Luqa 7

1Issĕsla Ɣisa isălan-win-dăɣ i-tamĕtte ɣas, ijjăš aɣrĕm wa n-Qăfărnaxum. 2Ill'-e dihen kăbtăn ilan akli ikna tărha-i s-a-s ităjj a-wen-dăɣ ija turhĕnna ta-dăɣ s-išwar hin-ăssijja. 3Islă kăbtăn a-s dd-ijjaš Ɣisa ăkall ɣas, ăšmašăl săr-s hărăt dăɣ-inušămăn n-kăl-Ălyăhud i-ad-dăɣ-s ĕttărăn ad-dd-ass, izuzĕy akli-net. 4Osăn-dd kăl-Ălyăhud Ɣisa, dălăn-t dăɣ-ad-t-izuzĕy, ĕnnăn-as: "Ăhalĕs-i-dăɣ, ăniihăjja s-ad-has-tĕkkĕsăd tekăriḍt, 5irha tumast-nănăɣ hullan, ĕnta a hanăɣ-issĕkrăsăn ehăn n-ăddin wa nĕla." 6Ăddew dăr-săn Ɣisa. Wăr-ujĕj a-s has-dd-ĕlkăḍăn imidiwăn n-kăbtăn dd-ăšimašăl, ĕnnăn-as: Inn'-ak kăbtăn: "Ălɣalim! Wăr tăslăyyăɣăd iman-năk făl-a-s, wăr-ănhăjjăɣ d-ad-dd-tĕjjĕšăd ehăn-in, 7a-wen-dăɣ daɣ a făl wăr-ăsnăhăjjăɣ iman-in d-ad-kăy-in-ăkkăɣ, ănn tiyyăt tăfert, ad-izzĕy ănaxdim-in. 8Năkk, ĕllan-t imănokalăn jĕnnĕj-i, leɣ daɣ năkk ĕssărdusa daw-i t-ĕllanen, e-d ĕnnĕɣ i-iyyăn: 'Ǝglĕw', ad-iglĕw, e-d ĕnnĕɣ i-wa iyyăḍăn: 'Ǝyyăw', ad-hi-dd-ass; akli-nin daɣ, e-d has-ĕnneɣ: 'Ăj a-wa', ad-t-ăj." 9Islă Ɣisa i-a-wen ɣas, ijrăẓ-as kăbtăn, innăḍ-dd s-ăddinăt wi has-ĕlkămnen, inn'-asăn: "Ăsidătteɣ-awăn a-s wăla dăɣ-ăkall wa n-Iṣrayil, wăr kăla ĕnhăyăɣ ere s-ogdăh immun-net d-wa n-ăhalĕs-i-dăɣ." 10Ǝqqălăn meddĕn-wi dd-ămešălnen, ogăẓăn-in akli wa s-kăla ărhin, izzay. 11Ašăl wa n-ḍarăt wen, ăddew Ɣisa d-inĕṭṭulab-net s-taɣrĕmt s-isĕm-net Nayin, tĕlkam-asăn daɣ tamĕtte tăjjeet. 12Diha-dăɣ dd-ĕjjăšăn aɣrĕm, ad-ămmoqqăsăn d-ăddinăt ăwwăḍnen hărăt ăwwaynen enĕmmettĕn s-tiẓĕska; enĕmmettĕn-en, alyaḍ s-wăr tĕla ma-s ar ĕnta, ti-s daɣ wăr-idder. 13Ojjă Ɣisa tamăḍt-ten-dăɣ, tănɣ'-e tăhanint-net, inn'-as: "Ǝlɣĕn Iblis." 14Ikkă-dd enĕmmettĕn, iḍăs-t, ĕbdădăn ăddinăt-wi t-ămisawăynen, innă i-enĕmmettĕn: "Ămawaḍ, ĕnneɣ-ak: ĕnkăr!" 15Ăqqimă-dd enĕmmettĕn ăssaɣăt-wen-dăɣ, ad-itamăjrad, ăssoɣăl-t Ɣisa i-ma-s. 16Ărmăɣăn ăddinăt iket-năsăn, ad-tiimĕlĕn Măssinăɣ, jannen: "Ašăl-i, ănfalăl-dd ănnăbi măqqoorăn jere-năɣ, Măssinăɣ osă-dd tamĕtte-net i-ad-tăt-iɣlĕs." 17Ămsaɣăl măjrăd-wen-dăɣ ătwănnăn făll-Ɣisa dăɣ-Ălyăhudĕyăt d-attayăn-net. 18Osăn-dd inĕṭṭulab n-Exya, jăn dăɣ-s isălan n-a-wa ijăn iket-dăɣ-net. 19Iɣră-dd dăɣ-săn ĕssin, ăšmašăl-tăn s-ălɣalim i-ad-t-sĕstĕnăn kunta ĕnta a-s Wa s-ătwănna ilkam ad-dd-ass meɣ ilkam iyyăn săl ĕnta. 20Osăn-dd meddĕn, ĕnnăn-as: "Exya wa n-Enĕsselmăɣ a hanăɣ-dd-ăšmašălăn săr-k, inn'-anăɣ ad-kăy-nĕsĕstĕn, 'kunta kăyy a-s Wa s-ătwănna ilkam ad-dd-tasĕd meɣ ilkam ere săl kăyy?' " 21Ăssaɣăt-wen-dăɣ t-sastanăn, ăzozăy Ɣisa ăddinăt ăjjootnen dăɣ-tiẓẓoren d-alšinăn, ikfa daɣ imĕddorɣal ăjjootnen turhajăt n-ahănay. 22Ăwwežăb i-meddĕn wi dd-ăšmašăl Exya, inn'-asăn: "Ăqqĕlăt Exya, suɣĕlăm-as a-wa tĕnhăyăm d-a-wa tĕslăm, ănnăt-as: imĕddorɣal hannăyăn, inĕbdan rajjăšăn; wi ijraw jĕri, tišdajăn, imẓaj, sallăn; inĕmmuttan nakkărăn-dd; tilăqqiwen, sallănăt i-Ălĕnžil. 23Tĕnḍĕḍ i-ere wa dăɣ-i wărăn ij' ăššăk." 24Ǝglăn inămmašalăn n-Exya ɣas, ădwănnăt Ɣisa i-tamĕtte dăɣ-isălan n-Exya, inn'-asăn: "Ak, a-s tĕzjărăm s-tenere, ma tĕnhăyăm? Ak teẓewt ăsiwălawăl aḍu a tĕnhăyăm? Ăbo! 25Adiš ma tĕkkăm i-ad-t-tĕnhĕyăm? Ak ăhalĕs ăsisahăɣăn ašăl a tĕnhăyăm? Ǝnhĕywăt-tăn-ak ăddinăt-wi sasahaɣnen ašăl, ĕntăneḍ-den ănnuflăynen dăɣ-ihănan-wi n-imănokalăn. 26Adiš mi tĕkkăm i-ad-t-tĕnhĕyăm? Ak ănnăbi? Tidĕt lab a-s ănnăbi, ăssiilmădăɣ-kăwăn a-s ere ojărăn tumast n-ănnăbi a tĕnhăyăm. 27Exya, ĕnta-en-dăɣ a făl inna ĕlkĕttab n-Măssinăɣ: 'Ǝnhĕy! Ăzizărăɣ-ak ănămmašul-in wa he-iknĕn tabarăt data-k.' 28Ăssiilmădăɣ-kăwăn a-s, wăr t-illa ara n-tamăḍt ojărăn Exya măšan, hakd a-wen-dăɣ, wăr t-illa ere t-wărăn ojer dăɣ-Tĕmmĕnĕya n-Măssinăɣ." 29Ăddinăt-wi has-ĕslănen iket-năsăn hakd-dăɣ inarmasăn n-tiwse ărḍăn s-Tĕmmĕnĕya n-Măssinăɣ ed, ăqbălăn ad-tăn-isĕlmăɣ Exya 30măšan, kăl-faris d-ălɣulam-i unjăynen s-asĕlmaɣ-net, ăsfatăn iman-năsăn dăɣ-a-wa iɣtăs Măssinăɣ. 31Innă Ɣisa: "Ak, mi dăr-mad-sĕnnĕfăqqăɣ kăl-ĕzzurĕyăt-ta-dăɣ? Ak, mi dăr-olăhăn? 32Olăhăn ɣas d-aratăn janen aɣrĕf dăɣ-tĕfărre, jannen iyyăḍ i-wi iyyăḍnen: 'Ǝnhĕywăt, kăwăneḍ, wăr lem asăfar; nĕwăt-awăn taɣănibt, tunjăyăm s-dăllol! Nĕnẓăr-awăn tiswal n-tisnant măšan, wăr tĕlhem!' 33Exya wa n-Enĕsselmăɣ, ăzzăman wa dd-osa, wăr-itĕtt imĕnsiwăn olaɣnen, wăr-isĕss aman n-lăɣnăb ăxxiimmărnen; tĕnnăm: 'Ih'-e alšin', 34išrăy-t-dd Ăgg-ăgg-adĕm, ĕnta itihar dăr-wăn a-wa tăttăm d-a-wa săssăm, ɣas tĕnnăm dăɣ-s: 'Wa ĕnta, insăy, irăf aman wi n-lăɣnăb ăxxiimmărnen, amidi n-inarmasăn n-tiwse d-ălfusaɣ wi iyyăḍnen.' 35Măšan a-wen wăr hin-ikkes a-s: 'Sărho wa dd-ifălăn Măssinăɣ, ijităn n-aratăn-net a t-isatbatăn.' " 36Ămjarăt-dd Ɣisa ašăl iyyăn i-u-faris iyyăn, ikk'-e-hi-dd, ad-tamănsawăn. 37Tĕsla tamăḍt n-tanăsbăkkaḍt hat aɣrĕm-en-dăɣ a-s Ɣisa ămijarăt i-u-faris-en ɣas, a ĕnḍărrăn, ĕnta da-dăɣ tăwway butĕl n-aḍutăn. 38Tosă-dd, tĕjjăš fălla-săn ehăn wa dăɣ-tamănsawăn, tĕkka dihad ăsiɣămăr Ɣisa, măl daw-iḍarăn-net, ad-hall. Hall har tĕssĕbdăj iḍarăn-net s-imeṭṭawăn-net, ad-tăn-timĕs s-tišĕkkaḍ-net, timĕllut-asăn, sănɣal fălla-săn aḍutăn. 39Inhăy u-faris wa dd-ăsmăjaren Ɣisa a-wen ɣas, ad-ijanna dăɣ-iman-net: "Ǝnnăr ămoos ăhalĕs-i-dăɣ ănnăbi, ilmĕd a-s tamăḍt-ta-dăɣ t-tĕḍasăt, tălkăxbat." 40Inn'-as Ɣisa: "Simyon, ărheɣ ad-hak-ănnăɣ hărăt iyyăn." Inn'-as Simyon: "Ălɣalim, ăsijădăɣ-ak, măjrăd." 41Inn'-as Ɣisa: "Kăla t-illa ăhalĕs irwasăn ĕssin meddĕn: iyyăn, irwas-t sĕmmosăt timaḍ n-ărriyal n-aẓrĕf, wa iyyăḍăn, irwas-t, sĕmmosăt timĕrwen n-ărriyal n-aẓrĕf. 42Inhăy a-s wăr tăn-iha-i ăddooben timẓal n-ehăre-net, ma n-ĕmmĕk ɣas, inš'-asăn-in a-wa tăn-irwăs. Ăssistănăɣ-kăy kăyy Simyon: 'Ǝndek dăɣ-săn wa has-madăn-ikĕn tămayit?' " 43Inn'-as Simyon: "Ordeɣ a-s wa s-hin-oyyă ămarwas wa ojărăn." Inn'-as Ɣisa: "Toɣadăd." 44Innăḍ-dd Ɣisa ḍarăt-a-wen s-tamăḍt tĕzzar, innă i-Simyon: "Wădden hannăyăd tamăḍt-ta-dăɣ, ĕjjăšăɣ-dd ehăn-năk, wăr hi-tĕkfed aman s-ăsserădăɣ iḍarăn-in măšan ĕnta, tĕssĕbdăj-tăn s-imeṭṭawăn-net, tomăs-tăn s-tišĕkkaḍ-net, 45ălwăqq wa dd-oseɣ ehăn-năk, wăr hi-dd-tĕlkeḍăd, tasĕsăd-ahi dăɣ-idmarăn-năk măšan ĕnta, a dd-oseɣ, timĕllut i-iḍarăn-in făll-semɣar-i-dăɣ hi-tĕja. 46Kăyy daɣ, wăr tĕšweyăd eɣăf-in, a-s ija a-wen ĕnta, iḍarăn-in a tĕšwăy s-aḍutăn. 47Dăɣ-tĕssĕba n-tărha-i-dăɣ măqqărăt hi-tĕssĕkna, a-wa ăjjen la dăɣ-ibăkkaḍăn, ătiwănšăn-as-in. Tidĕt-dăɣ a-s ere wa s-hin-ătwănša a ĕnḍărrăn, tămayit-net daɣ ti-ĕnḍărrăt." 48Inna Ɣisa ḍarăt-a-wen i-tamăḍt: "Ibăkkaḍăn-am, ătiwănšănăm-in." 49Ǝslăn imăjarăn i-a-wen-dăɣ ɣas, ad-jannen dăɣ-iman-năsăn: "Ma ămoos ăwadĕm wa ăddooben tenăšše n-ibăkkaḍăn n-ăddinăt?" 50Innă Ɣisa i-tamăḍt ḍarăt-a-wen: "Immun-năm a kăm-iɣlăsăn, ĕglĕw dăɣ-ălxer."

will be added

X\