Marqĕs 4

1Olăs Ɣisa daɣ asĕɣăr n-tamĕtte dăɣ-asălim n-ejănš wa n-Galila. Tăddew-dd săr-s tamĕtte tăjjeet, ijjăš-as turăft n-aman, ăqqima dăɣ-s, tăqqimă-dd tamĕtte ĕnta tĕbdad dăɣ-asălim n-aman, tăsijăd-as. 2Issăɣra ăddinăt hărătăn ăjjootnen s-tangalen. Dăɣ-a-wa tăn-issăɣra, inn'-asăn ašăl iyyăn: 3"Săjdăt! Kăla izjăr ănăsdamu iyyăn i-ad-iddumĕt ašĕkrĕš-net. 4Ălwăqq wa d-itidumut, oḍănăt tiblalen tiyyăḍ dăɣ-ăbara, ăkkukăren-tănăt-dd igḍaḍ, ĕkšăn-tănăt. 5Oḍa ašăr iyyăn jer-tihun, ăffoqqăt-dd šik ed wăr-intem dăɣ-ăkall, 6tăsmăqqăt-dd tăfukt jĕnnĕj-s, tĕssărɣa isĕffuqqa, ăqqur-in a-di iket-net ed wăr-ĕntemăn ikewăn-net dăɣ-hărăt. 7Oḍa ašăr iyyăn dăɣ-tabĕ/n/nĕnt, tĕdwăl-dd fălla-s tabĕ/n/nĕnt, tĕẓmăd-as, iɣrăy-in. 8Oḍa ašăr wa iyyăḍăn dăɣ-ăkall olaɣăn, ikrăš aratăn; ijă tibolăsen s-tiyyăḍ kăraḍăt timĕrwen n-tablalt a tănăt-iwarăn, tiyyăḍ săḍisăt timĕrwen, tiyyăḍ temeḍe." 9Inn'-asăn ḍarăt-a-wen: "Ere ilăn timĕẓẓujen s-islă-dăɣ, isăjdet!" 10Izjăr-dd Ɣisa ălžămaɣăt ɣas, ĕssĕstănăn-t inĕṭṭulab-net wi n-măraw d-ĕssin, d-ăddinăt wi săr-s dd-saɣlaynen d-ălmăɣna n-tangalen ti ija. 11Inn'-asăn: "Kăwăneḍ, tĕjrawăm turhajăt n-ujreh n-ĕddăraj wa ămoosăn isălan n-Tĕmmĕnĕya n-Măssinăɣ măšan, ăddinăt wi iyyăḍnen n-ajăma, a-wa s-e-ĕslĕn iket-net, tangalen a dăɣ-has-e-ĕslĕn i-innin: 12'Ad-ĕswaḍăn, wăr hĕnnĕyăn, ăsijădăn, wăr sĕllĕn; i-ad-wăr t-illa a jarrăhăn, i-udaɣ ad-utabăn s-Măssinăɣ, ĕjrĕwăn tenăšše.' " 13Inn'-asăn daɣ: "Ɣas ta-dăɣ tangalt, wăr tăt-tĕjrehăm? Adiš ĕndek ĕmmĕk wa s-mad-tĕjrăhăm tangalen ti iyyăḍnen? 14Ănăsdamu, ĕnta a-s ănaxṭab n-măjrăd n-Măssinăɣ. 15Ăddinăt iyyăḍ, olăhăn d-ăbara wa dăɣ-oḍănăt tiblalen. E-d ĕslăn i-măjrăd n-Măssinăɣ, šik a-s tăn-dd-itis Iblis, isĕttĕw-asăn-t-in. 16Ăddinăt iyyăḍ, olăhăn d-tihun-ti jer-oḍănăt tiblalen; e-d ĕslăn i-măjrăd n-Măssinăɣ, ad-ĕhlĕylĕyăn, ăqbĕlăn-t šik 17măšan, wăr t-tĕyyĕn ikraš ikewăn dăɣ-ulhawăn-năsăn, ad-ĕjĕn ăzzăman ĕnḍărrăn ăkoyădăn dăɣ-s măšan afăl dd-tosa tissust meɣ osă-dd ălɣizabăt dăɣ-tĕssĕba n-măjrăd n-Măssinăɣ, ad-hin-ĕbbuṭṭĕlăn a-wa s-omănăn. 18Ăddinăt iyyăḍ, ĕntăneḍ a-s tabĕ/n/nĕnt ta jer-oḍănăt tiblalen, ad-ĕslĕn i-măjrăd n-Măssinăɣ 19măšan, ad-has-ĕẓmĕdăn dăɣ-ulhawăn-năsăn s-tărha n-wălăt-ăddunya d-eylăl n-tărha n-ajmur-net d-derhanăn iyyăḍ ăjjootnen, wăr t-illa a săr-săn dd-isaɣsal. 20Ăddinăt wi iyyăḍnen, ĕntăneḍ a-s ăkall wa olăɣăn dăɣ-oḍănăt tiblalen. Ǝntăneḍ a-s e-d ĕslăn i-măjrăd n-Măssinăɣ, ad-t-ăqbĕlăn, ijjĕš-asăn-t ălfăyda; tarĕw-dd săr-săn tablalt tiyyăt kăraḍăt timĕrwen n-tablalt, tiyyăt săḍisăt timĕrwen, tiyyăt temeḍe n-tablalt." 21Inn'-asăn Ɣisa daɣ: "Ăwadĕm, wăr-isărmis tefătelt tĕzzar, ăj'-et daw-ăkoss meɣ daw-tešejit, ănn-ak, edăgg iḍkalăn a făll-tăt-e-isăns. 22Wăr t-illa a iffarăn s-wădden ad-dd-infilĕl, wăr t-tĕlla takše s-wădden ad-dd-tĕffukkăr. 23Ere dăɣ-wăn ilăn timĕẓẓujen s-islă-dăɣ, isăjdet! 24Ăjăt ĕnniyăt i-a-wa s-sallăm făl-a-s, a-wa dăr-ogdăh asjĕd wa tăjjăm i-Măssinăɣ ad-dăr-mad-agdăh daɣ ajăraw-năwăn ɣur-s. 25Ăwadĕm wa s-išwăr ifhăm hărăt, ad-has-iwwaḍ musnăt har isĕssikĕy măšan, wa s-wăr t-illa a ijrah, wăr t-in-ikka hărăt, ănn-ak, ad-dăɣ-s ămahăɣ wăla a-wa ĕnḍărrăn iṭṭăf." 26Inn'-asăn daɣ: "Sănto n-Tĕmmĕnĕya n-Măssinăɣ, olăh d-a-wa s-e-d ăddomăt ăwadĕm ašĕkrĕš-net, 27jer-iṭṭas wăla okay, jer-ehăḍ wăl' ašăl, ad-idaggăl ădomm dăɣ-ašĕkrĕš, itifăqqut-dd, dăɣ-a-s, wăr tĕha tijya n-a-wen măssi-s ed, 28ăkall a dd-madăn-arĕw d-iman-net teyĕšše s-tizarăt, ḍara-s teɣăɣănt, tĕzjăr-dd tejent n-ălkăma teɣăɣănt. 29Diha-dăɣ d-mad-inhĕy măssi-s n-ašĕkrĕš a-s i/n/na ălkăma, ad-dd-mad-iḍkĕl ălgori-net i-illuy-net." 30Inn'-asăn ḍarăt-a-wen: "Ma dăr-mad-nĕsĕssilăh sănto n-Tĕmmĕnĕya n-Măssinăɣ? Ǝndek ɣas tangalt tăsisăjrăhăt sănto-net? 31Sănto n-Tĕmmĕnĕya n-Măssinăɣ, olăh d-temătăwt ta tojărăt tĕmmĕtkit dăɣ-idommăn. A-s tăt-itidumut ăwadĕm, wăr t-tĕlla temătăwt dăɣ-ăddunya tăt-tojărăt tĕmmĕtkit, 32măšan, hakd a-wen-dăɣ, afăl tăt-ăddomăt ăwadĕm, ad-dd-tăjj tadăwla-i-dăɣ măqqărăt, tajăr tiyĕššawen iket-năsnăt tĕššĕjrĕt, tĕkrĕš ilĕktan-i-dăɣ măqqornen har wăla-dăɣ igḍaḍ, kallăn daw-tele-net." 33Tangalen ăjjootnen olăhnen d-ti-dăɣ, s-ălxal ăsisăjrăhăn a-s issăɣra Ɣisa ăddinăt; 34wăr t-illa a inna i-tamĕtte s-wădden tangalen a dăɣ-hasăn-t-innă măšan, e-d ănmăjrăw d-inĕṭṭulab-net dăɣ-edăgg iṣtarăn, ad-hasăn-ăffăssăr ălmăɣna n-tangalen-tin-dăɣ iket-năsnăt. 35Toḍa tăfukt ɣas, innă i-inĕṭṭulab-net: "Nĕjlĕyet ejănš s-ašrut wa n-emăynăj." 36Fălăn tamĕtte, ĕglăn dăr-s inĕṭṭulab dăɣ-turăft n-aman ta dăɣ-ăqqiima, ăddeewnăt dăr-săn daɣ turfen n-aman tiyyăḍ. 37Ǝglan a-s dd-inkăr aḍu-i-dăɣ ăṣṣoohen, ad-tibhilbĕhilnăt tinăzzămăren i-turăft har išwar tĕḍnay aman. 38A-s ităjj a-wen, ăssoomăt Ɣisa adăfor, iṭṭas dăɣ-ajilal n-turăft n-aman. Ǝssĕnkărăn-t inĕṭṭulab dăɣ-eḍĕs, ĕnnăn-as: "Ălɣalim! Ajăn wăr kăy-tĕssărmăɣ tamăttant-nănăɣ?" 39Inkăr-dd, ăsmăhăḍ făll-aḍu, innă i-ejănš: "Ismaḍ! Ǝzjĕw!" Ibdăd-in aḍu, sămmeḍ-in a-wen-dăɣ iket-net. 40Inn'-asăn ḍarăt-a-wen: "Ma-kăwăn ăssiirmăɣăn? Ma ija immun-năwăn?" 41Jăn inĕṭṭulab tarĕmmeɣt-ta-dăɣ făl dd-ĕqqălăn ɣas, tinmĕnnin: "Ma ămoos ăwadĕm-wa-dăɣ s-wăla aḍu d-ejănš, sajadăn-as?"

will be added

X\