1 Izjăr-dd Ɣisa ehăn n-ămudd wa măqqărăn ɣas, inn'-as iyyăn dăɣ-inĕṭṭulab-net "Ălɣalim, ĕnhĕy ɣas tihun-ti-dăɣ ăhuskătnen, tihusay n-ehăn!" 2 Inn'-as Ɣisa: "Wădden hannăyăd-t ehăn-wa-dăɣ măqqărăn ăhusken? Wăr mad-dăɣ-s dd-tăqqayĕm tăhunt tiyyăt warăt tamidit-net, ad-ăttăɣtăɣ iket-dăɣ-net." 3 Ăqqiima Ɣisa ḍarăt-a-wen făll-taḍaɣt ta tăssidwălăt ihĕškan wi n-ĕzzăytun, ikyad dăɣ-ehăn n-ămudd wa măqqăran, issĕstăn-t Bĕṭrus d-Yaqub d-Exya d-Idris dăɣ-takše, 4 ĕnnăn-as: "Lăɣăt-anăɣ ĕmme d-mad-ăj a-wa s-tĕnned? Ǝkkĕs-anăɣ dăɣ-taɣdărt n-išmal wi s-mad-nĕlmĕd a-s sămdo n-hărăt iket-net, iwwăḍ-dd?" 5 Ăwwežăb-asăn Ɣisa, inn'-asăn: "He kăwăneḍ, ăjăt ĕnniyăt, wăr kăwăn-išăšket ăwadĕm, 6 ad-dd-asĕn ăddinăt ăjjootnen făll-isĕm-in, ănn hak iyyăn dăɣ-săn: 'Năkk a-s Ălmasex', šiškĕn s-a-wen-dăɣ ăddinăt ăjjootnen. 7 Ad-tĕslĕm i-isălan n-imjărăn d-măhewĕl n-imjărăn, wăr tăxwelăm ed ilzam ad-ăj a-wen măšan, sămdo n-ăddunya ĕnta, wăr-ija hărwa. 8 Ad-tĕknĕs tawset tamidit-net, iknĕs ĕddĕwĕl amidi-net, ăj laẓ, iškĕḍkĕḍ ăkall dăɣ-idăggan ăjjootnen, sănto n-tămĕddawt n-ăddunya ɣas a-wa, olăh d-sănto n-tiẓẓurt n-tamăḍt jarrăwăt eɣăf-net. 9 Măšan, ăjăt ĕnniyăt i-iman-năwăn: ad-hawăn-aškĕn ăddinăt s-ĕlxĕkum, ĕjĕn dăɣ-wăn tiwit dăɣ-ihănan n-ăddin wi n-kăl-Ălyăhud; sĕbdĕdăn-kăwăn dat-gĕfărăn d-imănokalăn, dăɣ-ăddimmăt n-isĕm-in wa kăwăn-iwarăn; umas a-wen ĕssĕbab făl tămoosăm tijuhawen-in data-săn, 10 i-ad-ĕslĕnăt tiwsaten iket-dăɣ-năsnăt i-isălan n-Ălĕnžil tĕzzar. 11 Afăl kăwăn-ăstărmăsăn ăddinăt, wăr tăšăwwašăt dăɣ-isălan n-a-wa mad-tĕnnĕm, ăjăt măjrăd wa kăwăn-e-itwĕkfĕn ăssaɣăt-wen-dăɣ ed wădden kăwăneḍ a maden-ămmăjrăd, Unfas Šăddijăn a he-ijĕn dăɣ-imawăn-năwăn a-wa s-lăm s-tĕnna-net. 12 Išilan-en, ad-isĕttărmĕs ăwadĕm ă/n/na-s i-ad-ămmăt kĕrĕf, isĕttărmĕs abba rure-s, ănnăbdădăn aratăn d-imărawăn-năsăn, ĕjĕn iman n-imărawăn-năsăn; 13 ad-dăr-wăn akĕḍăn ăddinăt iket-năsăn, dăɣ-ăddimmăt n-isĕm-in wa kăwăn-iwarăn, măšan ere wa ihălăn iman-net, ăkoyăd dăɣ-alkum-hahi har ašăl wa d-imda a-wen-dăɣ iket-net, ad-iɣlĕs. 14 Afăl tĕnhăyăm ănabxas wa n-emĕkkărekăḍ hăr ăqqima dăɣ-edăgg wa s-wăr-ila s-ad-dăɣ-s ăqqayĕm, ăwadĕm wa iɣarrăn isălan-wi-dăɣ, ijrăhet ălmăɣna-năsăn! Wi irmăs a-wen-dăɣ ĕzzaɣăn teje ta n-Ălyăhudĕyăt, jawăḍnet dăɣ-azzal s-ašrut wa n-iḍaɣăn, 15 wa iwărăn afălla n-ehăn, wăr dd-itĕzĕbbutet i-ad-iḍkĕl a has-ihan ammas n-ehăn, 16 wa ihăn išĕkraš, wăr dd-ităqqălet ḍara-s i-ad-iḍkĕl asălso-net. 17 Timĕskay tiḍeḍen-ti mad-ărmĕsăn išilan-win-dăɣ lanăt ĕnniyăt meɣ siḍuḍnăt. 18 Ǝttărăt dăɣ-Măssinăɣ ad-wăr-itĕmzĕyyit ajiwĕḍ-năwăn d-ăzzăman wa n-tajrĕst 19 ed išilan-en-dăɣ, ad-ăj ălɣizabăt ăssuksăḍăn s-ad-dd-ixlăk Măssinăɣ ăddunya-dăɣ, wăr kăla ătiwănhăy šund ĕnta făll-ărori n-ăkall, ad-tĕmdĕw ăddunya daɣ, wăr-ilkem ad-ija a dăr-s olăhăn. 20 Afăl wăr-ifneẓ Emăli dăɣ-tăqqăn n-tisnant ta hăt išilan-win-dăɣ, wăr-iɣĕllĕs wăl' ăgg-adĕm iyyăn ɣas; măšan, ad-išĕkšĕl Măssinăɣ tăqqăn n-tiẓẓurt-ten-dăɣ, dăɣ-tĕssĕba n-ăddinăt wi ăsnăfrăn i-ĕlɣĕllas. 21 Ăzzăman-en, afăl hawăn-inna ăwadĕm: 'Ǝnhĕywăt-ak, Ălmasex, ĕnta da!' meɣ 'Ǝnhĕywăt-ak, ĕnta den!' wăr t-tĕflesăm. 22 Ad-dd-asĕn ălmasexăn n-bahu d-ănnăbităn n-bahu, ĕjĕn ijităn ăssuksăḍnen d-tišušab, šiškĕn ĕnnăr ămmukkăn a-wen wăla ăddinăt wi ăsnăfrăn Măssinăɣ. 23 He kăwăneḍ! Ăjăt ĕnniyăt i-iman-năwăn, ĕkkasăɣ-kăwăn dăɣ-taɣdărt hărwa wăr jen hărătăn-win-dăɣ." 24 "Ḍarăt tisnant ta madăt-tăj dăɣ-išilan-win-dăɣ, 'ad-ĕlsĕnăt tihay tăfukt, iba tĕmĕlle n-ewăr, 25 ĕtrĕkken-dd etran dăɣ-išĕnnawăn, ĕnhĕynĕhĕyăn imĕṣṣuha wi hănen išĕnnawăn.' 26 Ălwăqq-wen-dăɣ, ad-e-itwĕnhĕy Ăgg-ăgg-adĕm, imal-dd, inay tijărăken, tĕlkam-as tărna-net d-ălxurmăt-net. 27 Dihen, ad-išĕmmišĕl ănjălosăn-net, sĕdĕwĕn-dd săr-s dăɣ-tisdas iket-năsnăt e d t-illăm ere ăsinăfrăn Măssinăɣ dăɣ-e-d t-tĕllăm tamdujt făll-ărori n-ăkall hakd-dăɣ dăɣ-išĕnnawăn." 28 "Sĕjrăhăt ɣas ĕmmĕk wa s-idaggăl ašar: wădden e-d t-tĕnhăyăm a-s dd-inšăr har lămmeḍăn ifărketăn-net, ad-tĕnnĕm, os'-anăɣ ewelăn. 29 Ǝmmĕk-wen-dăɣ daɣ a-s afăl tĕnhăyăm hărătăn-win-dăɣ s-hawăn-ĕnneɣ har ĕqqălăn iji, adiš ĕlmĕdăt a-s Ăgg-ăgg-adĕm, ohăẓ-dd uɣĕl-net, os'-iwăn făw. 30 Ăsidătteɣ-awăn a-s, wăr-e takĕy ĕzzurĕyăt-ta-dăɣ wăr jen hărătăn-win-dăɣ s-hawăn-ĕnneɣ iket-dăɣ-năsăn. 31 Ojăr tărăɣse ija ad-ib' išĕnnawăn d-ăkall, uhĕn ad-iba tĕnna-nin. 32 Dăɣ-isălan n-ašăl meɣ ăssaɣăt wa dăɣ-mad-ĕjĕn hărătăn-win-dăɣ, wăr t-illa ere t-issanăn; wăr t-ĕssenăn ănjălosăn wi hănen išĕnnawăn wăla Ăgg-ăgg-adĕm; Abba ɣas, a t-issanăn. 33 He kăwăneḍ! Ɣaymăt tokayăm ed wăr tĕssenăm ăssaɣăt s-dd-e-ass. 34 A-wa madăn-ăj, olăh d-ăhalĕs iɣarrăn asikĕl. Ăssawăḍ tekle ɣas, issĕḍmăn ehăn-net dăɣ-inaxdimăn-net; ăsmătăr hak iyyăn dăɣ-săn d-a-wa s-ila s-ad-t-ăj. Inna i-wa iɣlăfăn emm-n-ehăn, ăqqaymet okay. 35 A-wen-dăɣ a făl, ɣaymăt tokayăm ed, wăr tĕssenăm ăssaɣăt s-dd-e-ass măssi-s n-ehăn, almĕẓ meɣ tišrayăt n-ehăḍ meɣ ăɣora meɣ tifawt. 36 Uksaḍăt ad-dd-ass wăr jem făll-a-wen, iɣdăr-kăwăn-dd tĕṭṭasăm. 37 A-wa hawăn-janneɣ, janneɣ-t daɣ i-ăddinăt iket-năsăn, ɣaymăt tokayăm."
