Marqĕs 11

1Ohăẓ-in Ɣisa d-inĕṭṭulab-net Yărussălam, ih' ămăra taɣrĕmt ta n-Bătfaži, edes i-taḍaɣt ta tăsijătăt ihĕškan wi n-ĕzzăytun. Ɣur-dihen-dăɣ, ad-ăšmašăl ĕssin dăɣ-inĕṭṭulab-net, 2inn'-asăn: "Ăkkăt tadăbayt ta n-data-wăn, dăɣ-ujĕš-năwăn-has, ad-tĕjrĕwăm ăẓa ojayăn s-kăla wăr t-iney ăwadĕm, arăt-t-dd, tĕlwĕyăm-t-dd. 3Ere hawăn-innăn, mafăl t-tirĕm, ănnăt-as: 'Ălɣalim a dăɣ-s ilan ĕššăɣĕl, ăssimda dăr-s ɣas, năssoɣăl-awăn-t-dd.' " 4Ǝglăn inĕṭṭulab wi n-ĕssin, ĕjrăwăn ăẓa ojayăn dăɣ-tăšarrit dat-emm n-ehăn iyyăn, orăn-t-dd. 5Ǝnnăn-asăn ăddinăt t-ĕllanen dihen: "Mafăl tirĕm ăẓa?" 6Ăssoɣălăn-asăn a-wa hasăn-inna Ɣisa, oyyăn-tăn, orăn-t, ĕglăn dăr-s. 7Ǝlwăyăn-dd ăẓa i-Ɣisa, ĕstăjăn-as isĕlsa-năsăn, inăy-t. 8Ad-fattăɣ tĕššĕm n-ăddinăt isĕlsa-năsăn făll-tabarăt, ɣattăsăn-dd wi iyyăḍnen ileḍleḍăn dăɣ-ihĕškan, fattăɣăn-tăn făll-tabarăt, 9ăsiɣăren wi has-ăzzarnen hakd wi has-ĕlkamnen, jannen: "Ozana! Năkfet Măssinăɣ semɣar! Ija Măssinăɣ ălbăraka dăɣ-wa dd-osăn dăɣ-isĕm n-Emăli, 10irxăm Măssinăɣ Tĕmmĕnĕya ta s-ija ărkăwăl-net i-abba-nănăɣ Dawĕd. Ozana i-Măssinăɣ wa iknăn aḍkul." 11Iwwăḍ-in Ɣisa aɣrĕm wa n-Yărussălam, ijjăš ehăn n-ămudd wa măqqărăn, ăzjăzz'-e iket-net; inhăy a-s ija fălla-s ehăḍ ĕnta d-inĕṭṭulab wi n-măraw d-ĕssin ɣas, ikkă dăr-săn tadăbayt ta n-Bitanya. 12Ăffăw, a-s dd-izjăr tadăbayt ta n-Bitanya, ălluẓ. 13Ojja ahĕšk s-isĕm-net ašar inšarăn, ikk'-e-hi-dd, itassăn warăn-t aratăn măšan, wăr fălla-s ijrew ar ifărketăn ed, wăr-ija ăzzăman n-tirwe-net. 14Innă i-ašar: "Wăr-issĕlkăm Măssinăɣ ad-torawăd har tĕnkăr ăddunya." A-s innă a-wen-dăɣ, sallăn-as inĕṭṭulab-net. 15Ǝwwăḍăn-in Yărussălam, ijjăš Ɣisa ehăn n-ămudd wa măqqărăn, ad-dăɣ-s isattăɣ ăttužžar d-imăžănšan-năsăn, isibrăɣwil tisĕskar n-kăl-amăhaš n-iẓărfan d-tisăqqima n-ăttužžar n-tidăberen. 16Wăr-oyy' ăwadĕm wăl' iyyăn ăwwayăn a inazzăn ăttužžăr-t dăɣ-ehăn n-ămudd wa măqqărăn. 17Isaɣră ăddinăt, ijann'-asăn: "Ajăn wădden iktab a-s, innă Măssinăɣ: 'Ehăn-in ad-umas ehăn n-ămudd i-tiwsaten iket-dăɣ-năsnăt,' măšan kăwăneḍ, jăm-t tajnut n-imăkrăḍăn." 18Ǝslăn imănokalăn n-kăl-tikutawen d-ălɣulam n-Ăṭṭăwrăt i-a-wen ɣas, ad-tattărăn ĕmmĕk s-jăn iman-net măšan, wăr helăn a-wen, făl-a-s ămoos a-wa isăɣra, a itĕḍḍasăn ulhawăn n-tamĕtte, ijraẓ-as iket-net. 19Ij' almĕẓ ɣas, izjăr Ɣisa d-inĕṭṭulab-net aɣrĕm. 20Ăffăw, ĕkkăn-dd edes i-ašar-wĕnnin, ĕnhăyăn-t ăqqur har ikewăn-net. 21Iktă-dd Bĕṭrus a-wa ijăn ɣas, innă i-Ɣisa: "Ălɣalim, ĕnhĕy-t-ak ašar wa tĕlɣănăd, ăqqur-in." 22Ăwwežăb-asăn Ɣisa, inn'-asăn: "Amĕnăt s-Măssinăɣ, 23ăsidătteɣ-awăn a-s ere dăɣ-wăn innăn i-aḍaɣ-wa-dăɣ: 'Haan, tĕjrĕd iman-năk dăɣ-ejănš wa sĕmmăn', ija a-wen, dăɣ-a-s, wăr-ij' ăššăk dăɣ-ulh-net, iflas s-a-wa innă ad-ăj, ad-ijrĕw ɣur-Măssinăɣ a-wa dăɣ-s ittăr. 24A-wen-dăɣ a făl hawăn-janneɣ a-s, a dăɣ-dălăm Măssinăɣ-dăɣ, dăɣ-a-s tĕflasăm a-s ad-t-tĕjrĕwăm, ad-hawăn-t-ăkf. 25E-d tĕbdădăm-dăɣ i-ad-tĕdlĕm Măssinăɣ har dd-tĕktăm a-s iɣšad-awăn ăwadĕm hărăt, ănšăt-as-in ed, afăl jăm a-wen, ad-hawăn-in-ănš daɣ Abba-năwăn Măssinăɣ-i ihăn išĕnnawăn erk imojjan-năwăn. (( 26Afăl wăr nĕššĕm i-ăddinăt, wăr hawăn-in-e-ănš Abba-năwăn Măssinăɣ-i ihăn išĕnnawăn ibăkkaḍăn-năwăn.))" 27Olăs-dd Ɣisa uɣĕl n-Yărussălam ĕnta d-inĕṭṭulab-net ɣas, issăɣlăy-dd dăɣ-ehăn n-ămudd wa măqqărăn. Osăn-t-dd imănokalăn n-kăl-tikutawen d-ălɣulam n-Ăṭṭăwrăt d-inušămăn n-Iṣrayil, 28ĕnnăn-as: "Mi kay-ikfăn turhajăt n-amišĕl n-tikunen-ti-dăɣ? Mi kăy-ikfăn tărna-ta-dăɣ s-tăjjăd a-wa tăjjăd?" 29Inn'-asăn Ɣisa: "Ad-hawăn-ăjăɣ năkk-dăɣ asĕstan iyyăn; wažăbăt-ahi ɣas ad-hawăn-ăllăɣeɣ năkk-dăɣ ere wa hi-ikfăn turhajăt ta s-tamašalăɣ a-wa tăjjăɣ. 30Asĕstan-in da: Mi dd-ăšmašălăn Exya wa n-Enĕsselmăɣ i-ad-isĕlmăɣ ăddinăt dăɣ-aman? Ak Măssinăɣ meɣ dăgg-adĕm ɣas?" 31Inn'-asăn a-wen ɣas, ĕqqălăn-dd ămmiizăɣăn jer-iman-năsăn, jannen: "Afăl has-nĕnna: 'Măssinăɣ a t-dd-ăšmašălăn', ad-hanăɣ-ănn: 'Adiš, mafăl wăr tomenăm s-a-wa hawăn-inna.' 32Afăl has-nĕnna daɣ dăgg-adĕm, aaa..." Wăr helăn tĕnna n-a-wen, ed ăksuḍăn, ad-fălla-săn tiḍĕw tamĕtte-ta-dăɣ ed tĕkkas iket-net ăššăk a-s, Exya, ănnăbi n-Măssinăɣ s-tidĕt a ămoos. 33Ǝnnăn-as: "Wăr nĕssen." Inn'-asăn: "Adiš, năkk-dăɣ wăr hawăn-e-ăllăɣeɣ ere wa hi-ikfăn tărna ta s-tăjjăɣ a-wa tăjjăɣ."

will be added

X\