Luqa 24

1Abĕnnĕbĕn n-ălxad-i n-ašăl wa ăzzarăn dăɣ-ĕssĕboɣ, ĕkkănăt tiḍeḍen aẓĕkka ăwwaynăt ĕlɣĕnfărăn d-aḍutăn-wi dd-ăsdăwnăt, 2ăwwăḍnăt-in aẓĕkka, ogăẓnăt-in tăhunt-ta hărăt emm n-aẓĕkka, tăɣirarăd-in, 3ĕjjăšnăt ammas n-aẓĕkka măšan, wăr dăɣ-s ĕnheynăt tafĕkka n-Ɣisa. 4Ăqqanăn iɣăfawăn-năsnăt dăɣ-a-wen-dăɣ a-s dd-ĕbdădăn ĕssin meddĕn ĕlsanen isĕlsa ăsimăɣmăɣnen edes-hasnăt, 5jănăt tarĕmmeɣt-ta-dăɣ făl dd-hănăt-ărkaɣnăt, ăsiḍăsnăt timmawen-năsnăt ăkall. Ǝnnăn-asnăt meddĕn: "Ma s-tammăɣmăt i-ere iddarăn jer-inĕmmuttan? 6Ɣisa, wăr t-illa diha, inkăr-dd dăɣ-tamăttant. Ǝktĕwmăt-dd a-wa innă hărwa iha teje ta n-Galila, 7a-s innă: 'Ăgg-ăgg-adĕm, ilzam ad-ăttărmăs, ijjĕš ifassăn n-inăsbăkkaḍăn, ĕṣlĕbăn-t măšan, ašăl wa s-kăraḍ, a dd-inkăr jer-inĕmmuttan.' " 8Ǝktănăt-dd imĕjridăn-win-dăɣ ija Ɣisa. 9Fălnăt aẓĕkka ɣas, ĕkkănăt inĕṭṭulab wi n-măraw d-iyyăn d-inalkimăn-wi iyyăḍnen, jănăt dăɣ-săn isălan. 10Tiḍeḍen-en, h'-enăt Măryăma ta n-tadăbayt ta n-Mulăždalĕyăt, Tăxya d-Măryăma ta n-ma-s n-Yaqub d-tiyyăḍ daɣ sidĕttutnen a-wa ĕnnănăt i-inĕṭṭulab 11măšan, jăn-tănăt tinĕbbuddal wăren ĕssen a jannenăt, unjăyăn s-ad-tănăt-ĕflĕsăn. 12Iggăd-dd Bĕṭrus, ošăl s-aẓĕkka, iwwăḍ-in ɣas, ăssijja dăɣ-ămmas-net măšan, wăr dăɣ-s inhey ar tefit tĕnsat d-iman-net, iqqăl ĕnta-dăɣ iqqan a-wa ijăn eɣăf-net. 13Ǝkkăn inalkimăn n-Ɣisa ĕssin ašăl-wen-dăɣ taɣrĕmt ta n-Imayus tănimăjjajăt d-Yărussălam s-ĕḍḍĕkuḍ n-măraw kelumetărăn d-ĕssin, 14ăssokalăn, simɣuɣulăn isălan n-a-wa ijăn iket-net 15a-s tăn-dd-iwwăḍ Ɣisa iman-net, ăddew dăr-săn 16măšan, indăr i-tiṭṭawen-năsăn ad-t-ĕzzĕynăt. 17Immĕjrăd-asăn, inn'-asăn: "Ma s-tărjašăm ham ti-net?" Ăqqănăn iɣăfawăn-năsăn, ĕbdădăn, 18inn'-as dăɣ-săn wa s-isĕm-net Kălyobbas: "Ɣas, kăyy ɣas, dăɣ-Yărussălam tĕmdat a wăr hen isălan n-a-wa dăɣ-s ijăn išilan-wi-dăɣ?" 19Inn'-asăn: "Ma dăɣ-s ijăn?" Ǝnnăn-as: "Un a-wa ijrăwăn Ɣisa wa n-Năṣirăt-i ămoosăn ănnăbi ăṣṣoohen s-imojjan-net hakd măjrăd-net dat-Măssinăɣ d-tamĕtte iket-net, 20ărmăsăn-t imănokalăn n-kăl-tikutawen d-imizărăn-nănăɣ, ăssoḍăn-t dăɣ-ăššăreɣa-năsăn tĕzzar, ĕṣlăbăn-t. 21Năkkăneḍ, nămoos hărăt dăɣ-wi ĕjărnen ăṭṭăma n-a-s ĕnta a madăn-iɣlĕs Iṣrayil măšan, a-wa ašăl wa s-kăraḍ d-ĕjăn hărătăn-win-dăɣ, 22ăqqănnăt daɣ tiḍeḍen-nănăɣ tiyyăḍ iɣăfawăn-nănăɣ ed, ĕnšăynăt aẓĕkka 23măšan, wăr dăɣ-s in-ogeẓnăt tafĕkka-net, ăqqălnăt-dd, ĕnnănăt ănfalălăn-asnăt-dd ănjălosăn hasnăt-ĕnnănen, iddar. 24Osăn iyyăḍ dăɣ-năɣ daɣ aẓĕkka, ăsbayănăn a-wa ĕnnănăt tiḍeḍen măšan, Ɣisa iman-net, wăr t-illa ere t-inhayăn." 25Inn'-asăn Ɣisa ălwăqq-wen: "Kăwăneḍ-i-š, tidĕt-dăɣ a-s ijraw-kăwăn iba n-tayĕtte, uhĕn, ma ăsiɣărăn ulhawăn-năwăn, igdal-awăn ad-tĕjrăhăm a-wa ĕnnăn ănnăbităn dăɣ-ĕlkĕttabăn n-Măssinăɣ? 26Wădden ĕnnăn ilzam ad-inhĕy Ălmasex tăhănšariḍt tĕzzar, ijjĕš ălxurmăt-net." 27Irmăs-asăn-dd ḍarăt-a-wen ɣur-ănnăbi Mosa, ikkă-dd ɣur-ănnăbităn wi iyyăḍnen iket-năsăn, itafăssar-asăn a-wa ĕnnăn ĕlkĕttabăn dăɣ-isălan-net. 28Ohăẓăn-in taɣrĕmt ta ĕkkăn ɣas, issĕkn'-en a-s okay-tăn 29măšan, ĕnnăn-as: "Ɣayĕm ɣur-năɣ ed, ašăl iglă, ehăḍ-dăɣ, išwar ija", ăzzubbăt ɣur-săn. 30Ǝqqălăn tetăte ɣas, iḍkăl tajĕlla, ămmoy i-Măssinăɣ, irẓ'-et, ikf'-asăn-tăt. 31Ămerănăt tiṭṭawen-năsăn ălwăqq-wen-dăɣ, ĕzzăyăn-t măšan, ăttunkăl-asăn ăssaɣăt-wen-dăɣ. 32Ănmănnăn jer-iman-năsăn: "Wădden a-s hanăɣ-ămmijrăd dăɣ-tabarăt, isafham-anăɣ ĕlkĕttabăn n-ănnăbităn, sanăjmaḍăn ulhawăn-nănăɣ făll-ad-t-ĕzzĕyăn." 33Ǝbdădăn ăssaɣăt-wen-dăɣ, ĕqqălăn Yărussălam. Ogăẓăn-in inĕṭṭulab wi n-măraw d-iyyăn d-inalkimăn-wi iyyăḍnen, ăžžiimmăɣăn dăɣ-edăgg iyyăn. 34Ǝnnăn-asăn inĕṭṭulab d-inalkimăn-wi iyyăḍnen: "Ijmaḍ-t ăššăk a-s Ɣisa, inkăr-dd jer-inĕmmuttan, inhay-t Simyon." 35Ǝllăɣen-asăn ĕntăneḍ-dăɣ amuqqĕs wa ĕjăn dăr-s dăɣ-tabarăt d-ĕmmĕk wa s-t-ĕzzăyăn ălwăqq wa d-irẓa tajĕlla. 36Ămmiijrădăn hărwa a-s dd-ibdăd Ɣisa iman-net jere-săn, inn'-asăn: "Ins' ălxer n-Măssinăɣ fălla-wăn." 37Ăxwălăn, ĕggădăn ĕnniyătăn-năsăn, ĕknăn tarĕmmeɣt ed, ăɣelăn ămăttănkul a hannăyăn 38măšan, inn'-asăn Ɣisa: "Ma kăwăn-ixwalăn, iggad d-ĕnniyătăn-năwăn, ikkas taflĕst dăɣ-ulhawăn-năwăn? 39Ǝkyĕdăt dăɣ-ifassăn-in d-iḍarăn-in, năkk iman-in a-wa, ăḍĕsăt-ahi, tĕkyĕdăm dăɣ-i i-ad-tĕkkĕsăm ăššăk, ămăttănkul, wăr dăr-i mad-alăh ed, wăr-ila taɣĕssa wăla iɣăsan." 40Ijann'-asăn a-wen, isakn'-en ifassăn-net d-iḍarăn-net 41măšan, tĕgdăl-asăn tĕmɣăre n-tedăwit-i-dăɣ jăn ad-t-ĕflĕsăn. Inhăy a-s ăqqanăn iɣăfawăn-năsăn ɣas, inn'-asăn: "Ak tĕlam a itamăkšen diha?" 42Ǝkfăn-t-dd ašăr n-emăn ăhhoɣen, 43irmăs-t-dd, ikš'-e data-săn. 44Inn'-asăn ḍarăt-a-wen: "A-wa-dăɣ a hawăn-janneɣ hărwa ĕlleɣ jere-wăn a-s ăhhuuššăl ad-itbĕt a-wa făll-i iktabăn dăɣ-alămăr wa n-ănnăbi Mosa d-ĕlkĕttabăn wi n-ănnăbităn d-Ăẓẓăbur." 45Ora ălwăqq-wen tiyĕtwen-năsăn i-ad-ĕfhĕmăn ĕlkĕttabăn, 46inn'-asăn: "Iktab a-s Ălmasex, ilzam ad-inhĕy tăhănšariḍt, inkăr-dd ašăl wa s-kăraḍ jer-inĕmmuttan, 47ĕtwĕjjĕn ḍarăt-a-wen isălan n-tătubt d-tenăšše n-ibăkkaḍăn s-isĕm-net i-tiwsaten iket-dăɣ-năsnăt, isănt a-wen dăɣ-Yărussălam. 48Kăwăneḍ a jeɣ tijuhawen n-a-wen iket-net, 49năkk daɣ, ad-hawăn-dd-sĕssiwĕyăɣ a-wa s-hawăn-ija Abba-nin ărkăwăl-net, a-wen-dăɣ a făl wăr felăm aɣrĕm-wa-dăɣ, a tĕkkăs tărna ta dd-fălăt išĕnnawăn wăr kăwăn-tĕlsa." 50Ilwăy-tăn ḍarăt-a-wen har edes i-tadăbayt ta n-Bitanya, iḍkăl ifassăn-net, ija dăɣ-săn ălbăraka. 51Itajj dăɣ-săn ălbăraka hărwa a-s dăr-săn ibḍa, immĕḍkăl s-išĕnnawăn. 52Ărkăɣăn-as ĕntăneḍ dihen-dăɣ tĕzzar, ĕqqălăn Yărussălam ĕknan dăɣ-tedăwit. 53Hak ašăl ḍarăt-a-wen, timăqqusăn dăɣ-ehăn n-ămudd wa măqqărăn ihăn Yărussălam, tiimĕlĕn Măssinăɣ. Amin!

will be added

X\