkărăn jer-inĕmmuttan, a-wen-dăɣ a t-ikfăn tădabit n-tikunen-ti itamašal." 15 Jannen iyyăḍ: "Ăbo, a-di ănnăbi Ɣĕli", jannen wi iyyăḍnen: "A-wa iyyăn dăɣ-ănnăbităn wi n-ibda." 16 Islă Harudĕs i-a-wen ɣas, innă ĕnta: "A-wa Exya wa s-ĕssĕfrăsăɣ eɣăf-net, ĕnta a dd-olăsăn tanăkra jer-inĕmmuttan." 17 Ăzzăman-en, Harudĕs iman-net a omărăn s-ad-ăttărmăs Exya, ijjĕš tišĕm, itwĕjăr-in dăɣ-takărmut, dăɣ-tĕssĕba n-Harudĕyăt ta n-hănne-s n-ă/n/na-s Fĕlibb dăɣ-s ohăɣ Harudĕs, 18 făl-a-s innin, inn'-as Exya: "Wăr hak-xălal, ad-tărkĕbăd hănne-s n-ă/n/na-k." 19 Tĕkšăr ya Harudĕyăt Exya făl a-wen-dăɣ, ad-tattăr tamăttant-net măšan, wăr hĕnnĕy tašlĕlt s-ja a-wen. 20 Ăksuḍ daɣ Harudĕs Exya ed, issan a-s ăhalĕs oɣadăn n-emĕššeddĕj a ămoos, ogaẓ-t dăɣ-tĕssĕba n-a-wen-dăɣ. E-d has-ăsjăd ămmiijrăd, ad-t-ĕkmun iman-net kud-dăɣ, ijraẓ-as asjĕd-has. 21 Han a-wen-dăɣ a-s dd-tosa tamĕntelt ta s-taqqăl Harudĕyăt a ija a-wa-dăɣ. Ašăl d-tajjăn imĕšlan wi n-isĕkta n-tiwit n-Harudĕs, ăsmăjarăt-dd Harudĕs kăl-ĕlxĕkum-net d-kumăndatăn n-ĕlɣĕskăr-net d-imizărăn n-teje ta n-Galila, 22 tĕjjăš-dd elle-s n-Harudĕyăt, ad-dallăl data-săn, ijrăẓ a-wen i-Harudĕs d-imăjarăn-net. Iɣră-dd ămănokal talyaḍt, inn'-as: "Ǝttăr dăɣ-i a-wa tărhed, ad-ham-t-ăkfăɣ." 23 Ad-has-itĕhhaḍ s-ad-tăt-ăkf a-wa dăɣ-s tĕttăr, kud-irha umas tăẓune n-ăkall-net. 24 Tĕzjăr talyaḍt, tĕnnă i-ma-s: "Ma dăɣ-s mad-ĕttărăɣ?" Tĕnn'-as ma-s: "Ǝttăr dăɣ-s eɣăf n-Exya wa n-Enĕsselmăɣ." 25 Tăqqăl-dd ămănokal šik, tĕnn'-as: "Ărheɣ ad-hi-tĕkfĕd ămăra-dăɣ eɣăf n-Exya wa n-Enĕsselmăɣ insa dăɣ-aẓăwa." 26 Ǝnxăsăn iman n-ămănokal hullan măšan, ăbas ăddoobăt uɣĕl s-a-wa inna, ed ihăḍ-as s-ad-tăt-ăkf a-wa dăɣ-s mad-tĕttăr, a ămoos-dăɣ, dat-imăjarăn-net, wăr-irha daɣ ad-ărẓ dăɣ-tĕnna-net i-talyaḍt. 27 Ăšmašăl ăssaɣăt-wen-dăɣ ĕssărdasi dăɣ-wi jănen ĕnniyăt i-ehăn-net i-ad-dd-ifrĕs eɣăf n-Exya. Ikk' ĕssărdasi takărmut ta ih' Exya, ifrăs-dd eɣăf-net, 28 iwwăy-t-dd insa dăɣ-aẓăwa, ikf'-e i-talyaḍt, tĕkf'-e talyaḍt i-ma-s. 29 Ǝslăn inĕṭṭulab n-Exya tamăttant-net ɣas, ĕglăn, ĕḍkălăn-dd tafĕkka-net, ĕẓkăn-t. 30 Ǝqqălăn-dd inĕṭṭulab wi ăšmašăl Ɣisa, jăn dăɣ-s isălan n-a-wa jăn d-a-wa ĕssăɣrăn iket-net. 31 Inn'-asăn: "Năkket edăgg n-iman-nănăɣ, sunfĕm a ĕnḍărrăn." Ij'-asăn măjrăd-wen-dăɣ, făl-a-s igdăl-asăn, ĕjut n-emerjaš n-ăddinăt wăla ăssaɣăt s-ăssokăn hărăt imawăn-năsăn. 32 Ǝjjăšăn turăft n-aman, ĕkkăn tenere n-iman-năsăn. 33 Ǝnhăyăn-tăn ăddinăt ăjjootnen a-s ĕglăn, ĕzzăyăn-tăn ɣas, fălăn-dd iɣărman iket-năsăn, ošălăn-dd har hasăn-ăzzarăn făw s-edăgg wa ĕkkăn. 34 Izjăr-dd Ɣisa turăft n-aman, inhăy ĕjut wa jăn ăddinăt ɣas, tănɣ'-e tăhanint-năsăn ed, olăhăn ɣas d-tihatten wăren la amăḍan, ad-tăn-isaɣra hărătăn ăjjootnen. 35 Toḍa tăfukt ɣas, osăn-t-dd inĕṭṭulab-net, ĕnnăn-as: "Năkkăneḍ, edăgg n-tenere a nĕha, ij'-anăɣ ehăḍ; 36 sĕglĕw ăddinăt, ad-ĕkkĕn tidbi d-imăzzaɣăn wi ohăẓnen, žĕnšĕn-dd a ĕkšăn." 37 Ăwwežăb-asăn Ɣisa, inn'-asăn: "Un, ăkfăt-tăn a ĕkšăn." Ǝnnăn-as: "Ajăn a tărhed ad-năkk aɣrĕm i-ad-dd-nĕžănš tijĕlwen n-sănatăt timaḍ n-ărriyal n-aẓrĕf i-ad-nĕšăkš tamĕtte-ta-dăɣ?" 38 Inn'-asăn: "Ǝssĕnăt-dd maniket tijĕlwen lăm." Ǝlmădăn-dd, ĕnnăn-as: "Sĕmmosăt tijĕlwen d-ĕssin imănan." 39 Omăr-asăn ḍarăt-a-wen s-ad-ĕbḍĕwăn ăddinăt, săqqaymĕn-tăn făll-teyĕšše ta dalet. 40 Tăqqima tamĕtte s-temeḍe-temeḍe n-ăwadĕm, sĕmmosăt-sĕmmosăt timĕrwen n-ăwadĕm. 41 Iḍkăl Ɣisa tijĕlwen ti n-sĕmmosăt d-imănan wi n-ĕssin, ăjoẓăy išĕnnawăn, ămmoy i-Măssinăɣ; ăfrăsfărăs tijĕlwen, ănkăḍnăkăḍ imănan wi n-ĕssin tĕzzar, ikfă a-wen-dăɣ iket-net i-inĕṭṭulab-net i-ad-t-uẓanăn jer-ăddinăt iket-năsăn. 42 Ǝkšăn iket-dăɣ-năsăn har ĕyyĕwănăn. 43 Ăsdăwăn-dd inĕṭṭulab a-wa dd-ĕjlăšăn, osăn-t iḍnăy măraw deketăn d-ĕssin n-tijĕlwen d-imănan. 44 Sĕmmos afḍăn n-ăhalĕs a ĕkšănen ašăl-wen-dăɣ. 45 Ăsrarăd Ɣisa ḍarăt-a-wen inĕṭṭulab-net s-ujĕš n-turăft ta n-aman, izarăn-as s-efăyy n-ejănš wa iyyăḍăn, ebre n-taɣrĕmt ta n-Băṭsăyda, ad-isagla ĕnta tamĕtte. 46 Făl-t tamĕtte ɣas, iwwăn taḍaɣt tiyyăt, ad-itĕddal Măssinăɣ. 47 A-s ijă ehăḍ, tĕha turăft n-aman ta hăn inĕṭṭulab ammas n-ejănš, a-s ija a-wen Ɣisa ĕnta, ih' asălim n-aman. 48 Ojj'-en ăsimăɣatăr-tăn aḍu šămad igla ehăḍ, ikk'-en-dd irjaš făll-aman har dăroɣ tăn-okăy. 49 Ǝnhăyăn-t ikk'-en-dd irjaš făll-aman ɣas, ăɣelăn ămăttănkul iyyăn, ad-naḍḍăwăn iɣăran. 50 Hannăyăn-t măšan, indăr-asăn a t-ĕzzĕyăn a-wa-dăɣ hasăn-tĕja tarĕmmeɣt. Ăssewăl-asăn šik, inn'-asăn: "Ǝflĕsăt-ahi, năkk a-wa, wăr tărmeɣăm." 51 Ijjăš-dd fălla-săn turăft n-aman ɣas, ibdăd aḍu. Ămoos-asăn a-wa ijăn tăkunt-i-dăɣ măqqărăt. 52 Indăr-asăn ujreh n-asjĕt wa ija i-tijĕlwen făl tăɣart-i-dăɣ jăn ulhawăn-năsăn. 53 Ijlăy Ɣisa d-inĕṭṭulab-net ejănš, ăsjănăn dăɣ-ăkall wa n-Žănnăṣarăt. 54 Diha-dăɣ dd-ĕzjărăn dăɣ-turăft n-aman, ad-ĕzzăyăn ăddinăt Ɣisa, 55 ad-tišĕlĕn dăɣ-ăkall iket-net, tazăwen-dd săr-s imarhinăn făll-tišija s-edăgg wa s-ĕslăn ih'-e i-ad-tăn-izuzĕy. 56 Edăgg osa-dăɣ, jer-iɣărman, tidbi, wăla ăssukăn, ad-dd-awĕyăn ăddinăt imarhinăn-năsăn, tattărăn ad-ăḍĕsăn kud-dăɣ afăr n-erăswăy-net ed, ere t-iḍăsăn-dăɣ, ad-izzĕy.
