Luqa 5

1Ašăl iyyăn d-ibdad Ɣisa dăɣ-asălim n-ejănš wa n-Žănnăṣarăt, tăɣlăyɣălăy-t-dd tamĕtte tăjjeet tărhat ad-sĕjĕd i-măjrăd n-Măssinăɣ wa ităjj. 2Inhăy sănatăt turfen n-aman ojaynen s-ăqqiimăn mĕssaw-snăt dăɣ-asălim n-aman, saradăn titarren-năsăn. 3Ijjăš dăɣ-snăt ta n-Simyon, ittăr dăɣ-s ad-has-tăt-in-imhĕl hundăɣ har tĕfĕl asălim n-aman, ăqqima dăɣ-s, ad-isaɣra tamĕtte. 4Issĕmdă măjrăd ɣas, inna i-Simyon: "Sĕglĕw turăft-năk hundăɣ har ammas n-aman, tĕjrĕd kăyy d-imidiwăn-nak titarren-năwăn." 5Inn'-as Simyon: "Ălɣalim, ehăḍ imdan a nĕja nĕšɣal wăr t-illa a nărmas măšan, făl tĕnna-năk, ad-nĕjăr titarren-nănăɣ." 6Jăn a-wa hasăn-innă, ărmăsăn-dd ašăl-en-dăɣ imănan-i-dăɣ ăjjootnen har dd-ăqqălnăt titarren-năsăn, tĕssarnăt. 7Ad-tallăfăn i-imidiwăn-năsăn wi hănen turăft-ta iyyăḍăt i-ad-dd-ašĕlĕn, ilalăn-asăn. Osăn-dd, ĕḍnăyăn turfen-năsăn tissĕnen hundăɣ har-dăɣ tilkĕyyitnăt. 8Inhăy Simyon Bĕṭrus a-wa ijăn ɣas, irkăɣ dat-Ɣisa, inn'-as: "Emăli, ajĕj-ahi făl-a-s năkk anăsbăkkaḍ a ămoosăɣ." 9Tărmăs tarĕmmeɣt-i-dăɣ măqqărăt Simyon d-imidiwăn-net făl tĕssĕba n-ĕjut n-imănan-i-dăɣ ărmăsăn. 10Tăkunt-ta tărmăsăt Simyon, ĕnta daɣ a tărmăsăt Yaqub d-Exya wi n-dăgg-Zăbdi-i dăr-ohăr ălxidmăt. Innă Ɣisa i-Simyon ḍarăt-a-wen: "Wăr tărmeɣăd, ɣur-ašăl-i-dăɣ, ad-tumasăd ăwadĕm săr-i dd-isadawăn ăddinăt i-ad-tăn-ăɣlĕsăɣ." 11Ăssoɣălăn-dd ḍarăt-a-wen turfen-năsăn asălim n-aman, oyyăn a-wa tăn-išlăn iket-net, ĕlkămăn-as. 12Iha Ɣisa iyyăn dăɣ-iɣărman a-s t-inhăy ăhalĕs ilsa jĕri, ikk'-e-hi-dd, irkăɣ data-s, ad-t-ilaqqăd, ijann'-as: "Ălɣalim, afăl tărhed a-wen-dăɣ, tăddoobed ad-hi-šĕšdĕjăd." 13Iẓẓăl Ɣisa ăfuss-net, iḍăs-t, inn'-as: "Ărheeɣ a-wen, išdaj", ifăl-t jĕri ălwăqq-wen-dăɣ. 14Ăsmătăr-t Ɣisa, inn'-as: "Wăr jed isălan i-ăwadĕm wăl' iyyăn n-a-s năkk a kăy-ăzozăyăn; ănn-ak, ĕglĕw, sĕkĕn iman-năk i-u-tikutawen, tĕjĕd takute ta n-tĕšĕdje s-ălmăɣna wa s-tăn-innă alămăr wa n-ănnăbi Mosa i-ad-hasăn-umas a-wen tajuhe n-a-s tĕzzăyăd." 15Hak ašăl tiwwaḍ-dd terše n-isĕm i-Ɣisa, tidaw-dd săr-s tamĕtte tăjjeet i-ad-sĕjĕd i-isălan n-Ălĕnžil, tĕzzĕy dăɣ-turhĕnnawen-net. 16Măšan Ɣisa ĕnta, ăssoof edăgg iṣtarăn dăɣ-ijraw s-tamădilt n-Măssinăɣ. 17Ijraw Ɣisa ɣur-Emăli tărna tăṣṣoohet ăssitbăt azuzi wa ităjj i-ăddinăt. Ašăl iyyăn d-isaɣra, ăqqiimăn edes-has kăl-faris d-ălɣulam n-Ăṭṭăwrăt dd-falnen tidbi n-Galila d-Ălyăhudĕyăt d-Yărussălam. 18A ĕnḍărrăn meddĕn iyyăḍ-da-dăɣ ămisawăyăn anăbdon insan făll-asĕftăɣ. Ǝttărăn a-wa dăɣ-he-ĕjĕn ĕrĕsăn tamĕtte, sĕnsĕn-t dat-Ɣisa 19măšan, ăba-hasăn ălmăɣna n-a-wen făl ĕjut-i-dăɣ ja tamĕtte. Ăɣlăyăn, ăwwănăn afălla n-ehăn, sărăn dăɣ-assĕtax n-ehăn edăgg s-ăddooben ad-săr-s dd-šujĕšăn anăbdon, ăstărarăn-t-dd ḍarăt-a-wen har t-dd-ĕssĕnsăn dăɣ-ammas n-tamĕtte, dat-Ɣisa. 20Inhăy Ɣisa immun-năsăn ɣas, innă: "Ăhalĕs, ătwănšăn-ak ibăkkaḍăn-năk." 21Ǝslăn ălɣulam n-Ăṭṭăwrăt d-kăl-faris i-a-wen ɣas, ad-jannen dăɣ-iman-năsăn: "Ma ămoos wa ăwadĕm isikuforăn s-ĕmmĕk-wa-dăɣ? Mi ăddoben tenăšše n-ibăkkaḍăn săl Măssinăɣ?" 22Ilmăd Ɣisa ɣur-iman-net a-wa ămiɣănnănăn ulhawăn-năsăn, inn'-asăn: "Ma tămmizăɣăm dăɣ-ulhawăn-năwăn? 23Ma ojărăn tărăɣse jer-ad-tĕnnĕd i-ăwadĕm: 'Ătwănšăn-ak ibăkkaḍăn-năk' d-ad-has-tĕnnĕd: 'Ǝbdĕd, ărjĕš.' 24Ašăl-i, ăssiilmădăɣ-kăwăn a-s Ăgg-ăgg-adĕm, ijraw făll-ărori n-ăkall turhajăt n-tenăšše n-ibăkkaḍăn." Inna ḍarăt-a-wen i-anăbdon: "Ǝnneɣ-ak, ĕbdĕd, ĕḍkĕl asĕftăɣ-năk, ĕqqĕl ehăn-năk." 25Ibdăd anăbdon ăssaɣăt-wen-dăɣ dat-ăddinăt iket-năsăn, iḍkăl asĕftăɣ-net, iqqăl ehăn-net itimĕl Măssinăɣ. 26Ăqqiimăn-dd ăddinăt ɣas tof'-en tăkunt n-a-wa ijăn, tiimlĕn Măssinăɣ. Tĕj'-asăn tarĕmmeɣt arămas wa-dăɣ făl jannen: "Ašăl-i, iman-net, nĕnhăy hărătăn ăqqannen eɣăf." 27Ifăl Ɣisa edăgg-en ɣas, inhăy ăhalĕs irammăsăn tiwse s-isĕm-net Lewi, ăqqiima dăɣ-edăgg n-ălxidmăt-net, inn'-as: "Ǝlkĕm-ahi." 28Ibdăd Lewi, ibḍă d-a-wa t-išlăn iket-net, ilkăm-as. 29Ăsmăjarăt Lewi Ɣisa ḍarăt-a-wen s-ehăn-net. Itaɣăyma Ɣisa dăɣ-edăgg wa n-imĕnsiwăn a-s erk ăddinăt han inarmasăn n-tiwse ăjjootnen da-dăɣ, osăn-dd, ănɣăymăn dăr-s ĕnta d-inĕṭṭulab-net. 30Ǝnhăyăn kăl-faris d-ălɣulam n-Ăṭṭăwrăt a-wen ɣas, ămjănjănăn jer-iman-năsăn ad-jannen i-inĕṭṭulab-net: "Mafăl tattăm, sassăm, tihrĕm ikassăn d-inarmasăn n-tiwse d-erk ăddinăt?" 31Ăwwežăb-asăn, inn'-asăn: "Ăddinăt ăssoxătnen, wăr-ămɣatărăn s-lăxtur, imarhinăn a săr-s ămiɣatărnen; 32năkk, wăr dd-ămešălăɣ s-ăddinăt-wi ordănen iman-năsăn iqqud, inăsbăkkaḍăn a-s dd-ămešălăɣ i-ad-utabăn." 33Ǝnnăn-as ḍarăt-a-wen: "Inĕṭṭulab wi n-Exya hakd-dăɣ kăl-faris, hărkuk tuẓamăn, tumadăn măšan, wi-năk ĕntăneḍ, tattăn, sassăn." 34Issăɣlăy-tăn tangalt dăɣ-hasăn-inna: "Kăl-tuksest, wăr tăn-ilzem ăẓum a ikka ămaẓlay ill'-e ɣur-săn 35măšan, ilkam ad-dd-ass ăzzăman-wa tăn-mad-ifĕl ămaẓlay, ăzzăman-en, ad-uẓamăn." 36Ij'-asăn Ɣisa tangalt tiyyăt dăɣ-hasăn-innă: "Wăr t-illa ere dd-isaɣărrawen tikĕst dăɣ-erăswăy ăynayăn i-ad-săr-s isĕmmĕkukĕs i wăššărăn ed, afăl ija a-wen, ad-dd-isăqqĕrriwĕt erăswăy wa ăynayăn bănnan, ḍarăt-a-wen daɣ, tabdoɣt-ta tăynayăt, wăr mad-talăh d-ta wăššărăt ini. 37Wăr t-illa daɣ ere itajjăn aman n-lăɣnăb ăynaynen ăxxiimmărnen dăɣ-ijdad, ere ijăn a-wen har kăfăn aman ĕnnin ăynaynen dăɣ-ijdad, ad-has-sĕbbuqqen ijdad-net, ifut ḍarăt-a-wen dăɣ-aman hakd-dăɣ dăɣ-ijdad. 38Aman n-lăɣnăb ăynaynen ăxxiimmărnen, iddidăn ăynaynen a dăɣ-tăn-itajj ăwadĕm. 39Ăwadĕm daɣ wa iswăn aman n-lăɣnăb s-ăru d-ăxximmărăn, ăbas ăsidărhăn tesăse n-wi ăynaynen ed ad-ănn: 'Wi s-ăru d-ĕxxĕmărăn a ăẓednen.' "

will be added

X\