Marqĕs 2

1Hărăt n-išilan ḍarăt-a-wen, olăs-dd Ɣisa uɣĕl n-Qăfărnaxum. Ǝslăn ăddinăt a-s ih' ehăn wa dăɣ-itizĕbbut ɣas, 2ĕkkăn-t-dd s-ĕjut har ăbas t-illa edăgg wăla-dăɣ dat-emm n-ehăn. 3Ămmiijrăd-asăn dihen-dăɣ a-s t-dd-osăn ĕkkoẓ meddĕn ămisawăynen anăbdon iyyăn, 4măšan, igdăl-asăn ĕjut n-tamĕtte ad-t-sănsĕn dat-Ɣisa. Ăɣlăyăn, ăwwănăn afălla n-ehăn, ĕkkăsăn-in ajobăn-wi ăsiităxnen ehăn dăɣ-tanămhăla n-edăgg wa dăɣ-ibdăd Ɣisa, ăstărarăn-dd s-axăbabu wa jăn anăbdon, insa făll-asĕftăɣ-net. 5Inhăy Ɣisa immun-năsăn ɣas, innă i-anăbdon: "Alyaḍ, ătwănšăn-ak ibăkkaḍăn-năk." 6Edăgg-en, han-t hărăt dăɣ-ălɣulam n-Ăṭṭăwrăt. Ǝslăn i-a-wa inna ɣas, ăbjănjănăn, 7ad-jannen: "Wa ma t-ăsihălăn măjrăd-wa-dăɣ? Ăskafăr! Mi ăddoben tenăšše n-ibăkkaḍăn săl Măssinăɣ?" 8Ilmăd Ɣisa ɣur-iman-net ălwăqq-wen-dăɣ a-wa dăɣ-zinĕzjumăn, inn'-asăn: "Mafăl tajjăšăn erk inĕzjam šund-wi-dăɣ ulhawăn-năwăn? 9Ma ojărăn tărăɣse jer-ad-tĕnnĕd i-anăbdon: 'Ătwănšăn-ak ibăkkaḍăn-năk,' d-ad-has-tĕnnĕd: 'Ǝbdĕd, ĕḍkĕl asĕftăɣ-năk, ărjĕš.' 10Ašăl-i, ăssiilmădăɣ-kăwăn a-s Ăgg-ăgg-adĕm, ijraw făll-ărori n-ăkall turhajăt n-tenăšše n-ibăkkaḍăn." Innă Ɣisa i-anăbdon ḍarăt-a-wen: 11"Ǝnneɣ-ak, ĕbdĕd, ĕḍkĕl asĕftăɣ-năk, ĕqqĕl ehăn-năk." 12Ibdăd, iḍkăl asĕftăɣ-net ăssaɣăt-wen-dăɣ, iglă hannăyăn-t ăddinăt iket-dăɣ-năsăn. Ăqqiimăn-dd ɣas, tof'-en tăkunt n-a-wa ijăn, tiimĕlĕn Măssinăɣ, jannen: "A-wa ijăn ašăl-i-dăɣ, wăr kăla t-nĕnhăy." 13Olăs Ɣisa azăjor, ikk' asălim n-ejănš wa n-Galila, ad-t-dd-takkăn ăddinăt ăjjootnen, isaɣr'-en. 14Igla dăɣ-a-wen-dăɣ a-s inhăy Lewi ăgg Ălfa, ăqqiima dăɣ-edăgg n-ălxidmăt-net, ămoos ănarmas n-tiwse, inn'-as Ɣisa: "Ǝlkĕm-ahi!" Ibdăd Lewi, ilkăm-as. 15Ḍarăt-a-wen, ăsmăjărăt Lewi Ɣisa s-ehăn-net. Itaɣăyma Ɣisa dăɣ-edăgg wa n-imĕnsiwăn a-s erk ăddinăt han inarmasăn n-tiwse ăjjootnen has-ĕlkamnen da-dăɣ; osăn-dd, ănɣăymăn dăr-s ĕnta d-inĕṭṭulab-net. 16Ǝnhăyăn ălɣulam n-Ăṭṭăwrăt n-taggayt ta n-kăl-faris a-s ohar Ɣisa d-erk ăddinăt d-inarmasăn n-tiwse ɣas, ĕnnăn i-inĕṭṭulab-net: "Mafăl itihăr ălɣalim-năwăn imĕnsiwăn d-inarmasăn n-tiwse d-erk ăddinăt?" 17Isl'-asăn Ɣisa ɣas, inn'-asăn: "Ăddinăt ăssoxătnen, wăr-ămɣatărăn s-lăxtur; imarhinăn a săr-s ămiɣatărnen. Năkk, wăr dd-ămešălăɣ s-ăddinăt-wi ordănen iman-năsăn iqqud, inăsbăkkaḍăn a-s dd-ămešălăɣ." 18Ašăl iyyăn d-ăẓumăn inĕṭṭulab wi n-Exya d-kăl-faris, osăn-dd ăddinăt Ɣisa, ĕnnăn-as: "Mafăl inĕṭṭulab wi n-Exya d-kăl-faris tuẓamăn, a-s ija a-wen wi-năk ĕntăneḍ, wăr tuẓamăn?" 19Inn'-asăn Ɣisa: "Ajăn kăl-tuksest, ilzam-tăn ăẓum a ikk' ămaẓlay ill'-e jere-săn? A ikk' ămaẓlay ill'-e jere-săn, wăr tăn-ilzem ad-uẓamăn. 20Ǝlkamăn išilan wi tăn-e-ifĕl, dihen, ad-ĕjrĕwăn s-ăẓum. 21Wăr t-illa ere itĕggatăn tikĕst i-temălsit wăššărăt s-taswĕḍt n-tabdoɣt tăynayăt. Afăl ija a-wen, wăr-e ăhaj a-s dd-e-tĕsăr taswĕḍt ta tăynayăt făll-temălsit ta wăššărăt, tăjj amĕnd ojărăn wĕnnin. 22Wăr t-illa daɣ ere itajjăn aman n-lăɣnăb ăynaynen, ăxxiimmărnen dăɣ-ijdad. Ere ijăn a-wen har kăfăn aman-ĕnnin dăɣ-ijdad, ad-has-sĕbbuqqen ijdad-net, ifut ḍarăt-a-wen dăɣ-lăɣnăb hakd-dăɣ dăɣ-ijdad. Aman n-lăɣnăb ăynaynen ăxxiimmărnen, iddidăn ăynaynen a dăɣ-tăn-itajj ăwadĕm." 23Ašăl iyyăn n-ĕssĕbĕt-i n-ašăl wa n-tăsonfat, irăs Ɣisa d-inĕṭṭulab-net išĕkraš n-ălkăma ad-dăɣ-săn dd-nakkăḍăn inĕṭṭulab-net tiɣăɣănen n-ălkăma. 24Ǝnhăyăn hărăt dăɣ-kăl-faris a-wa tăn-išlăn ɣas, ĕnnăn-as: "Ǝnhĕy, ma isawăjjen inĕṭṭulab-năk a wărăn-itĕtwĕjj dăɣ-ašăl wa n-ĕssĕbĕt-i n-tăsonfat?" 25Inn'-asăn Ɣisa: "Adiš kăwăneḍ, kăla wăr tăɣrem dăɣ-ĕlkĕttab a-wa ija Dawĕd a-s ămɣatăr, ălluẓ ĕnta d-imidiwăn-net. 26Ătwănn'-anăɣ, ijjăš ehăn n-Măssinăɣ dăɣ-ăzzăman wa d-ămoos Ăbyatăr ămănokal n-kăl-tikutawen, ikša dăɣ-tijĕlwen-ti ămoosnen takute i-Măssinăɣ, s-wăr t-illa ere s-t-tĕlla tetăte-năsnăt a săl kăl-tikutawen, ikfa dăɣ-snăt daɣ meddĕn wi dăr-s ăddewnen." 27Inn'-asăn daɣ: "Wădden ăgg-adĕm a dd-ixlăkăn i-ĕssĕbĕt, ănn-ak, ĕssĕbĕt a dd-ixlăkăn i-tănoflayt n-ăgg-adĕm. 28A-wen-dăɣ a făl Ăgg-ăgg-adĕm, a ănnihăḍăn dăɣ a-wa s-ila ăgg-adĕm d-a-wa s-wăr ila s-ad-t-ăj, dăɣ-ašăl wa n-ĕssĕbĕt-i n-tăsonfat."

will be added

X\