Luqa 8

1Ălliil Ɣisa ḍarăt-a-wen iɣărman d-tidbi ăjjootnen, ixaṭṭăb i-ăddinăt isălan n-ălxer n-Tĕmmĕnĕya n-Măssinăɣ, ăddeewăn dăr-s inĕṭṭulab-net wi n-măraw d-ĕssin 2d-hărăt dăɣ-tiḍeḍen s-tiyyăḍ, ikkas dăɣ-snăt, alšinăn d-tiyyăḍ ăzozăy dăɣ-turhĕnnawen. Tiyyăt dăɣ-snăt, isĕm-net Măryăma ta n-Mulăždalĕyăt, ikkas dăɣ-s ĕnta ĕssa alšinăn, 3tiyyăt isĕm-net Tăxya, ĕnta a-s hănne-s n-Šuza wa ixkămăn făll-inaxdimăn n-ehăn n-ămănokal n-ăkall wa s-isĕm-net Harudĕs, tiyyăt Suzănna d-timidiwen-net tiyyăḍ ăjjootnen, iket-dăɣ-năsnăt, ĕdhalnăt Ɣisa d-inĕṭṭulab s-a-wa ĕṭṭăfnăt. 4Tăddew-dd tamĕtte tăjjeet s-wăr t-illa aɣrĕm wăr dd-fel s-Ɣisa. Issăɣlăy tamĕtte tangalt, inn'-asăn: "Kăla izjăr ănăsdamu iyyăn i-ad-iddumĕt ašĕkrĕš-net. 5Ălwăqq wa d-itidumut, oḍănăt tiblalen tiyyăḍ dăɣ-ăbara, ăfkălfăkălăn-tănăt ăddinăt, ăkkukkăren-tănăt-dd igḍaḍ, ĕkšăn-tănăt. 6Oḍa ašăr iyyăn jer-tihun, diha-dăɣ dd-ăffoqqăt, ad-hin-ăqqur făl iba n-abduj. 7Oḍa ašăr iyyăn dăɣ-tabĕ/n/nĕnt, tĕdwăl-dd fălla-s tabĕ/n/nĕnt, tĕẓmăd-as. 8Ašăr wa iyyăḍăn, oḍa dăɣ-ăkall olaɣăn, idwăl-dd, ikrăš aratăn s-timaḍ." Ija măjrăd-wen-dăɣ ɣas, iḍkăl emăsli-net, innă: "Ere ilăn timĕẓẓujen s-islă-dăɣ, isăjdet." 9Ǝssĕstănăn-t inĕṭṭulab-net ḍarăt-a-wen d-ălmăɣna n-tangalt ta ija. 10Inn'-asăn: "Kăwăneḍ, tĕjrawăm turhajăt n-ujreh n-ĕddăraj wa n-isălan n-Tĕmmĕnĕya n-Măssinăɣ mašăn, ăddinăt wi iyyăḍnen, wăr jen a-wen. 'Ad-ĕswaḍăn, wăr hĕnnĕyăn; sallăn, wăr jărrăhăn.' " 11"Ămăra, tangalt, ălmăɣna-net da: Tiblalen a-s măjrăd n-Măssinăɣ. 12Ăbara wa dăɣ-oḍănăt tiblalen tiyyăḍ, ĕnta a-s ăddinăt-wi sallănen i-măjrăd n-Măssinăɣ, as'-en-dd Iblis, ilbĕy-t-dd dăɣ-ulhawăn-năsăn i-ad-wăr-omenăn s-Măssinăɣ, iɣlĕs-tăn. 13Tihun ti jer-oḍănăt tiblalen tiyyăḍ, ĕntănăteḍ a-s ăddinăt-wi s-e-d ĕslăn i-măjrăd n-Măssinăɣ, ad-ĕhlĕylĕyăn, ăqbĕlăn-t šik, măšan wăr t-tĕyyĕn ikraš ikewăn dăɣ-ulhawăn-năsăn, ad-ĕjĕn ăzzăman ĕnḍărrăn ălmăt ătubăn, măšan afăl ătwăžžurrăben, ad-hin-ĕbbuṭṭĕlăn a-wa s-omănăn. 14Tabă/n/nĕnt ta dăɣ-oḍănăt tiblalen tiyyăḍ, ĕnta a-s ăddinăt wi s-e-d ĕslăn i-măjrăd n-Măssinăɣ, ad-tăn-ăɣlĕbăn inĕzjam n-tărha d-ajmur d-iẓĕjraẓ n-wălăt-ăddunya, ĕẓmĕdăn-as, indăr-asăn ad-ĕhĕlĕn s-data dăɣ-tuksĕḍa-năsăn i-Măssinăɣ. 15Ăkall wa olăɣăn dăɣ-oḍănăt tiblalen tiyyăḍ, olăh d-ăddinăt-wi s-e-d ĕslăn i-măjrăd n-Măssinăɣ, ad-t-ĕknĕn uḍĕf s-sărho dăɣ-ulhawăn-năsăn, ad-hasăn-t-ijjĕš ălfăyda ăddewăn d-akuyĕd." 16Inn'-asăn Ɣisa daɣ: "Wăr t-illa ere isarmasăn tefătelt tĕzzar, isĕbbumbĕy fălla-s ăkoss meɣ tăt-ija daw-tešejit, ănn-ak, asili a tăt-itajj făll-ăsaḍĕf ăsikakăn i-ad-hannăyăn ăddinăt wi dd-tajjăšnen ehăn ănnur-net. 17Wăr t-illa a iffarăn s-wădden ad-dd-infilĕl, wăr t-tĕlla daɣ takše s-wădden ad-dd-tĕffukkăr s-tarăhut. 18Ăjăt ĕnniyăt i-ĕmmĕk wa s-sajadăm; ăwadĕm wa ifhămăn hărăt, ad-has-iwwaḍ musnăt har isĕssikĕy măšan, wa s-wăr t-illa a ijrah, wăr t-in-ikka hărăt, ănn-ak, ad-dăɣ-s ămahăɣ wăla a-wa s-orda a-s iṭṭaf-t." 19Tosă-dd anna n-Ɣisa d-ayĕtma-s măšan, igdăl-asăn ĕjut n-tamĕtte ad-t-ĕnhĕyăn. 20Ătwănn'-as: "Tĕbdad anna-năk d-ayĕtma-k dat-emm n-ehăn, ărhan ahănay-năk." 21Ăwwežăb-asăn, inn'-asăn: "Anna-nin d-ayĕtma-ɣ, ăddinăt-wi sajadnen i-măjrăd n-Măssinăɣ, tamašalăn a-wa inna." 22Ijjăš Ɣisa ašăl iyyăn turăft n-aman ĕnta d-inĕṭṭulab-net, inn'-asăn: "Nĕjlĕyet ejănš s-ašrut wa iyyăḍăn", ĕglăn. 23Ǝglan făll-aman-en-dăɣ a-s hin-iṭṭăs Ɣisa. A ĕnḍărrăn, inkăr-dd aḍu-i-dăɣ ăṣṣoohen, ad-ḍakkăr turăft aman, ĕjjăšăn miši. 24Ohăẓăn-dd inĕṭṭulab Ɣisa, ad-t-sănkarăn dăɣ-eḍĕs, jannen-as: "Ălɣalim, Ălɣalim, nĕhlăk!" Inkăr-dd Ɣisa, ăsmăhăḍ făll-aḍu d-tinăzzămăren ti ăṣṣoohătnen, ibdăd a-wen-dăɣ iket-net, sămmeḍ-in. 25Inn'-asăn Ɣisa: "Ma ija immun-năwăn." Ǝqqălăn-dd ɣas ărmaɣăn, oran imawăn, tinmĕnnin: "Ma ămoos ăwadĕm-wa-dăɣ s-e-d omăr i-aḍu d-aman ad-has-sĕjdĕn?" 26Ăsjănăn ḍarăt-a-wen dăɣ-ăkall wa n-kăl-Gadara ănimăswăḍăn d-teje ta n-Galila. 27Diha-dăɣ dd-izjăr Ɣisa turăft n-aman, ad-has-dd-ilkăḍ ăhalĕs n-aɣrĕm-en-dăɣ han alšinăn. A ilan ăzzăman, wăr-ilĕss tikĕst, wăr-il' edăgg n-iman-net, izzaɣ tiẓĕska. 28Inhăy Ɣisa ɣas, ăsɣărăt tĕzzar, irkăɣ data-s, inn'-as: "Ya Ɣisa wa n-Rure-s n-Măssinăɣ wa iknăn aḍkul, ma dăɣ-i tărhed? Dalăɣ-kăy d-ad-wăr hi-tăqquzzăbed." 29A-s ijănna a-wen-dăɣ, isamăhaḍ Ɣisa făll-alšin wa t-ihăn, i-ad-t-izjăr. Ăhalĕs-en, itajjăš-t alšin s-e-d t-ijjăš, akărad ad-t-tajjăn ăddinăt s-tišĕm d-tifren măšan, isaɣătas-dd a-wen-dăɣ iket-net, ăzzăwăt-t alšin s-tinariwen. 30Issĕstăn-t Ɣisa, inn'-as: "Mi isĕm-năk?" Inn'-as amălšon: "Isĕm-in ejhăn", ed alšinăn ăjjootnen a t-hanen. 31Ad-laqqădăn alšinăn-wi t-hănen Ɣisa i-ad-wăr tăn-ăssoka anu wa wărăn il' ider ihăn ălaxărăt. 32Iḍan dihen ehăre n-ĕlxĕnžărăn făll-tasăja n-taḍaɣt, ĕlɣădăn alšinăn Ɣisa i-ad-tăn-ăyy ad-ĕjjĕšăn ĕlxĕnžărăn-en-dăɣ, irḍ'-asăn s-a-wen. 33Ǝzjărăn alšinăn ăhalĕs, ĕjjăšăn ĕlxĕnžărăn, ad-dd-titrĕktĕrikăn wa-dăɣ n-afălla n-taḍaɣt, tiḍĕwăn dăɣ-ejărew wa sĕmmăn, tattăn-tăn aman. 34Ǝnhăyăn imăḍanăn-năsăn a-wa ijăn ɣas, ăjewăḍăn, jăn isălan dăɣ-kăl-aɣrĕm d-attayăn-net. 35Osăn-dd ăddinăt ăwinafătnen a-wa ijăn, ogăẓăn-dd ăhalĕs wa dăɣ-ikkăs Ɣisa alšinăn, ăqqiima edes i-iḍarăn n-Ɣisa, ijă isĕlsa, h'-e daɣ tijya n-iman-net; ărmăɣăn. 36Jăn dăɣ-săn ăddinăt wi ăjjĕyhnen i-a-wa ijăn isălan n-ĕmmĕk wa s-dd-iɣlăs amălšon dăɣ-alšinăn wi t-ĕzzăɣnen. 37Măšan, ĕjjăšăn-tăn isălan n-a-wa ijăn ɣas, ad-tattărăn kăl-Gadara dăɣ-Ɣisa ad-ifĕl ăkall-năsăn făll-tarĕmmeɣt-i-dăɣ jăn. Ijjăš Ɣisa turăft n-aman, iqqăl. 38Ittăr dăɣ-s ăhalĕs wa dăɣ-ikkăs alšinăn ad-t-ăyy ad-dăr-s idaw măšan, inn'-as Ɣisa: 39"Ǝqqĕl ehăn-năk, tăllăɣed i-ăddinăt tĕmɣăre n-a-wa hak-ija Măssinăɣ". Iglă ḍarăt-a-wen, ad-isanăfas dăɣ-aɣrĕm iket-net tĕmɣăre n-a-wa has-ija Ɣisa. 40Ălwăqq wa dd-iqqăl Ɣisa ašrut n-ejănš wa iyyăḍăn, tĕlkăḍ-as-dd tamĕtte has-tăqqalăt. 41A ĕnḍărrăn ăhalĕs iyyăn da-dăɣ s-isĕm-net Žayrus, ĕnta a-s ălfăqqi n-ehăn n-ăddin wa n-kăl-Ălyăhud n-taɣrĕmt-en; irkăɣ dat-Ɣisa, ad-dăɣ-s itattăr ad-idawăn s-ehăn-net, 42făl-a-s itiba elle-s lat marăw iwĕtyan d-ĕssin s-ĕnta ɣas a ila. Ăddeew dăr-s s-ehăn-net dăɣ-a-s t-tăɣilăyɣălăy tamĕtte siha hakd siha. 43Tamĕtte-en, h'-et tamăḍt izajjăr ašni a ilan măraw iwĕtyan d-ĕssin, wăr t-illa lăxtur wăr tosa măšan, ăbă-dd i tăt-ăzozăyăn. 44Tĕkkă-dd ḍarăt Ɣisa, ḍăs afăr n-erăswăy-net, iktăl ašni wa tăt-dd-izajjărăn ălwăqq-wen-dăɣ. 45Innă Ɣisa: "Ma ămoos ăwadĕm wa hi-iḍăsăn?" Wăr t-illa ere innan hărăt. Iggăd-dd Bĕṭrus, inn'-as: "Ălɣalim, tăsinăkmăm-kăy tamĕtte tăjjeet dăɣ-ifăyyăn iket-năsăn." 46Inn'-asăn Ɣisa: "Iḍăs-ahi ăwadĕm iyyăn făl-a-s, ofrayăɣ i-tărna ta hi-dd-tĕjmăḍăt." 47Tĕlmăd tamăḍt a-s tăffukkăr-dd ɣas, tĕkkă-dd Ɣisa tăšikăḍkăḍ, tărkăɣ data-s, tĕllăɣăt-as dat-ăddinăt iket-năsăn ăddălil wa făl ḍăs afăr n-erăswăy-net d-ĕmmĕk wa s-tĕzzăy ălwăqq-wen-dăɣ. 48Inn'-as Ɣisa: "Talyaḍt-in, ăzozăy-kăm immun-năm, ĕglĕw dăɣ-ălxer." 49Ămmiijrăd Ɣisa dihen-dăɣ a-s dd-osa ăhalĕs dd-ifalăn eɣewĕn n-ălfăqqi n-ehăn wa n-ăddin, inn'-as: "Elle-k, ăba-tăt, wăr tăslăyyăɣăd ălɣalim daɣ." 50Islă Ɣisa i-isălan wi dd-ăssawăḍ ăhalĕs-en ɣas, innă i-Žayrus: "Wăr kăy-isărmaɣet hărăt, amĕn ɣas, ad-tĕzzĕy." 51Iwwăḍ-in Ɣisa ehăn n-Žayrus ɣas, igdăl i-ăddinăt ad-t-ĕjjĕšăn, wăr-ăddew ar d-Bĕṭrus d-Exya d-Yaqub d-ti-s d-ma-s n-talyaḍt. 52A-s ităjj a-wen-dăɣ, tăsikălăl tamĕtte iket-dăɣ-net, hall iba n-talyaḍt măšan, inn'-asăn Ɣisa: "Wăr tĕlhem ed talyaḍt, wăr tăt-ăba, eḍĕs ɣas a ja." 53Jăn-t tekăškăšt ed ĕkkasăn ăššăk a-s ăba-tăt. 54Ijjăš Ɣisa edăgg wa dăɣ-tĕnsa talyaḍt, irmăs-tăt-dd s-ăfuss, iɣr'-et, inn'-as: "Talyaḍt, ĕnkăr-dd!" 55Ǝqqălăn-tăt-dd iman-net, tĕbdăd-dd s-iyyăt, omăr-tăn d-ad-tăt-ĕkfĕn a tĕkša. 56Ǝqqălăn-dd imărawăn-net ɣas tof'-en tăkunt. Ăsmătăr-tăn Ɣisa d-ad-wăr jen isălan n-a-wa ijăn dăɣ-ăwadĕm wăl' iyyăn.

will be added

X\