Marqĕs 16

1Okăy ĕssĕbĕt-i n-ašăl wa n-tăsonfat ɣas, tĕžžĕnšă-dd Măryăma ta n-Mulăždalĕyăt d-Măryăma ta n-ma-s n-Yaqub d-Sălma ĕlɣĕnfărăn i-ad-ĕšwĕynăt săr-săn tafĕkka n-Ɣisa. 2Tifawt n-ălxad-i n-ašăl wa ăzzarăn dăɣ-ĕssĕboɣ, ɣur-ajmuḍ n-tăfukt, ĕkkănăt aẓĕkka. 3Ǝglanăt, tinmĕnninăt jer-iman-năsnăt: "Năkkănăteḍ-i-dăɣ, mi hanăɣ-e-ikkĕsĕn tăhunt ta măqqărăt tĕhărăt emm n-aẓĕkka?" 4Ǝwwăḍnăt-in ɣas, ĕkyădnăt, ĕnhăynăt a-s tăhunt-tĕnnin măqqărăt, tăɣirarăd-in. 5Ǝjjăšnăt ammas n-aẓĕkka, ĕnhăynăt ămawaḍ ilsan emăls măllăn, ăqqiima daw-aɣil-năsnăt, tărtăy-asnăt tarĕmmeɣt d-tăqqăn n-eɣăf. 6Măšan, inn'-asnăt ămawaḍ: "Wăr tăqqănnet iɣăfawăn-năkmăt, wăr tărmeɣmăt, Ɣisa wa n-Năṣirăt ătwăṣlăbăn s-tammăɣmăt, inkăr-dd jer-inĕmmuttan, ăbas t-illa diha; ĕnhĕymăt edăgg wa s-kăla dăɣ-s insa. 7Ămăra, ăkkĕmăt inĕmmušal d-Bĕṭrus, tĕnnĕmăt-as a-s ăzzar-awăn iket-năwăn s-Galila, dihen-dăɣ ad-mad-t-tĕnhĕyăm s-ĕmmĕk wa-dăɣ s-kăla hawăn-tăn-inna." 8Ǝzjărnăt-dd aẓĕkka ɣas, ošălnăt, tăšišăkăḍkăḍ-tănăt tarĕmmeɣt tărtayăt d-tăqqăn n-eɣăf. Wăr t-illa ere s-ĕnnanăt hărăt a-wa-dăɣ hasnăt-ja tarĕmmeɣt. (( 9Ašăl wa n-ălxad-i n-ašăl wa ăzzarăn dăɣ-ĕssĕboɣ ad-dd-inkăr Ɣisa jer-inĕmmuttan. Ănfalăl-dd s-tizarăt i-Măryăma ta n-Mulăždalĕyăt-i dăɣ-ikkăs ĕssa alšinăn, 10tĕglă, tĕj'-isălan dăɣ-ăddinăt wi s-kăla ăddewăn d-Ɣisa-i s-a-s ităjj a-wen, ĕṭṭafăn iba-net, ăsniinăn. 11Ǝslăn a-s tĕnhay-t iddar măšan, unjăyăn s-ad-tăt-ĕflĕsăn. 12Issĕkna Ɣisa iman-net ḍarăt-a-wen i-ĕssin dăɣ-inalkimăn-net ĕkkanen ejef. Ănfalăl-asăn-dd dăɣ-ini săl wĕnnin-dăɣ dd-ănfalăl i-Măryăma. 13Ǝqqălăn Yărussălam, jăn isălan dăɣ-imidiwăn-năsăn wi iyyăḍnen măšan, wăr tăn-ĕflesăn ĕntăneḍ-dăɣ. 14Ănfalăl-dd Ɣisa ḍarăt-a-wen i-inĕṭṭulab wi n-măraw d-iyyăn dăɣ-ălwăqq d-ăžžiimmăɣăn, tamănsawăn. Ăklăwlăw fălla-săn dăɣ-tĕssĕba n-iba immun-năsăn d-tăɣart-ta jăn ulhawăn-năsăn făl-a-s, unjăyăn ĕflăsăn ăddinăt wi t-ĕnhăynen, inkar-dd jer-inĕmmuttan. 15Inn'-asăn: "Ămăra, ăglăt, ilalăt ăddunya iket-net, tăxṭĕbăm Ălĕnžil i-e d t-illăm ăgg-adĕm. 16Wa omănăn, ătwăsălmaɣ dăɣ-aman, ad-iɣlĕs; wa ăsɣărăn ulh-net, ad-t-iwăr uḍlem dat-Măssinăɣ. 17Ǝntăneḍ-da hărătăn wi mad-ămašălăn wi maden-amĕn: ad-ĕkkĕsăn alšinăn dăɣ-ăddinăt s-tărna n-isĕm-in, ad-ămmăjrădăn awalăn ăynaynen, 18ĕṭṭĕfăn taššălen dăɣ-ifassăn-năsăn, kud-ĕswăn sunsĕj-dăɣ, wăr hasăn-e-iɣšĕd hărăt, e-d ăswărăn ifassăn-năsăn imarhinăn, ad-ĕzzĕyăn." 19Ij'-asăn Ɣisa măjrăd-wen-dăɣ ɣas, immĕḍkăl s-išĕnnawăn, igl' ăqqima daw-aɣil n-Măssinăɣ. 20Ǝglăn inĕṭṭulab ḍarăt-a-wen, ad-xaṭṭăbăn isălan dăɣ-idăggan iket-năsăn. Idhal-tăn Emăli, isidĕttut măjrăd-năsăn s-ijităn n-Măssinăɣ wi tamašalăn. Amin!))

will be added

X\