Marqĕs 1

1Sănto n-Ălĕnžil n-Ɣisa Ălmasex wa n-Rure-s n-Măssinăɣ da: 2Ǝnta-en-dăɣ a făll-innă ănnăbi Saya dăɣ-ĕlkĕttab-net: "Ǝnhĕy! Ăzizărăɣ-ak, inna Măssinăɣ, ănămmašul-in wa he-iknĕn tabarăt-năk. 3Ănămmašul-en, ăseɣărăt dăɣ-tenere, ijanna: 'Ăknăt tabarăt n-Măssinăɣ, sĕssiɣĕdăt ibaran-net.' " 4Ǝmmĕk-wen-dăɣ a-s dd-osă Exya wa n-Enĕsselmăɣ, ixaṭṭăb, ijanna i-ăddinăt: "Utabăt, tĕtwĕsĕlmăɣăm dăɣ-aman i-ad-tĕjrĕwăm tenăšše n-ibăkkaḍăn." 5Ijanna a-wen-dăɣ, ad-săr-s dd-zajjărăn ăddinăt ăjjootnen dd-falnen teje ta n-Ălyăhudĕyăt d-aɣrĕm wa n-Yărussălam, safăkkarăn-dd a-wa ămešălăn dăɣ-ibăkkaḍăn dat-tamĕtte, isalmaɣ-tăn dăɣ-aman n-ejănš wa s-itawănna Ɣurdĕni. 6Ils' Exya emăls iknan s-elăm n-amnĕs warăn amẓadăn, ijbas s-tamĕntĕka n-elăm, iddar s-tašwalt d-torawăt. 7Ixaṭṭăb, ijanna i-tamĕtte: "Ad-hi-dd-išrĕy-i hi-ojărăn tărna, ij'-ahi tifut ta-dăɣ s-wăr-ănhăjjăɣ wăla-dăɣ d-ad-ĕddunkuɣ i-ad-arăɣ issal n-tifădelen-net. 8Năkk, aman a dăɣ-kăwăn-salmaɣăɣ, măšan ĕnta, Unfas Šăddijăn a dăɣ-kăwăn-e-isĕlmăɣ." 9Išilan-win-dăɣ a dăɣ-dd-ifăl Ɣisa taɣrĕmt ta n-Năṣirăt hăt teje ta n-Galila, ikkă-dd Exya, issĕlmăɣ-t dăɣ-aman n-ejănš wa n-Ɣurdĕni. 10Diha-dăɣ dd-izjăr aman, ad-inhăy išĕnnawăn a-s dd-ămerăn, ăzzubbăt-dd fălla-s Unfas Šăddijăn dăɣ-ănnuɣ n-tedăbert măllăt, 11ijmăḍ-dd emăsli išĕnnawăn, innăn: "Kăyy-i-dăɣ a-s Rure-ɣ wa ĕkneeɣ tărha, kăyy a dăɣ-ăsriwăn iman-in." 12Šik ḍarăt-a-wen, oɣăd Unfas n-Măssinăɣ Ɣisa s-tenere, 13ijă dăɣ-s ĕkkoẓăt timĕrwen n-ašăl, itižărrub-t Iblis, irtay d-iwăɣsan, ăxdamăn-as ănjălosăn. 14Ittărmăs Exya wa n-Enĕsselmăɣ ɣas, ikkă Ɣisa teje ta n-Galila, ad-dăɣ-s ixaṭṭăb isălan n-Ălĕnžil n-Măssinăɣ. 15Ijanna i-ăddinăt: "Tăqqăn tăwwăḍ! Tĕmmĕnĕya n-Măssinăɣ, tohăẓ-dd; utabăt, tamĕnăm s-isălan n-Ălĕnžil." 16Ălliil Ɣisa asălim n-ejănš wa n-Galila a-s inhăy Simyon d-ă/n/na-s Idris, tĕjjarăn titarren-năsăn dăɣ-aman ed imĕhhuyya n-imănan a ămoosăn. 17Inn'-asăn Ɣisa: "Ǝlkĕmăt-ahi, ad-kăwăn-ăjăɣ meddĕn săr-i dd-sadawnen ăddinăt i-ad-tăn-ăɣlĕsăɣ." 18Oyyăn titarren-năsăn ălwăqq-wen-dăɣ, ĕlkămăn-as. 19Illa-hin i-dihen a ĕnḍărrăn, inhăy Ɣisa dăgg-Zăbdi: Yaqub d-ă/n/na-s Exya, samăkrasăn titarren dăɣ-turăft-năsăn ta n-aman, 20iɣr'-en-dd ăssaɣăt-wen-dăɣ. Oyyăn abba-năsăn Zăbdi dăɣ-turăft ta n-aman ĕnta d-inaxdimăn, ĕlkămăn-as. 21Ǝkkăn taɣrĕmt ta n-Qăfărnaxum; ij'-en ašăl wa n-ĕssĕbĕt-i n-tăsonfat dihen ɣas, ikka Ɣisa ehăn n-ăddin wa n-kăl-Ălyăhud, ad-dăɣ-s isaɣra tamĕtte. 22Ǝqqălăn-dd ăddinăt ɣas oran imawăn făl ĕjjăruẓăt-i-dăɣ hasăn-ija a-wa isăɣra, ed isaɣr'-en s-ălxikmăt n-ere issanăn a-wa iha wădden, šund ălɣulam wi n-Ăṭṭăwrăt. 23Ehăn n-ăddin-en, ih'-ee ăhalĕs ih' alšin, inhăy Ɣisa ɣas, ad-isaɣărat, ijanna: 24"Ya Ɣisa wa n-Năṣirăt, ma dăɣ-năɣ tărhed? Ajăn ahălak-nănăɣ a-s dd-tosed? Ǝssanăɣ ere wa tămoosăd, kăyy-i-dăɣ a-s: Wa Šăddijăn dd-ăšmašăl Măssinăɣ." 25Ăsmăhăḍ dăɣ-s Ɣisa, inn'-as: "Ǝṭṭĕf emm-năk, tĕzjărăd ăhalĕs-i-dăɣ!" 26Ăššăkăḍkăḍ alšin ăhalĕs s-ăṣṣahăt, ăsɣărăt dăɣ-išĕnnawăn tĕzzar, izjăr-t. 27Issărmăɣ a-wa ijăn ăddinăt, ĕqqălăn-dd hak iyyăn isastan amidi-net, ijanna: "Ma ămoos a-wa? Ma tămoos teɣăre-ta-hi tăynayăt, tăṣṣohet? Wa ĕnta wăla alšinăn e-d fălla-săn ăsmăhăḍ, ad-ĕjĕn a-wa inna." 28Šik-dăɣ a-s intăj isĕm-net dăɣ-teje ta n-Galila iket-dăɣ-net. 29Izjăr-dd Ɣisa ehăn n-ăddin wa n-kăl-Ălyăhud ɣas, ăddew d-Yaqub d-Exya s-ehăn wa n-Simyon d-Idris. 30A-s hin-ĕwwăḍăn ehăn, tăssinsa tenăde taḍăggalt n-Simyon. Ǝllăɣen-as săr-s ăddinăt ălwăqq-wen-dăɣ. 31Os'-e-t, irmăs-tăt-dd s-ăfuss, issĕbdăd-tăt, tĕrẓa fălla-s tenăde, tĕbdăd, ad-tăn-simjurut. 32Toḍa tăfukt ɣas, ămewăyăn-dd imarhinăn d-imĕlšan iket-năsăn, 33ăddew-dd aɣrĕm iket-net dat-emm n-ehăn-wen-dăɣ iha. 34Ăzozăy dăɣ-săn i ăjjootnen ĕjrawnăt tăkmoten wăren oleh, ikkăs daɣ alšinăn ăjjootnen dăɣ-ăddinăt. Alšinăn ĕntăneḍ, wăr tăn-itĕyy ămmijrădăn ed ĕssanăn ere wa ămoos. 35Emăɣăr n-ašăl wa iyyăḍăn, hărwa janăt tihay, inkăr Ɣisa, ikkă tenere n-iman-net, ad-itĕddal Măssinăɣ. 36Kăla has-itammăɣ Simyon d-imidiwăn-net 37har t-ĕjrăwăn, ĕnnăn-as: "Tamĕtte iket-net a hak-tĕmmaɣăt." 38Inn'-asăn: "Năkket tidbi ti n-data-năɣ i-ad-hasnăt-ăxṭĕbăɣ ĕntănăteḍ-dăɣ, ed a-wen-dăɣ a-s dd-ămešălăɣ." 39Issăɣlăy-dd teje ta n-Galila iket-net, ixaṭṭăb dăɣ-ihănan n-ăddin wi n-kăl-Ălyăhud, itakkăs alšinăn dăɣ-ăddinăt. 40Osă-dd ăhalĕs ijraw jĕri Ɣisa, irkăɣ data-s, ad-t-ilaqqăd, ijann'-as: "Afăl tărhed a-wen-dăɣ, tăddobed ad-hi-šĕšdĕjăd." 41Tănɣ'-e tăhanint-net, iẓẓăl ăfuss-net, iḍăs-t, inn'-as: "Ărheeɣ-t, išdaj." 42Izzăy dăɣ-jĕri ălwăqq-wen-dăɣ, šăddij. 43Ikn'-e Ɣisa asĕmmĕtăr tĕzzar, issĕgl'-e măšan, 44inn'-as: "Wăr jed isălan i-ăwadĕm wăl' iyyăn, ĕglĕw, sĕkĕn iman-năk i-u-tikutawen, tĕjĕd takute ta s-innă alămăr wa n-Mosa dăɣ-isălan n-tĕšĕdje-năk i-ad-ăllăɣăt i-ăddinăt a-s tĕzzeyăd." 45Măšan, igl' ăhalĕs-ĕnnin-dăɣ ɣas, wăr t-illa ere dăr-ămmoqqăs s-wădden ija dăɣ-s isălan, ăbas ăddobăt Ɣisa ad-ijjĕš aɣrĕm wăl' iyyăn ar s-ufăr. Ăqqima dăɣ-tenere ad-săr-s dd-tĕffalăn ăddinăt išrutăn n-ăkall iket-net.

will be added

X\