Marqĕs 12

1Issăɣlăy Ɣisa daɣ tangalen tiyyăḍ tamĕtte. Ij'-asăn tiyyăt dăɣ-hasăn-innă: "Kăla t-illa ăhalĕs ăddomen ašĕkrĕš n-lăɣnăb, ij'-as afăraj, ijă dăɣ-s edăgg wa dăɣ-iẓimmĕw lăɣnăb, idăy dăɣ-s edăgg n-soro i-ămagaẓ-net; ifăr-t ḍarăt-a-wen i-inĕsduma iyyăḍ tĕzzar ikk' ăkall iyyăn. 2Iwwăḍ-dd ăzzăman n-amili n-ašĕkrĕš ɣas, ăšmašăl-dd ănaxdim-net s-inĕsduma i-ad-has-dd-awĕy ɣur-săn folăt-net dăɣ-a-wa dd-orăw ašĕkrĕš. 3Os'-en-dd ănaxdim, ărmăsăn-t, tithĕkkin-t har t-ĕksănăn tĕzzar, ĕssĕglăn-t korăyrăy. 4Ăšmašăl-dd săr-săn daɣ ănaxdim iyyăn, ăsfătăqqen eɣăf-net, ăsmăḍrăyăn-t. 5Olăs daɣ ašĕmmišĕl n-iyyăn, ărmăsăn-t ĕnta, ănɣăn-t kĕrĕf; issĕlkăm-asăn-dd-i ăjjootnen, ăsmăḍrăyăn aɣil-năsăn, jăn iman n-aɣil wa iyyăḍăn. 6Wăr has-dd-ăqqima ḍarăt-a-wen ar ad-săr-săn dd-išĕmmišĕl rure-s ikna tărha ed inna dăɣ-iman-net: 'Ǝnta ya šămad rure-ɣ, ănihăjja s-ad-t-sĕmɣărăn', 7măšan ĕnhăyăn-t inĕsduma imal-dd ɣas, ănmănnăn: 'Ǝnhĕywăt-ak, amăkkasu-net; ĕyyăwăt, nărmĕset, năjet iman-net i-ad-tumas takăsit ti-nănăɣ'; 8ărmăsăn-t, ănɣăn-t kĕrĕf tĕzzar, jărăn-t-in ḍarăt ašĕkrĕš." 9Issĕmdă Ɣisa tangalt ɣas, inn'-asăn: "Ăssiistănăɣ-kăwăn, ma mad-ăj măssi-s n-ašĕkrĕš ămăra? Ǝḍmanăɣ-awăn a-s ad-dd-ass ĕnta iman-net, ilhĕs inĕsduma-wi-dăɣ tĕzzar, alĕs tefert n-ašĕkrĕš-net i-iyyăḍ." 10Inn'-asăn daɣ: "Ajăn wăr tăɣrem dăɣ-ĕlkĕttab n-Măssinăɣ a-s: 'Tăhunt ta hin-jărăn ălbănnatăn s-ĕnnăn wăr tĕnfa hărăt, ĕnta a-s a-s tĕšrăy tanfust, tămoos tăhunt ta tufăt n-aɣmăr hakkăt ăṣṣahăt ehăn; 11a-wen Emăli a t-ijăn i-ad-umas tăkunt dat-tiṭṭawen-nănăɣ.' " 12Issĕmdă Ɣisa tĕnna n-a-wen ɣas, ad-tattărăn imănokalăn n-kăl-tikutawen d-ălɣulam n-Ăṭṭăwrăt d-inušămăn n-Iṣrayil ĕmmĕk s-t-ăstărmăsăn ed ĕssanăn a-s ĕntăneḍ-en-dăɣ a ăssiiɣlăy tangalt-ta-dăɣ măšan, wăr helăn a-wen făl tuksĕḍa-i jăn i-tamĕtte; ĕšlăyăn-as, ĕglăn. 13Ăšmašălăn-dd săr-s ḍarăt-a-wen hărăt dăɣ-kăl-faris d-hărăt dăɣ-kăl-Harudĕs i-ad-has-ĕqqĕnăn tănḍărbat, siḍĕwĕn-t dăɣ-a inna wărăn itĕtwinn. 14Osăn-t-dd, ĕnnăn-as: "Ălɣalim, nĕssan a-s tidĕt ɣas a janned, wăr tăkkulăd dăɣ-a-wa jănnen ăddinăt, wăr tăn-tăẓmăẓlăyăd, wăr săɣrid daɣ ɣas ar tidĕt n-tabarăt n-Măssinăɣ. Ămăra, năssiistăn-kăy: ak iwar-anăɣ ad-nĕẓĕl tiwse i-ămănokal Qăyṣăr meɣ? Năẓlet-tăt meɣ?" 15Ilmăd Ɣisa ɣur-iman-net s-tĕlmĕnufăɣa ta t-tĕllăt ḍarăt asĕstan-năsăn, inn'-asăn: "Mafăl hi-tižărrubum? Awĕyăt-ahi-dd ărriyal n-aẓrĕf-năwăn har t-ĕnhĕyăɣ." 16Ăwwăyăn-as-t-dd, inn'-asăn: "Mi ilăn ăṭṭăṣwer d-isĕm wa t-iwărăn?" Ǝnnăn-as: "I n-ămănokal Qăyṣăr." 17Inn'-asăn: "Adiš, suɣĕlăt i-ămănokal wa măqqărăn a-wa fălla-wăn ila, tĕkfĕm daɣ Măssinăɣ a-wa fălla-wăn ila." Ǝqqălăn-dd ɣas, tof'-en tăkunt n-ălwižab-wa-dăɣ hasăn-ija. 18Osăn-t-dd ḍarăt-a-wen hărăt dăɣ-kăl-sadus-i ɣur-ija a-s wăr tĕlkem tanăkra n-inĕmmuttan, ĕssĕstănăn-t, ĕnnăn-as: 19"Ălɣalim, inn'-anăɣ ănnăbi Mosa: 'Afăl ăba ă/n/na-s n-ăwadĕm, oyyă-dd hănne-s dăr-wăr oher ara, idubĕnet-tăt ă/n/na-s i-ad-ikrĕš ĕzzurĕyăt i-ă/n/na-s wa ăba i-ad-wăr hin-itilĕm isĕm n-wa ăba făll-ărori n-ăkall. 20Ămăra, ĕkkĕs-anăɣ dăɣ-tăqqăn n-eɣăf: kăla t-ĕllan ĕssa ayĕtma; ădobăn dăɣ-săn wa n-amăqqar măšan, ăba-t wăr-ikreš ara. 21Oyyă-dd hănne-s, ădobăn-tăt wa s-ĕssin, ăba-t ĕnta-dăɣ wăr dd-oyya ara, a-wen-dăɣ daɣ a ija wa s-kăraḍ; 22ăba-tăn ĕssa-essăn măšan, wăr tăn-iha i dd-oyyan ara; ăba daɣ tamăḍt ḍara-săn. 23Năssiistăn-kăy: ašăl wa n-tanăkra jer-inĕmmuttan, ĕndek dăɣ-săn wa s-e-tumas hănne-s ed, ĕnhayăn-tăt adubĕn ĕssa-essăn?' " 24Inn'-asăn Ɣisa: "Ǝnta-den-dăɣ tasĕtbat n-išk wa jăm ed, a-wa ĕnnăn ĕlkĕttabăn hakd-dăɣ a-wa dăr-togdăh tărna n-Măssinăɣ, wăr t-illa a dăɣ-s tĕfhamăm. 25Ašăl wa dd-nakkărăn inĕmmuttan, meddĕn hakd tiḍeḍen, ad-ăbas tidubunăn ed ad-talăh tămudre-năsăn d-ta n-ănjălosăn wi hănen išĕnnawăn. 26Ămăra, dăɣ-isălan wi n-inĕmmuttan d-tanăkra-năsăn, ajăn wăr tăɣrem dăɣ-ĕlkĕttab wa n-ănnăbi Mosa a-wa has-innă Măssinăɣ ɣur-tabsăɣt ta tăhjăljălăt wăr răqq? Wădden, inn'-as Măssinăɣ: 'Năkk a-s Măssinăɣ n-Ibrahim d-Isxaqq d-Yaqub.' 27A-wen, ălmăɣna-net a-s, ăddinăt-win-dăɣ, han ălžănnăt, tiimĕlĕn Măssinăɣ; ĕnnăr wăr-ĕdderăn, wăr tĕjjĕn a-wen. Măssinăɣ, wădden inĕmmuttan a-s ămoos Măssinăɣ, ămoos-t i-wi ĕddărnen. Tidĕt-dăɣ a-s toškam ed tĕnnăm wăr tĕlkem tanăkra jer-inĕmmuttan." 28Ohăẓ-dd iyyăn dăɣ-ălɣulam n-Ăṭṭăwrăt ăsijădăn i-edăwănne wa ija Ɣisa d-kăl-sadus d-ălwižab wa ăhuusken hasăn-ija, inn'-as: "Ma ămoos ɣur-Măssinăɣ alămăr wa ojărăn?" 29Inn'-as Ɣisa: "Ǝnta da wa ojărăn: 'Ya Iṣrayil, sĕjĕd! Emăli-nănăɣ Măssinăɣ, ĕnta ɣas a-s Emăli. 30Ad-tărhĕd Emăli-năk Măssinăɣ s-ulh-năk imda tărhĕd-t s-iman-năk ĕmdan, d-tayĕtte-năk tĕmda d-ăṣṣahăt-năk iket-net.' 31Wa s-ĕssin daɣ da: 'Ad-tărhĕd ănharăj-năk s-ĕmmĕk wa s-tĕrhed iman-năk.' Wăr t-illa alămăr ojărăn-win-dăɣ." 32Inn' ălɣalim n-Ăṭṭăwrăt i-Ɣisa: "Ălɣalim, tĕnned tidĕt: Măssinăɣ iyyăn, wăr t-illa ar ĕnta. 33Iwar ăgg-adĕm ad-t-ărh s-ulh-net imda, d-tayĕtte-net tĕmda d-ăṣṣahăt-net iket-net; ărh daɣ ănharăj-net s-ĕmmĕk wa s-irh' iman-net. A-wen, wăr t-tĕlla tasĕbḍărt wăla takute wăr-ojer." 34Inhăy Ɣisa iqqud n-ălwižab-net ɣas, inn'-as: "Kăyy, ăbas tujĕjăd Tĕmmĕnĕya n-Măssinăɣ." Ăbas t-illa ḍarăt-a-wen ere ihălăn asĕstan-net. 35Isaɣra Ɣisa dăɣ-ehăn n-ămudd wa măqqărăn, ijanna i-ăddinăt: "Ma isawănnen ălɣulam n-Ăṭṭăwrăt a-s Ălmasex, rure-s n-Dawĕd? 36Wădden Dawĕd iman-net a innăn s-măjrăd ija Unfas Šăddijăn dăɣ-emm-net a-s: 'Emăli Măssinăɣ, innă i-Emăli-nin, ĕyyăw, ɣayĕm daw-aɣil-in, hundăɣ har ăjăɣ išĕnja-năk daw-iḍarăn-năk.' 37Ɣas šămad Dawĕd iman-net iɣarr Ălmasex s-isĕm Emăli; ĕndek ĕmmĕk wa s-ăddoobăt ad-umas rure-s?" Ijrăẓ măjrăd-wen-dăɣ ija Ɣisa i-tamĕtte ta tăjjeet has-tăsijădăt. 38Dăɣ-a-wa isăɣra, inn'-asăn: "Agĕẓăt iman-năwăn dăɣ-ălɣulam n-Ăṭṭăwrăt, ĕjraẓnăt-asăn timukal dăɣ-isĕlsa ăhobătnen, ijraẓ-asăn ad-hasăn-titwĕjjin isofan dăɣ-tišarriten, 39ărhan tisăqqima-ti ănnuflăynen dăɣ-ihănan n-ăddin wi n-kăl-Ălyăhud d-atwĕsĕmɣar dăɣ-imjora, 40tihăɣăn a-wa ihăn ifassăn n-tinuḍăfen, a-s ija a-wen, hărkuk tumadăn i-ad-tăn-in-ĕjrăhăn ăddinăt; ilkam dăɣ-săn ăššăreɣa sĕmmăn." 41Ăqqiima Ɣisa dăɣ-ehăn n-ămudd wa măqqărăn dat-ĕssĕndoqq wa dăɣ-titwĕjjinăt tikutawen, ikyad dăɣ-ĕmmĕk wa s-dăɣ-s săns tamĕtte aẓrĕf. Tĕjjarăn dăɣ-s kăl-ehăre ăẓrĕf ăjjeen; 42tosă-dd tănuḍăft lăqqĕwăt, tăstărăkkăt dăɣ-ĕssĕndoqq sănatăt tămmaten ĕbḍanen. 43Iɣră-dd Ɣisa inĕṭṭulab-net s-iman-net, inn'-asăn: "Ăsidătteɣ-awăn a-s tănuḍăft-ta-dăɣ n-talăqqe, tojăr ăddinăt iket-năsăn ihuk, 44făl-a-s iket-năsăn, a-wa s-ăssakăyăn s-wăr-ămɣatărăn a ĕkfăn, a-s ija a-wen ĕnta, a-wa tĕṭṭăf i-tămudre-net iket-net a tĕkfa."

will be added

X\