1 Awătay wa s-măraw d-sĕmmos dăɣ-tĕmmĕnukĕla n-Qăyṣăr Tibăryus, ămoos Bunĕs Bilatĕs gĕfăr n-teje ta n-Ălyăhudĕyăt, ămoos Harudĕs ămănokal n-teje ta n-Galila, ă/n/na-s Fĕlibb ăminakăl făll-Tarăkunit d-Ǝyyadurĕya, Lisanyas ĕnta ăminakăl făll-ăkall wa n-Abila. 2 Ăzzăman-en, Hĕnnan d-Qayăf a ăminakălnen făll-kăl-tikutawen. Išilan-win-dăɣ, ad-immĕjrăd Măssinăɣ i-Exya ăgg Zăkărya dăɣ-tenere. 3 Ikk' Exya ḍarăt-a-wen ikallăn iket-năsăn wi hănen attayăn n-ejănš wa s-itawănna Ɣurdĕni. Ixaṭṭăb, ijanna i-ăddinăt: "Utabăt, tĕtwĕsĕlmăɣăm dăɣ-aman i-ad-tĕjrĕwăm tenăšše n-ibăkkaḍăn." 4 A-wen-dăɣ išlăn Exya, a iktabăn dăɣ-ĕlkĕttab wa n-ănnăbi Saya ălwăqq wa d-inna dăɣ-s: "Săjdăt, ija emăsli iyyăn ijannen: 'A-wa emăsli ăssewălăn dăɣ-tenere, ăknăt tabarăt n-Emăli, sĕssiɣĕdăt ibaran data-s. 5 Iɣĕšran-wi ɣăšnen, ad-ĕnbĕlăn, iḍaɣăn d-ijefăn, ad-alĕmĕn, ibaran-wi ăkrănbăynen, ad-aɣĕdĕn, tabarăten-ti ărbăɣrăbăɣnen, ad-agdăhnăt, 6 e d t-illăm ăgg-adĕm, ad-inhĕy ĕlɣĕllas wa dd-ăzzăbbăt Măssinăɣ.' " 7 Osăn-dd ăddinăt ăjjootnen ărhanen ad-tăn-isĕlmăɣ Exya dăɣ aman, inn'-asăn: "Ya taššălen-i-dăɣ! Wădden tĕnnăm tĕmsădăm! Ǝyya, a tărham ad-tĕtwĕsĕlmăɣăm i-ad-tĕflĕm daw-ăššăreɣa n-Măssinăɣ wa s-išwar fălla-wăn dd-oḍa. Lăɣătăt-ahi, mi kăwăn-issĕlmădăn s-a-wen? 8 Sĕtbĕtăm tătubt-năwăn s-imărkedăn, tĕyyĕm fălla-wăn tĕnna n-a-s ĕzzurĕyăt n-Ibrahim a nămoos ed afăl tăqqăl s-isălan n-ĕzzurĕyăt ɣas, ăyyăt-ahi ad-hawăn-ănnăɣ a-s: Măssinăɣ, ăddoobăt ad-isĕmmĕskĕl tihun-ti-dăɣ hannăyăm, ixlĕk-dd dăɣ-snăt ĕzzurĕyăt i-Ibrahim. 9 Ăjăt ĕnniyăt făl-a-s emm n-tutăla ăru d-insa făll-ikewăn n-ihĕškan, e d t-illăm ahĕšk wărăn itirĕw aratăn ih'-ălfăyda, ad-hin-ăttănkăḍ, itwĕjăr-in dăɣ-efew." 10 Ǝssĕstănăn-t ăddinăt wi has-ăsijădnen, ĕnnăn-as: "Ma s-nĕla s-ad-t-năj?" 11 Ăwwežăb-asăn, inn'-asăn: "Ere dăɣ-wăn ilăn ĕssin imălsan, ăkfet iyyăn i-wa wărăn ila wăl' iyyăn, wa ilăn a ikša, ăkfet ere wa t-wărăn ila." 12 Osăn-t-dd ḍarăt-a-wen inarmasăn n-tiwse i-ad-tăn-isĕlmăɣ dăɣ-aman, ĕnnăn-as: "Ălɣalim, ma s-nĕla s-ad-t-năj?" 13 Inn'-asăn: "Wăr tĕtterăm dăɣ-ăddinăt ar a-wa s-omăr ĕlxĕkum." 14 Ǝssĕstănăn-t ĕssărdusa, ĕnnăn-as: "Năkkăneḍ-i-š, ma hanăɣ-iwarăn?" Inn'-asăn: "Wăr toheɣăm ăwadĕm, wăr tĕssĕḍlămăm ăwadĕm s-bahu, ăjăt ărramăt dăɣ-timẓal-năwăn." 15 Ăddinăt iket-dăɣ-năsăn wi ĕslănen i-a-wa ijănna Exya, jărăn ăṭṭăma, ad-tinmĕsĕstinăn kunta wădden ĕnta-i-dăɣ a-s Ălmasex. 16 Ăwwežăb-asăn, inn'-asăn: "Năkk, aman a dăɣ-kăwăn-salmaɣăɣ măšan, ilkam-ahi ăhalĕs hi-ijan mijraw wa-dăɣ s-wăr-ănhăjjăɣ wăla-dăɣ d-ad-ăḍĕsăɣ issal n-tifădelen-net, ĕnta ad-kăwăn-isĕlmăɣ dăɣ-Unfas Šăddijăn d-efew i-ad-hin-istĕb a-wa lăbasăn. 17 Iṭṭaf tesăyt-net ta s-hin-e-izzuzzăr allon-net, isĕdĕw allon wa olăɣăn, ăj'-e dăɣ-ejănd-net, irmĕs ahošăr wa wărăn infa hărăt, ăj'-e dăɣ-efew ăhijăljălăn hărkuk." 18 Ikk' Exya dĕdi, itajj isălan n-ălxer n-Ălĕnžil-wi-dăɣ, isamătar daɣ ăddinăt s-ălmăɣnatăn ăjjootnen. 19 Ăzzăman-en-dăɣ, ad-ăsmăhăḍ Exya făll-ămănokal Harudĕs Intibbas dăɣ-isălan n-Hărudĕyyas ta n-hănne-s n-ă/n/na-s Fĕlibb dăɣ-s ohăɣ, illăɣăt-as daɣ ibăkkaḍăn ăjjootnen ămešăl săl wen-dăɣ. 20 Ăssewăḍ Harudĕs făll-a-wen-dăɣ iket-net iji n-Exya dăɣ-takărmut. 21 A-wen-dăɣ iket-net, ija ḍarăt a-s ăssilmăɣ Exya ăddinăt ăjjootnen d-Ɣisa iman-net dăɣ-aman. Ălwăqq wa d-ititwĕsĕlmeɣ Ɣisa, itĕddal Măssinăɣ dihen-dăɣ a-s dd-ămerăn išĕnnawăn, 22 ăzzubbăt-dd fălla-s Unfas Šăddijăn dăɣ-ănnuɣ n-tedăbert măllăt, ijmăḍ-dd emăsli išĕnnawăn, innăn: "Kăyy-i-dăɣ a-s Rure-ɣ wa ĕkneeɣ tărha, kăyy a dăɣ-ăsriwăn iman-in." 23 Ila Ɣisa ĕḍḍĕkuḍ n-kăraḍăt timĕrwen n-awătay a-s issĕnta ămašal-net, ija ɣur-ăddinăt iket-năsăn wi t-hannăynen a-s rure-s n-Yusĕf wa n-ăgg Xali. 24 Xali ĕnta, ăgg Mătata, Mătata ăgg Lewi, Lewi ăgg Mălki, Mălki ăgg Yănnay, Yănnay ăgg Yusĕf, 25 Yusĕf ăgg Mătaṣiyas, Mătaṣiyas ăgg Ɣămmosa, Ɣămmosa ăgg Năxwama, Năxwama ăgg Xăšli, Xăšli ăgg Naggay, 26 Naggay ăgg Mătti, Mătti ăgg Mătaṣiyas, Mătaṣiyas ăgg Šămɣi, Šămɣi ăgg Yosăx, Yosăx ăgg Yoda, 27 Yoda ăgg Exya, Exya ăgg Ɣisa, Ɣisa ăgg Žărrubabil, Žărrubabil ăgg Ăṣṣălat, Ăṣṣălat ăgg Năyri, 28 Năyri ăgg Mălki, Mălki ăgg Ăddi, Ăddi ăgg Kosăm, Kosăm ăgg Ălmădăm, Ălmădăm ăgg Err, 29 Err ăgg Ɣisa, Ɣisa ăgg Ɣĕlyazăr, Ɣĕlyazăr ăgg Yurim, Yurim ăgg Mătata, Mătata ăgg Lewi, 30 Lewi ăgg Simyon, Simyon ăgg Yăhuda, Yăhuda ăgg Yusĕf, Yusĕf ăgg Yonăm, Yonăm ăgg Ilyakim, 31 Ilyakim ăgg Mălaya, Mălaya ăgg Măyna, Măyna ăgg Mătata, Mătata ăgg Natan, Natan ăgg Dawĕd, 32 Dawĕd ăgg Isaya, Isaya ăgg Ăɣbăydi, Ăɣbăydi ăgg Boɣaz, Boɣaz ăgg Sala, Sala ăgg Nasun, 33 Nasun ăgg Aminădab, Aminădab ăgg Ădmin, Ădmin ăgg Arni, Arni ăgg Xăšrun, Xăšrun ăgg Faris, Faris ăgg Yăhuda, 34 Yăhuda ăgg Yaqub, Yaqub ăgg Isxaqq, Isxaqq ăgg Ibrahim, Ibrahim ăgg Tarăxa, Tarăxa ăgg Naxur, 35 Naxur ăgg Sarux, Sarux ăgg Raggăw, Raggăw ăgg Falăx, Falăx ăgg Ɣăbbir, Ɣăbbir ăgg Salăx, 36 Salăx ăgg Kăynăm, Kăynăm ăgg Arfăɣšad, Arfăɣšad ăgg Săm, Săm ăgg Nox, Nox ăgg Lamăx, 37 Lamăx ăgg Mătussalĕm, Mătussalĕm ăgg Inuk, Inuk ăgg Yarăt, Yarăt ăgg Măxlălyil, Măxlălyil ăgg Kăynăm, 38 Kăynăm ăgg Anuš, Anuš ăgg Šĕtti, Šĕtti ăgg Adĕm, Adĕm ĕnta, Măssinăɣ a t-dd-ixlăkăn.
