Marqĕs 5

1Ǝwwăḍăn-in ašrut n-ejănš wa iyyăḍăn, a-wen dăɣ-ăkall wa n-Gadara. 2Diha-dăɣ dd-izjăr Ɣisa turăft n-aman, ad-has-dd-ilkăḍ amălšon dd-izjarăn tiẓĕska. 3Dihen-dăɣ ad-izzaɣ, wăr t-illa ăwadĕm ăddoben akărad-net wăla-dăɣ s-tišĕm. 4Akărad has-jăn ăddinăt s-tifren hakd tišĕm-dăɣ, ad-tănăt-dd-isăqqĕtĕs, wăr t-illa făw ere ăddoben a dăɣ-s ănnăhăḍ. 5Ehăḍ d-ašăl iha tiẓĕska, meɣ ošal făll-iḍaɣăn, inaḍḍăw iɣăran, išašar iman-net s-tihun. 6Ojja Ɣisa dăɣ-ijĕj ɣas, ošăl-dd săr-s, irkăɣ data-s, 7iḍkăl emăsli-net, innă: "Ɣisa, Rure-s n-Măssinăɣ wa iknăn aḍkul, ma dăɣ-i tărhed? Făl Măssinăɣ, wăr hi-tăqquzzăbed." 8Alšin wa t-ihăn a ijannen a-wen ed isamăhaḍ Ɣisa fălla-s i-ad-t-izjăr. 9Issĕstăn-t Ɣisa, inn'-as: "Mi isĕm-năk?" Inn'-as ăhalĕs: "Isĕm-in: ejhăn ed nĕjjĕt." 10Ad-laqqădăn alšinăn wi t-hănen Ɣisa i-ad-tăn-wăr-ikkes dăɣ-ăkall. 11A-s ităjj a-wen-dăɣ, iḍan ehăre n-ĕlxĕnžărăn făll-tasăja n-taḍaɣt hat attayăn-en-dăɣ. 12Ad-laqqădăn alšinăn Ɣisa, jannen-as: "Suk-anăɣ ĕlxĕnžărăn i-ad-tăn-nĕjjĕš." 13Irḍ'-asăn s-a-wen. Ǝzjărăn alšinăn ăhalĕs, ĕjjăšăn ĕlxĕnžărăn, ad-dd-titrĕktĕrikăn a iwwăḍăn ĕssin afḍăn n-ĕlxĕnžăr, wa-dăɣ n-afălla n-taḍaɣt, tiḍĕwăn dăɣ-ejănš, tattăn-tăn aman. 14Ǝnhăyăn imăḍanăn n-ĕlxĕnžărăn a-wa ijăn ɣas, ăjewăḍăn. Ošălăn, jăn isălan dăɣ-kăl-aɣrĕm d-attayăn-net. Ad-dd-tišĕl tamĕtte, tiwnifit-dd a-wa ijăn. 15Osăn-dd ăddinăt edăgg wa iha Ɣisa, ogăẓăn-dd amălšon wa s-kăla t-ih' ejhăn n-alšinăn, ăqqiima, ij' isĕlsa, tĕh'-e daɣ tijya n-iman-net. 16Jăn dăɣ-săn ăddinăt wi ăjjĕyhnen i-a-wa ijrăwăn amălšon d-ĕlxĕnžărăn isălan ɣas, 17ad-tĕddalăn Ɣisa d-ad-ifĕl ăkall-năsăn. 18Ălwăqq wa d-itajjăš Ɣisa turăft n-aman, ikk'-e-hi-dd ăhalĕs wa s-kăla t-hăn alšinăn, ad-t-ilaqqăd d-ad-dăr-s idaw. 19Wăr has-irḍa Ɣisa s-a-wen, ănn-ak, inn'-as: "Ǝglĕw, ĕqqĕl ehăn-năk, diha t-ĕllăn išăqqaɣăn-năk, tăllăɣed-asăn tĕmɣăre n-a-wa hak-ija Emăli d-ĕmmĕk wa s-hak-oḍăn tăhanint." 20Iglă, ad-itajj isălan n-tĕmɣăre n-a-wa has-ija Ɣisa dăɣ-teje ta jăt isĕm: "Ta n-măraw iɣărman". Ere has-islăn-dăɣ, ad-dd-iqqĕl ɣas ăkun dăɣ-isălan-net. 21Izjăr Ɣisa ḍarăt-a-wen s-asălim n-ejănš wa iyyăḍăn, diha-dăɣ dd-ăsjănăn dăɣ-asălim n-aman, ad-săr-s dd-tăddew tamĕtte tăjjeet. 22Os'-e-hi-dd dihen iyyăn dăɣ-ălfăqqităn n-ehăn n-ăddin wa n-kăl-Ălyăhud n-taɣrĕmt-en s-isĕm-net Žayrus, inhăy Ɣisa ɣas, irkăɣ data-s, 23ad-t-itĕddal, ijann'-as: "Talyaḍt-in, tăbok i-iba, nidawet săr-s, sĕnsĕd fălla-s ifassăn-năk, ad-tĕzzĕy, tĕddăr." 24Ăddew dăr-s Ɣisa, tĕlkam-as daɣ tamĕtte tăjjeet t-tăsinăkmămăt. 25Tamĕtte-en, h'-et tamăḍt ijammăḍ ašni a ilan măraw iwĕtyan d-ĕssin, 26tĕkna ahănay n-aɣăna jer-ifassăn n-lăxturtăn, tăsmălkăw-in a-wa tĕla iket-net măšan, wăr t-illa făw a-hin-ifnaẓăn dăɣ-turhĕnna-net, ănn-ak, tiwwaḍt ɣas ad-dd-tajj fălla-s. 27Tĕsl' isălan n-Ɣisa ɣas, tĕjjăš-dd tamĕtte s-ḍarăt, ḍăs erăswăy-net, 28ed a-s tăjj a-wen-dăɣ, janna: "Wăla erăswăy-net, kud-t-ḍăsăɣ, ad-ĕzzĕyăɣ." 29Diha-dăɣ d-ḍăs erăswăy-net, ad-iktăl ašni wa tăt-dd-izajjărăn, tofrăy ăssaɣăt-wen-dăɣ dăɣ-taɣĕssa-net a-s tĕzzăy dăɣ-tiẓẓurt-net. 30Ilmăd Ɣisa ɣur-iman-net, ălwăqq-wen-dăɣ, făl tărna ta t-dd-tĕjmăḍăt, innăḍ-dd s-tamĕtte, innă: "Mi iḍăsăn isĕlsa-nin?" 31Ǝnnăn-as inĕṭṭulab-net: "Ajăn wăr hĕnnĕyăd tamĕtte ta kăy-tăsinăkmămăt a-s jănned: 'Mi hi-iḍăsăn?' " 32Issăɣlăy-tăn-dd akăyad-net i-ad-inhĕy ta t-tĕḍăsăt. 33Tĕnhăy tamăḍt ălafu wa tĕjrăw ɣas, tĕkk'-e-hi-dd, tăšikăḍkăḍ a-wa-dăɣ has-ja tarĕmmeɣt, toḍa data-s, tĕnn'-as tidĕt iket-net. 34Inn'-as Ɣisa: "Talyaḍt, ăzozăy-kăm immun-năm, ĕglĕw dăɣ-ălxer, tĕzzeyăd dăɣ-tiẓẓurt-năm." 35Ămmiijrăd Ɣisa hărwa a-s dd-osăn ăddinăt dd-falnen eɣewĕn n-ălfăqqi n-ehăn wa n-ăddin, ĕnnăn-as: "Elle-k, ăba-tăt. Ma s-salăyyaɣăd Ălɣalim daɣ?" 36Wăr hin-ijreh Ɣisa a-wa jănnen, innă i-ălfăqqi n-ehăn wa n-ăddin: "Wăr tărmeɣăd, amĕn ɣas." 37Igdăl Ɣisa i-ăddinăt iket-năsăn ad-dăr-s idawăn a-s tĕggădăd Bĕṭrus d-Yaqub d-Exya wa n-ă/n/na-s. 38A-s hin-ĕwwăḍăn eɣewĕn n-emănnăhăḍ n-ehăn wa n-ăddin, wăr hin-ogeẓăn ar tamĕtte tĕdgaẓăt; ăsikălăl, ăššurša a-wen-dăɣ, dăɣ-išĕnnawăn. 39Ijjăš-in fălla-săn, inn'-asăn: "Ma kăwăn-idgaẓăn, hallăm? Tarat, wăr tăt-ăba, eḍĕs ɣas a ja." 40Jăn-t tekăškăšt. Izzĕzjăr-tăn iket-dăɣ-năsăn, wăr dd-ăqqima dihen ar d-ti-s d-ma-s n-talyaḍt, d-inĕṭṭulab wi dăr-dd-ăddew. Ijjăš ḍarăt-a-wen edăgg wa dăɣ-tĕnsa talyaḍt, 41irmăs-tăt-dd s-ăfuss, inn'-as: "|iTalita kumi|d", a-wen ălmăɣna-net: "Talyaḍt, ĕnneɣ-am, ĕnkăr-dd." |r 42Tĕbdăd talyaḍt ăssaɣăt-wen-dăɣ, tărjăš. Talyaḍt-en-dăɣ, la măraw iwĕtyan d-ĕssin. Ǝqqălăn-dd ăddinăt ɣas oran imawăn făl tihusay n-a-wa-dăɣ ijăn. 43Ikn'-en-dăɣ Ɣisa asĕmmĕtăr i-ad-wăr jen isălan n-a-wa ijăn dăɣ-ăwadĕm wăl' iyyăn tĕzzar, inn'-asăn ad-tăt-ĕkfĕn a tĕkša.

will be added

X\