Luqa 22

1Ohăẓ-dd ămudd wa n-Faṣka-i dăɣ-tattăn ăddinăt tijĕlwen ti wăr tăskăf tăẓẓa ɣas, 2ĕggădăn-dd imănokalăn n-kăl-tikutawen d-ălɣulam n-Ăṭṭăwrăt, ad-tattărăn ĕmmĕk s-ĕjăn iman n-Ɣisa măšan, tĕgdăl-asăn-t tuksĕḍa ta jăn i-tamĕtte. 3Dăɣ-a-wen-dăɣ, ad-ijjăš Iblis Yăhudĕs Isxaryut, iyyăn dăɣ-inĕṭṭulab n-Ɣisa wi n-măraw d-ĕssin, 4iglă, immĕjrăd d-imănokalăn n-kăl-tikutawen d-imănokalăn n-ălgomităn, ănmăknăn dăr-s i-ad-hasăn-isăɣdăr Ɣisa. 5Ăsdăwăt-tăn a-wa hasăn-inna, ĕjjăšăn-as ărkăwăl n-ad-t-ĕkfĕn aẓrĕf, 6irḍ'-asăn, ad-itammăɣ i-ăssaɣăt ănnuflăyăn d-wăr t-tĕlla tamĕtte edes i-Ɣisa i-ad-hasăn-t-isĕttărmĕs. 7Osă-dd ašăl wa dăɣ-tattăn ăddinăt tijĕlwen-ti wăr ha tăẓẓa d-ɣarrăsnăt taɣsiwen ti n-Faṣka, 8ăšmašăl Ɣisa Bĕṭrus d-Exya, inn'-asăn: "Ăglăt, sĕmmĕjnum-anăɣ imĕnsiwăn wi n-ămudd wa n-Faṣka." 9Ǝnnăn-as: "Ǝndek diha d-tărhed ad-tăn-nĕsĕmmujnĕt?" 10Inn'-asăn: "Diha-dăɣ d-e-tĕjjĕšăm aɣrĕm ad-dăr-wăn-e-immuqqĕs ăhalĕs dd-iktarăn, ĕlkĕmăt-as s-ehăn wa mad-ijjĕš, 11tĕnnĕm i-măssi-s n-ehăn-en: 'Inn'-ak ălɣalim, sĕkĕn-anăɣ edăgg dăɣ-ehăn-năk wa-dăɣ mad-sĕssikĕyăɣ ămudd wa n-Faṣka năkk d-inĕṭṭulab-in.' 12Ad-kăwăn-isĕkĕn ehăn n-soro dăɣ-ămmujnen isĕftaɣ, dihen-dăɣ ad-mad-nĕsĕssikĕy ămudd. 13Ǝglăn, ĕnhăyăn hărătăn s-ĕmmĕk-wa-dăɣ s-hasăn-tăn-inna Ɣisa, ad-simĕjnun imĕnsiwăn wi n-Faṣka." 14Ămmujnăt-dd hărăt iket-net, ĕskărăn-dd imĕnsiwăn ɣas, ănɣăyma Ɣisa d-inĕmmušal dăɣ-edăgg wa n-imĕnsiwăn, 15inn'-asăn: "Ăsdărhănăɣ hullan ad-dăr-wăn ahărăɣ Faṣka-ta-dăɣ hărwa wăr-ăqquzzăbeɣ 16făl-a-s, ădduuttăt a-s ăbas ilkam, ad-dăr-wăn tăt-oharăɣ hundăɣ har ašăl wa d-mad-ăttălmăd ălmăɣna-net dăɣ-Tĕmmĕnĕya n-Măssinăɣ." 17Iḍkăl-dd Ɣisa kara han aman n-lăɣnăb ăxxiimmărnen, ăjoḍăy i-Măssinăɣ tĕzzar, ikf'-en i-inĕṭṭulab-net, inn'-asăn: "Năɣĕbbĕtăt a-wa jer-iman-năwăn 18făl-a-s, ăssiilmădăɣ-kăwăn a-s wăr-ilkem ɣur-ašăl-i-dăɣ ad-ĕsweɣ a dd-ijmaḍăn lăɣnăb, hundăɣ har ašăl-wa dd-mad-tass Tĕmmĕnĕya n-Măssinăɣ." 19Iḍkăl Ɣisa ḍarăt-a-wen tajĕlla, ămmoy i-Măssinăɣ, irẓ'-et tĕzzar, ăẓun-asăn-tăt, inn'-asăn: "A-wa taɣĕssa-nin ta mad-ăkfăɣ dăɣ-idăggan-năwăn, tuẓanăt tajĕlla jer-iman-năwăn kăwăneḍ-dăɣ i-ad-hi-dd-kittĕwăm." 20Ǝssĕmdăn tetăte ɣas, iḍkăl kara han aman n-lăɣnăb ăxxiimmărnen, inn'-asăn: "A-wa ihăn kara-i-dăɣ a-s ărkăwăl n-tassaɣt wa ăynayăn ijăn s-ašni-nin wa madăn-inɣĕl dăɣ-ăddimmăt-năwăn 21măšan, ĕnhĕywăt-ak ămaɣdar-in, ĕnta-da-dăɣ dăr-i oharăn. 22Ăsidătteɣ-awăn a-s Ăgg-ăgg-adĕm, ătiwatăs ad-t-iba măšan, amăskoy ăwadĕm wa t-madăn-isĕssăɣdăr!" 23Ad-tinmĕsĕstinăn ya inĕṭṭulab jer-iman-năsăn i-ad-ĕlmĕdăn ere wa ihălăn ad-ăj tăkunt-ten-dăɣ. 24Tĕnkăr dăɣ-săn tamădašt tăṣṣoohet ălwăqq-wen-dăɣ i-ad-ĕlmĕdăn ere wa dăɣ-săn ojărăn. 25Inn'-asăn Ɣisa: "Imănokalăn ăsiikălen ĕddĕwĕlăn-wi făll-ăxkamăn măšan, hakd a-wen-dăɣ, ărhan ad-hasăn-itawănna dăgg-ălxer 26măšan, kăwăweḍ, wăr jem a-wen: Wa ojărăn dăɣ-wăn, umaset šund wa ĕnḍărrăn, wa n-ămizăr, umaset ănaxdim n-wi iyyăḍnen. 27Ăssistănăɣ-kăwăn: ĕndek ere wa ăniihăjjăn d-semɣar jer-ere wa ăqqiimăn itatt d-ere wa has-ixdamăn? Wădden wa ăqqiimăn itatt a ăniihăjjăn d-semɣar. Ăywa! Năkk a-s kăwăn-dd-oseɣ, ĕjeɣ iman-in jere-wăn dăɣ-edăgg n-ănaxdim. 28Kăwăneḍ-i-dăɣ ɣas, ad-dd-ăqqimănen tĕlkamăm-ahi ḍarăt aɣăna wa ĕnhăyăɣ, 29a-wen-dăɣ a făl, tajjăɣ Tĕmmĕnĕya ta n-Abba-nin jer-ifassăn-năwăn s-ĕmmĕk wa s-tăt-ija jer-wi-nin, 30i-ad-dăr-wăn ahărăɣ išĕkša d-isĕswa dăɣ-Tĕmmĕnĕya-nin, tăqqaymĕm făll-tisăqqima n-tĕmmĕnukĕla i-ad-tĕšrăɣăm tiwsaten ti n-mărawăt d-sănatăt n-Iṣrayil." 31Innă Ălɣalim Ɣisa ḍarăt-a-wen: "Simyon, Simyon, ittăr iblis turhajăt n-ad-kăwăn-iskĕnsĕkĕt šund ălkăma 32măšan, dălăɣ-ak Măssinăɣ i-ad-wăr-ăba immun-năk săr-i; afăl hi-dd-tăqqălăd, sĕbdĕd ayĕtma-k dăɣ-ăddin." 33Iggăd-dd Bĕṭrus, innă i-Ɣisa: "Ălɣalim, năkk, ăsidăwăɣ i-ad-dăr-k idawăɣ s-takărmut hakd-dăɣ s-tamăttant." 34Inn'-as Ɣisa: "Bĕṭrus, ăssiilmădăɣ-kăy a-s, a-s mad-iwĕt ekăz ăɣora ašăl-i-dăɣ, tăkkuddălăd-ahi har kăraḍ ihăndăggan." 35Inn'-asăn Ɣisa iket-năsăn ḍarăt-a-wen: "Ălwăqq wa d-kăwăn-ăšmašălăɣ s-tizarăt wăr tăwweyăm aẓrĕf wăla šăkkoš, wăla tifădelen, ajăn ăba-hin hărăt fălla-wăn." Ǝnnăn-as: "Wăla a ĕnḍărrăn." 36Ɣas, inn'-asăn: "Ămăra, ere ilăn aẓrĕf, iḍkĕlet-t, ere ilăn šăkkoš, išlĕjet-t, ere dăɣ-wăn wărăn ila tăkoba, ižănšet-in anăkăbba-net i-ad-tăt-ikrĕš 37ed, ălleɣeɣ-awăn a-s a-wa ătwănnăn făll-i dăɣ-ĕlkĕttab n-Măssinăɣ a-s inna: 'Ăḍin dăɣ-inaḍlimăn', ad-ăj." 38Ǝnnăn-as ĕntăneḍ: "Ălɣalim, sănatăt tikobawen da"; inn'-asăn: "Tăkat, igdăh-awăn măjrăd!" 39Ifăl dihen ɣas, ăddew dăr-săn s-taḍaɣt ta n-ĕzzăytun ed, ăru-dăɣ a-wen-dăɣ a-s izzay ad-t-ăj. 40Ǝwwăḍăn-in taḍaɣt-en ɣas, inn'-asăn: "Ădĕlăt Măssinăɣ i-ad-kăwăn-agĕẓ dăɣ-tănḍărbaten n-Iblis." 41Iššĕnkăš-in Ɣisa fălla-săn s-ĕḍḍĕkuḍ n-tejere n-tăhunt, irkăɣ, ad-itĕddal Măssinăɣ, 42ijanna: "Abba, kunta tărhed a-wen-dăɣ, sĕssijĕj-ahi kara n-tisnant-ta-dăɣ măšan hakd a-wen-dăɣ, ăjet erhet wa-năk wădden wa-nin." 43Ijanna a-wen-dăɣ a-s has dd-ănfalăl ănjălos n-Măssinăɣ i-ad-t-isĕṣṣuhĕt. 44Idgăẓ Ɣisa, ijlăy hullan dăɣ-tamădilt n-Măssinăɣ har tămoos tide-net a olăhăn d-tikruten n-ašni dd-titrĕkkitnen făll-ăkall. 45Imdă d-tamădilt n-Măssinăɣ ɣas ibdăd, iqqăl-dd inĕṭṭulab-net, ogăẓ-tăn-dd tăssooḍăs-tăn tisnant. 46Inn'-asăn: "Ma s-tĕṭṭasăm? Ǝnkărăt-dd, ădĕlăt Măssinăɣ i-ad-kăwăn-agĕẓ dăɣ-tănḍărbaten n-Iblis." 47Hărwa-dăɣ ămmiijrăd i-inĕṭṭulab-net a-s dd-osa ejhăn wa t-ittărăn, ăzzar-as iyyăn dăɣ-inĕṭṭulab-net wi n-măraw d-ĕssin wa s-isĕm-net Yăhudĕs. Ohăẓ-dd Yăhudĕs Ɣisa i-ad-t-asĕs dăɣ-idmarăn-net 48măšan, inn'-as Ɣisa: "Ɣas kăyy Yăhudĕs, ĕmmĕk wa-dăɣ a-s saɣdarăd Ăgg-ăgg-adĕm?" 49Ǝnhăyăn inĕṭṭulab wi iyyăḍnen a-wa ikkăn iji ɣas, ĕnnăn: "Ak năwtet-t s-tikobawen-nănăɣ meɣ?" 50Iwăt iyyăn dăɣ-săn akli n-ămănokal n-kăl-tikutawen s-tăkoba-net, ištăf-dd tamĕẓẓujt-net ta n-aɣil. 51Iɣtăl-tăn Ɣisa, inn'-asăn: "Wăr jem a-di." Iḍăs tamĕẓẓujt n-ăhalĕs, ăzozăy-t. 52Innă Ɣisa i-imănokalăn n-kăl-tikutawen d-imănokalăn n-ălgomităn wi ăɣlăfnen ehăn n-ămudd wa măqqărăn d-inušămăn n-Iṣrayil d-wi t-ăššunjătnen: "Ma s-săr-i dd-tăwwayăm tikobawen d-iboriyăn šund ănaɣtaf? 53Wădden hak ašăl ărtayăɣ dăr-wăn dăɣ-ehăn n-ămudd wa măqqărăn, mafăl wăr hi-dăɣ-s tărmesăm; ĕlmĕdăt a-s ašăl-wa-dăɣ, ašăl-năwăn kăwăneḍ d-Iblis d-tihay-net." 54Ărmăsăn Ɣisa, ĕlwăyăn-t s-ehăn n-ămănokal wa n-kăl-tikutawen, ij'-asăn Bĕṭrus alkum šĕjren. 55A-s hin-ĕwwăḍăn dihen, irɣă efew dăɣ-ammas n-ăɣalla, ĕzzahăn săr-s ăddinăt; ijjăš Bĕṭrus ĕnta-dăɣ, iglă ăqqima edes i-ăddinăt-en. 56Tĕnhăy-t tănaxdimt tiyyăt ăqqiima s-efew, tĕkn'-e azĕjjĕzz, tĕnnă: "Hannăyăm-t wa-daɣ, amidi n-Ɣisa." 57Ăkkuddăl Bĕṭrus a-wen, inn'-as: "Tamăḍt, wăr t-ĕzzeyăɣ." 58A ĕnḍărrăn ḍarăt-a-wen-dăɣ, inhăy-t ăwadĕm iyyăn daɣ, inn'-as: "Iyyăn dăɣ-săn a tămoosăd." Inn'-as Bĕṭrus: "Ăhalĕs, ălɣafyăt-năk." 59Okăy a iwwăḍăn ăssaɣăt ḍarăt-a-wen, ikyăd dăɣ-s ăhalĕs iyyăn, inna: "Ijmaḍ-t ăššăk a-s ăhalĕs-i-dăɣ, amidi-năsăn făl-a-s ĕnta-dăɣ, i n-Galila." 60Inn'-as Bĕṭrus: "Ăhalĕs, wăr-ĕssenăɣ a dăɣ-hi-tăssewălăd." Diha-dăɣ d-innă Bĕṭrus a-wen-dăɣ, hărwa-dăɣ ămmijrăd a-s iwăt ekăz ăɣora. 61Innăḍ-dd săr-s Ɣisa, ămmoqqăs asawaḍ-năsăn, iknă dăɣ-s Ɣisa akăyad ɣas, iktă-dd Bĕṭrus măjrăd wa s-kăla has-t-ija a-s has-innă: "A-s mad-iwĕt ekăz ăɣora ašăl-i-dăɣ, tăkkuuddălăd tamĕzzuyt-in har kăraḍ ihăndăggan." 62Izjăr Bĕṭrus, ad-ihall a-wa-dăɣ has-ja tisnant. 63Ǝzzănăn meddĕn-wi jănen ĕnniyăt i-Ɣisa săr-s, ad-dăɣ-s ḍaẓẓăn, tĕggatăn-t; 64ăqqănăn idĕm-net s-ekăršăy, ad-has-jannen: "Lulĕy ya, tăllăɣed-anăɣ ere wa kăy-iwătăn." 65Ad-sikuforăn, gaggărăn-t. 66Ăffăw ɣas, ăddew-dd ălžămaɣăt wa n-inušămăn n-Iṣrayil d-imănokalăn n-kăl-tikutawen d-ălɣulam n-Ăṭṭăwrăt, ĕlwăyăn Ɣisa s-kăl-ăššăreɣa. 67Ǝwwăḍăn-in ɣas, ĕssĕstănăn-t, ĕnnăn-as: "Kunta kăyy a-s Ălmasex, ĕkkĕs-anăɣ dăɣ-taɣdărt." Inn'-asăn: "Kud-hawăn-tăn-ĕnneɣ-dăɣ, wăr hi-e-tĕflĕsăm; 68kud-kăwăn-ĕssĕstănăɣ daɣ, wăr hi-e-tăwwăžžăbăm 69măšan, ĕlmĕdăt a-s ɣur-ašăl-i-dăɣ, ad-tĕnhĕyăm Ăgg-ăgg-adĕm, ăqqiima daw-aɣil n-Măssinăɣ-i ilăn tărna." 70Ǝnnăn-as iket-dăɣ-năsăn: "Adiš kăyy a-s Rure-s n-Măssinăɣ?" Inn'-asăn: "Kăwăneḍ iman-năwăn, tĕnnăm a-s năkk a t-ămoosăn." 71Ǝnnăn ălwăqq-wen: "Ma nĕtajj i-tajuhe săl ta-dăɣ? Wădden nĕslă năkkăneḍ iman-nănăɣ i-a-wa dd-izjărăn emm-net."

will be added

X\