Luqa 6

1Ašăl iyyăn n-ĕssĕbĕt-i n-ašăl wa n-tăsonfat, ălliil Ɣisa išĕkraš n-ălkăma, ĕlkamăn-as inĕṭṭulab-net, nakkăḍăn tiɣăɣănen n-ălkăma, tifĕffĕrun-tănăt jer-ifassăn-năsăn, taffăẓăn tiblalen-ti tănăt-dd-zajjărnen. 2Ǝggădăn-dd hărăt dăɣ-kăl-faris tăn-hannăynen, ĕnnăn-asăn: "Mafăl tajjăm a wărăn itĕtwĕjj dăɣ-ašăl wa n-ĕssĕbĕt-i n-tăsonfat?" 3Ăwwežăb-asăn Ɣisa, inn'-asăn: "Adiš kăwăneḍ, wăr tăɣrem dăɣ-ĕlkĕttab a-wa ija Dawĕd ašăl wa d-ălluẓ ĕnta d-ejhăn-net? 4Wădden ătwănnă, ijjăš ehăn n-Măssinăɣ, iḍkăl dăɣ-tijĕlwen ti n-tikutawen s-wăr t-illa ere s-xălal tetăte-năsnăt săl kăl-tikutawen măšan, ĕnta, ikš'-enăt, ikfă dăɣ-snăt daɣ imidiwăn-net wi dăr-ăddew." 5Inn'-asăn Ɣisa ḍarăt-a-wen: "Ăgg-ăgg-adĕm a ănnihăḍăn dăɣ-a-wa s-ila ăgg-adĕm d-a-wa s-wăr ila s-ad-t-ăj dăɣ-ašăl wa n-ĕssĕbĕt-i n-tăsonfat." 6Iqqăl-dd ĕssĕbĕt-i n-ašăl wa n-tăsonfat ɣas, ijjăš Ɣisa ehăn n-ăddin wa n-kăl-Ălyăhud ad-dăɣ-s isaɣra. Ehăn-en, ih'-e ăhalĕs s-ăqqur ăfuss-net wa n-aɣil. 7Jan-as ălɣulam n-Ăṭṭăwrăt d-kăl-faris ĕnniyăt, tassănăn ihăl ad-t-izuzĕy dăɣ-ašăl wa n-ĕssĕbĕt-i n-tăsonfat meɣ i-ad-t-sĕḍlĕmăn. 8Ilmăd Ɣisa ɣur-iman-net a-wa dăɣ-zinĕzjumăn, innă i-ăhalĕs wa s-ăqqur ăfuss-net: "Ǝyyăw, ĕbdĕd dăɣ-ammas n-ălžămaɣăt." Inkăr-dd ăhalĕs, ibdăd diha s-has-innă. 9Inn'-asăn Ɣisa ḍarăt-a-wen: "Ăssiistănăɣ-kăwăn: Ak a xălalăn dăɣ-ašăl wa n-ĕssĕbĕt-i n-tăsonfat iji n-emărked meɣ iji n-a lăbasăn, igguẓ n-iman meɣ iji n-iman?" 10Issăɣlăy-tăn-dd Ɣisa asăwaḍ-net iket-dăɣ-năsăn tĕzzar, innă i-ăhalĕs: "Ǝẓẓĕl ăfuss-năk." Ija a-wa has-innă, izzăy ăfuss-net ălwăqq-wen-dăɣ. 11Ija a-wen ɣas, wăsăn kăl-ăddin, ănmănhăyăn jer-iman-năsăn dăɣ-isălan n-a-wa he-ĕjĕn i-Ɣisa. 12Išilan-win-dăɣ ad-iwwăn Ɣisa taḍaɣt, ikkăs dihen ehăḍ imdan, itĕddal Măssinăɣ. 13Ăffăw ɣas, iɣră-dd inĕṭṭulab-net, ăsnăfrăn dăɣ-săn măraw d-ĕssin, ăswăr-tăn isĕm inĕmmušal. 14Ǝntăneḍ da inĕṭṭulab-wi ăsnăfrăn: Simyon wa s-ija isĕm Bĕṭrus d-ă/n/na-s Idris; Yaqub d-Exya, Fĕlibb d-Bărtălămma, 15Mătti d-Tomi; Yaqub wa n-ăgg Ălfa d-Simyon wa s-itawănna ăššažeɣ, 16Hudd ăgg Yaqub d-Yăhudĕs wa n-Isxaryut-i ămoosăn ămaɣdar. 17Ăzzubbăt-dd Ɣisa taḍaɣt ḍarăt-a-wen ĕnta d-inĕṭṭulab-net, ătrarăn-dd făll-eɣărɣăr dăɣ-tĕbdad tamĕtte tăjjeet d-ăddinăt ăjjootnen dd-falnen Ălyăhudĕyăt d-Yărussălam d-iɣărman wi n-Tir d-Săyda hănen asălim n-ejănš. 18Ăddinăt-en-dăɣ, osăn-dd iket-dăɣ-năsăn i-ad-sĕjdĕn i-a-wa isaɣra, ĕzzĕyăn dăɣ-turhĕnnawen-năsăn, ĕjrĕwăn dăɣ-săn wi hăn alšinăn iman-năsăn. 19Tattăr taxlĕkt-ten-dăɣ iket-net ad-t-tĕḍĕs ed zajjăr-t-dd tărna tăn-zizuyăt iket-dăɣ-năsăn. 20Iswăḍ Ɣisa dăɣ-inĕṭṭulab-net, innă: "Tĕnḍĕḍ-awăn kăwăneḍ-i ăẓoẓnen iman-năwăn dat-Măssinăɣ ed, Tĕmmĕnĕya n-Măssinăɣ, ti-năwăn. 21Tĕnḍĕḍ-awăn kăwăneḍ-i inăqq laẓ ašăl-i-dăɣ ed, ad-tăyyăwănăm; tĕnḍĕḍ-awăn kăwăneḍ-i hallănen ašăl-i-dăɣ ed, ad-tăddăwem. 22Tĕnḍĕḍ-awăn afăl dăr-wăn okăḍăn dăgg-adĕm, afăl kăwăn-ĕkkăsăn jer-iman-năsăn; afăl kăwăn-gaggărăn; afăl ĕttărăn uɣšad n-ismawăn-năwăn dăɣ-ăddimmăt n-Ăgg-ăgg-adĕm. 23Dăwătăt, talĕwĕm dăɣ-ašăl-wen-dăɣ făl-a-s ad-ijat marušăt-năwăn dăɣ-ălžănnăt; erk ălxal-wen-dăɣ hawăn-han ašăl-i-dăɣ, a ĕjjăšăn abbatăn-năsăn i-ănnăbităn." 24"Imĕskay kăwăneḍ-i n-imărrĕzăɣăn ed, ălxer-năwăn, ih' ifassăn-năwăn. 25Imĕskay kăwăneḍ-i n-imăyyăwănăn n-ašăl-i-dăɣ ed, ad-tulaẓăm. Imĕskay kăwăneḍ-i daẓẓănen ašăl-i-dăɣ ed, ad-tĕṭṭĕfăm iba, tĕlhĕm. 26Imĕskay kăwăneḍ-i timĕlĕn ăddinăt ed, ălxal-wen-dăɣ a ĕjjăšăn abbatăn-năsăn i-ănnăbităn wi n-bahu n-ibda." 27"Kăwăneḍ-i hi-ăsijădnen, ĕnneɣ-awăn: Ărhăt išĕnja-năwăn, ăjăt a olaɣăn i-ăddinăt-wi dăr-wăn okăḍnen, 28ăjăt ălhimmăt i-wi hawăn-ărhanen a lăbasăn, ădĕlăt Măssinăɣ i-wi fălla-wăn jannănen bahu. 29Afăl hak-istăɣ ăwadĕm făll-tăjomăst-năk tiyyăt, sĕgdĕl-as daɣ ta iyyăḍăt; afăl irmăs ăwadĕm tanăkkăbbat-năk, ăkf'-e daɣ anăkăbba-năk. 30Ere kăy-idălăn-dăɣ, ăkf'-e; wăr tĕtterăd dăɣ-ăwadĕm ad-hak-isuɣĕl a-wa dăɣ-k irmăs. 31A-wa s-tărhăm, ad-hawăn-t tajjăn ăddinăt, ăjăt-asăn-t kăwăneḍ-dăɣ. 32Afăl wăr tărhem ar imărhan-năwăn, ĕndek marušăt-năwăn? Wădden, inăsbăkkaḍăn-dăɣ, ărhan ăddinăt wi tăn-ărhanen. 33Afăl wăr tĕjjĕm a olaɣăn ar i-wi hawăn-t-tajjănen, ĕndek irhuj-năwăn? Wădden, wăl' inăsbăkkaḍăn, a-wen, tajjăn-t. 34Afăl daɣ wăr sĕmĕrwisăm ar i-ăddinăt wi dăɣ-tordăm timẓal, ĕndek marušăt wa s-mad-tĕjrĕm ăṭṭăma-net? Wădden, inăsbăkkaḍăn-dăɣ, samărwasăn i-imidiwăn-năsăn ed, ordan ɣur-săn azăbăna. 35Ărhăt išĕnja-năwăn, tajjăt-asăn a olaɣăn; sĕmmĕrwĕsăt i-ere dăɣ-wăr jerăm ăṭṭăma n-timẓal. Dihen, ad-ijat marušăt-năwăn, tumasăm aratăn n-Măssinăɣ wa iknan aḍkul ed, ĕnta, milɣaw-net, wăr săr-s iẓley wi wăr ha tămayit hakd-dăɣ wi n-inăllăbăsăn. 36Tĕjjĕšet-kăwăn tĕmɣăre n-tăhanint ta hăt Abba-năwăn. 37Afăl wăr tĕnnem dăɣ-ăwadĕm, wăr mad-dăɣ-wăn ănn ăwadĕm, afăl wăr tĕssĕḍlămăm ăwadĕm, wăr kăwăn-e-isĕḍlĕm ăwadĕm, naššăt i-ad-tĕjrĕwăm tenăšše. 38Ăkfăt, ad-tĕjrĕwăm; ere wa ihakkăn, ad-ijrĕw a ăjjeen dăɣ-asĕbbĕtăr-net ed, ilkam ad-hanăɣ-ikĕt Măssinăɣ isuf-net s-ĕmmĕk wa s-nĕtĕkkat isuf-nănăɣ i-ăddinăt." 39Issăɣlăy-tăn-dd Ɣisa tangalt dăɣ-hasăn-inna: "Ajăn emĕdderɣĕl ăddoobăt ad-ilwĕy emĕdderɣĕl? Wădden, ad-iḍwĕn issĕnăn-essăn dăɣ-anu? 40Wăr t-illa ănăṭṭalib ojărăn ălɣalim-net măšan, ănăṭṭalib iket-net iɣradăn, ad-alăh d-ălɣalim-net. 41Uhĕn kăyy, mafăl hannăyăd teẓewt ta hăt tiṭṭ n-ă/n/na-k, a-s ija a-wen, wăr hĕnnĕyăd afăɣot wa ihăn tiṭṭ ta-năk? 42Meɣ daɣ, ĕndek ĕmmĕk wa s-mad-tĕnnĕd i-ă/n/na-k: 'Ăyy-ahi ad-hak-ĕkkĕsăɣ teẓewt dăɣ-tiṭṭ-năk', a-s ija a-wen, kăyy iman-năk, iha afăɣot tiṭṭ ta-năk. Ălmunafeɣ! Ǝkkĕs-in afăɣot wa ihăn tiṭṭ-năk tĕzzar i-ad-tudabed ahănay d-ukĕs n-teẓewt ta hăt tiṭṭ n-ă/n/na-k." 43"Wăr t-illa ahĕšk olaɣăn itiirĕwĕn aratăn lăbasnen, wăr t-illa daɣ erk ahĕšk itiirĕwĕn aratăn olaɣnen. 44Hak ahĕšk-dăɣ aratăn-net a-s ititwĕzziy. Wăr mad-dd-tĕkkĕsăd ara n-ašar făll-ewărwăr, wăr mad-tĕkkĕsăd daɣ lăɣnăb făll-tahĕjjart. 45Ăwadĕm-wa olăɣăn, milɣaw n-ulh-net a dăɣ-dd-itakkăs a-wa olăɣăn măšan, enăllăbăs ĕnta, tăllăbăst n-ulh-net a dăɣ-dd-itakkăs a-wa lăbasăn ed, a-wa iḍkărăn ulh n-ăgg-adĕm a dăɣ-itamăjrad emm-net." 46"Mafăl hi-jannem: 'Emăli, Emăli!' a-s ija a-wen, wăr tĕjjĕm a-wa hawăn-janneɣ. 47Ere hi-dd-ikkăn-dăɣ, ăsjăd i-măjrăd-in, ad-itamašal a-wa ĕnneɣ, ad-kăwăn-săknăɣ ere wa dăr-olăh. 48Olăh d-ăwadĕm itĕddayăn ehăn, iɣăš ăssas-net har iwwăḍ tăhunt, idăy fălla-s. Ij' akăsa, ij' anji ăṣṣoohen, inkăf i-taɣăšamt siha d-siha măšan, wăr tăt-ăsmăramăr ed, tĕkn' ăntum dăɣ-ăkall 49măšan ere wa islăn i-măjrăd-in wăr has-ăsjăd, olăh d-ere idăyăn ehăn-net făll-tasĕnjit wărăt la ăssas, osă-dd anji, inkăf i-ehăn, immăr-t-in s-iyyăt, ij'-as tenăde tĕmdat."

will be added

X\