Marqĕs 10

1Ifăl Ɣisa dihen, ikkă teje ta n-Ălyăhudĕyăt d-illa-hin i-ejănš wa n-Ɣurdĕni, tĕlkăḍ-as-dd tamĕtte tăjjeet, ad-isaɣra daɣ ăddinăt, s-ĕmmĕk wa s-izzăy ad-t-ăj. 2Osăn-t-dd hărăt dăɣ-kăl-faris, orămăn-t s-asĕstan iyyăn i-ad-ănn a wărăn itĕtwĕnn, ĕnnăn-as: "Dăɣ-a-wa innă alămăr-nănăɣ, ak ajăn xălal i-ăhalĕs ad-izĕmmĕzzĕy hănne-s?" 3Inn'-asăn Ɣisa: "Ma dăr-kăwăn-ăsmătăr ănnăbi Mosa." 4Ǝnnăn-as: "Ănnăbi Mosa, ijraw i-ăhalĕs ad-ăkf tăkarḍe n-amĕzzi i-hănne-s tĕzzar, izĕmmĕzzĕy-tăt." 5Inn'-asăn Ɣisa: "Alămăr wa hawăn-iktăb ănnăbi Mosa, iktăb-awăn-t dăɣ-tĕssĕba n-tăɣart-i jăn ulhawăn-năwăn, 6ĕnnăr wădden a-wen: 'S-tizarăt a-s dd-ixlăk Ămaxlak ăddunya, ăhalĕs d-tamăḍt a dd-ixlăk, 7tĕssĕba n-a-wen-dăɣ a făl mad-ifĕl ăhalĕs ti-s d-ma-s, irtĕy d-hănne-s, 8umasăn făll-ĕssin-essăn tiyyăt taɣĕssa, ad-ăbas ămoosăn ĕssin ăddinăt, ămoosăn tiyyăt taɣĕssa.' 9Ɣas, a-wa osăɣ Măssinăɣ, wăr t-ibĕḍḍĕwet ăgg-adĕm." 10Iqqăl-dd Ɣisa ehăn ɣas, ĕssĕtănăn-t inĕṭṭulab-net d-ălmăɣna n-a-wa innă. 11Inn'-asăn: "Ere hin-ăzmăzzăyăn hănne-s, olăs adubĕn n-iyyăt, izna, 12tamăḍt daɣ tĕbḍăt d-ăhalĕs-net, tolăs adubĕn n-iyyăn, tĕlmĕdet a-s, tĕzna ĕnta-dăɣ." 13Ǝlwăyăn-dd ăddinăt aratăn s-Ɣisa i-ad-dăɣ-săn ăj ălbăraka, măšan, ăklăwlăwăn inĕṭṭulab-net făll-imalwayăn-năsăn. 14Inhăy Ɣisa a-wa tăn-išlăn ɣas, ĕkmăn-t iman-net, inn'-asăn: "Ăyyăt aratăn ad-hi-dd-ĕkkĕn, wăr tăn-in-tăwweɣăm făll-i făl-a-s, Tĕmmĕnĕya n-Măssinăɣ, ăddinăt wi dăr-săn ănifăqqănen a-s tăt-ihakk. 15Ăsidătteɣ-awăn a-s ere wărăn iqbel Tĕmmĕnĕya n-Măssinăɣ s-ĕmmĕk wa s-tăt-mad-iqbĕl ara, wăr tăt-mad-ijjĕš." 16Ăsɣăyma ḍarăt-a-wen aratăn făll-ifaddăn-net, ăswăr-tăn ifassăn-net, ijă dăɣ-săn ălbăraka. 17Ălwăqq wa d-ăbok Ɣisa ad-ifĕl edăgg-en, ošăl-dd săr-s ăhalĕs iyyăn, irkăɣ data-s, inn'-as: "Ălɣalim wa olăɣăn, ma s-ĕleɣ s-ad-t-ăjăɣ i-ad-ĕkkusăɣ tămudre ta tăɣlălăt?" 18Inn'-as Ɣisa: "Mafăl hi-janned wa olăɣăn? Wăr t-illa ere olaɣăn săl Măssinăɣ, 19wădden, tĕssanăd alămărăn-net: Wăr jed iman, wăr jed ĕzzĕna, wăr tokerăd, wăr tăjjĕyhăd s-bahu, wăr tĕḍlemăd ăwadĕm, sĕmɣăr ti-k d-ma-k." 20Inn'-as ăhalĕs: "Ălɣalim, hărătăn-win-dăɣ, ăɣdalăɣ-asăn hărwa ămoosăɣ ara." 21Ikn'-e Ɣisa azĕjjĕzz, ijrăẓ-as, inn'-as: "Hărăt iyyăn a hak-in-ăba: ĕglĕw, tužžăr-in a-wa leed, tĕkfĕd-t i-tilăqqiwen i-ad-tĕkrĕšăd ărrĕzăɣ dăɣ-ălžănnăt; dihen, ĕqqĕl-dd, ĕlkĕm-ahi." 22Isl' ăhalĕs i-măjrăd-wen-dăɣ ɣas, innăḍ, ĕnxasăn iman-net, ed il' ehăre n-tikunen. 23Issăɣlăy-dd Ɣisa tamĕtte akăyad-net, innă i-inĕṭṭulab-net: "Aẓwi ija i-wi ărzăɣnen ujĕš n-Tĕmmĕnĕya n-Măssinăɣ." 24Inhăy a-s iqqan a-wen iɣăfawăn n-inĕṭṭulab-net ɣas, inn'-asăn daɣ: "Ilyaḍăn-in, aẓwi ija ujĕš n-Tĕmmĕnĕya n-Măssinăɣ! 25Ojăr tărăɣse ta ija ad-ijjĕš amnĕs s-tiṭṭ n-ănaẓmay uhĕn, ad-ijjĕš ere irzaɣăn Tĕmmĕnĕya n-Măssinăɣ." 26Iknă măjrăd-wen-dăɣ uɣĕn n-iɣăfawăn-năsăn, ad-tinmĕnnin: "Adiš mi madăn-iɣlĕs?" 27Issĕjrăh-tăn Ɣisa, inn'-asăn: "A-wen, dăgg-adĕm wăr t-ăsmăkkănăn măšan Măssinăɣ ĕnta, ăddoobăt-t ed, wăr t-illa a has-indarăn." 28Inn'-as Bĕṭrus ḍarăt-a-wen: "Ălɣalim, năkkăneḍ, wădden noyyă a-wa nĕla iket-net, nĕlkăm-ak." 29Inn'-asăn Ɣisa: "Ăsidătteɣ-awăn, a-s, wăr t-illa ere madăn-ifĕl ehăn-net d-ayĕtma-s d-šătma-s d-ma-s d-ti-s d-aratăn-net d-ihărawăn-net dăɣ-ăddimmăt-in, d-ăddimmăt n-Ălĕnžil 30s-wădden ad-ijrĕw dăɣ-ăzzăman-wa-dăɣ s-temeḍe n-anĕḍfus ihănan, ayĕtma, šătma, matte, aratăn d-ihărawăn ăddewnen d-ălɣizabăt, ijrĕw daɣ tămudre tăɣlalăt dăɣ-tilkamăt. 31A ăjjeen dăɣ-wi ăzzarnen ašăl-i-dăɣ, ad-ijjĕš ajilal, a ăjjeen dăɣ-wi hănen ajilal ašăl-i-dăɣ, ad-izar." 32Ijjăš Ɣisa ḍarăt-a-wen eɣăf n-tamĕtte, irmăs tamdujt ta n-Yărussălam, ăššiwwăšăn inĕṭṭulab-net, wăr ozja ĕnniyăt n-wi has-ĕlkamnen. Ikkăs-dd inĕṭṭulab wi n-măraw d-ĕssin s-takše, ad-hasăn-itajj isălan n-a-wa t-madăn-irmĕs, 33inn'-asăn: "Ǝnhĕywăt, năkkăneḍ-da-hi ĕkkănen Yărussălam-i-dăɣ mad-ăttărmăs Ăgg-ăgg-adĕm, ijjĕš ifassăn n-imănokalăn n-kăl-tikutawen d-ălɣulam n-Ăṭṭăwrăt, ad-t-siḍĕwăn dăɣ-ăššăreɣa-năsăn, ăɣtĕsăn-as tamăttant tĕzzar, ĕjĕn-t jer-ifassăn n-inĕẓẓulam, 34i-ad-t-ĕjĕn tekăškăšt, sutĕfĕn fălla-s, ĕjĕn dăɣ-s tiwit, ĕjĕn iman-net măšan, ašăl wa s-kăraḍ ḍarăt tamăttant-net, ad-dd-inkăr jer-inĕmmuttan." 35Ohăẓăn-dd dăgg-Zăbdi, Yaqub d-Exya Ɣisa, ĕnnăn-as: "Ălɣalim, nărha ad-hanăɣ-tĕjĕd a-wa dăɣ-k mad-nĕttăr." 36Inn'-asăn: "Ma s-tărham ad-hawăn-t-ăjăɣ?" 37Ǝnnăn-as: "Ăkf'-anăɣ ad-ăqqayĕm iyyăn dăɣ-năɣ daw-aɣil-năk, ăqqayĕm wa iyyăḍăn daw-tăšalje-năk i-ad-numas wi săr-k orăknen dăɣ-ălxikmăt, afăl dd-tăqqălăd dăɣ-ălxurmăt-năk." 38Inn'-asăn Ɣisa: "Kăwăneḍ, wăr tĕssenăm a dăr-săstanăm. Ajăn năkk, kara n-tisnant wa mad-ăswăɣ, tăddobem tesăse-net, meɣ daɣ, ajăn tăddoobem hărăt i-tamăttant ta mad-ăjăɣ?" 39Ǝnnăn-as: "Năddoobăt-t." Inn'-asăn Ɣisa: "Tidĕt lab a-s ad-tĕswĕm kara n-tisnant wa mad-ăswăɣ, tĕjĕm tamăttant ta mad-ăjăɣ 40măšan, dăɣ-isălan n-taɣimit daw-aɣil-in d-tăšalje-nin, wădden năkk a ihakkăn a-wen; Măssinăɣ a t-ihakkăn i-wi s-t-itwăr." 41Ǝslăn inĕṭṭulab wi n-măraw i-a-wen ɣas, ijjăš-tăn ălhăm făll-Yaqub d-Exya. 42Iɣr'-en-dd Ɣisa iket-năsăn s-iman-net, inn'-asăn: "Tĕssanăm a-s imănokalăn n-tiwsaten, ăxkamăn fălla-snăt s-ăṣṣahăt; kăl-ĕlxĕkum daɣ, wăr lămmeḍăn făll-kăl-ăkall 43măšan, kăwăneḍ, wăr jem a-wen; wa dăɣ-wăn irhăn mijraw, umaset akli n-imidiwăn-net tĕzzar, 44ere dăɣ-wăn irhăn daɣ tăzert i-imidiwăn-net, umaset akli-năsăn tĕzzar. 45Ăgg-ăgg-adĕm, wăr dd-ămešăl i-ad-has-ăxdĕmăn ăddinăt, ănn-ak, ămešăl-dd i-ad-ixdĕm ĕnta iman-net, ăkf tămudre-net i-ad-isĕddărfĕt ăddinăt ăjjootnen." 46Ǝglan har hin-ĕwwăḍăn taɣrĕmt ta n-Žărriko. Ălwăqq wa dd-izajjăr Ɣisa d-inĕṭṭulab-net taɣrĕmt-ten-dăɣ, tĕlkam-asăn tamĕtte tăjjeet. Zăbo wa dd-jăn, ăqqiima emĕdderɣĕl s-isĕm-net Bărtima ăgg Tima dăɣ-asălim-net, itattăr takute dăɣ-ăddinăt. 47Islă a-s Ɣisa wa n-Năṣirăt a okayăn ɣas, ăsɣărăt, innă: "Ya Ɣisa wa n-Ăgg Dawĕd, aḍĕn-ahi tăhanint!" 48Ăɣtălăn-t ăddinăt i-ad-hin-isusĕm măšan, ăsɣărăt s-afălla: "Ya Ăgg-Dawĕd, aḍĕn-ahi tăhanint." 49Ibdăd Ɣisa, innă: "Ǝlwĕyăt-ahi-t-dd." Ǝlwayăn-as-t-dd, jannen-as: "Ǝhĕl iman-năk, iɣarr'-ik." 50Ijăr-in emĕdderɣĕl abărnuš-net dihen, iggăd s-iyyăt, ikka Ɣisa. 51Os'-e-hi-dd ɣas, inn'-as Ɣisa: "Ma s-tărhed ad-hak-ăjăɣ?" Inn'-as emĕdderɣĕl: "Ălɣalim, alĕsăɣet ahănay." 52Inn'-as Ɣisa: "Ǝglĕw, ăzozăy-kăy immun-năk." Olăs Bărtima ahănay ălwăqq-wen-dăɣ, ilkăm i-Ɣisa.

will be added

X\