Luqa 9

1Iɣră-dd Ɣisa inĕṭṭulab-net wi n-măraw d-ĕssin, ikf'-en tărna d-ălxikmăt făll-e d t-illăm alšin d-tădabit n-ad-zizuyăn ăddinăt dăɣ-turhĕnnawen-năsăn, 2ăšmašăl-tăn ḍarăt-a-wen i-ad-xaṭṭăbăn isălan n-Tĕmmĕnĕya n-Măssinăɣ d-ad-zizuyăn imarhinăn, 3inn'-asăn: "Wăr tiwĕyăt wăla a ĕnḍărrăn dăɣ-asikĕl-năwăn, wăr tiwĕyăt tăborit, wăla šăkkoš, wăla ăzzad, wăla aẓrĕf; wăr tiwĕyăt ĕssin irăswăyăn. 4Ehăn tĕjjăšăm-dăɣ har kăwăn-ăsmăjarăt, ɣaymăt dăɣ-s har ašăl wa d-tăssawăḍăm tekle. 5Aɣrĕm tĕjjăšăm wăr kăwăn dăɣ-s ăsbărrăk ăwadĕm, ĕzjărăt-t, tăbbăkbăkăm iḍarăn-năwăn i-ad-wăr kăwăn-ilĕttăɣ wăla ăboqqal-net, ilkam ad-ăjjăyh a-wen fălla-săn." 6Ǝglăn inĕṭṭulab, tadăbayt ĕmmărăn-dăɣ, ad-dăɣ-s ăxṭĕbăn isălan n-ălxer, zuzĕyĕn dăɣ-s imarhinăn. 7Islă Harudĕs-i ixkămăn făll-teje ta n-Galila a-wa ităjj Ɣisa d-inĕṭṭulab-net ɣas, iqqăn eɣăf-net făl-a-s, jannen ăddinăt iyyăḍ dăɣ-isălan n-Ɣisa a-s ĕnta-i-dăɣ a-s Exya wa n-Enĕsselmăɣ dd-olasăn tanăkra jer-inĕmmuttan, 8jannen iyyăḍ: "A-wa ănnăbi Ɣĕli dd-olasăn uɣĕl", jannen wi iyyăḍnen: "A-wa iyyăn dăɣ-ănnăbităn wi n-ibda dd-olasăn tanăkra jer-inĕmmuttan." 9Harudĕs ĕnta iman-net, innă: "Exya-š, ajăn wădden năkk a dd-issĕfrăsăn eɣăf-net, ma ămoos-š wa hi-dd-išreyăn făll-sallăɣ ijităn-wi-dăɣ?" Ad-itattăr ya Harudĕs ĕmmĕk s-inhăy Ɣisa. 10Ǝqqălăn-dd inĕmmušal, jăn dăɣ-Ɣisa isălan n-a-wa jăn iket-net. Ikkăs-tăn-dd s-takše, ikka dăr-săn taɣrĕmt ta n-Băṭsăyda. 11Ǝlmădăn ăddinăt s-a-wen ɣas, ĕlkămăn-as-dd. Ilkăḍ-asăn-dd Ɣisa, ad-hasăn-itajj isălan n-Tĕmmĕnĕya n-Măssinăɣ, izizuy dăɣ-săn wi n-imărhinăn ăḍḍirărnen s-a-wen. 12Ohăẓ-dd ejăḍăl n-tăfukt ɣas, ohăẓăn-t-dd inĕṭṭulab-net wi n-măraw d-ĕssin, ĕnnăn-as: "Sĕglĕw tamĕtte ad-tăkk tidbi-ti ohăẓnen d-imăzzaɣăn i-ad-tĕmmăɣ i-edăgg dăɣ-tĕnsa d-i dăɣ-tĕkša făl-a-s, edăgg n-tenere a nĕha." 13Inn'-asăn: "Un, šăkšăt-tăn kăwăneḍ iman-năwăn." Ǝnnăn-as: "Wăr nĕṭṭef ar sĕmmosăt tijĕlwen d-ĕssin imănan, afăl wădden aɣrĕm a nĕkka, i-ad-dd-nĕžănš a tĕkša tamĕtte jat ĕjut-wa-dăɣ." 14Ălžămaɣăt-en-dăɣ, ih'-e a iwwăḍăn sĕmmos afḍăn n-ăhalĕs. Innă Ɣisa i-inĕṭṭulab-net: "Săqqaymĕt ăddinăt, tĕbḍĕwăm-tăn s-sĕmmosăt-sĕmmosăt timĕrwen n-ăwadĕm." 15Jăn inĕṭṭulab a-wa hasăn-innă, ăsɣăymăn ăddinăt iket-năsăn. 16Iḍkăl Ɣisa ḍarăt-a-wen tijĕlwen ti n-sĕmmosăt d-imănan wi n-ĕssin, ăjoẓăy išĕnnawăn, ămmoy i-Măssinăɣ, ăfrăsfărăs tijĕlwen, ănkăḍnăkăḍ imănan tĕzzar, ikfă a-wen-dăɣ iket-net i-inĕṭṭulab-net i-ad-t-uẓanăn jer-ăddinăt. 17Ǝkšăn iket-dăɣ-năsăn har ĕyyĕwănăn, ăsdăwăn-dd a-wa ĕjlăšăn, osăn-t iḍnăy măraw deketăn d-ĕssin n-tijĕlwen d-imănan. 18Ašăl iyyăn, itĕddal Ɣisa Măssinăɣ, ĕllan-t ɣur-s inĕṭṭulab-net, har šik-dăɣ, inn'-asăn: "Ma janna tamĕtte dăɣ-isălan-in, ma janna, mi ămoosăɣ?" 19Ǝnnăn-as: "Iyyăḍ jannen: kăyy a-s Exya wa n-Enĕsselmăɣ, iyyăḍ jannen: kăyy a-s ănnăbi Ɣĕli, iyyăḍ făw a jannen: kăyy iyyăn dăɣ-ănnăbităn wi n-ibda dd-olasăn tanăkra jer-inĕmmuttan." 20Inn'-asăn: "Kăwăneḍ-i-š, ma tĕnnăm, mi ămoosăɣ?" Ăwwežăb-as Bĕṭrus, inn'-as: "Kăyy a-s Ălmasex wa n-Măssinăɣ." 21Ăsmăhăḍ dăɣ-săn Ɣisa, omăr-tăn d-ad-wăr jen isălan-win-dăɣ i-ăwadĕm wăl' iyyăn, 22inn'-asăn: "Ăgg-ăgg-adĕm, ilzam-t ad-inhĕy tersĕmmawen ăjjootnen, ĕnkărăn-t inušămăn wi n-Iṣrayil d-imănokalăn n-kăl-tikutawen d-ălɣulam n-Ăṭṭăwrăt, ĕjĕn iman-net măšan, ašăl wa s-kăraḍ ḍarăt tamăttant-net, ad-dd-inkăr jer-inĕmmuttan." 23Inn'-asăn iket-năsăn ḍarăt-a-wen: "Ere irhăn alkum-hahi-dăɣ, adiš, iksĕnet iman-net, ăjet hak ašăl făll-tamăttant šund ta n-tajĕttewt tĕzzar, ilkĕmet-ahi. 24Wa wărăn itĕttăr ar ĕmmĕk s-ogăẓ iman-net dăɣ-ăddunya-ta-dăɣ, ad-ifut dăɣ-ălžănnăt, măšan, wa irḍăn ăfota dăɣ-iman-net dăɣ-ăddunya-ta-dăɣ, dăɣ-ăddimmăt-in, ad-iɣlĕs. 25Ma s-infa ăgg-adĕm ad-irbăx ăddunya iket-dăɣ-net, a-s ija a-wen, ăššiiška iman-net, ăfota dăɣ-ălaxărăt? 26Ere hi-ăkrakăḍăn-dăɣ năkk d-măjrăd-in, ad-t-ĕkrukĕḍăɣ năkk-dăɣ i n-Ăgg-ăgg-adĕm ašăl wa d-mad-dd-ăqqĕlăɣ dăɣ-ălxurmăt-in d-ălxurmăt n-Abba d-ănjălosăn wi n-imĕššeddĕjăn. 27Ăsidătteɣ-awăn a-s han-kăwăn ăddinăt ĕbdadnen diha-dăɣ wăr-e iba wăr-ĕnheyăn Tĕmmĕnĕya n-Măssinăɣ." 28Ǝḍḍĕkuḍ n-ĕttam išilan ḍarăt a-s hasăn-ija Ɣisa măjrăd-wĕnnin-dăɣ, ăddew d-Bĕṭrus d-Exya d-Yaqub s-taḍaɣt tiyyăt i-ad-idĕl Măssinăɣ. 29Itĕddal Măssinăɣ dihen-dăɣ a-s data-săn dd-ijjăš ini ăynayăn, iqqăl-dd emăls-net i măllăn-măllăn šund essam. 30A ĕnḍărrăn, ĕssin meddĕn-da-dăɣ dd-falnen išĕnnawăn hasăn-dd-ănfalălnen, ad-tamăjradăn d-Ɣisa. Meddĕn-en-hi, iyyăn ănnăbi Mosa, wa iyyăḍăn ănnăbi Ɣĕli. 31Ănfalălăn-as-dd dăɣ-ălxurmăt, ĕjăn-as isălan n-ĕmmĕk wa s-mad-hin-isĕssiwăḍ ămašal n-Măssinăɣ s-tamăttant-net, dăɣ-Yărussălam. 32A-s ităjj a-wen-dăɣ, ilɣad eḍĕs Bĕṭrus d-imidiwăn-net, ĕnkărăn-dd ɣas, ĕnhăyăn tĕmɣăre n-ălxurmăt n-Ɣisa d-meddĕn wi n-ĕssin dăr-ănnibdăd. 33Ălwăqq wa d-igillĕw Mosa d-Ɣĕli, innă Bĕṭrus i-Ɣisa: "Ălɣalim, ufa ad-nĕzzăɣ ɣas diha-dăɣ, nĕkrĕs kăraḍ ihĕktan: wa-năk, wa n-Mosa d-wa n-Ɣĕli." Wăr-issen Bĕṭrus a ijanna. 34Ijanna a-wen-dăɣ a-s tăn-dd-tĕlsa tele n-tejărăkt tiyyăt, ărmăɣăn. 35Izjăr-dd emăsli tejărăkt-en innăn: "A-wa Rure-ɣ wa n-iyyăn ăsnăfrănăɣ, săjdăt-as!" 36A-s imda măjrăd-ĕnnin-dăɣ, wăr t-illa ere dd-ăqqimăn dihen-dăɣ a săl Ɣisa. Ăssosămăn inĕṭṭulab făll-a-wa ĕnhăyăn dăɣ-išilan-win-dăɣ, wăr t-illa ere dăɣ-jan isălan. 37Ašăl wa ilkămăn i-wen, ălwăqq wa dd-ăzzubbăt Ɣisa d-inĕṭṭulab-net taḍaɣt, tĕlkăḍ-as-dd tamĕtte tăjjeet. 38A ĕnḍărrăn ăhalĕs iyyăn da-dăɣ, iḍkăl emăsli-net, innă: "Ălɣalim, aḍĕn tăhanint i-ara-nin s-ĕnta ɣas a leɣ. 39E-d t-irmăs alšin wa t-ihăn-dăɣ, ad-isaɣărat, itišbărḍil, isakăffaw, isilĕbbuḍ-t, šărnaš dăr-s ibiḍḍĕw, 40ĕttărăɣ dăɣ-inĕṭṭulab-năk ad-dăɣ-s t-ĕkkĕsăn măšan, indăr-asăn." 41Ăwwežăb-asăn, inn'-asăn: "Ya ĕzzurĕyăt-i-dăɣ wărăt tomen s-Măssinăɣ, tănimăšrăy-as, hundăɣ har ĕmme ĕlleɣ jere-wăn, ĕṣbarăɣ-kăwăn?" Innă i-ăhalĕs ḍarăt-a-wen: "Awĕy-ahi-dd rure-k." 42Ikka-dd alyaḍ Ɣisa a-s t-ăssoḍa alšin, ad-itišbărḍil măšan, ăsmăhăḍ Ɣisa făll-alšin, izzăy alyaḍ, ăssoɣăl-t i-ti-s. 43Ăkunăn ăddinăt iket-dăɣ-năsăn făl tĕssĕba n-tĕmɣăre n-ijităn n-Măssinăɣ. Inhăy Ɣisa a-s ăkunăn dăɣ-a-wa ităjj ɣas, innă i-inĕṭṭulab-net: 44"Ǝjjĕšnet isălan-wi-dăɣ timĕẓẓujen-năwăn: Ăgg-ăgg-adĕm, išwar ăttirmăs, ijjĕš ifassăn n-dăgg-adĕm." 45Wăr-ĕjrehăn măjrăd-wen-dăɣ hasăn-ija, ăttunkăl-asăn ălmăɣna-net i-ad-wăr t-jărrăhăn hakd a-wen-dăɣ, ăksuḍăn ad-t-sĕstĕnăn d-ălmăɣna-net. 46Tĕnkăr ḍarăt-a-wen tamɣĕnnant tăṣṣoohet jer-inĕṭṭulab i-ad-ĕlmĕdăn ĕndek dăɣ-săn wa ojărăn. 47Iɣră Ɣisa edăwănne n-ulhawăn-năsăn ɣas, iḍkăl-dd ara iyyăn, ij'-e edes-has, 48inn'-asăn: "Ere ăsbălălăn ara-wa-dăɣ, dăɣ-ăddimmăt-in, năkk a ăsbălăl, ere wa hi-ăsbălălăn, wa hi-dd-ăšmašălăn a ăsbălăl; wa dăɣ-wăn ăsrăsăn iman-net, ĕnta a-s wa ojărăn." 49Issĕstăn-t ănăṭṭalib-net Exya, inn'-as: "Ălɣalim, nĕnhay ăwadĕm iyyăn itakkăsăn alšinăn dăɣ-ăddinăt s-tărna n-isĕm-năk, nĕnn'-as, wăr-itilset, ed wăr hanăɣ-iha s-alkum-hak." 50Inn'-as Ɣisa: "Wăr has-t-tĕgdelăm făl-a-s ere wărăn kăwăn-iknes-dăɣ, a-di, amidi-năwăn." 51Ohăẓăn-dd išilan-wi d-ila Ɣisa s-ad-t-iba, inkăr-dd jer-inĕmmuttan, ăkk išĕnnawăn ɣas, tĕjjăš-dd tărha n-tikawt n-Yărussălam ĕnniyăt-net s-ăṣṣahăt. 52Issĕglă inămmašalăn data-s, ăssok'-en taɣrĕmt tiyyăt n-Sămari i-ad-has-ĕjrĕwăn ehăn dăɣ-ăzzubbăt 53măšan, unjăyăn kăl-taɣrĕmt-ten-dăɣ s-ad-hasăn-imjurĕt, ed ija tamdujt ta n-Yărussălam. 54Inhăy Yaqub d-Exya a-wen ɣas, ĕnnăn-as: "Ălɣalim, wi hi-ăddinăt, ăyy-anăɣ ad-fălla-săn dd-nĕzĕzzubbĕt efew tăn-ilhăsăn." 55Innăḍ-dd săr-săn Ɣisa, ăsnărɣăm fălla-săn, inn'-asăn: "Wăr tĕssenăm a jănnem, 56Ăgg-ăgg-adĕm wăr dd-osa i-ad-ilhĕs ăddinăt, osă-dd i-ad-tăn-iɣlĕs." Okăyăn ḍarăt-a-wen s-taɣrĕmt săl-ten. 57Ǝglan dăɣ-a-wen-dăɣ a-s inn' ăhalĕs iyyăn i-Ɣisa: "E-s tĕkked-dăɣ, ĕlkamăɣ-ak." 58Inn'-as Ɣisa: "Ibăggan lan tihaliwen, igḍaḍ lan iskak măšan, Ăgg-ăgg-adĕm, wăr ila wăla edăgg dăɣ-issĕnsa eɣăf-net." 59Innă Ɣisa i-ăhalĕs iyyăn ḍarăt-a-wen: "Ǝlkĕm-ahi." Inn'-as wa: "Ălɣalim, ăkf'-ahi turhajăt n-ad-ăglăɣ ăẓkăɣ abba-nin, ăqqĕlăɣ-kăy-dd, ĕlkĕmăɣ-ak." 60Inn'-as Ɣisa: "Ăyy inĕmmuttan ad-ĕẓkĕn inĕmmuttan-năsăn, kăyy, ĕglĕw ăj i-ăddinăt isălan n-Tĕmmĕnĕya n-Măssinăɣ." 61Inn'-as iyyăn daɣ: "Ălɣalim, ărheɣ ad-hak-ĕlkĕmăɣ măšan, ăkf'-ahi turhajăt n-ad-ăjăɣ isĕnnăɣlaf d-ăddinăt-in tĕzzar." 62Inn'-as Ɣisa: "Ere issĕntăn azzal wa n-ălxidmăt i-Măssinăɣ tĕzzar, ad-išanăšlam ḍara-s, a-di, wăr-ănhăjja d-Tĕmmĕnĕya n-Măssinăɣ."

will be added

X\