1 Inkăr ălžămaɣăt iket-net, ittĕlwăy Ɣisa s-Bilatĕs wa n-gĕfăr. 2 Osăn-in dihen ɣas, ad-t-saḍlamăn, jannen i-gĕfăr: "A-s nărmăs ăhalĕs-i-dăɣ, išaška tamĕtte-nănăɣ, ijanna ĕnta a-s Ălmasex wa n-ămănokal, ijanna daɣ i-ăddinăt wăr ẓelăm tiwse i-Qăyṣăr-i n-ămănokal wa măqqărăn." 3 Issĕstăn Bilatĕs Ɣisa, inn'-as: "Ak, kăyy a-s ămănokal n-kăl-Ălyăhud meɣ?" Inn'-as Ɣisa: "Kăyy iman-năk, tĕnned-tăn." 4 Innă Bilatĕs i-imănokalăn n-kăl-tikutawen d-tamĕtte: "Ăhalĕs-i-dăɣ, wăr hĕnnĕyăɣ fălla-s uḍlem t-ăsinăhăjjăn d-tamăttant." 5 Ǝẓẓăjăn ăddinăt imăslan-năsăn s-afălla, ĕnnăn-as: "Issĕntă-dd ašĕšk n-tamĕtte s-a-wa tăt-isăɣra ɣur-Galila ta dd-ifăl har dd-imdă Ălyăhudĕyăt, iwwăḍ-dd Yărussălam ămăra." 6 Islă Bilatĕs i-a-wen ɣas, issĕstăn d-a-s Ɣisa i n-Galila meɣ? 7 Ilmăd a-s Galila a t-tĕlăt ɣas, ăssawăy-t i-Harudĕs wa n-gĕfăr n-Galila-i fălla-s ixkamăn ed, a-s ităjj a-wen-dăɣ, iha Yărussălam. 8 Inhăy Harudĕs Ɣisa ɣas, iddĕwăt hullan făl-a-s ăru irh' ahănay-net dăɣ-tĕssĕba n-a-wa fălla-s isăll, ijar daɣ ăṭṭăma n-ad-ăj Ɣisa, iji n-Măssinăɣ iyyăn data-s. 9 Ija Harudĕs isĕstanăn ăjjootnen i-Ɣisa măšan, wăr t-illa a has-inna Ɣisa. 10 A-s ităjj a-wen, imănokalăn n-kăl-tikutawen d-ălɣulam n-Ăṭṭăwrăt, saḍlamăn Ɣisa s-ăṣṣahăt. 11 Iggăd-dd daɣ Harudĕs d-ĕssărdusa-net, ad-t-samăḍrayăn, tajjăn-t tekăškăšt; ĕssĕlsăn-t anăkăbba iknan tihusay, ăssoɣălăn-t ḍarăt-a-wen i-Bilatĕs wa n-gĕfăr. 12 Ašăl-ĕnnin-dăɣ, ad-ănmăẓăl Harudĕs d-Bilatĕs, ămedăwăn ed, dat-a-wa, ănimăkšărăn. 13 Ăsdăw-dd Bilatĕs imănokalăn n-kăl-tikutawen d-inušămăn d-tamĕtte, inn'-asăn: 14 "Ăhalĕs-i-dăɣ ya, tăwwăyăm-ahi-t-dd, tĕnnăm-ahi: 'Išaška ăddinăt', ĕssĕstănăɣ-t data-wăn măšan, wăr fălla-s ĕjrewăɣ făw a t-ăsinăhăjjăn d-tamăttant dăɣ-hărătăn-wi-dăɣ t-sawarăm. 15 Ăssawăyăɣ-t i-Harudĕs ĕnta-dăɣ măšan, wăr t-ill' uḍlem fălla-s ijraw ed, ăssoɣăl-anăɣ-t-dd. Wăr fălla-s hĕnnĕyăɣ făw a t-ăsinăhăjjăn d-tamăttant. 16 Ăddăbara ămăra, ad-dăɣ-s sĕwwĕjjăɣ tiwit, ăyyăɣ-t-in." (( 17 Ăzzăman-en, hak ămudd n-Faṣka, ăsiwăyy'-asăn-in Bilatĕs u-takărmut iyyăn. 18 Ohărăn iket-năsăn iyyăn n-emm, ăsɣăren dăɣ-išĕnnawăn, jannen: "Ămmătet ăhalĕs-wa-dăɣ, sĕwwĕyĕd-anăɣ-dd Bărɣăbbas.")) 19 Bărɣăbbas-i-hi, iha takărmut făl-a-s kăla dd-issĕnkăr tamĕtte dăɣ-aɣrĕm har ij' iman n-ăwadĕm dăɣ-a-wen-dăɣ. 20 Ittăr Bilatĕs ad-hasăn-ămmăjrăd daɣ ed irha ĕnta ad-hin-isĕwwĕyy Ɣisa 21 măšan, ăsɣăren iket-dăɣ-năsăn dăɣ-išĕnnawăn, ĕnnăn-as: "Itwĕṣlĕbet făll-tajĕttewt, itwĕṣlĕbet făll-tajĕttewt!" 22 Olăs-tăn asĕstan wa s-kăraḍ, inn'-asăn: "Mafăl, ma iɣšăd t-ăsiinăhăjjăn d-tamăttant? Wăr fălla-s ĕjrewăɣ a t-ăsinăhăjjăn d-tamăttant; ăddăbara ămăra, ad-dăɣ-s sĕwwĕjjăɣ tiwit, sĕwwĕyyăɣ-t-in." 23 Ăxwălăn-t s-iɣăran-năsăn, tattărăn dăɣ-s ad-itwăṣlĕb făll-tajĕttewt. Oyy'-asăn iman-net, ăsjăd-asăn Bilatĕs, 24 ăllil erhet-năsăn, iɣtăs-as tamăttant, 25 ăswăyy'-asăn-in ăhalĕs wa dăɣ-s ĕttărăn ihăn takărmut dăɣ-tĕssĕba n-asĕnkar wa dd-ija i-tamĕtte d-iman-wi ija, ija Ɣisa dăɣ-ifassăn-năsăn i-ad-has-ĕjĕn a-wa s-ărhăn. 26 Ălwăqq wa d-ăwwăyăn Ɣisa i-ad-itwăṣlĕb, ăšhăššălăn ăhalĕs s-isĕm-net Simyon n-tadăbayt ta n-Qĕrwan dd-ifalăn išĕkraš alĕnji n-tajĕttewt ta făll-mad-itwăs/lĕb Ɣisa; iḍkăl-tăt, ilkăm-asăn. 27 Tĕlkam-asăn daɣ tamĕtte tăjjeet ĕhanăt tiḍeḍen ăsiikălălnen, tĕggatnăt iman-năsnăt s-ăkall. 28 Innăḍ-dd săr-snăt Ɣisa, inn'-asnăt: "Šăt-Yărussălam, wăr tĕlhemăt făll-i, ĕlhĕmăt făll-iman-năkmăt d-aratăn-năkmăt 29 ed, malăn-dd išilan dăɣ-mad-itwĕnn: 'Tĕnḍĕḍ i-timĕjjejruten d-ti s-kăla wăr-ĕkrešnăt ara, wăr kăla ăssoḍăḍnăt', 30 ašăl-en, ad-ĕnnĕn ăddinăt i-iḍaɣăn: 'Aḍĕwăt fălla-năɣ', ĕnnĕn i-tiḍaɣen: 'Ălsĕmăt-anăɣ' 31 făl-a-s, efew kunta ošal dăɣ-ahĕšk ibdajăn s-ĕmmĕk-wa-dăɣ, ma inna wa ăqqurăn?" 32 Ăttilwăyăn daɣ dăɣ-a-wen-dăɣ ĕssin inaɣtafăn ĕkkanen tamăttant ĕntăneḍ-dăɣ. 33 Ălwăqq wa d-hin-ĕwwăḍăn edăgg wa s-itawănna: "Edăgg wa n-akărkor", ĕṣlăbăn Ɣisa, ĕṣlăbăn daɣ inaɣtafăn edes-has, iyyăn daw-aɣil-net, wa iyyăḍăn daw-tăšalje-net. 34 Ălwăqq wa d-ĕṣlăbăn Ɣisa, innă: "Abba, ănš-asăn făl-a-s, wăr-ĕssenăn a hăn"; jăn ḍarăt-a-wen tisăɣeren i-ad-uẓanăn isĕlsa-net jer-iman-năsăn. 35 A-s ităjj a-wen, tĕbdad tamĕtte, tăjjĕyha i-a-wa ijăn iket-net; ḍaẓẓăn imănnăhăḍăn n-kăl-Ălyăhud dăɣ-Ɣisa, jannen: "Wădden iɣlăs ăddinăt wi iyyăḍnen, iɣlĕset ya iman-net ămăra kunta ĕnta a-s Ălmasex wa ăsnăfrăn Măssinăɣ i-iman-net." 36 Ǝjăn-t ĕssărdusa taḍăẓẓa, ẓahaẓăn-t-dd bĕnegăr, hakkăn-as-t, 37 jannen-as: "Kunta kăyy a-s ămănokal n-kăl-Ălyăhud, ăɣlĕs iman-năk ya!" 38 Ǝttĕytăyăn ăllox jĕnnĕj-s, iktab fălla-s: "A|sc-WA ĂMĂNOKAL N-|dK|scĂL-|dĂ|scLYĂHUD|d". |r 39 Iggăd-dd iyyăn dăɣ-inaɣtafăn wi ătwăṣlăbnen dihen, ad-isamăḍray Ɣisa, ijann'-as: "Wădden kăyy a-s Ălmasex, ăɣlĕs iman-năk ya, tăɣlĕsăd-anăɣ!" 40 Ăklăwlăw ănaɣtaf-wa iyyăḍăn făll-amidi-net, inn'-as: "Kăyy-i dăr-s oharăn tisnant-ta-dăɣ, uksaḍ Măssinăɣ, 41 năkkăneḍ, a-wa hanăɣ-irmăsăn, imojjan-nănăɣ a săr-năɣ-t-dd-orăwăn, nănihăjja dăr-s, iwar-anăɣ uḍlem măšan ĕnta, wăr t-illa a lăbasăn iɣšad." 42 Inn' ănaɣtaf wa s-iket immĕjrăd i-Ɣisa: "Ǝktĕw-ahi-dd afăl dd-tăqqălăd tăminakălăd." 43 Inn'-as Ɣisa: "Ăsidătteɣ-ak a-s ašăl-i-dăɣ, ad-dăr-i tahĕrĕd ălžănnăt." 44 A-s ităjj a-wen-dăɣ, išwar tĕja tarăhut, ĕlsănăt tihay ărori n-ăkall iket-dăɣ-net hundăɣ har tĕja tezzar. 45 Tăttunkăl tăfukt, iqqărrawăt ărido wa ibḍăn dăɣ-ehăn n-ămudd wa măqqărăn, edăgg wa šăddijăn d-wa iknăn tĕšĕdje. 46 Ăsɣărăt Ɣisa s-ăṣṣahăt ḍarăt-a-wen, innă: "Abba, ărmĕs unfas-in." Innă a-wen-dăɣ ɣas, ĕjmăḍăn-t iman. 47 Inhăy kăbtăn wa ixkămăn făll-ĕssărdusa wi ĕṣlăbnen Ɣisa a-wa ijăn ɣas, omăl Măssinăɣ, innă: "Wăr t-ih' ăššăk a-s ăhalĕs-i-dăɣ, ămaɣdal." 48 Ǝnhăyăn ăddinăt wi dd-ăddewnen s-edăgg-wen-dăɣ a-wa ijăn, ĕqqălăn, ănxasăn iman-năsăn hullan. 49 A-s ităjj a-wen-dăɣ, ĕbdadăn imidiwăn n-Ɣisa dăɣ-ijĕj ĕkyadăn ĕntăneḍ d-tiḍeḍen-ti has-dd-ĕlkămnen wa-dăɣ n-Galila har ĕntănăteḍ-da-dăɣ. 50 Osă-dd ăhalĕs oɣadăn, olaɣăn n-taɣrĕmt ta n-Arimata s-isĕm-net Yusĕf, iha inušămăn n-Iṣrayil-wi ɣattăsnen ăššăreɣa, 51 wăr-oher d-imizărăn-wi iyyăḍnen ăddăbaratăn-wi jăn dăɣ-isălan n-Ɣisa ed ijar ăṭṭăma n-a-s ilkam ad-dd-tĕzzubbĕt Tĕmmĕnĕya n-Măssinăɣ, 52 ĕnta-en-dăɣ a ihălăn ad-ăkk Bilatĕs, ittăr dăɣ-s tafĕkka n-Ɣisa, 53 oyyas-tăt Bilatĕs ɣas, ikkăs-dd Yusĕf tafĕkka n-Ɣisa făll-tajĕttewt, ij'-et dăɣ-tefit tĕzzar, issĕns'-et dăɣ-aẓĕkka iɣašăn dăɣ-esăwăl s-kăla wăr dăɣ-s insa ere ăba. 54 Itajj a-wen-dăɣ ašăl wa d-simĕjnun ăddinăt i-ămudd wa n-ĕssĕbĕt-i n-tăsonfat. 55 Ǝlkămnăt tiḍeḍen-ti dd-ăddewnen d-Ɣisa wa-dăɣ n-Galila har diha-dăɣ i-Yusĕf, ĕnhăynăt edăgg n-aẓĕkka-en hakd-dăɣ ĕmmĕk wa s-tĕnsa tafĕkka n-Ɣisa dăɣ-aẓĕkka-en. 56 Ǝqqălnăt ihănan ɣas, ad-sadawnăt ĕlɣĕnfărăn d-aḍutăn. Ijă ašăl wa n-ĕssĕbĕt-i n-tăsonfat ɣas, ăssunfănăt ed, a-wen-dăɣ, a innă alămăr wa n-ănnăbi Mosa.
