1 A-s dd-ifăl Ɣisa ejănš wa n-Ɣurdĕni, iḍkar Unfas Šăddijăn s-ăṣṣahăt. Unfas-en-dăɣ a t-oɣădăn s-tenere. 2 Ijă dihen ĕkkoẓăt timĕrwen n-ašăl itižărrub-t Iblis. Tăqqăn-ten-dăɣ, ij'-et iket-net wăr t-illa a ikkan emm-net tĕzzar, ălluẓ. 3 Os'-e hi-dd Iblis, inn'-as: "Šămad kăyy a-s Rure-s n-Măssinăɣ, amăr i-tăhunt-ta-dăɣ ad-tumas tajĕlla." 4 Ăwwežăb-as Ɣisa, inn'-as: "Iktab dăɣ-măjrăd n-Măssinăɣ: 'Tămudre n-ăgg-adĕm, wăr tĕmda făll-tetăte ɣas.' " 5 Iwwăy-t Iblis s-edăgg iknan aḍkul, issĕkn'-e dăɣ-ešăfălli n-tiṭṭ, e d t-illăm ĕddĕwĕl iwarăn ărori n-ăkall, 6 inn'-as ămăra: "Ad-kăy-ăkfăɣ tărna d-tĕmɣăr făll-ĕddĕwĕlăn-wi-dăɣ hannăyăd iket-năsăn făl-a-s i-nin, hakkăɣ-tăn daɣ i-ere wa s-ărheɣ, 7 a-wen-dăɣ a făl, hakkăɣ-ak-tăn iket-năsăn afăl hi-tăɣbădăd." 8 Ăwwežăb-as, inn'-as: "Iktab dăɣ-măjrăd n-Măssinăɣ a-s: 'Emăli-năk Măssinăɣ a dat-e-tărkăɣăd, ĕnta ɣas a fălla-k ilan ălɣibadăt.' " 9 Iwwăy-t Iblis ḍarăt-a-wen s-Yărussălam, issĕbdăd-t făll-afălla n-ehăn n-ămudd wa măqqărăn tĕzzar, inn'-as: "Šămad kăyy a-s Rure-s n-Măssinăɣ, ăyy iman-năk s-ăkall ed, iktab dăɣ-edăgg iyyăn dăɣ-măjrăd n-Măssinăɣ a-s: 10 'Ad-dd-išĕmmišĕl ănjălosăn-net i-ad-kăy-agĕẓĕn dăɣ-ăššar, 11 ĕkbĕlăn-kăy dăɣ-ifassăn-năsăn i-ad-wăr hak-răssĕl wăla-dăɣ tăhunt tiyyăt ɣas.' " 12 Inn'-as Ɣisa: "Iktab dăɣ-măjrăd n-Măssinăɣ a-s: 'Wăr-e tarmĕd Emăli-năk Măssinăɣ.' " 13 Ăžžurrăbăt-t Iblis s-a-wa s-ăddobăt iket-net, indăr-as ɣas, ujĕj-t, ad-isimăqqul i-ad-săr-s ijrĕw taffawt tiyyăt daɣ. 14 Iqqăl Ɣisa ḍarăt-a-wen teje ta n-Galila, toɣad-t tărna n-Unfas Šăddijăn dăɣ-a-wa ităjj, intăj isĕm-net dăɣ-teje-ten-dăɣ iket-net. 15 Isaɣra ăddinăt dăɣ-ihănan n-ăddin wi n-kăl-Ălyăhud, ăssiimɣărăn-t ăddinăt iket-năsăn. 16 Ifăl Ɣisa dihen, ikkă taɣrĕmt ta n-Năṣirăt-i-dăɣ idwăl, ij'-e ašăl wa n-ĕssĕbĕt-i n-tăsonfat, ikk' ehăn n-ăddin wa n-kăl-Ălyăhud ed, a-wen-dăɣ a-s izzay ad-t-ăj. 17 Tĕddalăn ăddinăt Măssinăɣ dihen-dăɣ a-s ibdăd Ɣisa jere-săn, ĕkfăn-t ĕlkĕttab wa n-ănnăbi Saya i-ad-hasăn-dăɣ-s iɣăr. Ikkăs-in i-ĕlkĕttab aḍh wa ija tĕzzar, or'-e dăɣ-edăgg wa dăɣ-iktăb: 18 "Insa făll-i Unfas n-Emăli, ăsnăfrănăn-ahi i-ad-ăjăɣ isălan n-Ălĕnžil i-tilăqqiwen, ăšmašăl-ahi-dd i-ad-ăjăɣ isălan i-wi hănen tikărmuten, ĕjrĕwăn iman-năsăn, zuzĕyăɣ imĕddorɣal, sĕddărfeɣ ăddinăt-wi ătiwăkrăšnen, 19 zĕzzubbeɣ-dd awătay n-ănnuɣmăt n-Emăli făll-ărori n-ăkall." 20 Issĕmdă Ɣisa teɣăre ɣas, iɣfăl ĕlkĕttab, ăssoɣăl-t i-ănaxdim-wa ijăn ĕnniyăt i-ehăn wa n-ăddin. Iqqăl-dd, ăqqima ɣas, ăsbălalăɣăn dăɣ-s ăddinăt-wi hănen ehăn n-ăddin-en-dăɣ iket-dăɣ-năsăn. 21 Iḍkăl măjrăd, inn'-asăn: "Măjrăd wa s-tĕslăm ašăl-i-dăɣ, itbăt." 22 Ǝqqălăn-dd ɣas oran imawăn, tof'-en tăkunt n-tihusay n-imĕjridăn wi dd-zajjărnen emm-net, ad-jannen: "Ak ajăn a-wa wădden ăgg-Yusĕf wa-dăɣ nĕzzăy?" 23 Inn'-asăn Ɣisa: "Ǝssanăɣ a-s ad-hi-dd-sĕktĕwăm oẓẓ wa innăn: 'Lăxtur, kăyy-ak sĕssĕfăr i-iman-năkk tĕzzar', tĕnnĕm-ahi: 'Tĕmmaẓ jed dăɣ-ăkall-năk a-wa s-nĕsla jed-t dăɣ-aɣrĕm wa n-Qăfărnaxum.' " 24 Inn'-asăn daɣ: "Tidĕt-dăɣ a-s wăr t-illa ănnăbi ătiwăqbălăn dăɣ-ăkall-net. 25 Ăsidătteɣ-awăn a-s kăla t-ĕllănăt tinuḍăfen ăjjootnen dăɣ-Iṣrayil dăɣ-ăzzăman wa n-ănnăbi Ɣĕli. Ăzzăman-en, oɣăy mănna i-ăddinăt, jăn kăraḍ iwĕtyan d-săḍis orăn wăr t-tĕlla teddamt n-ajĕnna watăt ăkall-en-dăɣ, ija laẓ s-kăla wăr-ătwănhăy a dăr-olăh făll-ărori n-ăkall. 26 Ija a-wen iket-net măšan, wăr dd-ăšmašăl Măssinăɣ ănnăbi Ɣĕli ar s-tănuḍăft tiyyăt ɣas dăɣ-snăt tĕzzaɣăt taɣrĕmt ta n-Sarăfta dăɣ-teje ta n-Săyda. 27 Ḍarăt Ɣĕli daɣ, osă-dd ăzzăman wa n-ănnăbi Ilyas. Ăzzăman-en, ĕllan-t ăddinăt ăjjootnen dăɣ-ăkall wa n-Iṣrayil ijraw jĕri măšan, wăr tăn-iha-i s-dd-ăšimašăl Măssinăɣ Ilyas a săl ăhalĕs iyyăn n-amăjar il' ăkall wa n-Surya s-isĕm-net Năɣma i-ad-t-išĕšdĕj." 28 Ǝslăn ăddinăt i-hărătăn-win-dăɣ hasăn-innă dăɣ-ehăn n-ăddin ɣas, kăfăn a-wa-dăɣ hasăn-ija aḍkăr-net, 29 ămẓăyẓăyăn-t iket-năsăn, ĕzzĕwen-t hundăɣ har afălla n-aḍaɣ wa făll-idăy aɣrĕm i-ad-t-in-sĕttĕrĕkken, ămmăt 30 măšan, ikka Ɣisa jere-săn, iglă. 31 Ătrară-dd Ɣisa ḍarăt-a-wen, ikka taɣrĕmt ta n-Qăfărnaxum hăt teje ta n-Galila ad-isaɣra dihen ăddinăt hak ašăl n-ĕssĕbĕt-i n-tăsonfat; 32 ĕqqălăn-dd ăddinăt ɣas oran imawăn făll-ĕjjăruẓăt-i-dăɣ hasăn-ija a-wa isăɣra ed isaɣr'-en s-ălxikmăt ăṣṣohen. 33 Ehăn n-ăddin-en, ih'-e ăhalĕs ih' alšin, inhăy Ɣisa ɣas, ad-isaɣărat s-afălla, ijanna 34 "Ya Ɣisa wa n-Năṣirăt, ma dăɣ-năɣ tărhed? Ajăn ahălak-nănăɣ a-s dd-tosed? Ǝssanăɣ ere wa tămoosăd, kăyy-i-dăɣ a-s: Wa Šăddijăn dd-ăšmašăl Măssinăɣ." 35 Ăsmăhăḍ dăɣ-s Ɣisa, inn'-as "Ǝṭṭĕf emm-năk, tĕzjărăd ăhalĕs-i-dăɣ!" Ijjăḍlăt alšin ăhalĕs jer-ăddinăt tĕzzar, izjăr-t, wăr t-illa a has-iɣšad. 36 Ǝqqălăn-dd ăddinăt ɣas oran imawăn, tinmĕnnin: "Ma ămoos măjrăd wa? Wa ĕnta wăl' alšinăn e-d fălla-săn ăsmăhăḍ s-tărna-net, ad-ĕzjărăn ăddinăt." 37 Intăj isĕm n-Ɣisa ḍarăt-a-wen-dăɣ, wăr t-illa edăgg dăɣ-teje-ten-dăɣ s-wădden timsiɣulăn dăɣ-s isălan-net. 38 Izjăr Ɣisa ehăn wa n-ăddin ɣas, ikka ɣur-Simyon. Ămzăyyăt-in d-a-s tărmas tenăde tăṣṣoohet taḍăggalt n-Simyon, ĕttărăn dăɣ-s ăddinăt ad-tăt-izuzĕy. 39 Ibdăd-dd Ɣisa jĕnnĕj-s, ăsmăhăḍ făll-tenăde, tărẓa fălla-s. Tĕnkăr-dd ălwăqq-wen-dăɣ, ad-tăn-simjurut. 40 Toḍa tăfukt ɣas, ămewăyăn-dd săr-s imarhinăn s-hak iyyăn d-turhĕnna-net i-ad-tăn-izuzĕy, ăswăr hak iyyăn ifassăn-net, ăzozăy-tăn. 41 Zajjărăn alšinăn ăddinăt ăjjootnen, saɣăren, jannen: "Kăyy a-s Rure-s n-Măssinăɣ" măšan, isamăhaḍ fălla-săn, wăr tăn-itĕyy ămmijrădăn ed, ĕssanăn a-s ĕnta a-s Ălmasex. 42 Ăffăw ɣas, ikka Ɣisa tenere n-iman-net măšan tĕmmăɣ-as tamĕtte hăr t-tĕjrăw, ad-tattărăn ăddinăt ĕmmĕk s-t-ĕṭṭăfăn edes-hasăn i-ad-wăr-ilkem ad-tăn-ifal; 43 inhăy tayĕtte-năsăn ɣas, inn'-asăn: "Iwar-ahi ad-ăxṭĕbăɣ isălan n-ălxer n-Tĕmmĕnĕya n-Măssinăɣ i-iɣărman-wi iyyăḍnen ĕntăneḍ-dăɣ ed a-wen-dăɣ a-s dd-ămešălăɣ." 44 Ad-ixaṭṭăb ḍarăt-a-wen dăɣ-ihănan n-ăddin wi n-kăl-Ălyăhud n-teje ta n-Ălyăhudĕyăt.
