Marqĕs 15

1Hărwa emăɣăr ad-ănmănhăyăn kăl-tikutawen d-inušămăn n-Iṣrayil d-ălɣulam n-Ăṭṭăwrăt d-kăl-Sinhidrin-i tirĕnen ăššăreɣa; jăn tišĕm dăɣ-Ɣisa tĕzzar, ĕlwăyăn-t s-Bilatĕs. 2Inhăy-t Bilatĕs ɣas, issĕstăn-t, inn'-as: "Ak, kăyy a-s ămănokal n-kăl-Ălyăhud meɣ?" Inn'-as Ɣisa: "Kăyy iman-năk, tĕnned-tăn." 3Ad-t-sawarăn uḍlemăn ăjjootnen. 4Issĕstăn-t Bilatĕs daɣ, inn'-as: "Ǝnhĕy ɣas a-wa fălla-k itawănnen? Ma tĕnned kăyy iman-năk?" 5Wăr t-illa a has-inna Ɣisa har iqqăn asusĕm-net eɣăf n-Bilatĕs. 6Ăzzăman-en, hak ămudd n-Faṣka, ăsiwăyy'-in gĕfăr u-takărmut wa dăɣ-s tĕttăr tamĕtte. 7A-s ităjj a-wen, ih' ăhalĕs s-isĕm-net Bărɣăbbas takărmut ĕnta d-imidiwăn-net s-kăla dd-ĕssĕnkărăn tamĕtte har jăn iman n-ăwadĕm dăɣ-a-wen-dăɣ. 8Tĕnkăr tamĕtte iket-net ad-tattăr dăɣ-Bilatĕs a-wa s-izzăy ad-hasăn-t-ăj. 9Inn'-asăn: "Ak ajăn tărham ad-hawăn-in-ăyyăɣ ămănokal n-kăl-Ălyăhud?" 10Issan Bilatĕs a-s tĕmɣăre n-tismiten n-imănokalăn n-kăl-tikutawen a făl ăstărmăsăn Ɣisa. 11Ǝntăjăn-dd tamĕtte s-Bilatĕs i-ad-hasăn-dd-isĕwwĕyy Bărɣăbbas. 12Olăs daɣ Bilatĕs, inn'-asăn: "Ma s-tărham ad-t-ăjăɣ i-wa s-itawănna ămănokal n-kăl-Ălyăhud?" 13Olăsăn eɣări, jannen: "Itwăṣlĕbet făll-tajĕttewt." 14Inn'-asăn Bilatĕs: "Mafăl, ma iɣšăd t-ăsiinăhăjjăn d-tamăttant?" Ăsɣăyyăn dăɣ-išĕnnawăn: "Itwĕṣlĕbet făll-tajĕttewt." 15Ăssof Bilatĕs alkum i-erhet-năsăn, ăswăyy'-asăn-in Bărɣăbbas, ăswăjja tiwit s-ebărtăk dăɣ-Ɣisa tĕzzar, ikf'-asăn-t i-ad-itwăṣlĕb. 16Ǝlwăyăn ĕssărdusa wi n-gĕfăr Ɣisa s-ammas n-ehăn wa dăɣ-iɣattăs ăššăreɣa, iɣlăyɣălăy-t-dd dihen ejhăn n-ĕssărdusa imdan, 17ĕssĕlsăn-t anăkăbba šăggăɣăn, jăn-as ălmăt, korona, a-wen, takĕnbut šund ta n-imănokalăn, tĕẓat dăɣ-isĕnnanăn, 18ad-has-tajjăn isofan, jannen-as: "Ămănokal n-kăl-Ălyăhud, nĕj'-ak gărdĕbu." 19Hakkăn-t tiwit s-tăborit făll-eɣăf, situfăn fălla-s, rakkăɣăn data-s, ălmăt ɣabbădăn-t. 20Ǝssĕgdăhăn dăɣ-tekăškăšt ta tăn-tĕšlăt ɣas, ĕkkăsăn-dd fălla-s anăkabba-wĕnnin šăggăɣăn, ăssoɣălăn-as isĕlsa-net tĕzzar, ĕzjărăn dăr-s aɣrĕm s-edăgg wa-dăɣ ila s-ad-dăɣ-s itwĕṣlĕb făll-tajĕttewt. 21Ǝglan dăr-s a-s ămmoqqăsăn d-Simyon wa n-tadăbayt ta n-Qĕrwan n-abba n-Ălxaḍer d-Rĕffus, ifal-dd išĕkraš; ăšhăššălăn-t alĕnji n-tajĕttewt ta făll-mad-itwăṣlĕb Ɣisa. 22Ăwwăyăn Ɣisa s-edăgg wa s-itawănna Gălgota, a-wen, ălmăɣna-net: "Edăgg wa n-akărkor." 23Ǝssărtăyăn-as-dd dihen asmĕd d-asăfar iyyăn ifannăẓăn tisnant dăɣ-taɣĕssa n-ăwadĕm măšan, unjăy isw'-e. 24Ǝṣlăbăn-t ĕssărdusa făll-tajĕttewt ɣas, jăn tisăɣeren i-ad-uẓanăn isĕlsa-net jer-iman-năsăn, ĕlmĕdăn ĕndek a-wa he-ikrĕš hak iyyăn dăɣ-săn. 25Agdĕlset a-s t-ĕṣlăbăn făll-tajĕttewt, ɣur-ăssaɣăt wa s-tĕẓẓa. 26Ǝttĕytăyăn ăllox jĕnnĕj-s i-ad-ĕlmĕdăn ăddinăt ăddălil wa săr-s dd-orăwăn tamăttant; ăllox-en, iktab fălla-s: "A|sc-WA ĂMĂNOKAL N-|dK|scĂL-|dĂ|scLYĂHUD|d".|r 27Ašăl-en, ămizăyyen ĕssin inaɣtafăn atwĕṣlĕb d-Ɣisa; ătwăṣlăb iyyăn daw-aɣil-net, ătwăṣlăb wa iyyăḍăn daw-tăšalje-net. 28A-wen-dăɣ jăn i-Ɣisa a-s ĕnnăn ĕlkĕttabăn n-Măssinăɣ ad-ăj făl-a-s, iktab a-s: "Ad-iḍan dăɣ-imĕddăɣwa." 29Iqqăl Ɣisa tekăškăšt i-ăddinăt-wi tikĕynen, gaggărăn-t, siwliwilăn iɣăfawăn-năsăn, jannen-as: "Ǝyyaa, kăyy wădden tĕnned tăddobed terăẓẓe n-ehăn n-ămudd wa măqqărăn, talĕsăd-t edey dăɣ-kăraḍ išilan, 30ĕɣlĕs ya iman-năk ămăra, tĕzzĕbbud-dd tajĕttewt!" 31Jăn-t daɣ imănokalăn n-kăl-tikutawen d-ălɣulam n-Ăṭṭăwrăt tekăškăšt, tinmĕnnin: "Ǝnta-i iɣlăsăn ăddinăt wi iyyăḍnen, indar-as ămăra ad-iɣlĕs iman-net. 32Kunta ĕnta a-s Ălmasex wa n-ămănokal n-Iṣrayil, izzubbĕtet-dd tajĕttewt, ad-t-nĕnhĕy, namĕn săr-s." Jăn-t wi ătwăṣlăbnen edes-has tekăškăšt, ad-t-gaggărăn ĕntăneḍ-dăɣ. 33Ǝlsănăt tihay ărori n-ăkall iket-dăɣ-net wa-dăɣ n-tarăhut hundăɣ har tezzar. 34Tĕja tezzar ɣas, ăsɣărăt Ɣisa s-ăṣṣahăt, innă: "|iYă/l/loy, Yă/l/loy,|d |r |ilama săbăxtani?|d" |r A-wen ălmăɣna-net: "Măssi-ɣ Măssinăɣ, Măssi-ɣ Măssinăɣ, mafăl hi-tiyyĕd d-iman-in dăɣ-tisnant-ta-dăɣ?" 35Ǝslăn-as ăddinăt ĕbdadnen dihen, wăr-ĕfhemăn a-wa ijănna ɣas, ad-jannen: "Săjdăt-as, ănnăbi Ɣĕli a iɣarr." 36Ošăl-dd săr-s iyyăn dăɣ-săn, issĕlmăɣ tăḍuft tĕttalăt făll-ăbori dăɣ-bĕnegăr, iẓẓăl-as-tăt i-ad-tăt-isumĕm, infĕw-t a-wen dăɣ-fad, ihakk-as-tăt dihen-dăɣ, ijanna: "Ad-nĕnhĕy ya kunta ad-t-dd-ass ănnăbi Ɣĕli, izĕzzubbĕt-t-dd tajĕttewt." 37Ăsɣărăt Ɣisa s-ăṣṣahăt ḍarăt-a-wen, ĕjmăḍăn-t iman. 38Iqqărrawăt ălwăqq-wen-dăɣ ărido wa ibḍăn dăɣ-ehăn n-ămudd wa măqqărăn, edăgg wa šăddijăn d-edăgg wa iknăn tĕšĕdje dăɣ-ammas, wa-dăɣ n-afălla-net har ider-net. 39Inhăy kăbtăn iyyăn iswaḍăn dăɣ-Ɣisa a-s t-ijmăḍ unfas a-wen ɣas, innă: "Tidĕt-dăɣ a-s ăhalĕs-i-dăɣ, Rure-s n-Măssinăɣ." 40Ǝbdadnăt daɣ dihen tiḍeḍen tiyyăḍ dăɣ-ijĕj, ĕkyadnăt dăɣ-a-wa ijăn. Tiḍeḍen-en, h'-enăt Măryăma ta n-Mulăždalĕyăt, Măryăma ta n-ma-s n-Yaqub wa ĕnḍărrăn d-Yusĕf d-tiyyăt s-isĕm-net Sălma. 41Ǝntănăteḍ-en-dăɣ ad-dd-ăddewnen d-Ɣisa, wa-dăɣ n-Galila, ĕdhalnăt-t s-a-wa ĕṭṭăfnăt har ĕntănăteḍ-da-dăɣ; ĕbdadnăt daɣ edes-hasnăt tiyyăḍ ăjjootnen dd-ăddeewnen d-Ɣisa a-s dd-ikka Yărussălam. 42Tokăy takkăṣt n-ašăl wa n-ĕlžĕmĕt, sadaw tamĕtte i-ašăl wa n-ĕssĕbĕt-i n-tăsonfat, 43osă-dd Yusĕf wa n-Arimata, ăhalĕs ătiwăsămɣărăn dăɣ-inušămăn n-Iṣrayil, ijar ăṭṭăma n-a-s tĕlkam Tĕmmĕnĕya n-Măssinăɣ. Ǝnta-en-dăɣ a ihălăn tikawt n-Bilatĕs, ittăr dăɣ-s tafĕkka n-Ɣisa. 44Tofa tăkunt n-armuḍ n-tamăttant n-Ɣisa Bilatĕs, issăɣră-dd kăbtăn iyyăn i-ad-t-isĕstĕn d-a-s tădduuttăt tamăttant-net meɣ? 45Ijă dăɣ-s kăbtăn-en isălan n-a-s ăba-t ɣas, issărrăx-as aḍkul n-tafĕkka-net. 46Iglă Yusĕf, ižžĕnsă-dd tefit, ikkăs-dd tafĕkka n-Ɣisa făll-tajĕttewt, ij'-et dăɣ-tefit tĕzzar, issĕns'-et dăɣ-aẓĕkka iɣašăn dăɣ-esăwăl; ăsɣărănɣarăt ḍarăt-a-wen tăhunt măqqoorăt, ăṭṭubbăt săr-s emm n-aẓĕkka. 47Tăjjĕyha Măryăma ta n-Mulăždalĕyăt d-Măryăma ta n-ma-s n-Yusĕf i-a-wen-dăɣ iket-net, ĕknănăt asĕbbuyĕn n-edăgg wa dăɣ-iẓka Ɣisa tĕzzar, ĕglănăt.

will be added

X\