Marqĕs 3

1Olăs Ɣisa ḍarăt-a-wen ujĕš n-ehăn n-ăddin wa n-kăl-Ălyăhud. Ill'-e dihen ăhalĕs s-ăqqur ăfuss-net. 2Jan-as kăl-faris ĕnniyăt, tassănăn ihăl ad-t-izuzĕy dăɣ-ašăl n-ălɣibadăt, ĕjrĕwăn ya ăsaru s-t-ĕssĕḍlămăn. 3Innă Ɣisa i-ăhalĕs wa s-ăqqur ăfuss-net: "Ǝyyăw, ĕbdĕd dăɣ-ammas n-ălžămaɣăt." 4Innă i-ălžămaɣăt ḍarăt-a-wen: "Ak a xălalăn dăɣ-ašăl wa n-ĕssĕbĕt-i n-tăsonfat iji n-emărked, meɣ iji n-a lăbasăn, igguẓ n-iman, meɣ iji n-iman?" Wăr t-illa ere has-innan hărăt. 5Issăɣlăy-tăn-dd asăwaḍ n-aḍkăr irtayăn d-tisnant făl tĕssĕba n-tăɣart-i jăn ulhawăn-năsăn, innă ḍarăt-a-wen i-ăhalĕs: "Ǝẓẓĕl ăfuss-năk". Iẓẓăl ăfuss-net, izzăy. 6Ǝzjărăn kăl-faris edăgg-en ɣas, ănmănhăyăn d-taggayt ta n-kăl-Harudĕs dăɣ-isălan n-ĕmmĕk wa s-mad-ĕjĕn iman n-Ɣisa. 7Ăddew Ɣisa ḍarăt-a-wen d-inĕṭṭulab-net s-asălim n-ejănš wa n-Galila, tăddew-dd săr-s tamĕtte tăjjeet dd-falăt teje ta n-Galila d-ta n-Ălyăhudĕyăt, 8iyyăḍ falăn-dd Yărussălam, iyyăḍ ăkall wa n-Iduma d-ăkall wa iwărăn ašrut wa n-emăynăj n-ejănš wa n-Ɣurdĕni d-iɣărman wi n-Tir d-Săyda d-ălžămaɣăt ăjjeen dd-ikkan daw-măsăllăt n-hărătăn wi ităjj. 9Innă Ɣisa i-inĕṭṭulab-net ălwăqq-wen, ad-has-sĕmmĕjnun turăft n-aman ijjăš i-ad-wăr t-tăsnăkmăm tamĕtte 10făl-a-s ăzozăy dăɣ-săn i ăjjootnen hundăɣ har ămăra-dăɣ, ĕqqălăn-dd ăddinăt hak iyyăn itikĕl amidi-net făl tărha n-ad-t-ăḍĕsĕn. 11Imĕlšan ĕntăneḍ, e-d t-ĕnhăyăn, ad-ărkăɣăn data-s, saɣăren, jannen: "Kăyy a-s Rure-s n-Măssinăɣ" 12măšan, ikann dăɣ-săn asĕmmăhĕḍ i-ad-wăr-ĕllăɣen ere wa ămoos. 13Iwwăn Ɣisa ḍarăt-a-wen taḍaɣt, iɣră-dd s-iman-net inĕṭṭulab wi s-irha, ĕkkăn-t-dd. 14Ăsnăfrăn dăɣ-săn măraw d-ĕssin wi s-irha i-ad-t-ĕllan ɣur-s, ăswăr-tăn isĕm inĕmmušal wi n-inaxṭabăn n-Ălĕnžil, 15ikf'-en daɣ tărna n-ukĕs n-alšinăn dăɣ-ăddinăt. 16Ǝntăneḍ-da wi n-măraw d-ĕssin ăsnăfrăn: Simyon wa ăswăr isĕm Bĕṭrus; 17Yaqub d-ă/n/na-s Exya, wi n-dăgg-Zăbdi s-ij' isĕm Boyărnažĕs, a-wen ălmăɣna-net: dăgg-ejjaj; 18Idris d-Fĕlibb d-Bărtălămma d-Mătti d-Tomi d-Yaqub wa n-ăgg Ălfa d-Tade d-Simyon wa n-ăššažeɣ 19d-Yăhudĕs Isxaryut-i t-e-isĕssăɣdărăn. 20Iqqăl-dd Ɣisa ehăn ɣas, olăs-dd fălla-s ălžămaɣăt tidawt har ăbas ijraw ĕnta d-inĕṭṭulab-net wăla ălwăqq s-ăssokăn hărăt imawăn-năsăn. 21Ǝslăn kăl-ehăn-net i-a-wen ɣas, ĕkkăn-t-dd i-ad-t-ărmĕsăn făl-a-s jannen: "A-wa, immar-t hărăt." 22Ǝggădăn ălɣulam n-Ăṭṭăwrăt wi dd-fălnen Yărussălam, ĕnnăn: "A-wa Abălzăbil, Iblis wa n-ămănokal n-alšinăn a t-ihan, ĕnta a t-ikfăn tărna ta s-itakkăs alšinăn dăɣ-ăddinăt." 23Iɣr'-en-dd Ɣisa, issăɣlăy-tăn tangalt dăɣ-hasăn-inna: "Ǝndek ĕmmĕk wa s-tordam a-s Iblis ăddoobăt, ad-dd-iqqĕl isattăɣ Iblis? 24Afăl dd-ĕqqălăn kăl-iyyăn n-ĕddĕwĕl ĕknasăn jer-iman-năsăn, ĕddĕwĕl-en, wăr-e ăhaj ibdad. 25Ehăn daɣ s-dd-ĕqqălăn mĕssaw-s ĕknasăn jer-iman-năsăn, ehăn-en, wăr-e ăhaj ibdad. 26Afăl ibdăd Iblis i-imĕššerĕkăn-net, ad-tăn-ikannăs, wăr-e ăhaj ibdad, sămdo-net ɣas a ikka. 27Wăr t-illa ere ăddoben ujĕš n-ehăn n-ăhalĕs n-anăkfor, awĕy ilalăn-net ar s-ad-t-ikrad tĕzzar, dihen, ad-udabăt ad-awĕy a-wa ihăn ehăn-net." 28"Ăsidătteɣ-awăn a-s abăkkaḍ of'-ăgg-adĕm d-asĕkkufăr ija-dăɣ, ăddoobăt Măssinăɣ ad-has-t-in-ănš, 29măšan ăwadĕm wa ăskafărăn dăɣ-isălan n-Unfas Šăddijăn, wăr-ilkem ad-has-in-ătiwănša, ed iwăr-t uḍlem n-abăkkaḍ iɣlalăn." 30Ij'-asăn Ɣisa măjrăd-wa-dăɣ făl a ĕnnin s-ĕnnăn: "Ih'-e alšin." 31Osăn-dd ayĕtma-s n-Ɣisa ăddeewăn d-ma-s, ĕbdădăn dat-emm n-ehăn, ăšmašălăn-dd săr-s ăwadĕm i-ad-hasăn-t-dd-iɣăr. 32A-s ităjj a-wen-dăɣ, ăqqiima Ɣisa jer-tamĕtte has-jat afăraj; ĕnnăn-as ăddinăt: "Tĕbdad ma-k d-ayĕtma-k ((d-šătma-k)) dat-emm n-ehăn, sastanăn dăr-k." 33Inn'-asăn: "Ǝndek anna-nin d-ayĕtma-ɣ ((d-šătma-ɣ))?" 34Issăɣlăy-dd tamĕtte ta tăqqiimăt akăyad-net, innă: "Ǝnhĕywăt anna-nin d-ayĕtma-ɣ, ĕntăneḍ-da-dăɣ. 35E d t-illăm ere itamašalăn erhet n-Măssinăɣ, ĕnta a-s ă/n/na-ɣ d-wălătma-ɣ d-ma-ɣ."

will be added

X\