Marqĕs 14

1Ăqqiimăn-in ĕssin išilan i-ămudd wa n-Faṣka-i dăɣ-tamăkšanăt tijĕlwen ti wăr ha tăẓẓa. Tattărăn imănokalăn n-kăl-tikutawen ĕmmĕk s-ĕssăɣdărăn Ɣisa, ĕjĕn iman-net măšan, 2ĕnnăn, wăr-ufa ad-ăj a-wen dăɣ-ašăl wa n-ămudd, i-ad-wăr tĕjj tamdĕrwayt dăɣ-tamĕtte. 3Ašăl iyyăn d-ămijarăt Ɣisa i-Simyon wa s-kăla t-ijrăw jĕri izzăɣăn tadăbayt ta n-Bitanya, itamănsaw dihen-dăɣ, a-s t-dd-tosa tamăḍt tăwwayăt butĕl iknan dăɣ-tăhunt măllăt, han aḍutăn lanen ălqim wăr-iqqer hărăt. Tosă-dd ɣas, tărẓa emm n-butĕl wa tăwwăy, ad-sănɣal aḍutăn wi t-hănen făll-eɣăf n-Ɣisa. 4Ǝnhăyăn ăddinăt-wi dăr-ăniɣăyma a-wen, wăr hasăn-ijreẓ, ăhnăffen dăɣ-iman-năsăn, ad-jannen: "Mafăl baxxăsăn aḍutăn-wi-dăɣ, 5wădden ăddooben ad-hin-ĕnšĕn kăraḍăt timaḍ n-ărriyal n-aẓrĕf ămoosnen takute i-tilăqqiwen." Oḍănăn ya aḍkăr i-tamăḍt-ten-dăɣ. 6Inn'-asăn Ɣisa: "Ăkfăt-tăt ălɣafyăt, mafăl has-naxxăsăm iman? Tihusay n-hărăt tĕj'-ahi-t! 7Tilăqqiwen ya, ĕllanăt ɣur-wăn hărkuk, ălwăqq s-tărhăm-dăɣ, tăddoobem ad-hasnăt-tĕjĕm ălxer măšan, năkk, ilkam ad-kăwăn-ăflăɣ. 8Tamăḍt-i-dăɣ, tĕja a-wa tăddoobăt, tĕššĕswăr-dd i-ăddinăt dăɣ-isălan n-ĕmukĕn n-tafĕkka-nin i-aẓĕkka. 9Ăsidătteɣ-awăn a-s edăgg dăɣ-ătwăxṭăbăn isălan n-Ălĕnžil, dăɣ-ăddunya-ta-dăɣ, ad-dăɣ-s ĕtwĕsuɣĕlăn isălan n-a-wa ja i-ad-tăt-kittĕwăn ăddinăt." 10Inkăr Yăhudĕs Isxaryut wa n-iyyăn dăɣ-inĕṭṭulab wi n-măraw d-ĕssin, ikk' imănokalăn n-kăl-tikutawen i-ad-hasăn-isăɣdăr Ɣisa, ărmĕsăn-t. 11Ăsdăwen-tăn isălan wi dd-iwwăy, jăn-as ărkăwăl n-ad-t-ĕkfĕn aẓrĕf. Ad-itammăɣ Yăhudĕs ɣur-ălwăqq-wen-dăɣ i-tašlĕlt s-hasăn-t-ăstărmăs. 12Ašăl wa ăzzarăn n-ămudd dăɣ-tamăkšanăt tijĕlwen-ti wăr tĕha tăẓẓa, ălwăqq wa d-ɣarrăsăn ăddinăt i-taɣsiwen ti n-Faṣka, ĕnnăn inĕṭṭulab i-Ɣisa: "Ǝndek diha d-tărhed ad-nĕsĕssikĕy imĕnsiwăn n-ămudd wa n-Faṣka?" 13Ăsmašăl ĕssin dăɣ-săn s-aɣrĕm, inn'-asăn: "Ǝjjĕšăt aɣrĕm, ad-dăr-wăn immuqqĕs ăhalĕs ăwwayăn iddid n-aman, ĕlkĕmăt-as 14s-ehăn wa mad-ijjĕš, tĕnnĕm i-măssi-s n-ehăn-en: 'Inn'-ak ălɣalim, sĕkĕn-anăɣ edăgg dăɣ-ehăn-năk wa dăɣ-mad-sĕssikĕyăɣ ămudd wa n-Faṣka năkk d-inĕṭṭulab-in.' 15Ad-kăwăn-isĕkĕn soro n-ehăn-net ih' ehăn hĕrĕwăn, šăddiijăn dăɣ-ămmuujnen isĕftaɣ, dihen-dăɣ ad-mad-nĕsĕssikĕy ămudd." 16Ǝglăn inĕṭṭulab, ĕjjăšăn aɣrĕm, ĕnhăyăn hărătăn s-ĕmmĕk-wa-dăɣ s-hasăn-tăn-innă, ad-simĕjnun imĕnsiwăn wi n-Faṣka. 17Ij' ehăḍ ɣas, osă-dd Ɣisa ăddeew d-inĕṭṭulab-net wi n-măraw d-ĕssin. 18Tamănsawăn dihen-dăɣ a-s hasăn-inna: "Ăsidătteɣ-awăn a-s iyyăn dăɣ-wăn dăr-i oharăn ămăra-dăɣ a hi-madăn-isĕssăɣdăr." 19Ǝkmăn-tăn iman-năsăn a-s hasăn-innă a-wen-dăɣ, ad-has-jannen s-iyyăn-iyyăn: "Ajăn năkk?" 20Inn'-asăn: "Ǝnneɣ: iyyăn dăɣ-wăn dăr-i ănimăjjăn ăfuss dăɣ-ăkoss a hi-madăn-isĕssăɣdăr. 21Tidĕt-dăɣ a-s Ăgg-ăgg-adĕm, ad-t-iba, ed a-wen-dăɣ a ĕnnăn ĕlkĕttabăn n-Măssinăɣ dăɣ-isălan-net măšan, amăskoy ăwadĕm wa t-madăn-isĕssăɣdăr! Ăwadĕm-en, iššăm-as-in ad-wăr dd-ijješ ăddunya făw." 22Tattăn dihen-dăɣ a-s iḍkăl Ɣisa tajĕlla, ămmoy i-Măssinăɣ tĕzzar, ăẓun-asăn-tăt, inn'-asăn: "Uhĕnăt, a-wa taɣĕssa-nin." 23Iḍkăl ḍarăt-a-wen kara han aman n-lăɣnăb, ăxxiimmărnen, ămmoy i-Măssinăɣ tĕzzar, ikf'-asăn-t iket-dăɣ-năsăn, ĕswăn dăɣ-s. 24Inn'-asăn: "A-wa ašni-nin wa ămoosăn ărkăwăl n-tassaɣt ta tăynayăt d-Măssinăɣ, ašni-nin, ad-inɣĕl dăɣ-tĕssĕba n-ăddinăt ăjjootnen. 25Ăsidătteɣ-awăn a-s ăbas ilkam ad-ĕsweɣ a dd-ijmaḍăn ara n-lăɣnăb hundăɣ har ašăl wa d-mad-ăswăɣ wa ăynayăn dăɣ-Tĕmmĕnĕya n-Măssinăɣ." 26Ăwwăy Ɣisa d-inĕṭṭulab-net isuhaɣ n-tĕmmal n-Măssinăɣ dd-ĕzjarnen ĕlkĕttab wa n-Ăẓẓăbur, ĕglăn ḍarăt-a-wen, ĕkkăn taḍaɣt ta tăssidwălăt ihĕškan wi n-ĕzzăytun. 27Inn'-asăn ḍarăt-a-wen: "Ad-tăqqĕlăm ḍar'-i iket-dăɣ-năwăn ed iktab dăɣ-ĕlkĕttab n-Măssinăɣ a-s: 'Ad-ĕwĕtăɣ amăḍan, iba-t, ămmăhašnăt tihatten iket-năsnăt.' 28Afăl dd-ĕnkărăɣ jer-inĕmmuttan, ad-hawăn-izarăɣ s-teje ta n-Galila." 29Iggăd-dd Bĕṭrus, inn'-as: "Kud-irha ĕkkuddĕlăn-kăy imidiwăn-in iket-năsăn, năkk iman-in, wăr kăy-mad-ĕkkuddĕlăɣ." 30Inn'-as Ɣisa: "Ăsidătteɣ-ak a-s ehăḍ-i-dăɣ, a-s-e-ăj ekăz ĕssin iɣoran, tăkkuddălăd-ahi har kăraḍ ihăndăggan." 31Ibbărăḍ Bĕṭrus, innă daɣ: "Năkk ɣas, kud-dăɣ tamăttant a tihrăɣ dăr-k, wăr kăy-mad-ĕkkuddĕlăɣ." Abăraj-wen-dăɣ ija Bĕṭrus, a jăn imidiwăn-net. 32Ăddew dăr-săn Ɣisa ḍarăt-a-wen s-ašĕkrĕš iyyăn iknan asĕdwal n-ihĕškan s-isĕm-net Žătsămmani. Ǝwwăḍăn-in ɣas, inn'-asăn: "Ɣaymăt, tăqqĕlăm-ahi diha-dăɣ har ĕdĕlăɣ Măssinăɣ." 33Iššĕnkăš-in fălla-săn, ăddeew d-Bĕṭrus d-Yaqub d-Exya; ɣur-ăssaɣăt-wen-dăɣ ad-t-ĕssĕntăn iman-net tĕkma, ixwăl. 34Inn'-asăn: "Ărɣan iman-in, ărɣan har išwar hi-ăba; wăr tĕṭṭesăm, ɣaymăt ɣur-i, wăr hanăɣ-ilăqqădet eḍĕs." 35Iššĕnkăš-in daɣ fălla-săn a ĕnḍărrăn, irkăɣ, ad-itĕddal Măssinăɣ, ijanna: "Kunta ămmuukkăn a-wen-dăɣ, ajĕjet-ahi ăssaɣăt-i-dăɣ." 36Innă daɣ dăɣ-tittar-net: "Abba-nin, wăr t-illa a-s wădden tăddoobed-t, sĕssijĕj-ahi tisnant-ta-dăɣ, măšan hakd a-wen-dăɣ, ăjet erhet wa-năk wădden wa-nin." 37Iqqăl-tăn-dd Ɣisa, ogăẓ-tăn-dd ĕṭṭasăn, issĕnkăr Bĕṭrus, inn'-as: "Simyon, kăyy tĕṭṭasăd? Adiš, indăr-ak wăla-dăɣ ad-tĕjĕd ăssaɣăt iyyăn tokayăd, 38ăyyăt fălla-wăn eḍĕs, ĕdĕlăt Măssinăɣ i-ad-kăwăn-agĕẓ dăɣ-tănḍărbaten n-Iblis; ăgg-adĕm, tidĕt-dăɣ a-s ăsidărhăn amišĕl n-a ăjjeen ăhuusken măšan, igdal-as iba n-ăṣṣahăt n-tumast-net amišĕl n-a-wa irha." 39Olăs daɣ ašĕnkĕš fălla-săn, ad-itĕddal Măssinăɣ s-ĕmmĕk-wĕnnin-dăɣ s-t-idăl s-tizarăt. 40Olăs-tăn-dd uɣĕl, ogăẓ-tăn-dd, ij'-asăn eḍĕs alăɣad wa-dăɣ făl hasăn-indăr wăla ad-arĕn tiṭṭawen-năsăn; issĕnkăr-tăn măšan, ăba-hasăn a hasăn-ĕnnăn a-wa-dăɣ hasăn-ija, ăẓuk n-eḍĕs. 41Ifăl-tăn, ij'-asăn-dd uɣĕl wa s-kăraḍ, inn'-asăn: "Ɣas kăwăneḍ tĕṭṭasăm, sinfum hărwa? Igdăh-awăn; ăssaɣăt wa d-ititwăɣdir Ăgg-ăgg-adĕm, ijjĕš ifassăn n-inăsbăkkaḍăn, osă-dd. 42Ǝnkărăt, ăglăt-anăɣ, os'-iwăn ămaɣdar-in." 43Ămmiijrăd hărwa a-s dd-osa Yăhudĕs, iyyăn dăɣ-inĕṭṭulab-net wi n-măraw d-ĕssin, ăsilăl tamĕtte s-iyyăḍ, ĕšlajăn tikobawen, iyyăḍ ăwwayăn iboriyăn; ăšimašălăn-tăn imănokalăn n-kăl-tikutawen d-ălɣulam n-Ăṭṭăwrăt d-inušămăn n-Iṣrayil. 44Tamĕtte-ten-dăɣ, ij'-as Yăhudĕs wa n-ămaɣdar tamătart dăɣ-has-inna: "Ăhalĕs wa s-hi-tĕnhăyăm har t-osăsăɣ dăɣ-idmarăn-in, ĕnta a-s Ɣisa, ărmĕsăt-t, tĕglĕm dăr-s dăɣ-a-s has-tĕknam iji n-ĕnniyăt." 45Osă-dd Yăhudĕs, oɣăd iman-net s-Ɣisa, inn'-as: "Ălfăqqi!" Osăs-t dăɣ-idmarăn-net. 46Toḍa tamĕtte făll-Ɣisa, tărmăs-t. 47Iggăd-dd iyyăn dăɣ-inĕṭṭulab-net, ilbăy-dd tăkoba-net, iwăt săr-s akli n-ămănokal n-kăl-tikutawen, ištăf-dd săr-s tamĕẓẓujt-net. 48Inna Ɣisa i-tamĕtte: "Ajăn năkk ănaɣtaf a ămoosăɣ a-s hi-dd-takkăm d-tikobawen d-iboriyăn i-ad-hi-tărmĕsăm? 49Wădden hak ašăl ĕlleɣ-t jere-wăn, saɣreɣ dăɣ-ehăn n-ămudd wa măqqărăn, mafăl wăr hi dăɣ-s tărmesăm? Ǝlmĕdăt a-s a-wa ijăn ašăl-i-dăɣ, ija i-ad-itbĕt a-wa ĕnnăn ĕlkĕttabăn n-Măssinăɣ dăɣ-isălan-in." 50Ăjewăḍăn inĕṭṭulab iket-năsăn, oyyăn-dd Ɣisa ĕnta ɣas jer-išĕnja-net. 51Ilkăm-as-dd ămawaḍ iyyăn wărăn ilsa ar tasĕjbĕst lămmeḍăt daw-wăr t-illa hărăt, ăkbătten-t-dd ăddinăt ɣas, 52oyy'-asăn-in tasĕjbĕst-net, ošăl wăr ilsa tikĕst. 53Ittĕlwăy Ɣisa s-ămănokal n-kăl-tikutawen-i s-a-s ităjj a-wen-dăɣ, ăžžimmăɣăn ɣur-s kăl-tikutawen d-inušămăn n-Iṣrayil d-ălɣulam n-Ăṭṭăwrăt. 54Tamĕtte-en, ij'-as-dd Bĕṭrus alkum šĕjren har tĕjjăš ammas n-ăɣalla n-ehăn n-ămănokal n-kăl-tikutawen; osă-dd Bĕṭrus, ijjăš ĕnta-dăɣ, iglă ăqqima edes i-gărdităn, ad-itazzăh s-efew. 55A-s ităjj a-wen-dăɣ, tattărăn imănokalăn n-kăl-tikutawen d-kăl-Sinhidrin-i tirĕnen ăššăreɣa ere innăn bahu făll-Ɣisa, siḍĕwĕn-t dăɣ-ăššăreɣa, ăɣtĕsăn-as tamăttant măšan, wăr t-illa uḍlem fălla-s ĕjrawăn. 56Ǝggădăn-dd ăddinăt ăjjootnen, ad-t-saḍlamăn măšan, indăr-asăn ad-ănnăfhămăn făll-bahutăn-năsăn. 57Sawarăn-t iyyăḍ bahu, 58jannen: "nĕsall'-as a-s innă: 'Năkk, ad-ărẓăɣ ehăn n-ămudd wa măqqărăn dăyăn ifassăn n-dăgg-adĕm, sĕbdĕdăɣ-dd dăɣ-kăraḍ išilan i wăr deyăn ifassăn n-ăgg-adĕm dăɣ-edăgg-net' " 59măšan, wăla bahu-wen-dăɣ, indăr-asăn ad-fălla-s ănnăfhămăn. 60Ihă-dd ămănokal n-kăl-tikutawen ibdad dăɣ-ammas n-ălžămaɣăt, innă i-Ɣisa: "Ma tĕnned dăɣ-a-wa fălla-k itawănnen? Măjrăd!" 61Wăr t-illa a has-inna Ɣisa. Issĕstăn-t ămănokal n-kăl-tikutawen daɣ, inn'-as: "Ajăn kăyy a-s Ălmasex wa n-Rure-s n-Wa ibbĕlălăn." 62Inn'-as Ɣisa: "Ămoosăɣ-t; ăssiilmădăɣ-kăy daɣ a-s ɣur-ašăl-i-dăɣ, ad-tĕnhĕyăm Ăgg-ăgg-adĕm, ăqqiima daw-aɣil n-Wa ilăn tărna iket-net, talĕsĕm-t daɣ ahănay, iqqal-dd, ifal-dd išĕnnawăn, inay tijărăken." 63Isl' ămănokal n-kăl-tikutawen i-a-wen ɣas, ijjăš-t ălhăm wa-dăɣ făl irmăs err n-erăswăy-net, ăsɣărrawăt-t făll-iman-net, inna: "Ma nĕtajj i-tijuhawen daɣ? 64Tĕslăm-as iket-năwăn a-s ăskafăr wădden; ma tĕnnăm dăɣ-isălan-net?" Ăswărăn-t uḍlem iket-năsăn, ĕnnăn ănihăjja d-tamăttant. 65Ad-fălla-s situfăn, salsen ekăršăy idĕm-net, sattăɣăn-as, jannen-as: "Lulĕy ya!" Sattăɣăn-as daɣ gărdităn. 66Ăqqiima Bĕṭrus dăɣ-ammas n-ăɣalla-en-dăɣ a-s t-dd tosa tiyyăt dăɣ-tinaxdimen n-ămănokal n-kăl-tikutawen; 67tĕnhăy-t izzah s-efew, tăzjăzz'-e, tĕnn'-as: "Kăyy-dăɣ, kăla tăddewăd d-Ɣisa wa n-Năṣirăt?" 68Ăkkuddăl Bĕṭrus a-wen, inn'-as: "Wăr-ĕjrehăɣ, wăr-ĕssenăɣ a dăɣ-hi-tăssewălăd." Izjăr Bĕṭrus ḍarăt-a-wen, ikk' emm n-ăɣalla ɣas, iwăt ekăz ăɣora. 69Tĕnhăy-t daɣ tănaxdimt tiyyăt, ad-janna i-ăddinăt-wi t-ĕllanen dihen: "Hannăyăm-t ăhalĕs-wa-dăɣ, iyyăn dăɣ-săn." 70Olăs daɣ Bĕṭrus akuddĕl n-a-wen. A ĕnḍărrăn ḍarăt-a-wen, ĕnnăn-as ăddinăt ĕbdadnen dihen: "Ijmaḍ-t ăššăk a-s iyyăn dăɣ-săn a tămoosăd ed kăyy-dăɣ, Galila a kăy-lăt." 71Ad-hasăn-ităhhaḍ, ilaqqăn iman-net siha d-siha, ijann'-asăn: "Ăhalĕs wa s-hi-jănnem, wăr t-ĕzzeyăɣ." 72Diha-dăɣ d-innă a-wen-dăɣ ad-iwăt ekăz ăɣora wa s-ĕssin. Iktă-dd Bĕṭrus măjrăd wa s-kăla has-t-ija Ɣisa a-s has-innă: "Wăr mad-iwĕt ekăz ĕssin iɣoran wăr tĕnned har kăraḍ ihăndăggan, wăr hi-tĕzzeyăd." Izjăr, ad-ihall.

will be added

X\